ᔨᕆᒤᐊᐅᑉ ᐊᒡᓚᖏᑦ 24 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᕕᐅᔮᒃ ᒪᕐᕉᒃ ᐱᒋᓕᖕᓂᒃ ᐃᓗᓕᓖᒃ

¹ ᐊᖓᔪᖅᑳᕐᔪᐊᖅ ᔨᑯᓁᐊ ᔨᕼᐅᐃᐊᑭᐅᑉ ᐃᕐᓂᖓ ᔫᑕᒥᐅᓄᑦ ᐊᖓᔪᖅᑳᕐᔪᐊᖅ ᐊᖓᔪᖅᑳᖁᑎᖏᓪᓗ ᕿᔪᓕᕆᔨᖏᑦ ᓴᕕᕋᔭᓕᕆᔩᓪᓗ ᐊᐅᓪᓚᕈᑦᔭᐅᓯᒪᔪᐃᓐᓇᐅᓕᕐᑎᓪᓗᒋᑦ ᔨᕉᓴᓕᒥᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᓂᐱᑯᓁᓴᒧᑦ, ᐊᑕᓂᐅᑉ ᑕᑯᑎᓚᐅᕐᐹᖓ: ᑕᑯᒋᑦ, ᐃᕕᐅᔮᒃ ᒪᕐᕉᒃ ᐱᒋᓕᖕᓂᒃ ᐃᓗᓕᓖᒃ ᑐᒃᓯᐊᕐᕕᒡᔪᐊᑉ ᓯᕗᕌᓃᑦᑑᒃ.

² ᓯᕗᓪᓕᖅ ᐃᕕᒐᖅ ᐱᒋᓕᒃᑕᖃᕐᐳᖅ ᐱᐅᔪᓂᒃ ᐱᕈᑲᐅᑎᒋᔪᕕᓂᕐᑎᑐᑦ ᑍᒤᑦᑐᓂᒃ, ᐃᕕᐅᔭᐅᓪᓕ ᐂᑉᐸᖓ ᐱᒋᓕᒃᑕᖃᕐᐳᖅ ᐱᐅᔪᓐᓃᕐᓂᑯᓂᒃ, ᐱᐅᓐᖏᓗᐊᒧᑦ ᓂᕆᔭᒃᓴᐅᔪᓐᓃᕐᑐᓂᒃ.

³ ᐊᑕᓂᐅᓪᓗ ᐅᖃᐅᑎᕚᖓ, “ᔨᕆᒤᐊ, ᓱᓇᓂᒃ ᑕᑯᕕᑦ?” ᐅᖃᕐᐳᖓ, “ᐱᒋᓕᖕᓂᒃ ᐱᐅᔪᓂᒃ ᐊᒃᓱᐊᓗᒃ ᐱᐅᔪᓂᒃ, ᐱᒋᓕᖕᓂᒡᓗ ᐱᐅᖏᑦᑐᓂᒃ ᐱᐅᓐᖏᓗᐊᒧᑦ ᓂᕆᔭᒃᓴᐅᔪᓐᓃᕐᑐᓂᒃ.”

⁴ ᑕᕝᕙ ᐊᑕᓂᐅᑉ ᐅᖃᕐᕕᒋᓕᕐᐹᖓ:

⁵ “ᐃᒫᒃ ᐊᑕᓂᖅ ᐅᖃᕐᐳᖅ ᐃᓴᕆᐊᓕᒥᐅᑦ ᒎᑎᖓᑦ, ᐱᐅᔪᑦ ᑖᒃᑯᐊ ᐱᒋᓖᑦ ᐊᑦᔨᐅᕗᑦ ᔫᑕᒥᐅᓄᑦ ᐊᐅᓪᓚᕈᑦᔭᐅᓯᒪᔪᓄᑦ; ᔫᑎᐊᒥᑦ ᐊᐅᓪᓚᕈᑦᔭᐅᑎᓚᐅᕐᐸᒃᑲ ᑲᐅᓪᑎᐊᒥᐅᓄᑦ.

⁶ ᐃᒃᐱᒋᑦᓯᐊᕐᓂᐊᕐᐸᒃᑲ ᐱᐅᔪᒧᑦ, ᐅᑎᕐᑎᑦᓱᒫᕐᒥᒐᒃᑭᑦ ᓄᓇᒧᑦ ᑕᒪᐅᖓ. ᒪᑭᑎᑦᓱᒫᕐᐸᒃᑲ, ᑲᑕᒃᑎᓐᓂᐊᓐᖏᓚᒃᑲᓗ, ᐱᕈᕐᑎᓐᓂᐊᕐᐸᒃᑲ ᓄᓱᖕᓂᐊᓐᖏᓚᒃᑲ.

⁷ ᐆᒻᒪᑎᑖᕐᑎᑦᓱᒫᕐᐸᒃᑲ ᐅᕙᓐᓂᒃ ᖃᐅᔨᖁᓪᓗᒋᑦ ᐊᑕᓂᐅᓂᓐᓂᒃ; ᐃᓄᖁᑎᒋᔪᒫᕐᐸᒃᑲ ᒎᑎᒋᔭᐅᓗᖓᓗ ᑖᒃᑯᓄᖓ, ᐅᕙᓐᓄᑦ ᐅᑎᕈᒫᕐᒪᑕ ᐃᓘᓐᓈᒍᑦ ᐆᒻᒪᑎᒥᒍᑦ ᑐᓂᓯᒪᓕᕐᓗᑎᒃ.

⁸ “ᐊᑕᓂᕐᓕ ᐅᖃᕐᐳᖅ: ᐃᕕᒐᕐᒦᑦᑐᓪᓕ ᐱᒋᓖᑦ ᐱᐅᔪᓐᓃᕐᓯᒪᔪᑦ ᐱᐅᓐᖏᓗᐊᒧᑦ ᓂᕆᔭᒃᓴᐅᔪᓐᓃᕐᑐᑦ, ᐊᑦᔨᖃᕐᐳᑦ ᔫᑕᐅᑉ ᐊᖓᔪᖅᑳᕐᔪᐊᖓᓂᒃ ᔨᑎᑬᐊᒥᒃ, ᐊᖓᔪᖅᑳᖁᑎᖏᓐᓂᒃ ᐊᒥᐊᒃᑰᔪᓂᒡᓗ ᓄᓇᒥ ᔨᕉᓴᓕᒦᖏᓐᓇᕐᑐᓂᒃ, ᐄᑦᔨᑉᑎᒦᖏᓐᓇᕐᑐᓂᒡᓗ.

⁹ ᐃᓅᖃᑎᒋᔪᒥᓇᕈᓐᓃᕐᑎᑦᓱᒪᕙᒃᑲ ᐱᐅᒋᔭᐅᖏᑦᑑᑎᓪᓗᒋᓪᓗ ᐊᖓᔪᖅᑳᕐᔪᐊᖃᕐᕕᐅᔪᓕᒫᓄᑦ ᓄᓇᒥ, ᐱᐅᖏᑦᑐᒥᒃ ᐅᖃᐅᓯᐅᒐᔪᒃᑎᓪᓗᒋᑦ ᐊᑭᕋᕐᑐᕐᑕᐅᒐᔪᒃᑎᓪᓗᒋᓪᓗ ᓇᓂᑐᐃᓐᓇᖅ ᓄᓇᖃᓕᕌᖓᑕ.

¹⁰ ᐅᓇᑕᒐᐅᑎᑦᓱᒫᕐᐸᒃᑲ, ᑳᖕᓇᕐᑐᒦᑎᓪᓗᒋᓪᓗ, ᐋᓐᓂᐊᓇᕐᑐᖃᕐᑎᑉᐸᒡᓗᒋᓪᓗ, ᓄᖑᖏᓐᓂᓕᒫᖏᓐᓂ ᓄᓇᑖᕆᔭᐅᑎᓚᐅᕐᑕᓐᓂᒃ ᑖᒃᑯᓄᖓ ᓯᕗᓕᕕᓂᖏᓐᓄᓪᓗ.”