ᐂᓮᐊᓯᐅᑉ ᐊᒡᓚᖏᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐊᓐᓄᕌᖃᖏᓐᓂᖓᑕ ᑐᑭᓯᑦᔪᑎᒃᓴᐅᓂᖓ

¹ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᓵᕐᒍᓂᐅᑉ ᐱᖁᔨᓂᖓᓄᑦ ᐊᓯᕆᐊᒥᐅᑦ ᐅᓇᑕᕐᑎᖁᑎᖏᑕ ᐊᖓᔪᖅᑳᖓᑦ ᐅᓇᑕᕆᐊᕐᕕᖃᓚᐅᕐᐳᖅ ᐱᓕᔅᑎᐊᒥ ᐃᒡᓗᒐᓴᒡᔪᐊᓂᒃ ᐋᔅᑖᑦᒥᐅᓂᒃ, ᓵᓚᒋᓪᓗᓂᒋᓪᓗ.

² ᐊᕐᕌᒍᑦ ᐱᖓᓱᑦ ᓯᕗᓂᖓᓂ ᐊᑕᓂᐅᑉ ᐂᓮᐊᓯ ᐂᒨᓯᐅᑉ ᐃᕐᓂᖓ ᐅᖃᐅᑎᓚᐅᕐᐹ, ᐃᑎᒐᒍᑎᒥᓂᒃ ᐲᕐᓯᖁᓪᓗᒍ ᐊᓐᓄᕅᔭᖁᓪᓗᓂᐅᒡᓗ ᕿᒃᓵᒃᑐᕐᓯᐅᑎᓂᒃ ᐊᑐᕐᑕᖏᓐᓂᒃ, ᐊᑕᓂᖅ ᓈᓚᒡᓗᒍ ᐱᓱᑲᑕᓕᓚᐅᕐᐳᖅ ᐃᑎᒐᒍᑎᖃᕋᓂ ᐊᓐᓄᕌᖃᕋᓂᓗ.

³ ᑕᕝᕙ ᐊᑕᓂᖅ ᐅᖃᕐᐳᖅ, “ᐱᔨᒐ ᐂᓮᐊᓯ ᐊᕐᕌᒍᓂᒃ ᐱᖓᓱᓂᒃ ᐱᓱᑲᑕᖃᑦᑕᓚᐅᕐᐳᖅ ᐃᑎᒐᒍᑎᖃᕋᓂ ᐊᓐᓄᕌᖃᕋᓂᓗ, ᑕᒪᓐᓇ ᓇᓗᓁᒃᑯᑕᐅᕗᖅ ᑲᒪᓇᕐᑑᓪᓗᓂᓗ ᐄᑦᔨᑉᑎᒥᐅᑦ ᐃᑎᐅᐱᐊᒥᐅᓪᓗ ᐱᐅᓯᕆᔪᒫᕐᑕᖓᓐᓂᒃ.

⁴ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᑎᒍᔭᓂ ᐊᐅᓪᓚᕈᑎᔪᒫᕐᐰᑦ ᓄᓇᓕᖕᓂᑦ ᐃᑎᐅᐱᐊᒥᐅᓂᑦ ᒪᕐᕈᐃᖑᑎᓪᓗᒋᑦ ᐃᓐᓁᓪᓗ ᓄᑕᖅᑲᓪᓗ ᐱᓱᒍᒫᕐᐳᑦ ᐃᑎᒐᒍᑎᖃᖏᓪᓗᑎᒃ ᐊᓐᓄᕌᖃᖏᓪᓗᑎᒡᓗ ᐅᒃᐸᑎᖏᑦ ᓴᖅᑭᔮᕈᒫᕐᐳᑦ ᑲᓐᖑᓲᑎᒃᓴᐅᔪᒫᕐᐳᕐᓗ ᑕᒪᓐᓇ ᐄᑦᔨᑉᑎᒥᐅᓄᑦ.

⁵ ᐃᑎᐅᐱᐊᒥᐅᓂᒃ ᑕᑎᒃᓴᕐᐸᓚᐅᕐᑐᑦ ᐄᑦᔨᑉᑎᒥᐅᓂᒡᓗ ᐱᐅᓯᑎᑦᓯᓯᒪᓗᐊᕐᐸᓚᐅᕐᑐᑦ ᓯᕘᕋᓕᕈᒫᕐᐳᑦ ᓂᕆᐅᒋᔭᒃᓮᕈᑎᓗᑎᒡᓗ.

⁶ ᐅᓪᓗᐃᑦ ᑍᒃᑯᐊ ᓇᓪᓕᐅᑎᒃᐸᑕ ᐱᓕᔅᑎᐊᑉ ᓄᓇᖓᑕ ᓯᒡᔭᒥᐅᖁᑎᖏᑦ ᐅᖃᕈᒫᕐᐳᑦ, ᑕᑯᒋᑦ ᓴᐳᑦᔨᔨᒋᓂᐊᕋᓱᒋᓚᐅᕐᑕᕗᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑕ ᐱᔪᓐᓇᕐᓂᖓᓂᑦ ᖃᓄᕐᓕ ᐃᓅᔪᒫᓕᕐᐱᑕ?”