ᔫᐱᐅᑉ ᐊᒡᓚᖏᑦ 28 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᐱᐅᑉ ᓯᓚᑐᓂᕐᒥᒃ ᓂᕐᑐᕐᓇᕐᑎᑦᓯᓂᖓ

¹ “ᓄᓇᒥ ᐃᑎᕐᓴᓕᐅᕆᓪᓗᑎᒃ ᓯᐅᓪᕕᕆᒥᒃ ᑲᑎᑦᓯᔪᖃᓲᖑᕗᖅ, ᒎᓗᐃᓪᓗ ᐊᐅᒃᑎᑦᓯᕕᖕᒥ ᓴᓗᒻᒪᕐᓴᕐᑕᐅᓲᖑᓪᓗᑎᒃ.

² ᓴᕕᕋᔭᒃᓮᑦ ᓄᓇᐅᑉ ᐃᓗᐊᓂᑦ ᐱᔭᐅᓲᖑᕗᑦ, ᑲᓐᓄᔧᓪᓗ ᐊᐅᒃᑎᑕᐅᓲᖑᕗᑦ ᓴᕕᕋᔭᒃᓴᓂᑦ.

³ ᐊᖑᑎᑦ ᑖᕐᑐᐊᓗᖕᒥ ᕿᓂᓲᖑᕗᑦ, ᓄᓇᐅᑉ ᐃᓗᐊᓄᑦ ᖃᒧᖔᓗᒃ ᐃᑎᕐᓴᓕᐅᕆᓪᓗᑎᒃ ᓴᕕᕋᔭᒃᓴᒥᒃ ᕿᓂᓲᖑᕗᑦ ᑖᕐᑐᐊᓗᖕᒦᓪᓗᑎᒃ.

⁴ ᓄᓇᒋᔭᐅᖏᑦᑐᒥ ᓇᕐᓴᒥ ᐅᔭᕋᒃᑕᕐᕕᖕᒥᒃ ᐃᑎᕐᕕᓕᐅᕐᐳᑦ; ᐃᓄᖕᓄᑦ ᐃᖏᕐᕋᕕᐅᓚᐅᕐᓯᒪᖏᑦᑐᒥ, ᑕᕝᕙᓂ ᓴᓇᕗᑦ ᐅᐸᒃᑕᐅᕙᖏᑦᑐᒥ, ᐊᒃᓱᓈᓄᑦ ᓂᕕᖓᐅᑎᖃᕐᓗᑎᒃ ᐱᓇᓱᐊᕐᐸᒃᐳᑦ ᐊᐅᓚᑲᑦᑖᖃᑦᑕᕐᓗᑎᒃ.

⁵ ᓄᓇᕐᔪᐊᕐᒥᑦ ᓂᕿᒃᓴᓂᒃ ᐱᕈᕐᑐᖃᕐᐸᒃᐳᖅ; ᐊᑖᒍᓪᓕ ᓄᓇ ᒧᒥᒃᑎᑕᐅᓯᒪᕗᖅ ᓯᖃᓪᓕᔭᐅᓯᒪᓪᓗᓂ.

⁶ ᐅᔭᕋᖏᑕ ᐃᓗᐊᓂᑦ ᓴᐰᕆ ᑕᑯᒥᓇᕐᑐᑦ ᓇᒡᕚᕐᑕᐅᕗᑦ, ᓯᐅᕋᖓᓗ ᒎᓗᑕᖃᕆᓪᓗᓂ.

⁷ ᑖᓐᓇ ᐅᔭᕋᒃᑕᕐᕕᐅᔪᖅ ᑎᖕᒥᐊᓄᑦ ᖃᐅᔨᒪᔭᐅᓐᖏᓚᖅ, ᑭᒡᒐᕕᐊᕐᔪᖕᓄᓪᓗ ᑕᑯᔭᐅᓚᐅᕐᓯᒪᓇᓂ.

⁸ ᐆᒪᔪᓄᑦ ᐊᔪᖏᑦᑐᕐᔪᐊᓄᑦ ᐱᓱᒡᕕᐅᓚᐅᕐᓯᒪᓐᖏᓚᖅ; ᓛᔭᓄᓪᓗ ᐃᕐᓯᓇᕐᑐᓄᑦ ᐊᖅᑯᓵᕐᑕᐅᓚᐅᕐᓯᒪᓇᓂ ᐊᖅᑯᑖ.

⁹ ᐊᖑᑎᑦ ᐃᑎᕐᓴᓕᐅᕆᕗᑦ ᐅᔭᕋᒃᑯᑦ ᓯᑎᓂᕐᐹᑎᒍᑦ, ᖃᖅᑬᓪᓗ ᑐᓐᖓᕕᖏᑎᒍᑦ ᐃᑎᕐᓴᓕᐅᕆᓪᓗᑎᒃ.

¹⁰ ᕾᕐᓱᑎᒍᑦ ᑰᒡᕕᓕᐅᕐᓗᒋᑦ, ᓇᒡᕚᕐᐳᑦ ᐅᔭᕋᑦᓯᐊᕙᓕᒫᓂᒃ ᐱᕕᐊᕐᓇᕐᑐᓂᒃ.

¹¹ ᑰᑦ ᓯᒥᒃᑐᕐᑕᐅᕗᑦ ᑰᒍᓐᓃᕐᑎᑕᐅᓪᓗᑎᒃ; ᑕᓕᐅᒪᔪᑦ ᓴᖅᑭᑎᑕᐅᕗᑦ ᖃᐅᒪᔪᒧᑦ.

¹² ᓇᑭᓪᓕ ᓯᓚᑐᓂᖅ ᓇᒡᕚᕐᑕᐅᔪᓐᓇᕐᐹ? ᓇᑭᓪᓗ ᑐᑭᓯᓂᖅ ᓇᓂᔭᐅᔪᓐᓇᕐᐹ?

¹³ ᓯᓚᑐᓂᐅᑉ ᐊᖅᑯᑎᖓ ᐃᓅᑉ ᖃᐅᔨᒪᓐᖏᓛ, ᐃᓅᔪᓂᓗ ᓇᓂᔭᐅᔪᓐᓇᕋᓂ.

¹⁴ ᐃᒪᕕᐅᑉ ᐃᑎᓂᖓ ᐅᖃᕐᐳᖅ, ‘ᐅᕙᓐᓃᓐᖏᓚᖅ,’ ᐃᒪᕐᕕᒡᓗ ᐅᖃᕆᕗᖅ, ‘ᐱᓯᒪᓐᖏᓚᕋ.’

¹⁵ ᓯᓚᑐᓂᖅ ᓂᐅᕕᕐᑕᐅᔪᓐᓇᓐᒋᓚᖅ ᒎᓗᒧᑦ, ᓯᐅᓪᕕᕆᒧᓪᓗ ᐅᖁᒤᓐᓂᕐᓂᐊᕈᑕᐅᓗᓂ ᐊᑭᓕᕐᑕᐅᔪᓐᓇᕋᓂ.

¹⁶ ᓇᓪᓕᕐᑕᐅᔪᓐᓇᓐᖏᓚᖅ ᒎᓗᒧᑦ ᐅᐱᕼᐃᒥᐅᑕᒧᑦ ᑕᑯᒥᓇᕐᑐᓄᓪᓗ, ᐊᑭᑐᔪᓄᑦ ᐅᓂᒃᓯᓄᑦ ᓴᐰᕆᓄᓪᓗ ᓇᓪᓕᕐᑕᐅᔪᓐᓇᖏᓐᓂᕗᖅ.

¹⁷ ᒎᓗᒧᑦ ᐊᓕᒍᕐᒧᓪᓗ ᐊᑭᑐᔪᒧᑦ ᓇᓪᓕᕐᑕᐅᔪᓐᓇᓐᖏᓚᖅ, ᑕᐅᕐᓯᕐᑕᐅᔪᓐᓇᕋᓂᓗ ᐱᐅᓴᐅᑎᓄᑦ ᒎᓗᑦᓯᐊᕙᐅᓂᕐᐹᓄᓪᓗ.

¹⁸ ᒪᑯᐊ ᑍᒤᓪᓗᐊᖃᖏᓐᓂᕗᑦ ᑕᑯᒥᓇᕐᑐᑦ ᑰᕋᓕᒥᒃ ᐊᑎᓖᑦ ᐊᓕᒍᐃᓪᓗ; ᓯᓚᑐᓂᐅᑉ ᐊᑭᑐᓂᖓ ᐱᒃᑯᒥᓇᕐᑐᓂᑦ ᐊᑭᑐᓂᕐᓴᐅᖕᒪᑦ.

¹⁹ ᐅᔭᕋᑦᓯᐊᕔᑦ ᐃᑎᐅᐱᐊᒥᐅᑕᑦ ᑑᐸᔅᓰᑦ ᓇᓪᓕᕐᓲᑎᖏᓐᓂᕗᑦ, ᒎᓗᑦᓯᐊᕙᐅᓂᕐᐹᓄᓪᓗ ᓇᓪᓕᕐᑕᐅᔪᓐᓇᕋᓂ.

²⁰ ᓇᑭᓪᓕ ᑍᒪ ᓯᓚᑐᓂᖅ ᐱᓯᒪᓕᕐᐹ? ᑐᑭᓯᓂᕐᓗ ᓇᓂ ᐃᓂᖃᓕᕐᐹ?

²¹ ᐃᓅᔪᓕᒫᓄᑦ ᑕᑯᔭᐅᔪᓐᓇᓐᖏᓚᖅ, ᑎᖕᒥᐊᓄᓪᓗ ᖃᖓᑕᕙᒃᑐᓄᑦ ᑕᑯᔭᐅᔪᓐᓇᕐᒥᓇᓂ.

²² ᓄᖑᕈᑦᔭᐅᓂᖅ ᑐᖁᓗ ᐅᖃᕐᐴᒃ, ‘ᐅᖃᐅᓯᐅᑎᓪᓗᒍ ᑐᓴᑐᐃᓐᓇᓚᐅᕐᐸᕗᑦ.’

²³ ᒎᑎᐅᑉ ᑭᓯᒥ ᓯᓚᑐᓂᐅᑉ ᐊᖅᑯᑎᖓ ᖃᐅᔨᒪᕚ, ᐃᓂᒋᔭᖓᓗ ᓇᑭᑦ ᓇᒡᕚᕐᑕᐅᔪᓐᓇᕐᓂᖓ ᖃᐅᔨᒪᓪᓗᒍ.

²⁴ ᑖᓐᓇ ᑕᑯᓐᓇᕐᒪᑦ ᓄᓇᐅᑉ ᐃᓱᐊᓄᑦ, ᕿᓚᐅᓪᓗ ᐊᑖᓃᑦᑐᓕᒫᑦ ᑕᑯᓐᓇᕐᒪᒋᑦ.

²⁵ ᒎᑎᐅᑉ ᐊᓄᕆ ᐱᔪᓐᓇᕐᓂᕐᑖᕐᑎᓯᒪᖕᒪᒍ, ᐃᒪᐅᓪᓗ ᐊᖏᓂᒃᓴᖓ ᐋᖅᑭᒃᓯᒪᒋᕚ.

²⁶ ᓯᓚᓗᒃ ᐋᖅᑭᒃᓯᒪᕚ ᐱᒋᐊᕐᕕᒃᓴᖓᓗ, ᑲᓪᓘᓪᓗ ᑲᓪᓕᕐᕕᒃᓴᖓ ᐋᖅᑭᒃᓯᒪᒋᕚ;

²⁷ ᑕᕝᕙ ᓯᓚᑐᓂᖅ ᑕᑯᒐᒥᐅᒃ ᓇᓗᓁᓚᐅᕐᐹ; ᐋᖅᑭᒃᓱᓚᐅᕐᐹ, ᖃᐅᔨᓴᕋᒥᐅᒃ ᓈᒻᒪᒋᓚᐅᕐᐹ.

²⁸ ᐃᓄᖕᒧᓪᓗ ᐅᖃᕐᓗᓂ, ‘ᑕᑯᒋᑦ, ᐊᑕᓂᕐᒥᒃ ᓯᕘᕋᓂᖅ, ᑕᒪᓐᓇ ᓯᓚᑐᓂᐅᕗᖅ; ᐊᔪᕐᓂᕐᒥᒡᓗ ᕿᒤᓂᖅ ᑕᕝᕙ ᑐᑭᓯᓂᐅᕗᖅ.’”