ᔨᕆᒤᐊᐅᑉ ᐊᒡᓚᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕆᒤᐅᑉ ᐊᔪᕆᕐᑐᐃᓂᖓ ᑐᒃᓯᐊᕐᕕᒡᔪᐊᕐᒥ

¹ ᔨᕆᒤᐊ ᐅᖃᐅᓯᒃᓴᕐᑖᕐᑎᑕᐅᓚᐅᕐᐳᖅ ᐊᑕᓂᕐᒥᑦ.

² ᐊᑕᓂᐅᑉ ᐃᒡᓗᖓᑕ ᐃᑎᕐᑕᕐᕕᖓᓃᓪᓗᑎᑦ ᐅᖃᐅᓯᕆᔭᐅᖁᔭᒃᑲ ᐅᖃᒃᑭᑦ: “ᐊᑕᓂᐅᑉ ᐅᖃᐅᓯᖏᑦ ᑐᓴᕐᓯᐅᒃ, ᔫᑕᒥᐅᑕᐅᔪᓯ ᑐᒃᓯᐊᕐᕕᒡᔪᐊᕐᒧᑦ ᑐᒃᓯᐊᕆᐊᕐᑐᕐᐸᒃᑐᓯ ᐅᕘᓇ ᐃᑎᕐᑕᕐᕕᒃᑯᑦ.

³ ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐃᓕᖅᑯᓯᕆᔭᓯ ᐱᓂᐊᕐᓂᕆᔭᓯᓗ ᐋᖅᑭᒋᐊᕐᑕᒃᓴᕆᕙᓯ ᓄᓇᖃᕈᒪᒍᑦᓯ ᑕᒫᓂ.

⁴ ᐅᖃᐅᓯᑦᓯᓐᓄᑦ ᓯᓔᕐᕆᔭᐅᑦᑍᓕᒋᑦᓯ ᐅᖃᓕᕌᖓᑦᓯ, ‘ᐊᑕᓂᐅᑉ ᐅᓇ ᑐᒃᓯᐊᕐᕕᒃᔪᐊᖁᑎᖓ, ᐊᑕᓂᐅᑉ ᑕᕝᕙ ᑐᒃᓯᐊᕐᕕᒡᔪᐊᖁᑎᖓ, ᐊᑕᓂᐅᑉ ᑐᒃᓯᐊᕐᕕᒡᔪᐊᖁᑎᖓ!’

⁵ ᐃᓕᖅᑯᓯᕆᔭᑦᓯᓐᓂᒃ ᐱᓂᐊᕐᓂᕆᔭᑦᓯᓐᓂᒡᓗ ᐋᖅᑭᒋᐊᓪᓚᕆᖕᓂᐊᕈᑦᓯ, ᐃᓅᖃᑎᑦᓯᓐᓄᓪᓗ ᓈᒻᒪᑦᓯᐊᕐᑐᒥᒃ ᐱᓂᐊᕐᓂᖃᕐᓗᓯ,

⁶ ᐅᖁᒤᒃᓴᕐᑎᑦᓯᖏᓪᓗᓯᓗ ᐃᓅᖃᑎᑐᖃᕆᓐᖏᑕᑦᓯᓐᓂᒃ, ᐃᓕᐊᕐᔪᖕᓂᒃ, ᐅᐃᒡᒐᕐᓂᕐᓂᒡᓗ ᐸᓯᔭᒃᓴᐅᖏᑦᑐᓂᒡᓗ ᑐᖁᑕᐅᑎᑦᓯᕙᖏᓪᓗᓯ, ᒎᑎᓐᖑᐊᓂᒡᓗ ᒪᓕᒐᖃᕐᓂᑦᓯᓐᓄᑦ ᓇᖕᒥᓂᖅ ᓱᕋᒍᑎᒋᕙᖕᓂᐊᖏᓐᓇᑦᓯᐅᒃ.

⁷ ᑕᕝᕙ ᓄᓇᖃᕐᑎᑦᓱᓐᓇᕋᔭᕐᐸᑦᓯ ᑕᒫᓂ, ᓯᕗᓕᕕᓂᑦᓯᓐᓄᑦ ᓄᓇᑖᕆᔭᐅᑎᓚᐅᕐᑕᕋ ᓄᓇᒋᔭᐅᖏᓐᓇᖁᓪᓗᒍ ᐃᓱᖃᖏᑦᑐᒧᑦ.

⁸ ᑕᑯᒋᑦ! ᓱᓕᖏᑦᑐᓂᒃ ᐅᖃᐅᓯᕐᓂᒃ ᐅᒃᐱᕆᔭᖃᓗᐊᓕᕋᑦᓯ ᐃᑲᔫᑎᖏᑦᑐᓂᒃ.

⁹ ᑎᒡᓕᖃᑦᑕᕐᓂᐊᕐᐱᓰ? ᐃᓄᐊᕐᐸᒡᓗᓯᓗ, ᐊᓯᓐᓂᐊᕐᐸᒡᓗᓯᓗ ᐊᖏᕈᑎᒋᔭᕕᓂᑦᓯᓐᓂᒡᓗ ᐱᔮᖅᑯᒥᒃ ᐊᑐᕈᓐᓃᕐᐸᒡᓗᓯ, ᒎᑎᓐᖑᐊᒧᓪᓗ ᐰᓕᒧᑦ ᑐᓂᕐᕈᓯᕐᐸᒡᓗᓯ, ᒎᑎᓐᖑᐊᓂᒡᓗ ᒪᓕᓕᕐᐸᒡᓗᓯ ᖃᐅᔨᒪᓚᐅᓐᖏᑕᑦᓯᓐᓄᑦ.

¹⁰ ᐊᒻᒪ ᑐᒃᓯᐊᕐᕕᖁᑎᑦᓯᓐᓄᑦ ᐊᑎᓐᓂᒃ ᓇᓗᓁᒃᑯᑕᖃᕐᑐᒧᑦ ᐃᑎᕌᖓᑦᓯ ᐅᖃᓕᕐᐸᖕᒥᓗᓯ ‘ᐅᕙᓂ ᓴᐳᑦᔭᐅᓂᐊᕐᐳᒍᑦ.’ ᓴᐳᑎᔭᐅᓯᒪᓂᐊᕐᐱᓰ? ᑕᒪᒃᑯᓂᖓ ᓈᒻᒪᖏᑦᑐᐊᓗᖕᓂᒃ ᐱᓇᓱᐊᕐᑎᓪᓗᓯ?

¹¹ ᐃᒡᓗᖁᑎᒐ ᐊᑎᓐᓂᒃ ᓇᓗᓁᒃᑯᑕᖃᕐᑐᖅ, ᐃᒡᓗᒋᔭᐅᓕᕐᑎᑉᐱᓯᐅᒃ ᑎᒡᓕᒃᑎᓄᑦ? ᑕᑯᒋᑦ ᐅᕙᖓ ᓇᖕᒥᓂᖅ ᑕᑯᓯᒪᕙᕋ, ᐊᑕᓂᖅ ᐅᖃᕐᐳᖅ.

¹² ᐂᓕᕆᑦ ᓮᓗᐊᒦᑦᑐᒧᑦ ᑐᒃᓯᐊᕐᕕᐅᒋᐊᕐᖓᓚᐅᕐᑐᒧᑦ ᐊᑎᓐᓂᒃ ᓇᓗᓁᒃᑯᑕᖃᕐᑐᒧᑦ, ᑕᑯᓗᑎᓪᓗ ᖃᓄᐃᓕᓐᓂᕐᒪᖔᒃᑯ ᐃᓄᖁᑎᒪ ᐱᐅᖏᑦᑐᓕᓂᖏᑦ ᐱᓪᓗᒋᑦ.

¹³ ᑕᒪᒃᑯᓂᖓ ᐱᔪᒥᓇᖏᑦᑐᓂᒃ ᐱᓇᓱᐊᕐᑎᓪᓗᓯ, ᐊᑕᓂᖅ ᐅᖃᕐᐳᖅ ᐃᓕᑦᓯᓐᓄᑦ ᐅᖃᕋᓱᐊᖃᑦᑕᓚᐅᕋᓗᐊᕐᐳᖓ ᐅᓄᕐᑐᐃᕐᓱᕐᓗᖓ, ᓈᓚᓚᐅᓐᖏᓚᑦᓯᓐᖓᓕ, ᐅᖃᐅᑦᔨᓇᓱᐊᕋᓗᐊᕐᑎᓪᓗᖓ ᑭᐅᔪᓐᓇᓚᐅᓐᖏᓚᓯ.

¹⁴ ᑍᒤᒻᒪᑦ, ᓮᓗᐊᒧᑦ ᐱᓂᐊᕐᓂᕆᓯᒪᔭᕋ ᐃᒡᓗᖁᑎᓐᓄᑦᑕᐅᖅ ᐊᑎᓐᓂᒃ ᓇᓗᓁᒃᑯᑕᖃᕐᑐᒧᑦ ᐱᓂᐊᕈᑎᒋᓂᐊᓕᕆᕙᕋ, ᑐᒃᓯᐊᕐᕕᒃᔪᐊᖅ ᐅᒃᐱᕆᔭᓯ ᑐᓂᓚᐅᕐᓯᒪᔭᕋ ᐃᓕᑦᓯᓐᓄᑦ ᓯᕗᓕᕕᓂᑦᓯᓐᓄᓪᓗ.

¹⁵ ᐃᒋᓐᓂᐊᕐᐸᑦᓯ ᓵᓐᓂᑦ, ᖃᑕᓐᖑᑎᑦᓯᑐᑦ ᐃᕗᕅᒥᐅᑎᑐᑦ ᑖᒃᑯᐊ ᑭᖑᕚᕇᓕᒫᑦ ᐃᒋᓚᐅᕋᒃᑭᑦ.”

ᐃᓄᐃᑦ ᓈᓚᖏᓐᓂᖏᑦ

¹⁶ “ᐃᕝᕕᓪᓕ, ᐃᓄᐃᑦ ᑖᒃᑯᐊ ᑐᒃᓯᐅᑎᑦᑍᓕᒃᑭᑦ, ᕿᓄᑦᔪᑎᒋᑦᑍᓕᒃᑭᓪᓗ, ᑐᒃᓯᐊᕐᕕᒋᑦᑍᓕᓐᖓ ᑐᒃᓯᐅᑎᒐᓗᐊᕈᕕᒋᑦ ᑐᓴᑦᔮᓐᖏᓚᒋᑦ.

¹⁷ ᑕᑯᖃᑦᑕᓐᖏᓚᑏᑦ? ᖃᓄᐃᓕᐅᕐᓂᕆᔭᖏᓐᓂᒃ ᔫᑕᒥ ᔨᕉᓴᓕᒥᐅᓪᓗ ᐊᖅᑯᓯᓂᖏᓐᓃ?

¹⁸ ᕿᑐᕐᖓᖏᑦ ᐃᑯᐊᓚᑦᓯᑦᔪᑎᒃᓴᓂᒃ ᕿᔪᒃᑕᕐᐳᑦ, ᐊᑖᑕᖏᑕᓗ ᐃᑭᓵᕐᓗᓂᒋᑦ, ᐊᕐᓇᖏᓪᓗ ᓂᐊᖂᔭᓕᐊᒃᓴᒥᖕᓂᒃ ᐃᖑᑦᓯᕗᑦ, ᓂᐊᖂᔭᓂᒡᓗ ᖃᓚᑦᑎᕗᑦ ᕿᓚᐅᑉ ᑯᐃᖓᑕ ᐱᓂᐊᕐᑕᖏᓐᓂᒃ. ᐃᒥᕐᑕᐅᔪᒃᓴᓂᒡᓗ ᑐᓂᕐᕈᓯᕐᐳᑦ ᒎᑎᓐᖑᐊᓄᑦ ᐅᕙᓐᓂᒃ ᓂᓐᖓᒃᓮᓪᓗᑎᒃ.

¹⁹ ᐅᕙᓐᓂᒃ ᓂᓐᖓᒃᓮᒐᓗᐊᕐᐹᑦ? ᐊᑕᓂᖅ ᐅᖃᕐᐳᖅ, ᑍᒤᓕᐅᕐᓂᕐᒥᖕᓄᑦ ᐃᒻᒥᖕᓂᖔᖅ ᐊᓯᕈᕈᑎᒃᓴᓕᐅᓕᓐᖏᓛᑦ ᑲᓐᖑᓇᕐᑐᒦᑎᓪᓗᑎᒡᓗ?

²⁰ ᐃᒫᒃ ᑕᕝᕙ ᐊᑕᓂᖅ ᒎᑎ ᐅᖃᕐᐳᖅ: ᑕᑯᒋᑦ, ᓂᓐᖓᒃᑯᒪ ᓂᓐᖓᐅᒪᓗᖓ ᐱᓇᓱᐊᕐᕕᒋᓂᐊᕐᐸᒃᑲ ᐃᓄᐃᓗ ᐆᒪᔪᓪᓗ, ᓇᐹᕐᑐᐃᓪᓗ, ᐸᐅᕐᒊᓪᓗ ᓄᓇᒥ ᐱᕈᕐᐸᒃᑐᑦ, ᐃᑯᐊᓚᓂᐊᕐᐳᑦ ᖃᒥᑕᐅᔪᓐᓇᖏᑦᑐᒥᒃ.

²¹ “ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ ᐊᑏ ᑐᓂᕐᕈᑕᐅᕙᒃᑐᑦ ᐆᑕᒃᓴᑦ ᑐᓂᕐᕈᑎᒃᓴᓄᑦ ᐊᓯᖏᓐᓄᑦ ᐃᓚᓕᐅᑎᓕᕐᓯᐅᒃ ᓂᕿᐅᓂᖏᑦ ᓂᕆᓗᓯᐅᒃ ᓇᖕᒥᓂᖅ.

²² ᓯᕗᓕᕕᓂᕐᓯ ᐄᑦᔨᑉᑎᒥᑦ ᐊᐅᓪᓚᕐᑎᓐᓇᒃᑭᑦ, ᐅᖃᐅᑎᓚᐅᓐᖏᓚᒃᑲ ᐱᖁᔭᕐᑖᕐᑎᓚᐅᓐᖏᓚᒃᑲᓗ ᑐᓂᕐᕈᑏᑦ ᐆᑕᒃᓮᑦ ᑐᓂᕐᕈᑎᒃᓮᓪᓗ ᐱᓪᓗᒋᑦ.

²³ ᑭᓯᐊᓂᓕ ᐱᖁᔭᕐᑖᑎᓚᐅᕐᐸᒃᑲ ᐃᒤᓕᔪᒥᒃ, ᓂᐱᒐ ᓈᓚᒃᑕᒃᓴᕆᕙᓯ, ᒎᑎᒋᔭᐅᓂᐊᕋᒪ ᐃᓕᑦᓯᓐᓄᑦ, ᐃᓕᑦᓯᓗ ᐃᓄᖁᑎᒋᓂᐊᕐᐸᑦᓯ, ᐱᖁᔭᒃᑲ ᒪᓕᒡᓗᒋᑦ ᐃᓅᔪᒃᓴᐅᕗᓯ, ᐃᓅᓯᖃᑦᓯᐊᖁᓪᓗᓯ.

²⁴ ᑭᓯᐊᓂᓕ ᑐᓴᓚᐅᓐᖏᓚᑦ, ᓈᓚᓚᐅᓐᖏᓚᓪᓘᓐᓃᑦ, ᒪᓕᖔᑐᐃᓐᓇᓕᓚᐅᕐᐳᑦ ᓈᒻᒪᖏᑦᑐᓂᒃ ᐆᒻᒪᑎᖏᑦ ᓯᑎᔫᒐᒥᒃ, ᐃᓱᒪᒥᖕᓂᒃ ᐃᓅᑐᐃᓐᓇᐅᓚᐅᕐᐳᑦ ᑭᖑᒧᑦ ᑕᑯᓐᓇᕋᒥᒃ ᓯᕗᒨᖏᑦᑐᖅ.

²⁵ ᓯᕗᓕᕕᓂᓯ ᐄᑦᔨᑉᑎᒥᑦ ᐊᐅᓪᓚᕐᑎᑕᐅᓯᒪᓂᖓᑕ ᑭᖑᓂᖓᓂᑦ ᐱᒋᐊᕐᓗᒍ ᐅᓪᓗᒥᒧᑦ ᑎᑭᓪᓗᒍ, ᖃᐅᑕᒫᑦ ᐅᓄᕐᑐᐃᕐᓱᕐᓗᖓ ᑎᓕᓯᕕᒋᖃᑦᑕᕐᓯᒪᕙᒃᑲ ᐱᔪᖃᓛᕐᑐᒥᒃ ᐅᖃᕐᑎᓐᓂᒃ.

²⁶ ᑐᓴᕐᑕᐅᕙᓚᐅᓐᖏᓚᖓ ᓈᓚᒃᑕᐅᓇᖓᓗ ᓯᑎᒃᑎᑉᐸᓪᓕᐊᖔᑐᐃᓐᓇᓚᐅᕐᐳᑦ. ᐱᐅᖏᑦᑐᓕᑦᑍᓕᖏᓐᓂᕐᓴᐅᓪᓗᑎᒡᓗ ᓯᕗᓕᕕᓂᑦᓯᓐᓂᑦ.

²⁷ ᑕᒪᒃᑯᓂᖓ ᐅᖃᐅᑎᒐᓗᐊᕈᕕᒋᑦ ᑐᓴᕐᑕᐅᑦᔮᓐᖏᓚᑎᑦ ᕾᖁᒐᓗᐊᕈᕕᒋᓪᓗ ᑭᐅᑦᔮᓐᖏᓛᑎᑦ.

²⁸ ᐅᖃᐅᑎᔭᒃᓴᕆᕙᑎᑦ, ᐃᓅᖃᑎᒌᒡᔪᐊᖑᓂᕋᕐᓗᒋᑦ ᐊᑕᓂᕐᒥᒃ ᒎᑎᒥᖕᓂᒃ ᑐᓵᖏᑦᑐᓂᒃ, ᐋᖅᑭᒋᐊᕈᑎᖃᕈᓐᓇᖏᑦᑐᑦ ᐋᖅᑭᒋᐊᕐᑕᐅᑦᔪᑎᒋᓇᓱᒃᑕᒥᖕᓂᒃ, ᓱᓕᑦᓯᐊᕐᓂᖅ ᐃᓄᖕᓂᑦ ᐊᑐᕐᑕᐅᔪᓐᓃᕐᐳᖅ, ᐅᖃᐅᓯᖏᓐᓃᑦᑐᓐᓃᕐᓗᓂ.”

ᐊᔪᕐᑐᓕᓃᑦ ᐱᓂᐊᕐᑕᐅᓂᖏᑦ ᕼᐃᓇᒻᒥᐅᓄᑦ ᓇᕐᓴᒦᑦᑐᓄᑦ

²⁹ “ᓄᔧᔭᕐᓗᓯ ᓄᔧᔭᕐᓂᑯᓯ ᐃᒋᓪᓗᒋᑦ, ᕿᒃᓵᖕᓂᑦᓯᓐᓂᒃ ᓴᖅᑭᑎᑦᓯᓕᕆᑦᓯ ᐱᖑᐃᑦ ᖄᖏᓐᓂ, ᐊᑕᓂᐅᑉ ᑭᖑᕚᖑᖃᑎᒌᖑᔪᓯ ᖁᔭᓈᕐᒪᓯ ᓂᓐᖓᐅᒪᕕᒋᓕᕐᐹᓯ.

³⁰ “ᔫᑕᒥᐅᑦ ᓵᓐᓂ ᐊᔪᕐᑐᓕᓯᒪᖕᒪᑕ, ᐊᑕᓂᖅ ᐅᖃᕐᐳᖅ, ᒎᑎᓐᖑᐊᓂᒃ ᓇᕐᕈᓇᕐᑐᓂᒃ ᐃᓕᐅᖅᑬᓯᒪᖕᒪᑕ ᑐᒃᓯᐊᕐᕕᒡᔪᐊᖁᑎᓐᓄᑦ ᐊᑎᓐᓂᒃ ᓇᓗᓁᒃᑯᑕᖃᕐᑐᒧᑦ ᓇᕐᕈᓇᕐᓯᑎᑦᓯᕗᑦ ᑍᒤᓕᐅᕐᓂᕐᒥᖕᓄᑦ.

³¹ ᑐᓂᕐᕈᓯᕐᕕᓕᐅᕐᓯᒪᖕᒪᑕ ᑐᐱᑎᒥ ᐱᐊᓐ ᕼᐃᓇᒻ ᓇᕐᓴᖓᓂ ᐃᕐᓂᕐᒥᖕᓂᒃ ᐸᓂᖕᒥᖕᓂᒡᓗ ᑐᓂᕐᕈᓯᕐᕕᒋᖃᑦᑕᕐᒪᑦᔪᒃ ᐃᑯᐊᓚᓪᓗᒋᑦ ᐱᖁᔭᓕᐅᕈᑎᒋᓚᐅᕐᓯᒪᓐᖏᑕᕋ ᐊᑐᕐᑕᐅᖁᓗᒍ ᐃᓱᒪᒋᓚᐅᕐᓯᒪᓐᖏᑕᕋᓘᓐᓃᑦ.

³² ᑍᒤᒻᒪᑦ ᑕᑯᒋᑦ, ᐅᓪᓗᐃᑦ ᕾᓕᕐᐳᑦ, ᐊᑕᓂᖅ ᐅᖃᕐᐳᖅ, ᐃᓄᖕᓄᑦ ᑖᓐᓇ ᓄᓇ ᑍᔭᐅᔪᓐᓃᕈᒫᕐᐳᖅ ᑐᐱᑎᒥᒃ ᐅᕝᕙᓗ ᐱᐊᓐ ᕼᐃᓇᒻ ᓇᕐᓴᖓᓂᒃ, ᑐᖁᕅᕕᖕᒥᒃ ᑍᔭᐅᖔᓕᕈᒫᕐᒪᑦ ᑐᖁᖓᔪᓂᒃ ᐃᓗᕕᕐᓯᕕᒃᓮᕈᑎᔪᒫᕐᐳᖅ.

³³ ᐃᓗᕕᕐᓯᕕᒃᓴᖃᕈᓐᓃᕐᐸᑦ ᑎᒥᕕᓃᑦ ᑎᖕᒥᐊᓄᑦ ᐆᒪᔪᓄᓪᓗ ᓄᓇᒦᑦᑐᓄᑦ ᓂᕿᒋᔭᐅᑐᐃᓐᓇᓕᕈᒫᕐᐳᑦ, ᕿᒫᑎᑦᓯᔪᒃᓴᕐᑕᖃᕈᒫᓐᖏᓚᕐᓗ ᑕᒪᒃᑯᓂᖓ.

³⁴ ᖁᕕᐊᓇᕐᑐᖃᕈᓐᓃᕈᒫᕐᐳᖅ ᖁᕕᐊᓱᒡᕙᓗᒃᑐᑦ ᓄᓕᐊᓂᒃᑐᑦ ᐅᐃᓂᒃᑐᓪᓗ ᓂᐱᖓᑐᑦ ᑐᓴᕐᓴᐅᔪᓐᓇᕈᓐᓃᕈᒫᕐᐳᑦ ᔫᑕᒥᐅᓂ ᔨᕉᓴᓕᒥᐅᓂᓗ, ᓄᓇᖏᑦ ᑭᓱᑕᖃᕈᓐᓃᕈᒪᕐᒪᑕ ᐃᓄᖃᔪᐃᑦᑐᑎᑐᑦ.”