ᔫᐱᐅᑉ ᐊᒡᓚᖏᑦ 24 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᓱᖕᒪᑦ ᐊᔪᒐᖃᖏᑦᑐᖅ ᐃᖅᑲᕐᑐᐃᕕᒃᓴᒥᒃ ᐋᖅᑭᒃᓯᓯᒪᓐᖏᓚᖅ, ᑖᑦᓱᒥᖓᓗ ᖃᐅᔨᒪᔪᑦ ᓱᖕᒪᑦ ᐅᓪᓗᖏᓐᓂᒃ ᑕᑯᓚᐅᕐᓯᒪᓐᖏᓚᑦ?

² ᐃᓄᐃᑦ ᓄᓇᖁᑎᖏᑕ ᓇᓗᓁᒃᑯᑕᖏᓐᓂᒃ ᐃᓚᖏᑦ ᓅᑦᓯᓯᒪᕗᑦ; ᓰᐱᖁᑕᐅᔪᓂᒡᓗ ᑎᒡᓕᒃᓗᑎᒃ ᓰᐱᖁᑎᒥᖕᓄᑦ ᐃᓚᓕᐅᑦᔨᕙᒃᓗᑎᒃ.

³ ᐃᓕᐊᕐᔪᐃᑦ ᓯᐅᑎᖅᑯᕐᑐᔪᖁᑎᖏᓐᓂᒃ ᑎᒍᓯᑐᐃᓐᓇᕐᐸᒃᐳᑦ; ᐅᐃᒡᒐᕐᓃᓪᓗ ᐃᒻᒧᒃᓯᐅᒐᖁᑎᖏᑕ ᐸᖕᓂᖏᓐᓂᒃ ᑎᒍᓯᕙᒃᐳᑦ ᐊᑭᓕᒃᓴᖏᓐᓂᒃ ᐊᑭᓖᓚᐅᖏᓐᓂᖏᓐᓂ.

⁴ ᐊᒃᓱᔪᓂᒃ ᐊᔭᐅᕆᕙᒃᐳᑦ ᐊᖅᑯᑎᐅᑉ ᓯᓚᑖᓄᑦ; ᐊᔪᕐᓴᕐᑐᓕᒫᓪᓗ ᕿᒫᑎᑕᐅᕗᑦ ᐃᔨᕐᓯᒪᓕᕐᓗᑎᒃ.

⁵ ᑕᑯᒋᑦ, ᓯᐅᑎᖅᑯᕐᑐᔪᑎᑐᑦ ᓄᔪᐊᕐᑕᑎᑐᑦ ᓂᕿᒃᓴᕐᓯᐅᓕᕐᐳᑦ ᓄᓇᒥ ᐸᓂᕐᑐᒥ ᓱᓇᖃᖏᑦᑐᒥ, ᕿᑐᕐᖓᖏᑕ ᓂᕿᒃᓴᖏᓐᓂᒃ.

⁶ ᑕᕝᕙ ᐱᕈᕐᓰᕕᖕᓂ ᓇᑲᑎᕆᑎᑕᐅᓕᕐᐳᑦ ᐱᒋᓐᖏᑕᒥᖕᓂᒃ: ᕔᓂᒃᓴᓂᒡᓗ ᑲᑎᑦᓯᓪᓗᑎᒃ ᐱᐅᖏᑦᑐᓕᔪᑦ ᐱᖁᑎᖏᓐᓂᑦ.

⁷ ᐅᓐᓄᐊᒃᑯᑦ ᓯᓂᖃᑦᑕᕐᐳᑦ ᐊᓐᓄᕌᖃᕋᑎᒃ, ᕿᐱᒃᓴᖃᕐᐸᒐᑎᒡᓗ ᓂᒡᓚᓱᒃᑎᓪᓗᒍ.

⁸ ᖃᐅᓯᓕᖃᑦᑕᕐᐳᑦ ᖃᖅᑬᑦ ᑰᒐᕐᓂᖏᓐᓂᑦ, ᐅᔭᕋᓱᒡᔪᖕᓂᓗ ᑲᑎᓐᖓᖃᑦᑕᕐᐳᑦ ᐅᖅᑯᐃᓯᒪᓇᓱᒃᓗᑎᒃ.

⁹ ᓄᑕᖅᑲᑦ ᐊᑖᑕᖃᖏᑦᑐᑦ ᑎᒍᔭᐅᑲᓪᓚᖃᑦᑕᕐᐳᑦ ᐊᒫᒪᒃᑎᓪᓗᒋᑦ, ᐊᒃᓱᔪᓪᓗ ᓄᑕᕋᖏᑦ ᐊᑭᓕᒃᓮᕈᑎᒋᔭᐅᖃᑦᑕᕐᐳᑦ ᐊᑭᓕᒃᓴᖏᓐᓄᑦ.

¹⁰ ᐊᓐᓄᕌᒃᓴᖃᓐᖏᒧᑦ ᐊᓃᖃᑦᑕᕐᐳᑦ ᓱᓇᑕᖃᕋᑎᒃ; ᑳᖃᑦᑕᕐᐳᑦ ᓂᐊᖂᔭᒃᓴᓂᒃ ᐊᒡᔭᕐᑐᖃᑦᑕᕋᓗᐊᕐᓗᑎᒃ.

¹¹ ᓇᐹᕐᑑᑉ ᐸᐅᕐᖓᖏᓐᓂᒃ ᐃᑦᓰᔧᖃᑦᑕᕐᐳᑦ ᐅᕐᓱᒃᓴᓕᐅᕐᓗᑎᒃ; ᕔᓂᒃᓴᓂᒡᓗ ᑐᓪᓕᖃᑦᑕᕐᐳᑦ ᐃᑦᓰᔧᓪᓗᑎᒃ, ᐃᒥᕈᒃᑐᐊᓘᓪᓗᑎᒃ.

¹² ᐃᒡᓗᒐᓴᖕᓂᑦ ᐊᖑᑎᑦ ᑐᖁᓕᒑᔪᑦ ᐋᓐᓂᐊᓂᕐᒧᑦ ᓂᐹᕗᑦ, ᐃᑭᓕᕐᑕᐅᓯᒪᔪᓪᓗ ᓂᐹᕗᑦ ᐃᑲᔪᕐᑕᐅᔪᒪᓪᓗᑎᒃ; ᒎᑎᐅᓪᓕ ᑲᒪᒋᓐᖏᓔᑦ ᑐᒃᓯᐊᕐᓂᕆᔭᖏᑦ.

¹³ ᐃᓄᒃᑕᖃᕆᕗᖅ ᖃᐅᒪᔪᒥᒃ ᐊᑭᕋᕐᑐᕐᑐᓂᒃ, ᐃᓅᓯᕆᔭᐅᖁᔭᐅᔪᒥᒡᓗ ᖃᐅᔨᒪᖏᑦᑐᓂᒃ, ᐊᖅᑯᑎᐅᖁᔭᐅᔪᒦᖏᑦᑐᓂᒡᓗ.

¹⁴ ᐃᓄᐊᕐᑏᑦ ᐅᓐᓄᐊᒃᑯᑦ ᒪᑭᑉᐸᒃᐳᑦ, ᑐᖁᑦᓯᔪᒪᓪᓗᑎᒃ ᐊᒃᓱᔪᓂᒃ ᐊᔪᕐᓴᕐᑐᓂᒡᓗ; ᐅᓐᓄᐊᒃᑯᓪᓗ ᑎᒡᓕᒐᕐᑎᐅᓕᕐᐸᒃᓗᑎᒃ.

¹⁵ ᐊᓯᓐᓂᐊᕐᑏᑦ ᑖᕐᓯᑦᑏᕙᒃᑭᕗᑦ, ᑮᓇᕐᒥᖕᓂᒡᓗ ᒪᑐᐊᕐᓯᓯᒪᕙᒃᓗᑎᒃ ᐃᓕᑕᕆᔭᐅᔪᒪᓐᖏᒧᑦ.

¹⁶ ᑎᒡᓕᒃᑏᑦ ᑖᕐᑎᓪᓗᒍ ᑎᒡᓕᒋᐊᕐᑐᕐᐸᒃᐳᑦ ᐃᒡᓗᓄᑦ; ᐅᓪᓘᓕᕅᖕᒪᓪᓕ ᐃᔨᕐᓯᒪᕙᒃᓗᑎᒃ; ᖃᐅᒪᔪᒥᒃ ᖃᐅᔨᒪᖏᓐᓇᒥᒃ.

¹⁷ ᑖᕐᑐᐊᓗᖕᒥᒃ ᐅᓪᓛᖃᖔᕐᐳᑦ ᑕᒪᕐᒥᒃ; ᑲᑉᐱᐊᓵᕆᔨᓂᒃ ᑖᕐᑐᐊᓗᖕᒥᐅᑕᓂᒡᓗ ᐃᓚᓐᓇᕆᔭᖃᕐᐳᑦ.”

ᔪᐸᕆ

¹⁸ “ᐅᖃᖅᑲᐅᒐᕕᑦ, ‘ᐱᐅᖏᑦᑐᓕᔪᑦ ᐅᓕᕕᒡᔪᐊᒧᑦ ᐊᐅᓪᓚᕈᑦᔭᐅᕗᑦ; ᓄᓇᖁᑎᖏᓪᓗ ᒎᑎᐅᑉ ᓱᒋᐊᕈᒪᔭᖓᓃᓪᓗᑎᒃ; ᐱᕈᕐᓰᕕᖁᑎᒥᖕᓄᓪᓗ ᐱᓇᓱᐊᕆᐊᕐᑐᕐᑐᖃᓚᐅᕐᓯᒪᔪᓐᓃᕐᓗᑎᒃ.

¹⁹ ᐸᓂᕐᓇᕐᑐᒧᑦ ᐅᖅᑰᔪᒧᓪᓗ ᐊᐳᑦ ᐸᓂᕐᓗᓂ ᐊᓯᐅᓲᖑᖕᒪᑦ: ᑍᒫᒃᑕᐅᖅ ᐊᔪᕐᑐᓕᔪᑦ ᐊᓯᐅᔪᒫᕆᕗᑦ ᓄᓇᒥ ᐃᓅᔪᓂ.

²⁰ ᐊᒡᓛᑦ ᐊᓈᓇᖏᑕ ᐳᐃᒍᕈᓐᓇᕐᐰᑦ; ᐊᑎᖏᓪᓘᓐᓃᑦ ᐃᖅᑲᐅᒪᔭᐅᔪᓐᓁᕐᓗᑎᒃ; ᑍᒤᒻᒪᑦ ᐱᐅᖏᑦᑐᓕᓂᖅ ᓇᑲᑕᐅᓯᒪᕗᖅ ᓇᐹᕐᑐᑎᑐᑦ.’

²¹ ᑍᒤᓚᕿᕗᑦ ᐅᐃᒡᒐᕐᓂᕐᓂᒃ ᐱᑦᓯᐊᖃᑦᑕᕐᓯᒪᖏᓐᓇᒥᒃ: ᐊᕐᓇᓂᒡᓗ ᕿᑐᕐᖓᖃᖏᑦᑐᓂᒃ ᓂᕆᑎᑦᓯᖃᑦᑕᖔᕐᓗᑎᒃ.

²² ᒎᑎᓕ ᐊᔪᖏᑦᑐᕐᔪᐊᓂᒃ ᐊᓯᕈᐃᕗᖅ ᐱᔪᓐᓇᕐᓂᕐᒥᒍᑦ; ᑖᒃᑯᐊ ᐱᕙᓪᓕᐊᒐᓗᐊᕐᐳᑦ ᐃᓄᓯᖏᓪᓕ ᓴᐱᕐᓇᕐᑐᒧᐊᕐᐳᑦ.

²³ ᒎᑎᐅᑉ ᐃᓱᒫᓗᓇᖏᑦᑐᒦᑎᑉᐰᑦ, ᓴᐳᒻᒥᓪᓗᒋᓪᓗ; ᑍᒪᓐᖓᓪᓕ ᐱᓂᐊᕐᓂᖏᑦ ᑕᑯᓐᓇᕐᐰᑦ.

²⁴ ᐱᐅᖏᑦᑐᓕᔪᖅ ᐊᑯᓂᐅᖏᑦᑐᖅ ᓂᕐᑐᕐᓇᑬᓐᓇᕐᐳᖅ, ᐊᑯᓂᐅᖏᑦᑐᕐᓗ ᑕᕝᕙᐅᔪᓐᓃᕐᐳᖅ; ᑐᖁᓕᕗᖅ ᐱᕈᕐᑐᑎᑐᑦ; ᓂᐊᖂᔭᒃᓮᑦ ᓄᕗᖏᑎᑐᑦ ᓇᑲᑕᐅᕗᑦ.

²⁵ ᑕᒪᓐᓇ ᑍᒤᖏᑉᐸᑦ, ᓇᓪᓕᐊᑦᑕ ᓱᓕᖏᓐᓂᕋ ᓇᓗᓁᕈᓐᓇᕐᐸᐅᒃ? ᑭᓇᓗ ᓇᓗᓁᕐᓯᔪᓐᓇᕐᐹ ᐅᖃᐅᓯᕆᔭᒪ ᓱᓕᖏᓐᓂᖏᓐᓂᒃ?”