ᔨᕆᒤᐊᐅᑉ ᐊᒡᓚᖏᑦ 27 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕆᒤᐊᐅᑉ ᐊᑐᕐᓂᖓ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᑕ ᐊᓄᖓᓂᒃ

¹ ᔨᑎᑬᐊ ᐊᖓᔪᖅᑳᕐᔪᐊᖑᓕᓵᕐᑎᓪᓗᒍ ᔫᑕᒥ ᔫᓮᐊᐅᑉ ᐃᕐᓂᖓ, ᐊᑕᓂᐅᑉ ᔨᕆᒤᐊ ᐅᖃᕐᕕᒋᕚ.

² ᐃᒫᒃ ᐊᑕᓂᐅᑉ ᐅᖃᕐᕕᒋᕚᖓ, “ᐃᖃᕐᑎᐅᔭᕐᒥᒃ ᐊᓄᓕᐅᕆᑦ ᕿᔪᖕᒥᒡᓗ ᐃᑳᖓᔪᒃᓴᓕᐅᕐᓗᒍ ᖁᖓᓯᕐᓄᓪᓗ ᐊᑎᓗᒍ.

³ ᐅᖃᕆᐊᕐᑐᓕᕆᑦ ᐊᖓᔪᖅᑳᕐᔪᐊᓄᑦ ᐄᑐᒥ, ᒧᐊᐱᒥ, ᐋᒪᓐᒥ, ᑍᕆᒥ, ᓮᑐᓂᒥᓗ ᐱᔨᑦᓯᕐᑎᖏᑦ ᐊᖅᑯᑎᒋᓗᒋᑦ ᔨᕉᓴᓕᒧᑦ ᑎᑭᓯᒪᔪᑦ ᔫᑕᒥᐅᑦ ᐊᖓᔪᖅᑳᕐᔪᐊᖓᓂᒃ ᔨᑎᑬᐊᒥᒃ ᑕᑯᔭᕐᑐᕐᓯᒪᔪᑦ.

⁴ ᐊᖓᔪᖅᑳᖏᓐᓄᑦ ᐅᖃᐅᓯᒃᓴᒡᒋᕐᑎᒃᑭᑦ ᐅᖃᐅᑎᓗᒋᓪᓗ, ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᑕᒪᓐᓇ ᐊᖓᔪᖅᑳᑦᓯᓐᓄᑦ ᐅᖃᐅᓯᕆᓯᐅᒃ.

⁵ ᐱᔪᓐᓇᕐᓂᕐᔪᐊᓐᓄᑦ ᐊᐅᓚᑦᓯᓂᓐᓄᓪᓗ ᓄᓇ ᓴᓇᓚᐅᕐᐸᕋ ᐃᓄᖏᓪᓗ ᐆᒪᔪᖏᓪᓗᑦᑕᐅᖅ, ᑐᓂᑦᔪᑎᒋᓪᓗᒋᓪᓗ ᑐᓂᑦᔪᑎᒋᔪᒪᔭᓐᓄᑦ.

⁶ ᓄᓇᖁᑎᓕᒫᓯᓗ ᑐᓂᑦᔪᑎᒋᔪᒪᓕᕐᐸᒃᑲ ᐱᔨᒋᔭᓐᓄᑦ ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᐆᒪᔪᑦ ᐊᒡᓛᑦ ᑖᑦᓱᒥᖓ ᐊᖓᔪᖅᑳᖃᕐᑎᑦᓱᒪᕙᒃᑲ.

⁷ ᐃᓅᖃᑎᒌᒡᔪᐊᓪᓗ ᐱᔨᑦᓯᕈᒫᕐᐹᑦ, ᐃᕐᓂᖏᓪᓗ ᐃᕐᖑᑕᖏᓪᓗᑦᑕᐅᖅ ᓇᖕᒥᓂᖅ ᐅᕐᕈᕕᒃᓴᖓ ᑎᑭᓚᐅᖅᑳᕐᑎᓐᓇᒍ, ᑭᖑᓂᖓᒍᓪᓗᑦᑕᐅᖅ ᐊᓯᒥᓄᑦ ᐊᐅᓚᑕᐅᓕᕈᒫᕆᕗᖅ ᐱᔪᓐᓇᕐᓂᖃᕐᓂᕐᓴᐅᔪᓄᑦ.

⁸ “ᐃᓅᖃᑎᒌᒡᔪᐊᖑᔪᓪᓕ ᐊᐅᓚᑕᐅᓕᕈᒪᓂᐊᖏᑉᐸᑕ ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑖᒃᑯᐊ ᓱᒋᐊᕐᑕᐅᑎᑦᓱᒫᕐᐸᒃᑲ ᐅᓇᑕᕐᓂᕐᒧᑦ, ᑳᖕᓇᕐᑐᕐᔪᐊᒧᑦ ᐋᓐᓂᐊᓇᕐᑐᓄᓪᓗ ᐊᓯᕈᕐᑕᐅᖏᓐᓂᓕᒫᖏᓐᓂ ᓂᐱᑯᓁᓴᐅᑉ ᐱᔪᓐᓇᕐᓂᖓᓄᑦ.

⁹ ᓈᓚᒃᑕᕐᓴᕆᓐᖏᓚᓯ ᓇᓚᐅᑦᑍᔪᖁᑎᓯ, ᓇᓗᓇᕐᑐᓂᒃ ᖃᐅᔨᒪᓇᓱᐊᕐᑎᖁᑎᓯ, ᓯᓐᓇᒃᑐᓂᒡᓗ ᑐᑭᓯᐅᒪᓇᓱᐊᕐᑎᖁᑎᓯ, ᐊᓂᕐᓂᓕᕆᔨᖁᑎᓯ, ᐊᖓᒃᑯᖁᑎᓯᓗ ᐅᖃᕐᐸᒃᑐᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᐱᔨᑦᓯᕈᒪᖏᓐᓂᕅᓪᓗᑎᒃ ᐃᓕᑦᓯᓐᓂᒃ.

¹⁰ ᓇᓚᐅᑦᑍᓂᖏᑦ ᓱᓕᖏᒻᒪᑕ ᓄᓇᒋᔭᑦᓯᓐᓂ ᐊᐅᓪᓚᕈᑦᔭᐅᑦᔪᑎᒋᔪᒫᕐᐸᓯ ᐅᖓᓯᒃᑐᒧᑦ, ᖁᔭᓈᕐᓯᔪᒫᕋᒪ ᐃᓕᑦᓯᓐᓂᒃ ᐊᓯᕈᕈᑎᒋᔪᒫᕐᐸᓯᓗ ᑕᒪᓐᓇ.

¹¹ ᐃᓅᖃᑎᒌᒡᔪᐊᖑᔪᓪᓕ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᐅᓚᑦᓯᓂᖓᓄᑦ ᐊᐅᓚᑕᐅᔪᒪᔪᑦ ᓄᓇᑐᖃᕐᒥᖕᓂᑦ ᓄᓇᖃᕐᓂᐊᕐᐳᑦ ᐱᔨᑦᓯᕐᓗᒍᓗ ᐃᓅᕕᒋᓂᐊᕐᐹᑦ, ᐊᑕᓂᖅ ᐅᖃᕐᐳᖅ.”

¹² ᑍᒫᑦᓮᓐᓇᖅ ᔨᑎᑬᐊ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ ᐅᖃᐅᑎᓚᐅᕆᕙᕋ, ᐅᖃᕐᓗᖓᓗ, “ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐊᐅᓚᑕᐅᔪᒃᓴᐅᕗᑎᑦ ᐱᔨᑦᓯᕐᓗᒍᓗ ᑕᕝᕙ ᐃᓅᓂᐊᕐᐳᑎᑦ.

¹³ ᓱᖕᒪᓪᓕ ᐃᓄᖁᑎᓯ ᐅᓇᑕᕐᑐᓄᑦ ᑐᖁᑕᐅᔪᒃᓴᐅᕚᑦ? ᑳᖕᓇᕐᑐᕐᔪᐊᒧᓪᓘᓐᓃᑦ ᐋᓐᓂᐊᓇᕐᑐᓄᓪᓘᓐᓃᑦ ᐊᑕᓂᐅᑉ ᐊᑑᑎᓂᐊᕐᓂᕋᕐᑕᖏᓐᓄᑦ ᐹᐱᓘᓂᐅᑉ ᐊᖓᔪᖅᑳᕐᔪᐊᖓᓐᓄᑦ ᐊᐅᓚᑕᐅᔪᒪᖏᑦᑐᓅᑦ ᐃᓅᖃᑎᒌᒡᔪᐊᓄᑦ?

¹⁴ ᓇᓚᐅᑦᑍᔪᑦ ᓈᓚᒃᑍᓕᓯᐅᒃ ᐅᖃᐅᑦᔨᖃᑦᑕᕐᑐᑦ ᐊᐅᓚᑕᐅᓕᕐᑐᒃᓴᐅᖏᓐᓂᕋᕐᓗᑎᒃ ᐹᐱᓘᓂᐅᑉ ᐊᖓᔪᖅᑳᕐᔪᐊᖓᓐᓄᑦ, ᑖᒃᑯᐊ ᓱᓕᖏᑦᑐᒥᒃ ᐅᖃᐅᓯᖃᕐᐳᑦ.

¹⁵ ᑖᒃᑯᐊ ᑎᓕᓯᒪᓐᖏᓚᒃᑲ ᐃᓕᑦᓯᓐᓄᑦ, ᐊᑕᓂᖅ ᐅᖃᕐᐳᖅ, ᓱᓕᖏᑦᑐᒥᒃ ᐊᑎᕋ ᐊᑐᕐᓗᒍ ᐅᖃᖃᑦᑕᕐᐳᑦ, ᑍᒤᒻᒪᑦ ᖁᔭᓈᕈᑦᓯ ᐊᓯᕈᕐᑕᐅᔪᒫᕐᐳᓯ, ᓇᓚᐅᑦᑍᔪᖁᑎᓯᓗ ᐃᓕᑦᓯᓐᓂᒃ ᐅᖃᐅᑦᔪᐃᖃᑦᑕᕐᑐᑦ.

¹⁶ “ᑐᓂᕐᕈᓯᕐᑎᑦᓯᔨᓄᑦ ᐃᓄᖕᓄᓪᓗ ᐅᖃᓕᕐᐳᖓ, ᐃᒫᒃ ᐊᑕᓂᖅ ᐅᖃᕐᐳᖅ, ᓇᓚᐅᑦᑍᔪᑦ ᓈᓚᒃᑍᓕᓯᒋᒃ ᐅᖃᖃᑦᑕᕐᑐᑦ, ‘ᐊᑕᓂᐅᑉ ᐃᒡᓗᖓᑕ ᐱᖁᑎᖏᑦ ᐅᑎᕐᑎᑕᐅᔪᒫᕐᐳᑦ ᐹᐱᓘᓂᒥᑦ,’ ᓱᓕᖏᓪᓗᑎᒃ ᑍᒤᓕᐅᕐᐳᑦ.

¹⁷ ᓈᓚᒃᑍᓕᓯᒋᒃ ᐹᐱᓘᓂᐅᑉ ᐊᖓᔪᖅᑳᕐᔪᐊᖓ ᐱᔨᑦᓯᕈᑦᓯᐅᒃ ᑕᕝᕙ ᐃᓅᓂᐊᕐᐳᓯ ᓱᖕᒪᑦ ᑖᒃᑯᐊ ᐃᒡᓗᒐᓴᒡᔪᐊᑦ ᓄᓇᓕᕕᓂᑐᐃᓐᓇᐅᓕᖁᕕᓯᐅᒃ?

¹⁸ ᓇᓚᐅᑦᑍᔫᒍᑎᒃ ᐊᑕᓂᕐᒥᓪᓗ ᐅᖃᐅᓯᒃᓴᖃᕐᑎᑕᐅᒍᑎᒃ, ᐊᑏ ᐊᑕᓂᕐᒧᑦ ᐊᔪᒐᖃᖏᑦᑐᒧᑦ ᕿᓄᑦᔪᑎᖃᓚᐅᕐᓕᑦ ᐊᑕᓂᐅᑉ ᐃᒡᓗᖓᑕ ᐱᖁᑎᖏᓐᓂᒃ ᐊᐅᓪᓚᕈᑦᔭᐅᖁᔨᖏᓪᓗᑎᒃ ᔫᑕᐅᑉ ᐊᖓᔪᖅᑳᕐᔪᐊᖃᕐᕕᖓᓂᑦ ᔨᕉᓴᓕᒥᓪᓗ ᐹᐱᓘᓂᒧᑦ.

¹⁹ “ᐃᒫᒃ ᐊᑕᓂᖅ ᐅᖃᐅᓯᒃᓴᖃᕐᐳᖅ, ᓇᐸᔪᑦ ᐱᓪᓗᒋᑦ, ᑕᓯᓕᐊᕆᓯᒪᔪᕐᓗ ᐱᓪᓗᒍ, ᐃᑯᕐᕅᓪᓗ ᐊᓯᖏᓪᓗ ᐱᖁᑎᑦ ᐃᒡᓗᒐᓴᒡᔪᐊᓂ ᐊᒥᐊᒃᑰᔪᑦ,

²⁰ ᓂᐱᑯᓁᓴᐅᑉ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᐅᓪᓚᕈᑎᓚᐅᓐᖏᑕᖏᑦ ᐊᐅᓪᓚᕈᑦᔨᓕᕐᓗᓂ ᔨᕼᐅᐃᐊᑭᒥᒃ ᔨᕉᓴᓕᒥᑦ ᐱᔭᐅᑎᓪᓗᒋᑦ, ᐅᑯᐊ ᔨᕼᐅᐃᐊᑭᐅᑉ ᔫᑕᐅᑉ ᐊᖓᔪᖅᑳᕐᔪᐊᖓᑦᑕ ᐃᕐᓂᖓ ᔨᑯᓁᐊ ᐊᖓᔪᖅᑳᖁᑎᓕᒫᖏᓪᓗ ᐃᓚᒋᓗᒋᑦ.

²¹ “ᑍᒫᒃ ᑕᕝᕙ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐊᑕᓂᐅᑉ ᐃᒡᓗᖓᑕ ᐱᖁᑎᖏᑦ ᐊᒥᐊᒃᑰᔪᑦ ᐱᑦᔪᑎᒋᓪᓗᒋᑦ ᔫᑕᒥᐅᑦ ᔨᕉᓴᓕᒥᐅᓪᓗ ᐊᖓᔪᖅᑳᕐᔪᐊᖃᕐᕕᖓᓃᑦᑐᑦ;

²² ᐊᐅᓪᓚᕈᑦᔭᐅᔪᒫᕐᒪᑕ ᐹᐱᓘᓂᒧᑦ ᑍᑲᓃᖏᓐᓇᓕᕐᓗᑎᒡᓗ ᐂᔭᐅᑎᑦᓯᖄᕐᑎᓐᓇᖓ ᑖᒃᑯᓂᖓ, ᐊᑕᓂᖅ ᐅᖃᕐᐳᖅ, ᐃᓂᒋᔭᖏᓐᓄᑦ ᐅᑎᕐᑎᑦᓱᒫᕐᐸᒃᑲ ᑕᒪᐅᖓ.”