ᔨᕆᒤᐊᐅᑉ ᐊᒡᓚᖏᑦ 41 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑍᑦᓱᒪᓂᓕ ᐊᕐᕌᒎᑉ ᑕᖅᑭᖏᑕ 7ᖓᓐᓂ, ᐃᓯᒥᐅᓕ ᓂᑕᓁᐊᐅᑉ ᐃᕐᓂᖓ ᐃᓔᓴᒪᐅᑉ ᐃᕐᖑᑕᖓ ᐊᖓᔪᖅᑳᕐᔪᐊᕐᒧᑦ ᐃᓚᒋᔭᐅᔪᖅ ᐊᖓᔪᖅᑳᒻᒪᕆᐅᖃᑕᐅᓪᓗᓂᓗ, ᐊᖑᑎᓂᒃ ᖁᓕᓂᒃ ᐃᓚᖃᕐᓗᓂ ᒥᔅᐸᒧᐊᕐᐳᖅ ᒋᑕᓔᐊᒥᒃ ᐊᕼᐂᑲᐅᑉ ᐃᕐᓂᖓᓂᒃ ᑕᑯᔭᕐᑐᕐᓗᓂ, ᓂᕆᖃᑎᒌᒃᑎᓪᓗᒋᑦ ᓂᕆᕕᖕᒥᖕᓂ ᒥᔅᐸᒥ.

² ᐃᓯᒥᐅᓕᐅᑉ ᓂᑕᓁᐊᐅᑉ ᐃᕐᓂᖓ ᐃᓚᒋᔭᖏᑕᓗ ᖁᓖᑦ ᐊᖑᑎᑦ ᓴᕕᒡᔪᐊᑎᒃ ᐊᒧᓪᓗᒋᑦ ᒋᑕᓔᐊ ᐊᕼᐂᑲᒥᐅᑉ ᐃᕐᓂᖓ ᑐᖁᑉᐹᑦ ᓴᕙᓂᐅᑉ ᐃᕐᖑᑕᖓ, ᑖᓐᓇ ᐹᐱᓘᓂᐅᑉ ᐊᖓᔪᖅᑳᕐᔪᐊᖓᑕ ᑲᒪᔨᒻᒪᕆᓐᖑᕐᑎᓚᐅᕐᑕᖓ ᓄᓇᓕᖕᓄᑦ.

³ ᐃᓯᒥᐅᓕᐅᑉ ᑐᖁᒃᑭᕔᑦ ᐃᓴᕆᐊᓕᒥᐅᑦ ᒋᑕᓔᐊᐅᑉ ᐃᓚᒋᔭᖏᑦ ᒥᔅᐸᒦᑦᑐᑦ, ᑲᐅᓪᑎᐊᒥᐅᓪᓗ ᐅᓇᑕᕐᑐᒃᓴᖏᑦ ᑐᖁᒃᑭᕔᑦ ᑕᕝᕙᓃᖃᑕᐅᑐᐃᓐᓇᕐᑑᒐᓗᐊᑦ.

⁴ ᖃᐅᑎᓪᓗᒍ ᓱᓕ ᒋᑕᓔᐊᐅᑉ ᑐᖁᑕᐅᓂᕕᓂᖓᓂᒃ ᑐᓴᕐᑐᖃᓚᐅᕐᑎᓐᓇᒍ,

⁵ ᐊᖑᑎᓂᒃ 80ᓂᒃ ᑎᑭᑦᑐᖃᕐᐳᖅ ᓯᑭᒻᒥᑦ ᓮᓗᐊᒥᓪᓗ ᓴᒥᐊᕆᐊᒥᓪᓗ, ᐅᓐᖏᔭᕐᓯᒪᓪᓗᑎᒃ, ᐊᓐᓄᕌᑎᒡᓗ ᐊᓕᒃᑐᕐᓯᒪᓪᓗᒋᑦ ᑭᓪᓕᐊᓯᒪᓪᓗᑎᒡᓗ, ᓂᐊᖂᔭᒃᓴᒥᒃ ᑎᐱᑦᓯᐊᕆᒃᑐᒥᒡᓗ ᓇᒃᓴᕐᓗᑎᒃ ᑐᒃᓯᐊᕐᕕᒃᔪᐊᒥ ᑐᓂᕐᕈᓯᐅᑎᔭᒃᓴᒥᖕᓂᒃ.

⁶ ᐃᓯᒥᐅᓕᐅᑉ ᓂᑕᓁᐊᐅᑉ ᐃᕐᓂᖓᑕ ᑲᑎᔭᕐᑐᕐᐰᑦ ᒥᔅᐸᒥᑦ, ᕿᐊᓪᓗᓂᓗ ᑎᑭᓐᓇᒥᒋᑦ ᐅᖃᐅᑎᕔᑦ, “ᕾᓕᕆᑦᓯ ᒋᑕᓔᐊ ᐊᕼᐂᑲᐅᑉ ᐃᕐᓂᖓ ᑕᑯᔭᕐᑐᕐᓗᒍ.”

⁷ ᐃᒡᓗᒐᓴᒡᔪᐊᓪᓕ ᐊᕙᓗᕐᔪᐊᖏᑕ ᐃᓗᐊᓃᓕᕋᒥᒃ ᐃᓯᒥᐅᓕᐅᑉ ᓂᑕᓁᐊᐅᑉ ᐃᕐᓂᖓᑕ ᐱᖃᑎᒋᔭᖏᑕᓗ ᑐᖁᓪᓗᒋᑦ ᐃᒥᕐᑕᕐᕕᖕᒧᑦ ᐴᖅᑲᕐᐰᑦ ᑎᒥᕕᓂᖏᑦ.

⁸ ᐊᖑᑎᓪᓕ ᖁᓖᑦ ᑖᒃᑯᓇᓂ ᐃᓚᒋᔭᐅᔪᑦ ᐃᓯᒥᐅᓕ ᐅᖃᐅᑎᕚᑦ, “ᑐᖁᑦᑍᓕᑎᒍᑦ, ᐸᐅᕐᖓᒃᓴᓂᒃ ᐱᕈᕐᑐᓂᒡᓗ ᐅᕐᓱᒃᓴᓕᖕᓂᒃ, ᕼᐊᓂᒥᒡᓗ ᐃᔨᕐᓯᓯᒪᒐᑦᑕ ᐱᕈᕐᓰᕕᖕᓂ.” ᑕᕝᕙ ᑐᖁᑦᓱᓐᓃᕐᐰᑦ.

⁹ ᐃᒥᕐᑕᕐᕕᒃ ᐃᓯᒥᐅᓕᐅᑉ ᑎᒥᕕᓂᕐᓂᒃ ᐴᖅᑬᕕᒋᔭᖓ ᐊᖏᓂᕐᐹᖑᓚᐅᕐᐳᖅ ᐃᒥᕐᑕᕐᕕᓕᐊᕆᔭᐅᓯᒪᔪᓂᑦ ᐊᖓᔪᖅᑳᕐᔪᐊᑉ ᐂᓴᐅᑉ ᐃᒥᕐᑕᕐᕕᓕᐊᕆᔭᕕᓂᖓ ᐅᓇᑕᕆᐊᕐᑕᐅᓯᒪᓪᓗᓂ ᐊᖓᔪᖅᑳᕐᔪᐊᕐᒧᑦ ᐹᓴᒧᑦ ᐃᓯᒥᐅᓕᐅᑉ ᓂᑕᓁᐊᐅᑉ ᐃᕐᓂᖓᑕ ᐃᒥᕐᑕᕐᕕᒃ ᑕᑕᑎᑉᐹ ᑎᒥᕕᓂᕐᓂᒃ.

¹⁰ ᐊᖓᔪᖅᑳᕐᔪᐊᓪᓗ ᐸᓂᖏᑦ ᑎᒍᔭᐅᑎᑉᐰᑦ ᐃᓄᑐᐃᓐᓁᓪᓗ ᒥᔅᐸᒦᑦᑐᑦ, ᓂᐳᔭᕋᑕᐅᑉ ᑲᒪᒋᔭᐅᑎᓕᓚᐅᕐᑕᖏᑦ ᐊᖓᔪᖅᑳᒧᑦ ᒋᑕᓔᐊᒧᑦ ᐊᕼᐂᑲᐅᑉ ᐃᕐᓂᖓᓄᑦ, ᐃᓯᒥᐅᓕᐅᑉ ᓂᑕᓁᐊᐅᑉ ᐃᕐᓂᖓᑕ ᑎᒍᔭᐅᑎᓪᓗᓂᒋᑦ ᐊᐅᓪᓚᕈᑎᓕᕐᐰᑦ ᓄᓇᐅᑉ ᐊᒧᓁᑎᐅᑉ ᓇᓛᓄᑦ.

¹¹ ᔪᕼᐋᓇᓐ ᑲᕆᐊᑉ ᐃᕐᓂᖓ ᐅᓇᑕᕐᑐᒃᓮᓪᓗ ᐊᖓᔪᖅᑳᖏᑦ ᑐᓴᐅᒪᓕᕐᐳᑦ ᐃᓯᒥᐅᓕᐅᑉ ᓂᑕᓁᐊᐅᑉ ᐃᕐᓂᖓᑕ ᐃᓄᐊᕐᓯᓂᖓᓂᒃ.

¹² ᐃᓯᒥᐅᓕᓗ ᓂᑕᓁᐊᐅᑉ ᐃᕐᓂᖓ ᒪᓕᒃᓴᕋᒥᑦᔪᒃ, ᐊᖑᕚᑦ ᒋᐱᐅᓂᒥ ᑕᓯᐅᑉ ᓴᓂᐊᓂ.

¹³ ᐃᓯᒥᐅᓕᐅᓪᓕ ᑎᒍᓯᒪᔭᖏᑕ ᔪᕼᐋᓇᓂᒃᑯᑦ ᑲᕆᐊᑉ ᐃᕐᓂᖏᑦ ᕾᔪᑦ ᑕᑯᓕᕋᒥᑦᔪᒃ ᖁᕕᐊᓱᓚᐅᕐᐳᑦ.

¹⁴ ᐃᓄᓕᒫᓪᓗ ᐃᓯᒥᐅᓕᐅᑉ ᑎᒍᓚᐅᕐᑕᖏᑦ ᐊᐅᓪᓚᕈᑎᓪᓗᒋᑦ ᒥᔅᐸᒥᑦ ᐅᑎᕆᐊᕋᒥᒃ ᐅᑎᓚᐅᕐᐳᑦ, ᔪᕼᐋᓇᓂᒃᑯᓐᓄᓪᓗ ᑲᕆᐊᑉ ᐃᕐᓂᖏᓐᓄᑦ ᐅᐸᒍᑎᓪᓗᑎᒃ.

¹⁵ ᐃᓯᒥᐅᓕ ᓂᑕᓁᐊᐅᑉ ᐃᕐᓂᖓ ᐊᖑᑎᓪᓗ ᐃᓚᒋᔭᖏᑦ 8ᖑᓪᓗᑎᒃ ᕿᒪᒃᓯᖕᒪᑕ ᔪᕼᐋᓇᓂᒃᑯᓐᓂᑦ ᐱᔭᐅᓐᖏᓚᑦ, ᐊᒧᓁᑎᒥᐅᓪᓗ ᓄᓇᖓᓄᐊᕐᓗᑎᒃ.

¹⁶ ᔪᕼᐋᓇᓂᒃᑯᓪᓕ ᑲᕆᐊᑉ ᐃᕐᓂᖓᑕ ᐃᓚᒋᔭᖏᑕᓗ ᐊᖓᔪᖅᑳᖑᔪᑦ ᐃᓯᒥᐅᓕᒃᑯᑦ ᓂᑕᓁᐊᐅᑉ ᐃᕐᓂᖓᑕ ᑎᒍᓯᒪᔭᕕᓂᖏᑦ ᒥᔅᐸᒥᑦ ᐱᕔᑦ, ᑖᒃᑯᐊ ᐊᐅᓪᓚᕈᑎᓚᐅᕐᑕᖏᑦ ᒋᑕᓔᐊᒥᒃ ᐊᕼᐂᑲᐅᑉ ᐃᕐᓂᖓᓂᒃ ᑐᖁᑦᓯᓪᓗᑎᒃ ᐅᓇᑕᕐᑎᖁᑎᖏᓐᓂᒡᓗ ᐊᕐᓇᓂᒃ ᓄᑕᖅᑲᓂᒡᓗ ᐊᖓᔪᖅᑳᓪᓗ ᐊᖑᑎᖁᑎᖏᓐᓂᒃ ᐃᒡᔪᐃᕐᑕᐅᓯᒪᔪᓂᒃ, ᑖᒃᑯᐊ ᔪᕼᐋᓇᓂᐅᑉ ᐅᑎᕐᑎᓚᐅᕐᑕᖏᑦ ᒋᐱᐅᓂᒥᑦ.

¹⁷ ᐊᐅᓪᓚᕋᒥᒃ ᐄᑦᔨᑉᑎᓕᐊᓯᕗᑦ ᒋᐅᕉᓯ ᓯᒻᕼᐋᒻ ᐊᖅᑯᓵᕐᓗᒍ ᐱᑦᓕᐊᒦᑦᑐᖅ.

¹⁸ ᑲᐅᓪᑎᐊᒥᐅᓄᑦ ᐱᔭᐅᓇᓱᐊᕐᓂᐊᕋᓱᒋᒐᒥᒃ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᐅᓚᑦᓯᔨᓐᖑᕐᑎᓚᐅᕐᑕᖓᑦ ᒋᑕᓔᐊ ᐊᕼᐂᑲᐅᑉ ᐃᕐᓂᖓᑕ ᑐᖁᑕᐅᓯᒪᓂᖓ ᐃᓯᒥᐅᓕᒧᑦ ᓂᑕᓁᐊᐅᑉ ᐃᕐᓂᖓᓄᑦ ᐱᑦᔪᑎᒋᓪᓗᒍ.