ᐃᓗᐊᕐᓮᔩᑦ ᐊᒡᓚᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᓐᔭᒥᓂᐅᑉ ᑭᖑᕚᖏᑕ ᓄᓕᐊᕐᑖᖏᑦ

¹ ᐃᓴᕆᐊᓕᒥᐅᑦ ᑲᑎᒐᒥᒃ ᒥᔅᐸᒥ, ᐊᖏᕈᑎᖃᒻᒪᕆᓚᐅᕐᐳᑦ ᐊᑕᓂᕐᒧᑦ ᐃᒫᒃ, “ᓇᓕᕐᐳᓪᓘᓐᓃᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ ᓄᓕᐊᓂᒃᑎᑦᓯᓂᐊᕈᓐᓃᕐᐳᒍᑦ ᐸᓂᑎᓂᒃ.”

² ᑍᒤᒻᒪᑦ ᐃᓴᕆᐊᓕᒥᐅᑦ ᐃᓄᒋᐊᒃᑐᕐᔪᐊᑦ ᐱᑎᓕᒧᐊᓚᐅᕐᐳᑦ ᑍᑲᓂᓗ ᐃᒃᓯᕙᓪᓗᑎᒃ ᒎᑎᐅᑉ ᓵᖓᓂ ᐅᓐᓄᒧᑦ ᑎᑭᓪᓗᒍ. ᓂᐱᖅᑯᕐᑐᒻᒪᕆᒃᓗᑎᒃ ᕿᐊᓚᐅᕐᐳᑦ:

³ ᐃᒫᒃ ᐅᖃᕐᓗᑎᒃ, “ᐊᑕᓃᖅ ᐃᓴᕆᐊᓕᐅᑉ ᒎᑎᖓ, ᓱᖕᒪᑦ ᑍᒤᑉᐹ? ᐃᓴᕆᐊᓕᒥ? ᓱᖕᒪᑦ ᐃᓴᕆᐊᓕᐅᑉ ᑭᖑᕚᖏᑦ ᐊᑕᐅᓰᓂᒃ ᐃᓚᑰᓂᐊᓕᕐᐸᑦ?”

⁴ ᖃᐅᑎᓪᓗᒍ ᐅᓪᓛᒻᒪᕆᒃᑯᑦ ᐃᓄᒋᐊᒃᑐᕐᔪᐊᑦ ᒪᑭᑉᐳᑦ, ᑐᓂᕐᕈᓯᕐᕕᓕᐅᕐᓗᑎᒃ, ᑐᓂᕐᕈᓯᕐᓗᑎᒡᓗ ᐃᑯᐊᓚᑎᑦᓯᓂᒃᑯᑦ ᐃᓚᒌᑦᓯᐊᕐᓂᕐᒧᓪᓗ ᑐᓂᕐᕈᑎᓂᒃ.

⁵ ᐃᓄᒋᐊᒃᑐᕐᔪᐊᓪᓗ ᐊᐱᕆᕗᑦ, “ᓇᓪᓕᖐᑦ ᐃᓚᒌᑦ ᐃᓴᕆᐊᓕᒥᐅᑦ ᑭᖑᕚᖏᓐᓂ ᑲᑎᖃᑕᐅᔭᕐᑐᓛᓐᖏᓛᑦ ᐊᑕᓂᐅᑉ ᓵᖓᓂ ᒥᔅᐸᒥ?” ᐊᖏᕈᑎᖃᒻᒪᕆᓚᐅᕋᒥᒃ ᒥᔅᐸᒧᑦ, ᑲᑎᒋᐊᕐᑐᖏᑦᑐᑦ ᐱᓪᓗᒋᑦ, ᑐᖁᑕᒃᓴᐅᓂᖏᓐᓂᒃ. ᐅᖃᕐᓗᑎᒃ, “ᑲᑎᖃᑕᐅᖏᑦᑐᑦ ᑐᖁᑕᒃᓴᐅᕗᑦ.”

⁶ ᐃᓴᕆᐊᓕᒥᐅᑦ ᐃᓄᒋᐊᒃᑐᕐᔪᐊᑦ ᐅᒡᒍᐊᓕᓚᐅᕐᐳᑦ ᖃᑕᓐᖑᑎᑎᒃ ᐱᓐᔭᒥᓂᐅᑉ ᑭᖑᕚᖏᑦ ᐱᓪᓗᒋᑦ ᐅᖃᕐᓗᑎᒡᓗ, “ᐅᓪᓗᒥ ᐃᓴᕆᐊᓕᐅᑉ ᑭᖑᕚᖏᑕ ᐃᓚᖓᓐᓂᒃ ᐊᑕᐅᓰᓂᒃ ᐊᓯᐅᔨᕗᒍᑦ,

⁷ ᖃᓄᕐᓕ ᐱᓂᐊᓕᕐᐱᑕ ᐊᖑᑎᑦ ᓄᓕᐊᕐᑖᖁᓪᓗᒋᑦ ᐱᓐᔭᒥᓂᐅᑉ ᑭᖑᕚᖏᓐᓂ ᐊᒥᐊᑰᔪᑦ? ᐊᖏᒻᒪᕆᓚᐅᕋᑦᑕ ᐊᑕᓂᕐᒧᑦ ᐸᓂᑦᑎᓐᓂᒃ ᑐᓂᓯᔪᒪᓇᑕ ᑖᒃᑯᓄᖓ.”

⁸ ᐊᐱᕐᓱᕋᒥᒡᓗ ᐅᖃᕐᓗᑎᒃ, “ᑭᖑᕚᕇᑦ ᓇᓪᓕᖏᑦ ᐃᓴᕆᐊᓕᒥᐅᑦ ᑲᑎᒋᐊᕐᑐᓚᐅᓐᖏᓚᑦ ᒥᔅᐸᒧᑦ?” ᖃᐅᔨᕗᓪᓗ ᔭᐲᓯ ᒋᓕᐊᑎᒥᐅᓂᒃ ᐃᓚᐅᔪᖃᖏᓐᓂᖓᓂᒃ,

⁹ ᐃᓄᒋᐊᒃᑐᕐᔪᐊᓪᓗ ᖃᐅᔨᓴᕐᑎᑕᐅᖕᒪᑕ, ᔭᐲᓯ ᒋᓕᐊᑎᒥᐅᑦ ᑕᒫᓃᑦᑐᖃᓐᖏᓚᑦ.

¹⁰ ᐃᓄᒋᐊᒃᑐᕐᔪᐊᑦ ᑎᓕᓯᓚᐅᕐᐳᑦ 12,000ᓂᒃ ᐊᖑᑎᓂᒃ, ᓯᕘᕋᖏᓐᓂᕐᐹᓂᒃ ᐃᒫᒃ ᐱᖁᓪᓗᒋᑦ, “ᔭᐲᓯ-ᒋᓖᑎᒥᐅᑦ ᑐᖁᕋᕆᐊᕐᑐᓕᕐᓯᐅᒃ ᐊᕐᓁᓪᓗ ᕿᑐᕐᖓᖏᓪᓗ ᒥᑭᔪᑦ ᐱᖃᓯᐅᑎᓗᒋᑦ.

¹¹ ᐃᒫᒃ ᐱᓂᐊᕐᐳᓯ, ᐊᖑᑎᓕᒫᑦ ᐊᕐᓇᓕᒫᓪᓗ ᐊᖑᑎᓂᒃ ᐃᓐᓇᖓᖃᑎᖃᕐᓯᒪᔪᑦ ᓄᖑᓪᓗᒋᑦ ᑐᖁᕋᕐᓂᐊᕐᐸᓯ.”

¹² ᓇᓂᓯᓚᐅᕐᐳᓪᓗ ᐅᐃᒐᓱᖕᓂᒃ 400ᓂᒃ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᓂᒃ ᔭᐲᓯ-ᒋᓖᑎᒥᐅᑦ ᐃᓄᖏᓐᓂᑦ; ᑖᒃᑯᐊᓗ ᐋᑉᐰᑦ ᑕᖕᒫᕐᓯᒪᕕᖕᒥᓄᑦ ᓮᓗᐊᒧᑦ, ᑬᓇᓂᐅᑉ ᓄᓇᖓᓃᑦᑐᒧᑦ.

¹³ ᑕᕝᕙ ᐃᓄᒋᐊᒃᑐᕐᔪᐊᑦ ᑎᓕᓯᕗᑦ ᑐᓴᕐᑎᑦᓯᖁᔨᓪᓗᑎᒃ ᐱᓐᔭᒥᓂᐅᑉ ᑭᖑᕚᖏᓐᓂᒃ ᕆᒪᓐᒥ ᕾᕐᑐᒦᑦᑐᓂᒃ, ᐅᓇᑕᕈᒪᔪᓐᓃᕐᓂᕐᒥᒃ ᐅᖃᐅᑎᓪᓗᒋᑦ.

¹⁴ ᐱᓐᔭᒥᓂᐅᑉ ᑭᖑᕚᖏᑦ ᑍᑦᓱᒪᓂ ᐅᑎᓚᐅᕐᐳᑦ; ᑐᓂᓯᕕᐅᓪᓗᑎᒡᓗ ᐊᕐᓇᓂᒃ ᔭᐲᓯ-ᒋᓖᑎᒥᑦ ᐱᔭᐅᔪᕕᓂᕐᓂᒃ ᑐᖁᓚᐅᓐᖏᑕᒥᖕᓂᑦ; ᑖᒃᑯᐊ ᑭᓯᐊᓂ ᐊᒥᒐᓚᐅᕐᐳᑦ.

¹⁵ ᐃᓄᐃᑦ ᐅᒡᒍᐊᕈᑎᖃᓕᓚᐅᕐᐳᑦ ᐱᓐᔭᒥᓂᐅᑉ ᑭᖑᕚᖏᓐᓂᒃ ᐊᑕᓂᐅᑉ ᐃᓚᑯᓐᖑᕐᑎᓚᐅᕐᒪᒋᑦ ᐃᓴᕆᐊᓕᒥᐅᑦ ᑭᖑᕚᖑᖃᑎᒌᖕᓂᖏᑦ.

¹⁶ ᐃᓄᖕᓄᑦ ᐊᖓᔪᖅᑳᖑᔪᑦ ᐅᖃᕐᐳᑦ, “ᖃᓄᕐᓕ ᐱᓂᐊᓕᕐᐱᑕ ᐊᒥᐊᒃᑯᑦ ᓄᓕᐊᒃᓴᖏᓐᓂᒃ, ᐱᓐᔭᒥᓂᐅᑉ ᑭᖑᕚᖏᓐᓂ ᐊᕐᓁᑦ ᓄᖑᑕᐅᓚᐅᕐᒪᑕ?”

¹⁷ ᐅᖃᕐᓗᑎᒡᓗ, “ᐱᓐᔭᒥᓂᐅᑉ ᑭᖑᕚᖏᑕ ᐊᒥᐊᒃᑯᖏᑦ ᓄᓇᒥᒃ ᑭᖑᕐᖑᑦᔨᔭᕆᐊᖃᕐᐳᑦ, ᑭᖑᕚᖑᖃᑎᒌᑦ ᐃᓴᕆᐊᓕᒥᐅᓂᑦ ᐱᑕᖃᕈᓐᓃᕆᐊᖃᖏᒻᒪᑕ,

¹⁸ ᑭᓯᐊᓂ ᓄᓕᐊᕐᑖᕐᑎᑦᓱᓐᓇᖏᓐᓇᑦᑎᒍ ᐸᓂᑦᑎᓐᓂᒃ.” ᐃᓴᕆᐊᓕᒥᐅᑦ ᐃᓄᒋᐊᒃᑐᕐᔪᐊᑦ ᐊᖏᖃᑎᒌᒍᑎᓕᐅᓚᐅᕐᒪᑕ, “ᓇᕐᕈᓇᕐᓯᑎᑕᐅᓕ ᓇᓪᓕᐊᑦ ᐸᓂᒥᓂᑦ ᓄᓕᐊᕐᑖᕐᑎᑦᓯᔪᖅ ᐱᓐᔭᒥᓂᐅᑉ ᑭᖑᕚᖏᓐᓂᒃ.”

¹⁹ ᐅᖃᓚᐅᕐᐳᑦ, “ᑕᑯᒋᑦ, ᐊᕐᕌᒍᑕᒫᑦ ᓇᓪᓕᐅᓐᓂᕐᓯᐅᕐᓂᖃᕐᐳᖅ ᐊᑕᓂᕐᒧᑦ ᓮᓗᐊᒥ, ᓮᓗᐊ ᐱᑎᓕᐅᑉ ᐅᓪᓗᓪᓗᐊᑉ ᑕᕐᕋᓕᓂᖓᓃᓚᐅᕐᐳᖅ, ᓕᐳᓇᐅᑉ ᓯᕿᓂᖓᓃᑦᑐᖅ, ᐊᖅᑯᑎᐅᓪᓗ ᐱᑎᓕᐅᓪᓗ ᓯᑭᒻᒥᐅᓪᓗ ᐊᑯᓐᓂᖓᓃᑦᑐᖅ, ᓕᐳᓇᐅᑉ ᑭᑖᓂ.”

²⁰ ᐱᖁᔨᓚᐅᕐᐳᓪᓗ ᐱᓐᔭᒥᓂᐅᑉ ᑭᖑᕚᖏᓐᓂᒃ, “ᐂᓕᕆᑦᓯ ᐃᔨᕐᓗᓯᓗ ᐱᕈᕐᓰᕕᖏᓐᓂ ᕔᓂᓕᐅᕐᕕᖕᓂ.

²¹ ᖃᐅᔨᓴᕐᓗᓯᓗ ᐊᕐᓁᑦ ᓮᓗᐊᒥᑦ ᐊᓂᒃᐸᑕ ᑖᓂᓯᕐᓗᑎᒃ ᓇᓪᓕᐅᓐᓂᕐᓯᐅᕐᕕᖕᒥ, ᑕᕝᕙᓐᖓᑦ ᐊᓂᓗᓯ ᐱᕈᕐᓰᕕᖕᓂᑦ ᕔᓂᓕᐅᕐᕕᖕᓂᑦ, ᐃᓘᓐᓇᓯ ᑎᒍᓯᓗᓯ ᐊᕐᓇᓂᒃ ᓄᓕᐊᒃᓴᑦᓯᓐᓂᒃ ᐅᑎᖃᑎᒋᓗᒋᓪᓗ ᐱᓐᔭᒥᓂᐅᑉ ᑭᖑᕚᖏᑕ ᓄᓇᖁᑎᖓᓐᓄᑦ.

²² ᐊᑖᑕᒃᑯᖏᑦ, ᐊᓂᖏᓪᓘᓐᓃᑦ ᖁᕕᐊᓱᖏᓪᓗᑎᒃ ᕾᒃᐸᑕ ᐅᕙᑦᑎᓐᓄᑦ, ᐅᖃᐅᑎᓂᐊᕐᐸᕗᑦ, ‘ᐱᑦᓯᐊᕐᕕᒋᓗᑕ ᐃᑲᔪᓚᐅᕐᑎᒍᑦ, ᐅᓇᑕᕐᓂᒃᑯᑦ ᓄᓕᐊᒃᓴᖏᓐᓂᒃ ᐱᓚᐅᖏᓐᓇᑦᑕ, ᐸᓯᔭᒃᓴᐅᓐᖏᓚᓯ, ᐸᓂᓯ ᑐᓂᓚᐅᖏᓐᓇᑦᓯᐅᒃ ᑖᒃᑯᓄᖓ.’”

²³ ᐱᓐᔭᒥᓂᐅᑉ ᑭᖑᕚᖏᑦ ᑍᒫᒃ ᐱᓇᓱᐊᓚᐅᕐᐳᑦ; ᐃᓘᓐᓇᑎᒃ ᓄᓕᐊᒃᓴᕐᑖᓚᐅᕐᐳᑦ ᐊᕐᓇᓂᑦ ᑕᓂᓯᓚᐅᕐᑐᓂᒃ ᓮᓘᒥ ᐊᐅᓪᓚᐅᑎᓪᓗᒋᓪᓗ. ᐅᑎᓚᐅᕐᐳᓪᓗ ᓄᓇᒥᖕᓄᑦ, ᓄᓇᓕᒥᖕᓂᓗ ᐃᒡᓗᒐᓴᒡᔪᐊᓕᐅᓚᐅᕐᐳᑦ, ᓄᓇᖃᓕᕐᓗᑎᒡᓗ.

²⁴ ᑍᑦᓱᒪᓂᑦᓮᓐᓇᖅ ᐃᓴᕆᐊᓕᒥᐅᑦ ᑕᕝᕙᓐᖓᑦ ᐊᐅᓪᓚᓚᐅᕐᐳᑦ, ᐃᓘᓐᓇᑎᒡᓗ ᐃᓚᒥᖕᓄᑦ ᑭᖑᕚᖑᖃᑎᒥᖕᓄᑦ ᐅᑎᕐᐳᑦ ᓇᖕᒥᓂᖁᑎᒥᖕᓄᑦ.

²⁵ ᐅᓪᓗᓂ ᑍᒃᑯᓇᓂ ᐊᖓᔪᖅᑳᕐᔪᐊᖃᓚᐅᖏᒪ ᐃᓴᕆᐊᓕᒥᐅᓂ; ᐃᓘᓐᓇᑎᒡᓗ ᐊᑐᕈᒪᔭᒥᖕᓂᒃ ᓈᒻᒪᒐᓱᒋᔭᒥᖕᓂᒡᓗ ᐊᑐᓚᐅᕐᐳᑦ.