ᔪᐊᓇᓯᐅᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᖃᐅᓯᖅ ᐃᓅᓯᐅᔪᖅ

¹ ᐱᒋᐊᕐᓂᕐᒥ ᐅᖃᐅᓯᖅ ᑕᕝᕙᓃᓚᐅᕐᐳᖅ, ᐅᖃᐅᓯᕐᓗ ᒎᑎᒦᓚᐅᕐᐳᖅ, ᐅᖃᐅᓯᕐᓗ ᒎᑎᐅᕗᖅ.

² ᑖᓐᓇ ᐱᒋᐊᕐᓂᕐᒥᑦ ᒎᑎᒦᓚᐅᕐᐳᖅ;

³ ᓱᓇᓕᒫᑦᓯᐊᑦ ᑖᑦᓱᒨᓇ ᐱᓐᖑᕐᑎᑕᐅᓚᐅᕐᓯᒪᕗᑦ; ᑖᑦᓱᒪᓗ ᐊᓯᐊᒍᑦ ᐱᓐᖑᕐᑎᑕᐅᓯᒪᔪᖃᓐᖏᓚᖅ ᐱᓐᖑᕐᑎᑕᐅᓯᒪᔪᓂᒃ.

⁴ ᐃᓅᓯᖅ ᑖᑦᓱᒪᓃᓚᐅᕐᐳᖅ, ᐃᓅᓯᕐᓗ ᐃᓄᖕᓄᑦ ᑕᒤᓐᓄᑦ ᖃᐅᒻᒪᖅᑯᑕᐅᓚᐅᕐᐳᖅ.

⁵ ᖃᐅᒪᔪᖅ ᖃᐅᒻᒤᕗᖅ ᑖᕐᑐᒥᒃ, ᑖᕐᑑᓪᓗ ᖃᒥᓚᐅᓐᖏᓛ.

⁶ ᒎᑎ ᑎᓕᓯᓚᐅᕐᐳᖅ ᐃᓄᖕᒥᒃ, ᔪᐊᓇᓯᒥᒃ ᐊᑎᓕᖕᒥᒃ,

⁷ ᑖᓐᓇ ᑎᑭᓚᐅᕐᐳᖅ ᐅᖃᐅᓯᖃᕆᐊᕐᑐᕐᓗᓂ, ᖃᐅᒪᔪᒥᒃ ᓇᓗᓁᕐᓯᔭᕐᑐᕐᓗᓂ, ᐃᓘᓐᓇᑎᒃ ᑖᑦᓱᒨᓇ ᐅᒃᐱᓕᕐᑎᑕᐅᖁᓪᓗᒋᑦ.

⁸ ᓇᖕᒥᓂᕐᓕ ᔪᐊᓇᓯ ᖃᐅᒪᔫᓐᖏᓚᖅ, ᑎᑭᓚᐅᕐᐳᕐᓕ ᓇᓗᓁᕐᓯᔭᕐᑐᕐᖢᓂ ᖃᐅᒪᔪᒥᒃ.

⁹ ᓱᓕᔪᒥᒡᓕ ᖃᐅᒪᔫᕗᖅ ᑖᓐᓇ ᓯᓚᕐᔪᐊᕐᒧᑦ ᑎᑭᑦᑐᓕᒫᓂᒃ ᐃᓄᖕᓂᒃ ᖃᐅᒪᒃᓮᔪᖅ.

¹⁰ ᖃᐅᒪᔪᖅ ᓯᓚᕐᔪᐊᕐᒦᓚᐅᕐᐳᖅ, ᓯᓚᕐᔪᐊᕐᓗ ᑖᑦᓱᒨᓇ ᐱᓐᖑᕐᑎᑕᐅᓯᒪᕗᖅ, ᓯᓚᕐᔪᐊᕐᒥᐅᓪᓕ ᖃᐅᔨᒪᓐᖏᓛᑦ.

¹¹ ᓄᓇᒥᓄᑦ ᓇᖕᒥᓂᕐᒥᓄᑦ ᑎᑭᑉᐳᖅ, ᐃᓄᖁᑎᖏᑕᓕ ᓇᖕᒥᓂᖏᑕ ᐃᓚᓕᐅᓐᖏᓛᑦ.

¹² ᑖᑦᓱᒥᖓᓕ ᐃᓚᓕᐅᕆᔪᓕᒫᑦ, ᐅᒃᐱᓕᕐᓗᑎᒡᓗ ᑖᑦᓱᒪ ᐊᑎᖓᓄᑦ, ᑖᒃᑯᐊ ᕿᑐᕐᖓᑖᕆᔭᐅᔪᓐᓇᕐᓯᑎᑉᐰᑦ ᒎᑎᒧᑦ;

¹³ ᑖᒃᑯᐊ ᐃᕐᓂᐊᖑᕗᑦ, ᐊᖑᒻᒥᑦ ᐱᓇᑎᒃ ᑎᒥᐅᓪᓘᓐᓃᑦ ᐱᔪᒪᔭᖓᓂᑦ, ᐃᓅᓪᓗ ᐱᔪᒪᔭᖓᓂᑦ ᐱᖕᒥᓇᑎᒃ, ᒎᑎᒥᓪᓕ ᐃᕐᓂᐊᖑᕗᑦ.

¹⁴ ᐅᖃᐅᓯᖅ ᑎᒥᑖᓚᐅᕐᐳᖅ ᐃᓅᖃᑎᒋᓕᓚᐅᕐᐸᕗᓪᓗ, ᓂᕐᑐᕐᓇᕐᓂᕐᔪᐊᖓ ᑕᑯᓚᐅᕐᐸᕗᑦ, ᓂᕐᑐᕐᓇᕐᓂᕐᔪᐊᖅ ᐊᑖᑕᒥᑦ ᐱᓯᒪᔭᖓ ᐃᕐᓂᑐᐊᖑᓂᕐᒥᓄᑦ; ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓂᒃ ᓱᓕᑦᓯᐊᕐᓂᕐᒥᒡᓗ ᑕᑕᑦᑐᖅ.

¹⁵ ᔪᐊᓇᓯᐅᑉ ᓂᐱᖅᑯᕐᑐᓪᓗᓂ ᓇᓗᓁᓚᐅᕐᐹ ᐅᖃᕐᓗᓂ, “ᑖᓐᓇᐅᕗᖅ ᐅᖃᐅᓯᕆᓚᐅᕐᑕᕋ, ‘ᑭᖑᓂᒃᑯᑦ ᕾᓂᐊᕐᐳᖅ ᐅᕙᓐᓂᑦ ᐊᔪᖏᓐᓂᕐᓴᐅᔪᖅ, ᐃᓅᓕᓚᐅᕐᑎᓐᓇᖓ ᐃᓅᓯᒪᔪᖅ.’”

¹⁶ ᑖᑦᓱᒪ ᐱᑦᑎᐊᕐᓂᖓᑕ ᐱᔪᒃᓇᕐᓯᑎᑎᓂᖓ ᐊᖏᔫᓂᑯᖓᓄᑦ ᓮᒻᒪᕐᑎᑕᐅᓯᒪᔪᒥᒃ ᐃᓅᓯᖃᕐᑎᑉᐹᑎᒍᑦ ᐱᑦᑎᐊᕐᕕᐅᓂᕐᒧᑦ ᓮᒻᒪᕐᑎᑕᐅᕙᓪᓕᐊᖏᓐᓇᕐᓗᑕᓗ.

¹⁷ ᐱᖁᔭᑦ ᒨᓯᓯᒃᑯᑦ ᑐᓂᔭᐅᓚᐅᕐᐳᑦ; ᐱᑦᓯᐊᕐᕕᐅᓂᕐᓕ ᓱᓕᑦᓯᐊᕐᓂᕐᓗ ᔩᓱᓯ ᙭ᔅᑑᓯᑯᑦ ᐱᕘᒃ.

¹⁸ ᒎᑎᒥᒃ ᑕᑯᓯᒪᔪᖃᓐᖏᓚᖅ; ᐃᕐᓂᑐᐊᓪᓕ ᐊᑖᑕᐅᑉ ᓴᕐᓕᐊᕐᑕᖓᑕ, ᑖᑦᓱᒪ ᒎᑎ ᖃᐅᔨᔭᐅᑎᑉᐹ.

ᔪᐊᓇᓯ ᐹᑉᑎᑎᕆᔨᐅᑉ ᐊᔪᕆᕐᑐᐃᓂᖓ

¹⁹ ᔫᑎᑦ ᐊᖓᔪᖅᑳᖏᑦ ᔨᕉᓴᓕᒻᒦᑦᑐᑦ ᑐᓂᕐᕈᓯᕐᑎᑦᓯᔨᓂᒃ ᓕᕔᑎᓂᒡᓗ ᔪᐊᓇᓯᒥᒃ ᐊᐱᕆᔭᕐᑐᖁᔨᕗᑦ, ᐃᒫᒃ “ᑭᓇᐅᕖᑦ?”

²⁰ ᔪᐊᓇᓯᓕ ᓴᒡᓗᓇᓂ, ᐃᒻᒥᓂᒃ ᐅᖃᐅᓯᕆᕗᖅ, ᐅᖃᕐᓗᓂ, “᙭ᔅᑑᓯᐅᓐᖏᓚᖓ.”

²¹ ᑖᒃᑯᐊ ᐊᐱᕆᕚᑦ, “ᑭᓇᐅᒐᕕᓪᓖ? ᐃᓔᑦᔭᐅᕖᑦ?” ᑭᐅᕗᖅ, “ᑍᓐᓇᐅᓐᖏᓚᖓ.” “ᓇᓚᐅᑦᑍᔫᕖᑦ?” ᑭᐅᕔᑦ, “ᐋᒃᑲ.”

²² ᑖᒃᑯᐊ ᐅᖃᕐᐳᑦ, “ᑭᓇᐅᕕᑦ? ᑭᐅᓚᐅᕐᑎᒍᑦ ᐅᕙᑦᑎᓐᓂᒃ ᑎᓕᓯᔪᓄᑦ ᐅᖃᕈᓐᓇᖁᓪᓗᑕ. ᖃᓄᖅ ᐃᓕᖕᓂᒃ ᐅᖃᐅᓯᕆᔪᓐᓇᕐᐱᑦ?”

²³ ᔪᐊᓇᓯᐅᑉ ᑭᐅᕔᑦ, “ᑍᓐᓇᐅᕗᖓ, ‘ᓂᐱ ᕾᒐᓛᕐᑐᖅ ᑐᓴᕐᓴᐅᔪᖅ ᐃᓄᖃᖏᑦᑐᒥ; ᐊᑕᓂᐅᑉ ᐊᖅᑯᑎᒃᓴᖓ ᑐᑭᓕᐊᕐᓯᑎᓯᐅᒃ,’ ᓇᓚᐅᑦᑍᔪᑉ ᐂᓮᐊᓯᐅᑉ ᐅᖃᐅᓯᕆᓯᒪᔭᖓ.”

²⁴ ᑖᒃᑯᐊ ᐹᕆᓯᒃᑯᓐᓂᑦ ᑎᓕᔭᐅᓯᒪᓚᐅᕐᐳᑦ,

²⁵ ᐊᐱᕆᓕᕆᕗᑦ, “ᓱᖕᒪᓪᓕ ᐹᑉᑎᑦᓯᖃᑦᑕᕐᐲᑦ? ᙭ᔅᑑᓯᐅᓇᒃ, ᐃᓔᑦᔭᐅᓇᒡᓗ, ᓇᓚᐅᑦᑍᔫᓇᒡᓗ.”

²⁶ ᔪᐊᓇᓯᐅᑉ ᑭᐅᕔᑦ, “ᐃᒪᕐᒧᑦ ᐹᑉᑎᑦᓯᕗᖓ; ᐊᑯᓐᓇᑦᓯᓐᓂᓕ ᓇᖏᕐᑐᖃᕐᐳᖅ ᖃᐅᔨᒪᓐᖏᑕᑦᓯᓐᓂᒃ,

²⁷ ᑖᓐᓇ ᑭᖑᓂᒃᑯᑦ ᕾᓂᐊᕐᑐᖅ, ᓇᓗᖅᑯᑎᕗᖓ ᐊᒡᓛᑦ ᐃᑎᒐᒍᑎᖏᓐᓂᒃ ᓯᖐᑦᔮᕐᓯᔭᕆᐊᒃᓴᖅ.”

²⁸ ᑕᒪᓐᓇ ᐱᓂᐊᕐᓂᐅᓚᐅᕐᐳᖅ ᐱᑕᓂᒥ ᑰᑉ ᔪᐊᕐᑕᓂᐅᑉ ᑕᓕᕐᐱᐊᓂ, ᔪᐊᓇᓯᐅᑉ ᐹᑉᑎᓯᕕᖓᓂ.

ᒎᑎᐅᑉ ᓄᕐᕋᐅᔭᖁᑎᖓ

²⁹ ᖃᐅᑎᓪᓗᒍ ᔪᐊᓇᓯᐅᑉ ᔩᓱᓯ ᒥᒃᓯᒧᑦ ᕾᓕᕐᑐᖅ ᑕᑯᒐᒥᐅᒃ, ᐅᖃᕐᐳᖅ, “ᑕᑯᒋᑦ, ᑕᕝᕙ ᒎᑎᐅᑉ ᓄᕐᕋᐅᔭᖁᑎᖓ, ᓄᓇᕐᔪᐊᕐᒥᐅᑦ ᐊᔪᕐᓂᖏᓐᓂᒃ ᐲᔧᔪᖅ!

³⁰ ᑕᕝᕙ ᐅᖃᐅᓯᕆᓚᐅᕐᑕᕋ ᐅᖃᕐᑎᓪᓗᖓ, ‘ᐊᖑᑦ ᑭᖑᓂᒃᑯᑦ ᕾᓂᐊᕐᐳᖅ ᐅᕙᓐᓂᑦ ᐊᔪᖏᓐᓂᕐᓴᐅᔪᖅ, ᐃᓅᓚᐅᕐᑎᓐᓇᖓ ᐃᓅᓯᒪᒐᒥ.’

³¹ ᓇᖕᒥᓂᕐᓕ ᖃᐅᔨᒪᓚᐅᓐᖏᓚᕋ; ᑍᒤᒻᒪᑦ ᐃᒪᕐᒧᑦ ᐹᑉᑎᑎᕆᔭᕐᑐᓚᐅᕐᐳᖓ, ᐃᓕᑕᕆᔭᐅᓕᖁᓪᓗᒍ ᐃᓴᕆᐊᓕᒥᐅᓄᑦ.”

³² ᔪᐊᓇᓯ ᓇᓗᓁᕐᓯᓚᐅᕐᐳᖅ ᐃᒫᒃ, “ᐊᓂᕐᓂᖅ ᕿᓚᖕᒥᑦ ᐊᖅᑲᕐᑐᖅ ᑕᑯᓚᐅᕐᐸᕋ ᑎᖕᒥᐊᑐᑦ ᑑᕕᑐᑦ, ᑖᑦᓱᒪᓃᓕᕐᓗᓂ.

³³ ᐅᕙᖓᓕ ᓇᖕᒥᓂᖅ ᖃᐅᔨᒪᓚᐅᓐᖏᓚᕋ; ᑎᓕᔨᒪᓕ ᐃᒪᕐᒧᑦ ᐹᑉᑎᑎᕆᔭᕐᑐᖁᓪᓗᖓ ᐅᖃᐅᑎᓚᐅᕐᐹᖓ, ‘ᐊᖑᒻᒧᑦ ᐊᓂᕐᓂᕐᒥᒃ ᐊᖅᑲᕐᑐᒥᒃ ᑕᑯᒍᕕᑦ ᑕᕝᕙᓃᓕᕐᑐᒥᒃ, ᑖᓐᓇᐅᕗᖅ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᐹᑉᑎᑎᕆᔨ.’

³⁴ ᐅᕙᖓᓗ ᓇᖕᒥᓂᖅ ᑕᑯᓚᐅᕐᐸᕋ, ᐅᖃᐅᑎᕙᑦᓯ ᑖᓐᓇᐅᕗᖅ ᑕᕝᕙ ᒎᑎᐅᑉ ᐃᕐᓂᖓ.”

ᔩᓱᓯᐅᑉ ᐃᓕᓐᓂᐊᕐᑎᑖᖏᑦ ᓯᕗᓪᓕᕐᐹᑦ

³⁵ ᖃᐅᑎᓪᓗᒍ ᔪᐊᓇᓯ ᓇᖏᖃᑎᖃᓚᐅᕐᐳᖅ ᐃᓕᓐᓂᐊᕐᑎᒥᓂᒃ ᒪᕐᕉᖕᓂᒃ;

³⁶ ᔩᓱᓯ ᐱᓱᒃᑐᖅ ᑕᑯᓈᕋᒥᐅᒃ, ᐅᖃᕐᐳᖅ, “ᑕᑯᒋᑦ, ᑕᕝᕙ ᒎᑎᐅᑉ ᓄᕐᕋᐅᔭᖁᑎᖓ!”

³⁷ ᐃᓕᓐᓂᐊᕐᑎᖏᒃᑕᓕ ᑍᒫᒃ ᐅᖃᕐᑐᖅ ᑐᓴᕋᒥᒃᑯᒃ, ᔩᓱᓯ ᒪᓕᓕᕐᐹᒃ.

³⁸ ᔩᓱᓯ ᕿᕕᐊᕋᒥ, ᑕᑯᕗᖅ ᒪᓕᒃᑑᖕᓂᒃ, ᐅᖃᐅᑎᕚᒃ, “ᓱᓇᒥᒃ ᕿᓂᕐᐱᓰᒃ?” ᑭᐅᕘᒃ, “ᕌᑉᐰ (ᑐᑭᖃᕐᐳᖅ ᐃᓕᓮᔨ), ᓇᓃᖃᑦᑕᕐᐱᑦ?”

³⁹ ᔩᓱᓯᐅᑉ ᐅᖃᐅᑎᕚᒃ, “ᕾᓗᓯᒃ ᑕᑯᔭᕐᑐᕆᑦᓯᒃ.” ᑕᕝᕙ ᒪᓕᓕᕐᐹᒃ ᖃᐅᔨᓪᓗᑎᒡᓗ ᓇᓂᒥᐅᑕᐅᖕᒪᖔᑦ; ᐅᓪᓗᒥ ᑕᕝᕙᓂ ᓇᔫᑎᕘᒃ, ᐅᓐᓄᓴᐅᓕᓚᐅᕐᒪᑦ ᐃᒻᒪᖄ 4ᖃᓂᒋᔮᓂ.

⁴⁰ ᑖᒃᑯᐊᒃ ᔪᐊᓇᓯ ᐅᖃᕐᑎᓪᓗᒍ ᑐᓴᓚᐅᕐᑑᒃ, ᔩᓱᓯᒥᒃ ᒪᓕᒃᓴᓚᐅᕐᑐᖅ ᐂᑉᐸᖓ ᐋᓐᑐᕉᖑᕗᖅ ᓮᒨᓂ ᐲᑦᑐᕉᓯᐅᑉ ᓄᑲᖓ.

⁴¹ ᓯᕗᓪᓕᕐᐹᒥᒃ ᐊᖓᔪᒥᓄᐊᕐᐳᖅ ᓮᒨᓂᒧᑦ, ᐅᖃᐅᑎᓪᓗᒍ, “ᒥᓮᐊ ᓇᓂᕙᕗᑦ.” (ᑐᑭᖃᕐᐳᖅ “᙭ᔅᑑᓯ.”)

⁴² ᐋᓐᑐᕉᑉ ᓮᒨᓂ ᔩᓱᓯᒧᐊᕈᑎᕚ. ᔩᓱᓯᐅᑉ ᑕᑯᒐᒥᐅᒃ, ᐅᖃᐅᑎᕚ, “ᓮᒨᓂᐅᕖᑦ ᔪᐊᓇᓯᐅᑉ ᐃᕐᓂᖓ? ᓰᐸᓯᒥᒃ ᐊᑎᖃᕐᓂᐊᓕᕐᐳᑎᑦ.” (ᓰᐸᓯ ᑐᑭᖃᕐᐳᖅ ᐲᑦᑐᕉᓯ ᐅᕝᕙᓗ “ᕾᕐᑐᖅ.”)

ᔩᓱᓯᐅᑉ ᕾᖁᔨᓂᖓ ᐱᓕᑉᐴᓯᒥᒃ ᓈᑕᓁᒥᒡᓗ

⁴³ ᖃᐅᑎᓪᓗᒍ ᔩᓱᓯ ᒐᓕᓕᐊᒧᐊᕈᒪᓕᕐᐳᖅ. ᑲᑎᓯᒐᒥ ᐱᓕᑉᐴᓯᒥᒃ ᐅᖃᐅᑎᕚ, “ᒪᓕᓐᖓ.”

⁴⁴ ᐱᓕᑉᐴᓯᓕ ᐱᑦᓮᑕᒥᐅᑕᐅᕗᖅ, ᐋᓐᑐᕉᒃᑯᒃ ᐲᑦᑐᕉᓯᒃᑯᒃ ᓄᓇᖓᓂᑦ.

⁴⁵ ᐱᓕᑉᐴᓯᐅᑉ ᓈᑕᓁ ᑲᑎᒐᒥᐅᒃ ᐅᖃᐅᑎᕚ, “ᑲᑎᓯᕗᒍᑦ ᒨᓯᓯᐅᑉ ᐱᖁᔭᖏᓐᓂ ᓇᓚᐅᑦᑍᔪᓪᓗ ᑎᑎᕋᐅᓯᕆᓚᐅᕐᑕᖓᓂᒃ, ᔩᓱᓯ ᓈᓴᕇᑎᒥᐅᒥᒃ, ᔫᓯᐱᐅᑉ ᐃᕐᓂᖓᓂᒃ.”

⁴⁶ ᓈᑕᓁᑉ ᐊᐱᕆᕚ, “ᓈᓴᕇᑎᒥᑦ ᐱᐅᔪᒥᒃ ᓴᖅᑭᑦᑐᖃᕈᓐᓇᕐᐹ?” ᐱᓕᑉᐴᓯᐅᑉ ᑭᐅᕚ, “ᕾᓗᑎᑦ ᑕᑯᔭᕐᑐᕆᑦ.”

⁴⁷ ᔩᓱᓯᐅᓪᓕ ᓈᑕᓁ ᒥᒃᓯᒧᑦ ᕾᓕᕐᑐᖅ ᑕᑯᒐᒥᐅᒃ, ᐅᖃᐅᓯᕆᕚ, “ᑕᑯᒋᑦ, ᑕᕝᕙ ᐃᓴᕆᐊᓕᒥᐅᑕᓪᓚᕆᒃ, ᑖᑦᓱᒪᓂᓗ ᓱᓕᖏᓐᓂᕐᑕᖃᓐᖏᓚᖅ!”

⁴⁸ ᓈᑕᓁᑉ ᐊᐱᕆᕚ, “ᖃᓄᖅ ᖃᐅᔨᒪᕕᖓ?” ᔩᓱᓯᐅᑉ ᑭᐅᕚ, “ᐱᓕᑉᐴᓯᒧᑦ ᕾᖁᔭᐅᓚᐅᖄᕐᑎᓐᓇᒃ, ᓇᐹᕐᑑᑉ ᐸᐅᕐᖓᓕᒃᓴᐅᑉ ᐊᑖᓂ ᐃᒃᓯᕙᑎᓪᓗᑎᑦ ᑕᑯᓚᐅᕐᐸᒋᑦ.”

⁴⁹ ᓈᑕᓁᑉ ᑭᐅᕚ, “ᕌᑉᐰ, ᒎᑎᐅᑉ ᐃᕐᓂᕆᕚᑎᑦ! ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑦ!”

⁵⁰ ᔩᓱᓯᐅᑉ ᑭᐅᕚ, “ᐅᒃᐱᓕᕐᐲᑦ ᐅᖃᖅᑲᐅᓂᕋ ᐱᓪᓗᒍ ᑕᑯᓚᐅᕐᓂᕋᕐᓗᑎᑦ ᓇᐹᕐᑑᑉ ᐸᐅᕐᖓᓕᒃᓴᐅᑉ ᐊᑖᓃᑎᓪᓗᑎᑦ? ᑕᑯᖃᑦᑕᕐᓂᐊᕐᐳᑎᑦ ᑕᒪᑐᒪᓐᖓᑦ ᐊᖏᓂᕐᓴᓂᒃ.”

⁵¹ ᐅᖃᐅᑎᓪᓗᒋᓪᓗ, “ᓱᓕᑦᓯᐊᕐᑐᒥᒃ ᐅᖃᐅᑎᕙᑦᓯ, ᕿᓚᒃ ᐊᖕᒪᕐᑐᖅ ᑕᑯᔪᒫᕐᐸᓯ, ᒎᑎᐅᓪᓗ ᐂᖏᓕᖏᑦ ᒪᔪᕋᕐᑐᑦ ᐊᖅᑲᕐᑎᕐᑐᓪᓗ ᐃᓅᑉ ᐃᕐᓂᖓᓄᑦ.”