ᐂᓮᐊᓯᐅᑉ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦᐃᓱᖃᖏᑦᑐᒧᑦ ᖃᓄᐃᖏᑦᓯᐊᕐᓂᖃᕐᓂᖅ ᒤᑲ 4:1-3 1 ᐅᑯᐊ ᐅᖃᐅᓰᑦ ᐂᓮᐊᓯᐅᑉ ᑕᑯᓚᐅᕐᑕᖏᑦ ᐂᒨᓯᐅᑉ ᐃᕐᓂᖓᑕ ᔫᑕ ᔨᕉᓴᓕᓗ ᐱᓪᓗᒋᒃ. 2 ᐅᓪᓗᐃᑦ ᑭᖑᓪᓕᖏᓐᓂ ᐱᔪᖃᕈᒫᕐᐳᖅ ᖃᖅᑲᖅ ᐊᑕᓂᐅᑉ ᑐᒃᓯᐊᕐᕕᒡᔪᐊᖓᑕ ᐃᓂᖓ ᐳᕐᑐᓂᕐᐸᐅᓕᕈᒫᕐᐳᖅ ᖃᖅᑲᓂᑦ, ᐱᖑᓕᒫᓂᓪᓗ ᐃᓅᖃᑎᒌᒡᔪᐊᓪᓗ ᓇᑭᑐᐃᓐᓈᕐᓯᒪᔪᑦ ᑕᕝᕗᖓ ᐂᔪᒫᕐᐳᑦ ᑰᒃᑐᑎᑐᑦ, 3 ᐃᓄᐃᓪᓗ ᐅᓄᕐᑐᑦ ᑕᕝᕗᓐᖓᕐᓗᑎᒃ ᐅᖃᖃᑦᑕᕈᒫᕐᐳᑦ; “ᕾᒋᑦᓯ ᐊᑕᓂᐅᑉ ᖃᖅᑲᖁᑎᖓᓄᑦ ᒪᔪᕋᕐᑕ, ᔧᑰᑉ ᒎᑎᖓᑦᑕ ᐃᒡᓗᖓᓄᑦ; ᐊᔪᕆᕐᑐᕐᓂᐊᕐᒪᑎᒍᑦ ᐱᓂᐊᕐᑕᐅᖁᔭᒥᓂᒃ ᐊᖅᑯᑎᐅᖁᔭᖏᑎᒍᓪᓗ ᐱᓱᒍᓐᓇᓕᖁᓪᓗᑕ.” ᓮᐅᓂᒥᑦ ᐱᖁᔭᑦ ᐊᓂᔪᒫᕐᒪᑕ, ᐊᑕᓂᐅᓪᓗ ᐅᖃᐅᓯᖓ ᔨᕉᓴᓕᒥᑦ ᐱᓗᓂ. 4 ᐃᓅᖃᑎᒌᒡᔪᐊᓪᓗ ᐊᑭᕋᕐᑐᕐᑎᒌᒃᑐᑦ ᐊᑭᕋᕐᑐᕐᑎᒌᒍᓐᓃᕐᑎᑦᓱᒫᕐᐰᑦ, ᓴᕕᒡᔪᐊᑎᒡᓗ ᑲᐅᒐᕐᓗᒋᑦ ᓄᓇᒥᒃ ᒪᒃᐱᕐᑎᕆᑦᔪᑎᓐᖑᕐᑎᑦᓱᒫᕐᐰᑦ, ᖃᓗᒋᐊᑎᒡᓗ ᓇᐹᕐᑑᑉ ᓄᕗᖏᓐᓂᒃ ᑭᓪᓗᐃᑦᔪᑎᒃᓴᓐᖑᕐᑎᓪᓗᒋᑦ. ᐃᓅᖃᑎᒌᒡᔪᐊᓪᓗ ᐅᓇᑕᖃᑦᑕᕈᓐᓃᕈᒫᕐᐳᑦ ᐅᓇᑕᕆᐊᕐᐸᒍᓐᓃᕐᓗᑎᒡᓗ. 5 ᐃᓕᑦᓯ ᔧᑰᑉ ᑭᖑᕚᖏᑦ, ᕾᓗᓯ, ᐱᓱᓚᐅᕐᑕ ᐊᑕᓂᐅᑉ ᖃᐅᒪᑎᑕᖓᒍᑦ! ᑐᓴᕈᓐᓇᖏᑦᑐᑦ ᓄᖑᑕᐅᔪᒫᕐᐳᑦ 6 ᐃᓄᖁᑎᑎᑦ ᐊᓂᑎᓚᐅᕐᐸᑎᑦ, ᔧᑰᑉ ᑭᖑᕚᖏᑦ, ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐱᔪᓂᒃ ᐊᖓᒃᑰᓂᕐᓂᒃ ᐃᓕᖅᑯᓯᕐᑖᕐᓯᒪᓕᕐᒪᑕ; ᓯᕗᓂᒃᓴᒥᒡᓗ ᓇᓚᐅᑦᑍᖃᑦᑕᕐᑐᓂᒃ ᒪᓕᓕᕐᓗᑎᒃ ᐱᓕᔅᑍᓂᒥᐅᑎᑐᑦ, ᐃᓅᖃᑎᒋᓐᖏᑕᖏᑕᓗ ᐱᐅᓯᖏᓐᓂᒃ ᒪᓕᒃᓴᕐᓯᒪᓕᕐᓗᑎᒃ. 7 ᓄᓇᖓᑦ ᑕᑕᑉᐳᖅ ᓯᐅᓪᕕᕆᓂᒃ ᒎᓗᓂᒡᓗ, ᐊᔪᕐᓴᖏᑦᔪᑎᒃᓴᖏᓪᓗ ᐊᒥᒐᖏᑦᑐᕐᔪᐊᖑᓪᓗᑎᒃ; ᓄᓇᖓᓪᓗ ᑕᑕᑉᐳᖅ ᕿᒻᒥᕐᔪᐊᓂᒃ, ᐊᖓᔪᖅᑳᕐᓯᐅᑎᓪᓗ ᐊᒃᓴᓗᐊᓖᑦ ᐊᒥᒐᖏᑦᑐᕐᔪᐊᖑᓪᓗᑎᒃ. 8 ᓄᓇᖓᑦ ᑕᑕᒃᑭᕗᖅ ᒎᑎᓐᖑᐊᓂᒃ; ᐹᒻᒪᖃᑦᑕᕐᓗᑎᒃ ᑐᒃᓯᐊᕐᓗᑎᒡᓗ, ᐊᒡᒐᓄᑦ ᓴᓇᓯᒪᔪᓄᑦ, ᓇᖕᒥᓂᖅ ᐊᒡᒐᖕᒥᖕᓄᑦ ᓴᓇᓚᐅᕐᑕᒥᖕᓄᑦ. 9 ᑍᒤᒻᒪᑦ ᐃᓄᐃᑦ ᒥᑭᒡᓕᑎᕐᑎᑕᐅᕗᑦ, ᐊᖑᑎᓪᓗ ᐊᑐᓂᑦ ᓱᓇᐅᔪᓐᓃᕐᑎᑕᐅᓪᓗᑎᒃ; ᑍᒤᒻᒪᑦ ᐳᐃᒍᕐᑍᓕᒃᑭᑦ! 10 ᕾᕐᑐᒧᑦ ᐃᑎᓕᕆᑦ, ᐃᔨᕐᓗᑎᓪᓗ ᓄᓇᒧᑦ ᐊᑕᓂᐅᑉ ᓯᕘᕋᓇᕐᑐᕐᔪᐊᖑᓂᖓᓂᑦ, ᑖᑦᓱᒪᓗ ᐊᖓᔪᖅᑳᕐᔪᐊᖑᓂᖓᑕ ᓂᕐᑐᕐᓇᕐᑐᕐᔪᐊᖑᓂᖓᓂᑦ. 11 ᐊᖑᑎᐅᑉ ᐱᐅᔪᕆᓂᕐᒧᑦ ᑕᑯᔭᐅᑎᓐᓇᓱᐊᕐᓂᖓ ᒥᒃᓕᓕᕐᑎᑕᐅᔪᒫᕐᐳᖅ, ᐃᓄᐃᓪᓗ ᐱᐅᔪᕆᔪᑦ ᒥᑭᒡᓕᑎᑕᐅᓗᑎᒃ, ᐊᑕᓂᖅ ᑖᓐᓇᑐᐊᖅ ᐊᖏᒡᓕᑎᑕᐅᔪᒫᕐᐳᖅ ᑕᒪᓐᓇ ᐅᓪᓗᖅ ᓇᓪᓕᐅᑎᒃᐸᑦ. 12 ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ ᐅᓪᓗᒃᓴᖃᕐᒪᑦ ᐊᑭᕋᕐᑐᕐᓗᓂ ᐱᐅᔪᕆᔪᓂᒃ ᑕᒤᓐᓂᒃ ᐱᔪᓐᓇᕋᓱᒋᔪᓂᒡᓗ, ᐊᑭᕋᕐᑐᕐᓗᓂᓗ ᐅᐱᓐᓇᕐᓂᕋᕐᑕᐅᔪᓂᒃ ᖁᕝᕙᓯᒐᓱᐊᕐᑐᓂᒡᓗ, ᑕᒤᓐᓂᒃ; 13 ᐊᑭᕋᕐᑐᕐᓗᓂᓗ ᓕᐸᓇᓂᐅᑉ ᓇᐹᕐᑐᖁᑎᖏᓐᓂᒃ ᓰᑕᕆᒥᒃ ᐊᑎᓕᖕᓂᒃ ᑕᒤᓐᓂᒃ, ᐳᕐᑐᔪᒦᑎᑕᐅᔪᓂᒃ ᖁᕝᕙᓯᒃᑎᑕᐅᔪᓂᒡᓗ; ᐊᑭᕋᕐᑐᕐᓗᓂᓗ ᐹᓴᓂᐅᑉ ᓇᐹᕐᑐᖁᑎᖏᓐᓂᒃ ᐆᒃᒥᒃ ᐊᑎᓕᖕᓂᒃ ᑕᒤᓐᓂᒃ. 14 ᐊᑭᕋᕐᑐᕐᓗᓂᓗ ᖃᖅᑲᓂᒃ ᑕᒤᓐᓂᒃ ᐳᕐᑐᔪᓂᒃ, ᐱᖑᕐᓂᒃ ᐳᕐᑐᔪᓂᒡᓗ; 15 ᐊᑭᕋᕐᑐᕐᓗᓂᓗ ᓄᕗᒐᓴᒡᔪᐊᓕᐊᕆᓯᒪᔪᓂᒃ ᑕᒤᓐᓂᒃ, ᐃᒡᓗᒐᓴᒡᔪᐊᓪᓗ ᐊᕙᓗᕐᔪᐊᖏᓐᓂᒃ ᐅᓇᑕᕐᓂᕐᒧᑦ ᓵᓚᐅᔪᓐᓇᖏᑦᑐᓂᒃ; 16 ᐊᑭᕋᕐᑐᕐᓗᓂᓗ ᑖᕐᓯᓯᐅᑉ ᐅᒥᐊᕐᔪᐊᖁᑎᖏᓐᓂᒃ ᑕᒤᓐᓂᒃ, ᐅᒥᐊᓂᒡᓗ ᑕᑯᒥᓇᕐᑐᓂᒃ ᑕᒤᓐᓂᒃ. 17 ᐃᓅᓪᓗ ᐱᐅᔪᕆᓂᖓ ᒥᑭᒡᓕᑎᑦᓱᒫᕐᐹ, ᐃᓄᐃᓪᓗ ᐱᐅᔪᕆᓂᖏᑦ ᒥᑭᔪᕈᕐᑎᓪᓗᒋᑦ; ᐊᑕᓂᖅ ᑖᓐᓇᑐᐊᖅ ᐊᖏᔪᕈᕐᑎᑕᐅᔪᒫᕐᐳᖅ ᐅᓪᓗᒥ ᑖᑦᓱᒪᓂ. 18 ᒎᑎᓐᖑᐊᓪᓗ ᐊᑕᖏᑦᓯᐊᕐᓗᑎᒃ ᐱᑕᖃᕈᓐᓃᕈᒫᕐᐳᑦ. 19 ᐃᓄᐃᓪᓗ ᕾᕐᑑᑉ ᕾᕈᓱᖏᓐᓄᑦ ᐳᓚᔪᒫᕐᐳᑦ ᓄᓇᐅᓪᓗ ᐃᑎᕐᓴᖏᓐᓄᐊᕐᓗᑎᒃ, ᐊᑕᓂᐅᑉ ᓯᕘᕋᓇᕐᑐᕐᔪᐊᖑᓂᖓ ᐱᓪᓗᒍ, ᑖᑦᓱᒪᓗ ᐊᖓᔪᖅᑳᕐᔪᐊᖑᓂᖓᑕ ᓂᕐᑐᕐᓇᕐᑐᕐᔪᐊᖑᓂᖓᓂᑦ, ᒪᑭᓕᕐᐸᑦ ᓄᓇᕐᔪᐊᖅ ᓴᔪᒍᒫᕐᐳᖅ ᐊᖏᔪᕐᔪᐊᒥᒃ. 20 ᐅᓪᓗᒥ ᑖᑦᓱᒪᓂ ᐃᓄᐃᑦ ᐃᒋᐅᖅᑬᓕᕈᒫᕐᐳᑦ ᒎᑎᓐᖑᐊᒥᖕᓂᒃ ᓯᐅᓪᕕᕆᓂᒃ ᒎᑎᓐᖑᐊᒥᖕᓂᒡᓗ ᒎᓗᓂᒃ, ᓇᖕᒥᓂᖅ ᓴᓇᓚᐅᕐᑕᒥᖕᓄᑦ ᑐᒃᓯᐊᕐᕕᒋᖃᑦᑕᕈᒪᓪᓗᒋᑦ, ᐃᒋᑦᓯᔪᒫᕐᐳᑦ ᓄᓇᐅᑉ ᐃᓗᐊᓂᒥᐅᑕᕐᓄᑦ ᐊᕕᓐᖓᐅᔮᕐᑐᓄᑦ ᐊᕕᓐᖓᐅᔮᕐᑐᓄᓪᓗ ᐃᓴᕈᓕᖕᓄᑦ. 21 ᐳᓚᔪᒫᕐᐳᓪᓗ ᕾᕐᑑᑉ ᖁᖕᓈᖏᓐᓄᑦ ᐃᓐᓈᕈᐃᓪᓗ ᕾᕈᓱᖏᓐᓄᑦ, ᐊᑕᓂᐅᑉ ᓯᕘᕋᓇᕐᑐᕐᔪᐊᖑᓂᖓᓂᒃ ᕿᒫᓗᑎᒃ, ᐊᖓᔪᖅᑳᕐᔪᐊᖑᓂᖓᑕᓗ ᓂᕐᑐᕐᓇᕐᓂᕐᔪᐊᖓᓂᑦ, ᒪᑭᓕᕐᐸᑦ ᓄᓇᕐᔪᐊᖅ ᓴᔪᒃᑎᓪᓗᒍ ᐊᖏᔪᕐᔪᐊᒥᒃ. 22 ᐃᓄᒃ ᐊᓚᕐᓯᐅᒃ ᓱᕐᓗᖕᒥᒍᑦ ᐊᓂᕐᓵᕐᑐᕐᐸᒃᑐᖅ, ᓱᓇᒦᒃ ᐊᑑᑎᒃᓴᖃᕐᒪᑦ? |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society