ᔫᐱᐅᑉ ᐊᒡᓚᖏᑦ 36 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑕᕝᕙ ᐃᓕᕼᐅ ᑲᔪᓯᓪᓗᓂ, ᐅᖃᓯᒋᕗᖅ:

² “ᕿᓄᐃᓵᕐᓗᑎᑦ ᓈᓚᒃᑲᓐᓂᑬᓐᓇᓐᖓ, ᐅᖃᐅᑎᒃᑲᓐᓂᕐᓂᐊᕋᒃᑭᑦ, ᓱᓕ ᐅᖃᐅᓯᒃᓴᖃᕋᒪ ᒎᑎ ᐱᑦᔪᑎᒋᓪᓗᒍ.

³ ᖃᐅᔨᑎᑕᐅᓯᒪᓂᕋ ᐊᖏᔫᖕᒪᑦ ᐊᑯᓂᓂᑦ, ᓇᓗᓁᕐᓯᔪᒪᕗᖓ ᐱᓐᖑᕐᑎᑎᔨᒪ ᓇᓛᒎᕐᓂᖓᓂᒃ.

⁴ ᐃᓕᖕᓄᑦ ᐅᖃᐅᓯᕆᔭᒃᑲ ᓱᓕᕗᑦ ᓴᒡᓗᓂᕐᑕᖃᕋᑎᒃ; ᖃᐅᔨᓯᒪᓪᓚᕆᒃᑐᒥᒃ ᑕᕝᕙ ᑕᑯᓐᓈᕐᐳᑎᑦ ᐃᓚᒋᔭᕐᓂᒃ.

⁵ ᑕᑯᒋᑦ, ᒎᑎ ᐊᔪᒐᖃᖏᑦᑑᕗᖅ, ᓇᓪᓕᐊᓐᓂᒡᓘᓐᓃᑦ ᓇᕐᕈᒋᔭᖃᖏᑦᑐᖅ; ᐊᔪᒐᖃᖏᑦᑑᒐᒥ ᐱᔪᓐᓇᕐᓂᕐᔪᐊᒥᒍᑦ ᖃᐅᔨᒪᓐᖏᑕᖃᓐᖏᓚᖅ.

⁶ ᐱᐅᖏᑦᑐᓕᔪᑦ ᐃᓅᑯᑖᒃᑎᓐᖏᓔᑦ, ᐅᖁᒤᑦᑐᒃᑰᕐᑐᓪᓕ ᓈᒻᒪᒃᑐᒥᒃ ᐱᓇᓱᐊᕐᕕᒋᕔᑦ.

⁷ ᐃᓱᐊᕐᑐᓕᔪᑦ ᑕᑯᓐᓇᑦᓮᓐᓇᕐᐰᑦ, ᐊᖓᔪᖅᑳᕐᔪᐊᓄᑦ ᐊᐅᓚᑦᓯᖃᑕᐅᑎᓐᓂᐊᕐᐰᑦ ᓂᕐᑐᕐᓇᕐᑎᑕᐅᓗᑎᒡᓗ ᐃᓱᖃᖏᑦᑐᒧᑦ.

⁸ ᐊᑦᓱᖏᕐᑕᐅᓯᒪᒃᐸᑕᓕ ᐊᕐᓵᕐᑑᔭᓄᑦ, ᕿᓚᒃᑕᐅᓯᒪᒃᐸᑕᓗ ᐅᖁᒤᒃᓴᕐᑎᑕᐅᓂᐅᑉ ᕿᓚᕈᑎᖏᓐᓄᑦ,

⁹ ᑕᕝᕙ ᓇᓗᓁᕐᓯᕕᒋᕔᑦ ᐱᓂᐊᕐᓂᕆᓚᐅᕐᑕᖏᓐᓂᒃ ᐊᔪᕐᑐᓕᓂᖏᑕᓗ, ᓯᑎᔫᓂᕐᒥᒃ ᑐᓐᖓᕕᖃᕐᓂᖏᓐᓂᒃ.

¹⁰ ᑕᕝᕙ ᓯᐅᑎᖏᑦ ᓈᓚᒍᓐᓇᕐᓯᑎᓪᓗᒋᑦ ᐊᔪᕆᕐᑐᓕᕐᐰᑦ, ᐱᐅᖏᑦᑐᓕᓂᕐᒥᖕᓂᒃ ᕿᒤᓗᑎᒃ ᐅᑎᖁᓪᓗᒋᑦ.

¹¹ ᑖᑦᓱᒥᖓ ᓈᓚᓕᕐᓗᑎᒃ ᐱᔨᑦᓯᕈᒪᓕᕐᐸᑕᓗ, ᑕᕝᕙ ᐃᓅᓯᖏᑕ ᐅᓪᓗᖏᑦ ᓈᓗᒋᑦ ᐱᕙᓪᓕᐊᑦᓯᐊᕐᓂᐊᕐᐳᑦ, ᐊᕐᕌᒍᓂᒡᓗ ᐃᓅᓂᐊᕐᐳᑦ ᖃᓄᐃᖏᑦᓯᐊᕐᓗᑎᒃ.

¹² ᓈᓚᖏᑉᐸᑕᓕ, ᑕᕝᕙ ᓴᕕᒡᔪᐊᒧᑦ ᑐᖁᑕᐅᔪᒫᕐᐳᑦ, ᑐᖁᒐᔭᕐᐳᓪᓗ ᖃᐅᔨᒪᖏᓐᓂᕐᒧᑦ.

¹³ ᒎᑎᖃᖏᑦᑐᑦ ᓂᓐᖓᐅᒪᓂᕐᒥᒃ ᐃᓗᒥᐅᑕᖃᑦᓮᓐᓇᕐᐳᑦ; ᑖᑦᓱᒧᖓᓗ ᕿᓚᒃᑕᐅᒐᓗᐊᕋᒥᒃ ᐃᑲᔪᕐᑕᐅᔪᒪᓗᑎᒃ ᑐᒃᓯᐊᓚᐅᓐᖏᓚᑦ.

¹⁴ ᐃᓅᓱᒃᑑᓗᑎᒃ ᓱᓕ ᑐᖁᓂᐊᕐᐳᑦ, ᐃᓅᓯᖏᓪᓗ ᑲᓐᖑᓲᑦᔨᓇᕐᑐᒥ ᐃᓱᓕᓐᓂᖃᕐᓗᑎᒃ.

¹⁵ ᒎᑎᓕ ᐱᐅᓕᓯᕙᒃᐳᖅ ᐅᖁᒤᑦᑐᒃᑰᕐᑐᓂᒃ ᐅᖁᒤᒃᓴᕐᑎᑕᐅᓂᖏᑎᒍᑦ, ᐋᓐᓂᐊᓂᖏᓪᓗ ᐊᑐᕐᓗᒋᑦ ᓯᐅᑎᖏᑦ ᐊᖕᒪᕐᑎᑉᐰᑦ.

¹⁶ ᐃᕝᕕᑦᑕᐅᖅ ᐅᖁᒤᒃᓴᕈᑎᒋᔭᕐᓂᑦ ᐊᓂᑎᓐᓂᐊᕐᐹᑎᑦ, ᐱᕕᑐᔪᒧᑦ ᐃᓂᒃᓴᑦᓯᐊᒧᑦ ᓄᖅᑲᖓᑦᔪᑎᒃᓴᕐᑕᖃᖏᑦᑐᒧᑦ, ᓂᕆᕕᖁᑏᓪᓗ ᐊᑐᐃᓐᓇᕈᐃᕕᐅᓂᐊᕐᐳᖅ ᖁᐃᓂᔪᓂᒃ.

¹⁷ ᐃᕝᕕᓪᓕ ᓱᒋᐊᕐᑕᐅᓯᒪᕗᑎᑦ ᐱᐅᖏᑦᑐᓕᓂᑎᑦ ᐱᑦᔪᑎᒋᓪᓗᒋᑦ; ᓱᒋᐊᕐᑕᐅᒃᔪᑎᒋᔭᕆᐊᖃᕐᑕᕐᓄᑦ ᓈᒻᒪᓈᕐᑕᐅᓯᒪᕗᑎᑦ.

¹⁸ ᐃᒃᐱᒍᓱᑦᓯᐊᓕᕆᑦ ᐊᑭᑦᔪᑎᒃᓴᕐᓯᐅᕐᓂᕐᒧᑦ ᓯᓔᕐᕆᔭᐅᖁᓇᒃ; ᐊᔪᖏᓐᓂᕐᒧᑦ ᐊᑭᓖᓇᓱᒃᑯᕕᑦ ᑕᒻᒪᕐᑎᑕᐅᑦᔪᑎᖃᖁᓇᒃ.

¹⁹ ᐊᔪᕐᓴᖏᓐᓂᕐᓄᑦ ᓴᓐᖏᔪᐊᓘᓂᕐᓄᓪᓗ, ᐃᑲᔪᕐᑕᐅᔪᒪᒐᓗᐊᕈᕕᑦ ᐋᓐᓂᐊᕈᑎᒋᔭᕐᓂᑦ ᐊᔪᕐᐳᑎᑦ.

²⁰ ᕿᓚᓈᕐᓂᐊᕐᓇᒃ ᐅᓐᓄᐊᖑᓂᐊᕐᑐᒧᑦ, ᐃᓅᖃᑎᒌᑦ ᐃᓂᒋᔭᒥᖕᓂᑦ ᓄᖑᑕᐅᕕᒃᓴᖏᓐᓂᒃ.

²¹ ᐃᒃᐱᒍᓱᑦᓯᐊᕆᑦ, ᐱᐅᖏᑦᑐᓕᓂᕐᒧᑦ ᓵᓕᖁᓇᑎᑦ, ᑕᒪᓐᓇ ᐋᓐᓂᐊᓇᕐᑐᒃᑰᕐᓃᑦ ᐃᓕᖕᓄᑦ ᑎᑭᓯᒪᖕᒪᑦ ᓴᐳᑎᔭᐅᖁᓪᓗᑎᑦ ᐱᐅᖏᑦᑐᓕᓂᕐᒥᑦ.

²² ᑕᑯᒋᑦ, ᒎᑎᐅᑉ ᐱᔪᓐᓇᕐᓂᖓ ᐊᖏᔪᕐᔪᐊᖑᕗᖅ; ᑭᓈ ᑖᑦᓱᑐᓇᖅ ᐃᓕᓮᑦᓯᐊᕈᓐᓇᕐᑎᒋᕚ?

²³ ᐱᓂᐊᕐᓂᕆᔭᕆᐊᖃᕐᑕᖓᓂᒃ ᑭᐊ ᐅᖃᐅᑎᔪᓐᓇᕐᐸᐅᒃ? ᐅᕝᕙᓗ ᑭᐊ ᑕᒻᒪᕐᓯᒪᓂᕋᕈᓐᓇᕐᐸᐅᒃ?

²⁴ ᐃᖅᑲᐅᒪᒋᑦ ᑖᑦᓱᒪ ᐱᓇᓱᐊᕐᓂᖓ ᓂᕐᑐᕋᒃᓴᕆᒐᕕᐅᒃ, ᐱᓇᓱᐊᕐᓂᖓ ᐃᓄᖕᓄᑦ ᐃᓐᖏᕈᑕᐅᖃᑦᑕᕐᓯᒪᖕᒪᑦ.

²⁵ ᐱᓂᐊᕐᓂᖓ ᐃᓄᓕᒫᓄᑦ ᑕᑯᔭᐅᓯᒪᕗᖅ; ᐅᕙᒍᓪᓕ ᐅᖓᓯᒋᔮᓂᑦ ᑭᓯᐊᓂ ᑕᑯᑐᐃᓐᓇᕈᓐᓇᕐᐸᕗᑦ.

²⁶ ᑕᑯᒋᑦ, ᒎᑎᐅᑉ ᐊᖏᔪᕐᔪᐊᖑᕗᖅ, ᖃᐅᔨᔪᓐᓇᓐᖏᓚᕗᓪᓗ; ᑖᑦᓱᒪᓗ ᐊᕐᕌᒍᖏᑦ ᖃᐅᔨᔭᐅᔪᓐᓇᕋᑎᒃ.

²⁷ ᑖᑦᓱᒪ ᓄᓇᕐᔪᐊᑉ ᐃᒪᖓ ᖁᒻᒧᐊᒃᑎᖃᑦᑕᕐᐹ, ᑕᑉᐹᓐᖓᓪᓗ ᐃᒪᕐᒥᒃ ᓯᓚᓗᓕᕐᑎᖃᑦᑕᕐᐹ.

²⁸ ᓄᕗᔭᓂᑦ ᓯᓚᓗᒃ ᑯᕕᓕᕐᑎᖃᑦᑕᕐᐹ, ᐃᓄᓕᒫᑦᓯᐊᓄᓪᓗ ᓯᓚᓗᒃᑎᖃᑦᑕᕐᓗᓂᐅᒃ.

²⁹ ᓇᓪᓕᐊᓐᓄᑦ ᑐᑭᓯᔭᐅᔪᓐᓇᕐᐹ ᖃᓄᖅ ᓄᕗᔧᑦ ᐃᖏᕐᕋᕙᖕᒪᖔᑕ? ᑲᓪᓘᓪᓗ ᐃᕗᓗᖕᓂᖓ ᓯᓚᒃᑯᑦ ᖃᓄᖅ ᓂᓪᓕᐊᖃᑦᑕᕐᒪᖔᑦ? ᑕᑉᐸᐅᓇ ᐃᒡᓗᕕᒐᐅᔭᐅᑉ ᖁᓛᖓᓂᑦ?

³⁰ ᑕᑯᒋᑦ, ᖃᐅᒻᒪᓪᓚᑎᑦᓯᖃᑦᑕᕐᐳᖅ ᓇᐅᒃᑯᑐᐃᓐᓇᓕᒫᖅ ᓯᓚᒃᑯᑦ, ᐃᒪᕐᕕᐅᓪᓕ ᓱᓕ ᑐᓐᖓᕕᖏᑦ ᒪᑐᓯᒪᕔᑦ.

³¹ ᑕᒪᑐᒧᖓ ᑕᕝᕙ ᐃᓅᒐᓴᒡᔪᐊᑦ ᐃᖅᑲᕐᑐᕐᐰᑦ; ᓂᕿᒃᓴᖏᓐᓂᒡᓗ ᓈᒻᒪᒃᑐᓂᒃ ᑍᒪᓐᖓᑦ ᑐᓂᓯᕕᒋᓪᓗᒋᑦ.

³² ᑖᑦᓱᒪ ᐊᒡᒐᓂ ᐅᓕᒃᓯᒪᕔᑦ ᖃᐅᒻᒪᓪᓚᖕᒧᑦ, ᐱᖁᔨᓂᖓᒍᓪᓗ ᖃᐅᒻᒪᓪᓚᖃᑦᑕᕐᐳᖅ.

³³ ᑲᓪᓘᑉ ᐃᒃᑐᓚᐅᕐᓂᖓ ᓇᓗᓁᕐᓯᖃᑦᑕᕐᐳᖅ ᑖᑦᓱᒥᖓ, ᑖᓐᓇ ᓯᖕᓇᓂᕐᒧᑦ ᓂᓐᖓᐅᑦᔨᓯᒪᖕᒪᑦ ᐊᔪᕐᓂᕐᒥᒃ.”