ᔨᕆᒤᐊᐅᑉ ᐊᒡᓚᖏᑦ 39 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕉᓴᓕᐅᑉ ᓵᓚᒋᔭᐅᓂᖓ

¹ ᐃᒫᒃ ᑕᕝᕙ ᔨᕉᓴᓕᒻ ᐱᔭᐅᓚᐅᕐᐳᖅ ᔨᑎᑬᐊᐅᑉ ᐊᖓᔪᖅᑳᕐᔪᐊᖑᓂᖓᑕ ᔫᑕᒥᐅᓄᑦ 9ᖓᓐᓂ ᑕᖅᑮᑦ 10ᒋᓕᕐᑕᖓᓐᓂ, ᓂᐱᑯᓁᓴ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑕ ᐅᓇᑕᕐᑐᒃᓴᖁᑎᓕᒫᖏᑦ ᔨᕉᓴᓕᒧᑦ ᐅᓇᑕᕆᐊᓚᐅᕐᐳᑦ ᐊᕙᑕᖏᕐᓯᒪᓕᓚᐅᕐᐹᓪᓗ.

² ᔨᑎᑬᐊᐅᑉ ᐊᖓᔪᖅᑳᕐᔪᐊᖑᓂᖓᑕ 11ᒋᓕᕐᑕᖓᓂ ᑕᖅᑮᑦ ᓯᑕᒪᖓᓐᓂ ᐅᓪᓗᖏᑕ 9ᒋᓕᕐᑕᖓᓐᓂ ᔨᕉᓴᓕᐅᑉ ᐊᕙᓗᕐᔪᐊᖓ ᑭᓚᒃᑕᐅᕗᖅ ᐃᓗᒻᒧᑦ.

³ ᔨᕉᓴᓕᐅᑉ ᐱᔭᐅᑦᔪᑖᓂ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᖓᔪᖅᑳᖁᑎᖏᑦ ᐃᓂᑖᕐᑐᓚᐅᕐᐳᑦ ᐃᑎᕐᑕᕐᕕᐅᑉ ᕿᑎᖓᓃᑦᑐᒥᒃ ᑍᔭᐅᔪᒥ ᐅᑯᐊ; ᓂᕐᒐᐅᓪ-ᓴᕆᔨᕆ, ᓴᒪᒐᕆ-ᓂᐳ, ᓴᕐᓯᑭᒻ ᕌᑉᓴᕆᔅ, ᓂᕐᒐᐅᓪᓴᕆᔨᕆ ᕌᑉᒪᒡ, ᑖᒃᑯᐊᓗ ᐊᓯᖏᑦ ᐊᖓᔪᖅᑳᖁᑎᒋᔭᐅᖕᒥᔪᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ.

⁴ ᐊᖓᔪᖅᑳᕐᔪᐊᑉ ᔨᑎᑬᐊᐅᑉ ᐅᓇᑕᕐᑎᖁᑎᖏᑕᓗ ᑕᑯᒐᒥᑦᔪᒃ ᕿᒫᕗᑦ ᐅᓐᓄᐊᒃᑯᑦ ᐊᖓᔪᖅᑳᕐᔪᐊᑉ ᐱᕈᕐᓰᕕᖁᑎᖓ ᐊᓂᕕᒋᓪᓗᒍ ᐊᕙᓗᕐᔪᐊᒃ ᒪᕐᕉᒃ ᐃᑎᕐᑕᕐᕕᖓᒍᑦ ᐊᕌᐸᐅᑉ ᓄᓇᖓ ᑐᕌᕐᕕᒋᓪᓗᒍ.

⁵ ᑲᐅᓪᑎᐊᒥᐅᓪᓕ ᐅᓇᑕᕐᑐᒃᓴᖁᑎᖏᑕ ᒪᓕᒃᑲᒥᑦᔪᒃ ᔨᑎᑬᐊ ᐊᖑᕚᑦ ᔨᕆᑰᑉ ᓇᑎᕐᓈᖑᓂᖓᓂ, ᑎᒍᒐᒥᑦᔪᒡᓗ ᐋᑉᐹᑦ ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᕆᑉᓚᒦᑎᓪᓗᒍ ᕼᐊᒫᑎᐅᑉ ᓄᓇᖓᓂ ᔨᑎᑬᐊᓗ ᑐᖁᑕᒃᓴᐅᖁᕚᑦ.

⁶ ᑕᕝᕙᓃᓪᓗᑎᒃ ᓱᓕ ᕆᑉᓚᒥ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᔨᑎᑬᐊᐅᑉ ᐃᕐᓂᖏᑦ ᑐᖁᑕᐅᑎᑉᐰᑦ ᔨᑎᑬᐊ ᑕᑯᓐᓇᕐᑎᓪᓗᒍ ᔫᑕᒥᐅᓪᓗ ᐊᖓᔪᖅᑳᖁᑎᖏᑦ.

⁷ ᔨᑎᑬᐊᐅᓪᓗ ᐃᔨᖏᒃ ᖃᕐᑕᐅᑎᑉᐹᒃ ᐊᑦᓱᖏᕐᑕᐅᑎᓪᓗᒍᓗ ᐊᕐᓵᕐᑑᔭᓄᑦ ᐹᐱᓘᓂᒧᑦ ᐊᖏᕐᕋᐅᑎᔪᒪᓪᓗᒍ.

⁸ ᑲᐅᓪᑎᐊᒥᐅᓪᓗ ᐊᖓᔪᖅᑳᕐᔪᐊᑉ ᐃᒡᓗᖓ ᐃᑯᐊᓪᓚᒃᐹᑦ ᐃᓄᐃᓪᓗ ᐃᒡᓗᖏᑦ, ᔨᕉᓴᓕᐅᓪᓗ ᐊᕙᓗᕐᔪᐊᖏᑦ ᓯᖁᑦᑎᕐᓗᒋᑦ.

⁹ ᓂᐳᔭᕋᑕᓐ ᐊᖓᔪᖅᑳᕐᔪᐊᑉ ᐅᓇᑕᕐᑎᖁᑎᖏᑕ ᐊᖓᔪᖅᑳᖓᑦ ᐃᒡᓗᒐᓴᒡᔪᐊᓂ ᐊᒥᐊᒃᑰᔪᑦ ᑎᒍᓪᓗᓂᒋᑦ ᐊᐅᓪᓚᕈᑎᓚᐅᕐᐰᑦ ᐹᐱᓘᓂᒧᑦ ᐃᓚᒋᓪᓗᒋᑦ ᐃᒻᒥᖕᓂᒃ ᑐᓂᑦᔪᑎᒋᓚᐅᕐᑐᑦ ᑖᑦᓱᒧᖓ.

¹⁰ ᓂᐳᔭᕋᑕᓐᓕ ᐅᓇᑕᕐᑎᓄᑦ ᐊᖓᔪᖄᖑᔪᖅ ᕿᒤᓚᐅᕐᐳᖅ ᔫᑕᒥᐅᓂᒃ ᐊᔪᕐᓴᕐᑐᓂᒃ ᑭᓱᖁᑎᖃᐅᖏᑦᑐᓂᒃ, ᑍᑦᓱᒪᓕ ᑕᕝᕙ ᓄᓇᖁᑎᑖᕐᑐᕐᑎᓚᐅᕐᐰᑦ ᕔᓂᓕᒃᓴᓂᒡᓗ ᐱᕈᕐᓰᕕᒃᑖᑎᓪᓗᒋᑦ.

ᔨᕆᒤᐊᐅᑉ ᑎᒍᔭᐅᓯᒪᔪᓐᓃᕐᑎᑕᐅᓂᖓ

¹¹ ᓂᐱᑯᓁᓴᓕ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᐊᖓᔪᖅᑳᖁᑎᒥᓂᒃ ᓂᐳᔭᕋᑕᓐᒥᒃ ᐊᖅᑯᑎᖃᕐᓗᓂ ᐱᖁᔨᑦᔪᑎᓕᐅᕐᐳᖅ ᔨᕆᒤᐊ ᐱᑦᔪᑎᒋᓪᓗᒍ ᐃᒫᒃ:

¹² “ᔨᕆᒤᐊ ᐱᒍᑦᓯᐅᒃ ᑲᒪᒋᑦᓯᐊᕐᓂᐊᕐᐸᓯ ᐱᔪᒪᔭᖏᓐᓂᒡᓗ ᐱᑎᑕᐅᓂᐊᕐᐳᖅ.”

¹³ ᓂᐳᔭᕋᑕᓐ ᐊᖓᔪᖅᑳᖑᓂᕐᐹᖑᔪᖅ ᓂᐳᓴᔭᐸᓐᓗ ᐊᖓᔪᖅᑳᖑᖕᒥᔪᖅ, ᓂᕐᒐᐅᓪᓴᕆᔨᕆᓗ ᐊᖓᔪᖅᑳᒻᒪᕆᐅᖃᑕᐅᖕᒥᔪᖅ ᐊᓯᖏᓪᓗᑦᑕᐅᖅ ᐊᖓᔪᖅᑳᖑᖕᒥᔪᑦ ᐹᐱᓘᓂᒥ.

¹⁴ ᔨᕆᒤᐊ ᑎᒍᔭᐅᓯᒪᕕᒋᔭᖓᓂᑦ ᐊᓂᑎᓪᓗᒍ, ᒋᑕᓔᐊᒧᑦ ᐊᕼᐂᑲᒥᐅᑉ ᐃᕐᓂᖓᓄᑦ ᑲᒪᒋᔭᐅᑎᑉᐹᑦ ᓴᕙᓂᐅᑉ ᐃᕐᖑᑕᖓᓄᑦ, ᑖᑦᓱᒧᖓᓗ ᐊᖏᕐᕋᕐᑎᑕᐅᕗᖅ ᐃᓅᖃᑎᒥᓃᖁᓪᓗᒍ.

ᐃᐱᒥᓕᑭᐅᑉ ᓂᕆᐅᒋᔭᒃᓴᕐᑖᕐᑎᑕᐅᓂᖓ

¹⁵ ᔨᕆᒤᐊᓕ ᑎᒍᔭᐅᓯᒪᕕᖕᒥᓃᑎᓪᓗᒍ ᓱᓕ ᐊᑕᓂᕐᒧᑦ ᐅᖃᕐᕕᐅᓚᐅᕐᐳᖅ.

¹⁶ ᐃᐱᑦ-ᒥᓕᑭ ᐃᑎᐅᐱᐊᒥᐅᑕᖅ ᐅᐸᒡᓗᒍ ᐅᖃᐅᑎᔭᕐᑐᕈᒃ ᐃᒫᒃ; ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ: “ᐅᖃᐅᓯᕆᓚᐅᕐᑕᒃᑲ ᐃᒡᓗᒐᓴᒡᔪᐊᑦ ᑖᒃᑯᐊ ᐊᓯᕈᕐᑕᐅᔪᒫᕐᓂᕋᕐᓗᒋᑦ ᑲᑉᐱᐊᓇᕐᑐᒃᑯᑦ ᐱᔪᓐᓇᑦᓯᐊᕐᓂᒃᑰᖏᑦᑐᖅ ᒫᓐᓇ ᓇᓚᐅᑦᓯᑎᓐᓂᐊᓕᕐᐸᒃᑲ ᓇᓚᐅᑦᓯᓕᕐᓂᖏᓪᓗ ᑕᑯᓂᐊᓕᕐᐸᓯ.

¹⁷ ᐅᕙᖓᓕ ᐅᓪᓗᖅ ᑍᓐᓇ ᓇᓪᓕᐅᑎᒃᐸᑦ ᓴᐳᑎᔪᒪᕙᒋᑦ, ᐊᑕᓂᖅ ᐅᖃᕐᐳᖅ, ᑲᑉᐱᐊᒋᔭᕐᓄᑦ ᑎᒍᔭᐅᔪᒫᓐᖏᓚᑎᑦ.

¹⁸ ᐱᐅᓕᓂᐊᕐᐸᒋᑦ, ᐅᓇᑕᕐᑐᓄᑦ ᑐᖁᑕᐅᓂᐊᓐᖏᓚᑎᑦ, ᐃᓅᑎᑕᐅᓂᐊᕐᐳᑎᓪᓕ ᐅᕙᓐᓂᒃ ᐅᒃᐱᕆᔭᖃᕋᕕᑦ, ᐊᑕᓂᖅ ᐅᖃᕐᐳᖅ.”