ᐃᓗᐊᕐᓮᔩᑦ ᐊᒡᓚᖏᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

ᓕᕔᑎ ᓄᓕᐊᖓᓗ

¹ ᐅᓪᓗᓂ ᑍᒃᑯᓇᓂ ᐃᓴᕆᐊᓕᒃᑯ ᐊᖓᔪᖅᑳᕐᔪᐊᖃᓚᐅᖏᒻᒪᑕ, ᓕᕔᑎᖃᓚᐅᕐᐳᖅ ᓄᓇᖃᓚᐅᕐᑐᒥᒃ ᐃᕗᕅᒥᐅᑉ ᖃᖅᑲᖏᑕ ᐃᓱᐊᓂ. ᐱᑦᓕᐊᒥᑦ ᔫᑕᒦᑦᑐᒥᑦ ᐊᕐᓇᒥᒃ ᑎᒍᓯᓚᐅᕐᐳᖅ ᓄᓕᐊᕆᒃᑲᓐᓂᕈᒪᓪᓗᒍ.

² ᐊᕐᓇᐅᓪᓕ ᓂᓐᖓᐅᑎᓚᐅᕐᐹ ᐊᓯᐊᓃᓕᕐᓗᓂ, ᐅᑎᓚᐅᕐᐳᕐᓗ ᐊᑖᑕᒃᑯᒥᑕ ᐃᒡᓗᖓᓄᑦ ᐱᑦᓕᐊᒧᑦ ᔫᑕᒦᑦᑐᒧᑦ, ᑕᕝᕙᓃᓚᐅᕐᐳᕐᓗ ᑕᖅᑭᓂᒃ ᓯᑕᒪᓂᒃ.

³ ᐊᖑᓪᓗ ᐊᐅᓪᓚᓚᐅᕐᐳᖅ ᒪᓕᒃᓴᕐᓗᒍ, ᐃᓚᓐᓂᕐᓴᕐᓗᒍ ᐅᑎᕐᑎᑦᓱᒪᓪᓗᒍ, ᐱᔨᓂᓗ ᐱᖃᑎᒋᓪᓗᒍ ᒪᕐᕉᖕᓂᒡᓗ ᓯᐅᑎᖅᑯᕐᑐᔫᖕᓂᒃ ᓇᒃᓴᕐᓗᓂ ᐊᐅᓪᓚᕐᐳᖅ, ᐊᕐᓇᐅᓪᓗ ᓕᕔᑎ ᐃᑎᕐᑎᑉᐹ ᐃᒡᓗᒧᑦ, ᐊᑖᑕᖓᑕᓗ ᑕᑯᒐᒥᐅᒃ ᖁᕕᐊᓱᒡᓗᓂ ᑐᓐᖓᓱᒃᑎᑉᐹ.

⁴ ᓴᑭᖓᑕ ᐊᕐᓇᐅᑉ ᐊᑖᑕᖓᑕ, ᑕᕝᕙᓃᖁᒻᒪᕆᓚᐅᕐᐹ, ᑍᒤᒻᒪᑦ ᐅᓪᓗᓂᒃ ᐱᖓᓱᓂᒃ ᑕᕝᕙᓃᑉᐳᖅ, ᑖᒃᑯᐊᒃ ᐂᑉᐸᕇᒃ ᓂᕆᕙᒃᓗᑎᒃ ᐃᒥᕐᐸᒃᓗᑎᒡᓗ ᓯᓂᒃᑕᕐᐴᒃ ᑕᕝᕙᓂ.

⁵ ᐅᓪᓗᐃᓪᓕ ᓯᑕᒪᖓᓐᓂ ᐅᓪᓛᒻᒪᕆᒃᑯᑦ ᑐᐸᒃᐸᒃᑲᒥᒃ, ᐸᕐᓇᓕᓚᐅᕐᐳᖅ ᐊᐅᓪᓚᕈᒪᓪᓗᓂ, ᐊᕐᓇᐅᓪᓕ ᐊᑖᑕᖓᑕ ᓂᖓᐅᓂ ᐅᖃᐅᑎᕚ, “ᓂᕆᖅᑳᑬᓐᓇᕆᑦ, ᓄᑭᖃᑦᓯᐊᕐᓂᐊᕋᕕᑦ, ᑭᖑᓂᖓᓂ ᐊᐅᓪᓚᕈᓐᓇᕐᓂᐊᕐᐳᑎᑦ.”

⁶ ᑖᒃᑯᐊᒃ ᐊᖑᑏᒃ ᒪᕐᕉᒃ ᐃᒃᓯᕙᖃᑎᒌᓚᐅᕐᐴᒃ ᓂᕆᖃᑎᒌᒡᓗᑎᒃ ᐃᒥᖃᑎᒌᒡᓗᑎᒡᓗ; ᐊᕐᓇᐅᓪᓗ ᐊᑖᑕᖓᑕ ᐊᖑᑦ ᐅᖃᐅᑎᕚ, “ᑐᓐᖓᓱᒡᓗᑎᑦ ᓯᓂᒃᑕᒃᑲᓐᓂᑬᓐᓇᕆᑦ ᖁᕕᐊᓱᒡᓗᑎᓪᓗ.”

⁷ ᓕᕔᑎᓕ ᒪᑭᑉᐳᖅ ᐊᐅᓪᓚᕈᒪᓪᓗᓂ, ᓴᑭᖓᑕᓕ ᐊᔪᐃᓐᓈᕆᕚ ᓯᓂᒃᑕᒃᑲᓐᓂᖁᓪᓗᒍ, ᐊᓱᐃᓛᒃ ᓯᓂᒃᑕᒃᑲᓐᓂᓚᐅᕐᐳᖅ.

⁸ ᐅᓪᓗᐃᓪᓕ ᑕᓪᓕᒪᒋᓕᕐᑕᖓᓂ ᐅᓪᓛᒻᒪᕆᒃᑯᑦ ᒪᑭᓐᓇᒥ ᐊᐅᓪᓚᕋᓱᐊᓕᓚᐅᕐᐳᖅ, ᐊᕐᓇᐅᓪᓕ ᐊᑖᑕᖓᑕ ᐅᖃᐅᑎᕚ, “ᓂᕆᑬᓐᓇᕆᑦ, ᐅᑕᖅᑭᓗᑎᑦ ᐅᓪᓗᑐᖃᐅᓕᕐᐸᑦ ᐊᐅᓪᓚᕐᓂᐊᕐᐳᑎᑦ”. ᐊᓱᐃᓛᒃ ᑖᒃᑯᐊᒃ ᒪᕐᕉᒃ ᐊᖑᑏᒃ ᓂᕆᖃᑎᒋᓕᕐᐴᒃ.

⁹ ᑖᓐᓇ ᐊᖑᑦ, ᓄᓕᐊᖓᓗ, ᐱᔨᖓᓗ ᐊᐅᓪᓚᕋᓱᐊᓕᕐᑎᓪᓗᒋᑦ, ᐊᑖᑕᖓᑕ ᐅᖃᐅᑎᕚ, “ᑕᑯᒋᑦ, ᐅᓐᓄᓕᓕᕐᒪᑦ ᒫᓐᓇ; ᑕᕝᕙᓃᑐᐃᓐᓇᓕᕆᑦ ᐅᓐᓄᐊᒥ, ᑖᕐᓯᔭᕇᓚᖓᓕᕐᒪᑦ, ᑕᕝᕙᓃᑐᐃᓐᓇᓕᕆᑦ ᑐᓐᖓᓱᒡᓗᑎᑦ, ᓯᓂᒃᑕᓕᕆᑦ ᖃᐅᒃᐸᑦ ᐅᓪᓛᒻᒪᕆᒃᑯᑦ ᐊᐅᓪᓚᕐᓂᐊᕐᐳᑎᑦ ᐊᖏᕐᕋᕐᓗᑎᓪᓗ.”

¹⁰ ᐊᖑᓪᓕ ᑖᓐᓇ ᐅᓐᓄᐊᒥ ᑕᕝᕙᓃᒃᑲᓐᓂᕈᒪᓐᖏᓚᖅ; ᐊᐅᓪᓚᕐᓗᑎᒡᓗ, ᑎᑭᓐᓇᒥᒃ ᔨᐳᓯᐅᑉ ᐊᑭᐊᓄᑦ (ᑖᓐᓇ ᔨᕉᓴᓕᒻ). ᓯᐅᑎᖅᑯᕐᑐᔪᖁᑎᖃᓚᐅᕐᐳᖅ ᒪᕐᕉᖕᓂᒃ ᐃᒃᓯᕙᕕᓖᖕᓂᒃ, ᓄᓕᐊᒃᑲᓐᓂᓂ ᐃᓚᒋᓪᓗᒍ.

¹¹ ᔨᐳᓯᐅᑉ ᖃᓂᒋᔭᖓᓃᓕᕐᑎᓪᓗᒋᑦ, ᐅᓪᓗᖅ ᐊᓂᒍᓕᕐᑎᓪᓗᒍ ᖃᒡᓕᒐᒥᒃ ᔨᐳᓯᒧᑦ ᐱᔨᐅᑉ ᐊᖓᔪᖅᑳᓂ ᐅᖃᐅᑎᕚ, “ᐊᑏ ᓴᖑᓚᐅᕐᑕ ᔨᐳᓮᑎᑦ ᐃᒡᓗᒐᓴᖏᓐᓄᑦ, ᑕᕝᕙᓂ ᓯᓂᒃᑕᕐᓗᑕ.”

¹² ᐊᖓᔪᖅᑳᖓᑕᓕ ᐅᖃᐅᑎᕚ, “ᐃᒡᓗᒐᓴᖕᓄᑦ ᓄᖅᑲᕐᓂᐊᓐᖏᓚᒍᑦ ᐃᓅᖃᑎᒋᓐᖏᑕᑦᑎᓐᓂ, ᐃᓴᕆᐊᓕᒥᐅᖑᖏᑦᑐᓂ; ᖄᖏᕐᓂᐊᕐᐳᒍᑦ ᒋᐱᐊᒧᑦ.”

¹³ ᐱᔨᒥᓄᓪᓗ ᐅᖃᕆᓪᓗᓂ, “ᐊᑏ ᑍᒃᑯᐊ ᐃᒡᓗᒐᓮᑦ ᑎᑭᓐᓇᓱᐊᓕᕐᓚᕗᑦ ᑕᒻᒫᕆᐊᕐᑐᕐᓗᑕ ᒋᐱᐊᒥ ᐅᕝᕙᓘᓐᓃᑦ ᕌᒪᒥ.”

¹⁴ ᑍᒤᒻᒪᑦ ᖄᖏᕐᐳᑦ ᔨᐸᓯᒥᒃ ᑲᔪᓯᓪᓗᑎᒃ ᐃᖏᕐᕋᓚᐅᕐᐳᑦ; ᓯᕿᓂᖅ ᓂᐱᓚᐅᕐᐳᖅ ᒋᐱᐊᒧᑦ ᖃᒡᓕᑎᓪᓗᒋᑦ ᐱᓐᔭᒥᓂᐅᑉ ᑭᖑᕚᖏᑕ ᓄᓇᖓᓄᑦ.

¹⁵ ᐃᒡᓗᒐᓴᖕᓄᑦ ᓴᖑᓪᓗᑎᒃ, ᐃᑎᕐᐳᑦ ᓯᓂᒃᑕᕈᒪᓪᓗᑎᒃ ᒋᐱᐊᒥ, ᐊᖅᑯᑏᑦ ᐊᑯᓐᓂᖓᓂ ᐱᕕᑐᔪᒥ ᐃᒃᓯᕙᓕᕐᐳᑦ ᐃᒡᓗᒐᓴᖕᓂ, ᑭᓇᒧᓪᓘᓐᓂᑦ ᕾᖁᔭᐅᖏᓐᓇᒥᒃ ᐃᒡᓗᒥᓂ ᓯᓂᒃᑕᖁᔭᐅᓗᑎᒃ.

¹⁶ ᑕᑯᒋᓪᓗ, ᐃᑦᑐᖅ ᕾᕗᖅ ᐱᓇᓱᐊᕐᑐᕕᓂᖅ ᐱᕈᕐᓰᕕᖕᒥᒃ ᐅᓐᓄᒃᑯᑦ; ᑖᓐᓇ ᖃᖅᑲᓕᖕᒥ ᐃᕗᕅᒥᒥ ᓄᓇᖃᕐᑐᖅ, ᒋᐱᐊᒥ. ᑕᕝᕙᓂᓕ ᐃᓄᐃᑦ ᓄᓇᖃᕐᑐᑦ ᐱᓐᔭᒥᓂᐅᑉ ᑭᖑᕚᕆᓚᐅᕐᐰᑦ.

¹⁷ ᑖᓐᓇ ᐃᑦᑐᖅ ᑕᑯᓴᕋᒥ, ᓂᐅᕐᕈᐊᖅ ᑕᑯᕚ ᐃᒡᓗᒐᓮᑦ ᐊᖅᑯᑎᖓᑕ ᐱᕕᑐᓂᖓᓃᑦᑐᖅ, ᐃᑦᑑᑉ ᐊᐱᕆᕚ, “ᓇᒧᓐᖓᐅᕖᑦ? ᓇᑭᓪᓗ ᑎᑭᑉᐱᑦ?”

¹⁸ ᓕᕔᑎᐅᑉ ᑭᐅᕚ, “ᐱᑦᓕᐊᒥᐅᑕᐅᕗᒍᑦ ᔫᑕᒦᑦᑐᒥ, ᐃᕗᕅᒥᒧᓪᓗ ᖃᖅᑲᓕᖕᒧᑦ ᐂᕗᒍᑦ ᑕᐅᕙᓂᒥᐅᖑᒐᒪ, ᐱᑦᓕᐊᒧᑦ ᔫᑕᒦᑦᑐᒧᑦ ᐂᓚᐅᕋᒪ; ᒫᓐᓇᓕ ᐊᖏᕐᕋᐅᓕᕐᐳᖓ;

¹⁹ ᐃᕕᒃᓱᒐᖃᕐᐳᒍᑦ ᓂᕿᒃᓴᖃᕐᓗᑕᓗ ᓯᐅᑎᖅᑯᕐᑐᔪᖁᑎᑦᑎᓐᓄᑦ, ᓂᐊᖂᔭᖃᕐᓗᑕᓗ ᕔᓂᒥᒡᓗ ᓄᓕᐊᒃᑲᓐᓂᓐᓄᑦ ᐅᕙᓐᓄᓪᓗ ᐱᔨᓐᓄᓪᓗ; ᓱᓇᒥᒃ ᑭᓐᖒᒪᒃᓕᖏᒃᑲᓗᐊᕐᓗᑕ ᓱᓇᓕᒫᓂᒃ ᐱᑕᖃᕋᑦᑕ.”

²⁰ ᐃᑦᑐᕐᓕ ᐅᖃᕐᐳᖅ, “ᑐᓐᖓᓱᒋᑦᓯ ᐅᕙᑦᑎᓐᓄᑦ! ᑲᒪᒋᑦᓯᐊᕐᓂᐊᕐᐸᑦᓯ ᐱᔭᕆᐊᖃᕐᑕᑦᓯᓐᓂᒃ; ᑕᒫᓂ ᑭᓯᐊᓂ ᐱᕕᑐᓂᕐᒥ ᐊᖅᑯᑎᒥ ᓯᓂᒃᑕᕋᓱᐊᖏᓪᓗᓯ.”

²¹ ᑕᕝᕙ ᐃᒡᓗᒥᓄᑦ ᐊᖏᕐᕋᐅᑎᕔᑦ, ᓂᕆᑎᓪᓗᒋᓪᓗ ᓯᐅᑎᖅᑯᕐᑐᔪᖁᑎᖏᑦ, ᐃᑎᒐᖏᓪᓗ ᐅᐊᓴᕐᐰᑦ ᓂᕆᑎᓪᓗᒋᓪᓗ ᐃᒥᕐᑎᑉᐰᑦ.

²² ᖁᕕᐊᓱᖃᑎᒋᓕᕐᓗᒋᓪᓗ, ᑕᕝᕔᓐᓇᖅ ᓄᓕᐊᕐᓂᕐᒥᒃ ᐊᑐᕐᓂᕐᓗᒃᑎᓂᑦ ᐃᒡᓗᖓ ᐊᕙᑕᖏᕐᑕᐅᕗᖅ ᐅᒃᑯᐊᖓᓂᒡᓗ ᐊᑦᓴᕐᑕᕐᓗᑎᒃ; ᐊᖑᓪᓗ ᐃᑦᑐᖅ ᐅᖃᐅᑎᕚᑦ, “ᐊᖑᑦ ᑍᓐᓇ ᐊᖏᕐᕋᐅᑎᔧᑦ ᐊᓂᑎᒍᒃ! ᓄᓕᐊᕈᒪᒐᑦᑎᒍ!”

²³ ᑖᓐᓇᓕ ᐊᖑᑦ ᐃᑦᑐᖅ ᐃᒡᓗᖃᕐᑐᖅ ᐊᓂᕗᖅ ᐅᖃᐅᑎᓪᓗᒋᓪᓗ, “ᑍᒤᓕᐅᕋᓯ, ᖃᑕᓐᖑᑎᒃᑳ! ᑍᒫᒃ ᐱᐅᖏᑦᑐᐊᓗᖕᒥᒃ ᐱᓇᓱᐊᕋᓯ, ᑖᓐᓇ ᐊᖑᑦ ᐃᒡᓗᒥᐅᑕᕆᒐᒃᑯ.

²⁴ ᑕᑯᒋᑦ! ᑕᕝᕙ ᓄᓕᐊᒃᑲᓐᓂᖓ ᐸᓂᒐᓗ ᐅᐃᒡᒐᓱᒃ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᖅ. ᑖᒃᑯᐊᒃ ᐊᓂᑎᓐᓂᐊᕐᐹᒃᑲᒃ, ᑖᒃᑯᐊᓗ ᐱᔪᓐᓇᕐᐸᓯ. ᐃᓱᒤᓐᓇᕐᕈᑎᒋᓂᐊᕋᑦᓯᐅᒃ, ᑭᓯᐊᓂᓕ ᐱᐅᖏᑦᑐᐊᓗᖕᒥᒃ ᐱᓇᓱᐊᕐᑍᓕᒋᑦᓯ ᐊᖑᒻᒧᑦ ᑖᑦᓱᒧᖓ!”

²⁵ ᑖᒃᑯᐊᓕ ᐊᖑᑎᑦ ᓈᓚᒍᒪᓚᐅᓐᖏᓚᑦ ᑖᑦᓱᒥᖓ, ᑍᒤᒻᒪᑦ ᓕᕔᑎᐅᑉ ᓄᓕᐊᒃᑲᓐᓂᖓ ᐊᓂᑎᑉᐹ ᑖᒃᑯᓄᖓ, ᑖᓐᓇᓗ ᓄᓕᐊᕐᐹᑦ ᐱᓕᕆᐊᕆᓪᓗᒍᓗ ᐅᓐᓄᐊᓕᒫᖅ ᓄᖅᑲᓚᐅᕋᑎᒃ ᐅᓪᓛᖅ ᑎᑭᓪᓗᒍ, ᖃᐅᒻᒪᓕᕐᑎᓪᓗᒍ ᓴᒃᑯᑍᓐᓇᕐᐹᑦ.

²⁶ ᐅᓪᓛᓐᖑᓕᕐᒪᓪᓗ ᐊᕐᓇᖅ ᕾᕗᖅ ᐅᕐᕈᓪᓗᓂᓗ ᐊᖑᑎᐅᑉ ᐃᑦᑑᑉ ᐅᒃᑯᐊᖓᓄᑦ, ᐅᐃᖓᑕ ᓇᔪᕐᑕᖓᓄᑦ, ᑕᕝᕙᓃᖏᓐᓇᓚᐅᕐᐳᕐᓗ ᖃᐅᒻᒪᓕᕐᑎᓪᓗᒍ.

²⁷ ᐅᐃᖓᓗ ᒪᑭᓐᓇᒥ ᐅᓪᓛᒃᑯᑦ, ᐊᓂᓕᕐᓗᓂᓗ ᐅᒃᑯᐊᖅ ᒪᑐᐃᕋᒥᐅᒃ, ᓄᓕᐊᒃᑲᓐᓂᓂ ᑕᑯᕚ ᓇᓚᔪᖅ ᐃᒡᓘᑉ ᓯᓚᑖᓂ ᑕᓕᖏᒃ ᐃᓵᖓᔫᒃ ᐅᒃᑯᐊᒧᑦ.

²⁸ ᐅᖃᐅᑎᕚᓗ, “ᒪᑭᓕᕆᑦ, ᐊᑏ ᐊᐅᓪᓚᓕᕐᑕ.” ᑖᓐᓇᓕ ᑭᐅᓐᖏᓚᖅ. ᑕᕝᕙ ᑎᒥᖓ ᓯᐅᑎᖅᑯᕐᑐᔪᒧᐊᕐᐹ; ᐊᐅᓪᓚᕐᓗᓂᓗ ᐊᖏᕐᕋᐅᓕᕐᓗᓂ.

²⁹ ᐊᖏᕐᕋᕋᒥᓗ ᐃᒡᓗᒥᓄᑦ ᐃᑎᕐᐳᖅ ᓴᕕᖕᒥᒡᓗ ᑎᒍᓯᓪᓗᓂ. ᓄᓕᐊᒃᑲᓐᓂᖓᑕᓗ ᑎᒥᖓ ᐊᒡᒍᕐᐹ 12ᓕᓪᓗᒍ, ᐊᐅᓪᓚᕐᑎᑉᐰᓪᓗ ᐃᓴᕆᐊᓕᐅᑉ ᑭᖑᕚᓕᒫᖏᓐᓄᑦ 12ᓄᑦ ᐊᑐᓂᑦ.

³⁰ ᐃᓘᓐᓇᑎᒃ ᑕᑯᔪᑦ ᐅᖃᕐᐳᑦ, “ᑍᒤᑦᑐᐊᓗᖕᒥᒃ ᑕᑯᓚᐅᕐᓯᒪᓐᖏᓚᒍᑦ! ᑍᒫᒃ ᐱᔪᖃᓚᐅᕐᓯᒪᓐᖏᓚᖅ ᐃᓴᕆᐊᓕᒥᐅᑦ ᐊᐅᓪᓚᓚᐅᕐᓯᒪᖕᒪᑕ ᐄᑦᔨᑉᑎᒥᑦ ᐅᓪᓗᒥᒧᑦ ᑎᑭᓪᓗᒍ, ᐃᓱᒪᒃᓴᕐᓯᐅᕆᐊᖃᓕᕐᐳᒍᑦ ᑲᑎᒪᖃᑎᒌᒡᓗᑕ ᐅᖃᖃᑎᒌᒡᓗᑕᓗ.”