ᐄᑉᕈᐃᓄᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᐅᖃᐅᓯᖓ ᐃᕐᓂᕐᒥᒍᑦ

¹ ᑍᑦᓱᒪᓂ ᒎᑎᐅᑉ ᓯᕗᓕᕆᓚᐅᕐᑕᕗᑦ ᐅᓄᕐᑐᐃᕐᓱᕐᓗᓂ ᐅᖃᕐᕕᒋᖃᑦᑕᓚᐅᕐᒪᒋᑦ ᓇᓚᐅᑦᑍᔪᑎᒍᑦ ᐊᑦᔨᒌᖏᑦᑐᑎᒍᑦ ᐱᓇᓱᐊᕐᓗᓂ;

² ᐅᓪᓗᓂᓕ ᑭᖑᓪᓕᕐᓂ ᐅᖃᓪᓚᒡᕕᒋᓚᐅᕐᐹᑎᒍᑦ ᐃᕐᓂᕐᒥᒍᑦ, ᑖᓐᓇ ᓱᓇᓕᒫᑦᓯᐊᕐᓂᒃ ᑭᖑᕐᖑᑦᔨᔪᒃᓴᐅᖁᓪᓗᒍ ᓂᕈᐊᕐᓯᒪᕚ, ᑖᑦᓱᒨᓇᓗ ᓯᓚᕐᔪᐊᖅ ᐱᓐᖑᕐᑎᓚᐅᕐᐹ.

³ ᑖᓐᓇ ᒎᑎᐅᑉ ᐱᓐᓇᕐᓇᕐᓂᕐᔪᐊᖓᓂᒃ ᓴᖅᑭᔮᕐᑎᑦᓯᓚᐅᕐᐳᖅ ᒎᑎᐅᓪᓗ ᖃᓄᐃᑦᑑᓂᖓᑕ ᐊᑦᔨᓪᓗᐊᖓ, ᓯᓚᕐᔪᐊᓕᒫᒥᒡᓗ ᐊᐅᓚᑦᓯᔪᖅ ᐅᖃᐅᓯᕐᒥᓄᑦ ᐱᔪᓐᓇᕐᓂᖃᕐᑐᒧᑦ. ᐊᔪᕐᓃᑦ ᓴᓗᒻᒪᕐᑕᐅᑦᔪᑎᒃᓴᖏᓐᓂᒃ ᐋᖅᑭᒃᓯᔭᕇᕋᒥ, ᕿᓚᖕᒧᑦ ᐃᖏᑦᓴᕐᑐᓚᐅᕐᑐᖅ ᐊᖓᔪᖅᑳᕐᔪᐊᑉ ᑕᓕᕐᐱᐊᓄᑦ ᖁᑦᓯᖕᓂᕐᒥ.

ᒎᑎᐅᑉ ᐃᕐᓂᖓᑕ ᐊᔪᖏᑦᑐᕐᔪᐊᖑᓂᖓ

⁴ ᐂᖏᓕᓂᑦ ᐊᔪᖏᓐᓂᕐᓴᕐᔪᐊᖑᑎᑕᐅᓯᒪᕗᖅ ᐊᑎᖃᕐᑎᑕᐅᓪᓗᓂᓗ ᐂᖏᓖᑦ ᑍᔭᐅᒍᓯᖏᓐᓂᑦ ᐱᐅᓂᕐᓴᒥᒃ.

⁵ ᒎᑎ ᐂᖏᓖᑦ ᓇᓪᓕᐊᓐᓄᑦ ᐅᖃᓚᐅᕐᓯᒪᖏᒻᒪᑦ, “ᐃᕐᓂᕆᕙᒋᑦ, ᐅᓪᓗᒥ ᐃᕐᓂᕐᑖᕆᕙᒋᑦ.” ᐅᖃᓚᐅᕐᓯᒪᖏᓐᓂᕗᕐᓗ ᐂᖏᓕᓄᑦ, “ᐊᑖᑕᒋᓂᐊᕐᐹᖓ, ᐅᕙᖓᓗ ᐃᕐᓂᕆᓂᐊᕐᐸᕋ.”

⁶ ᐊᒻᒪᓗ, ᐃᕐᓂᕐᑖᕆᐅᕈᑎᓂ ᑎᓕᓕᕋᒥᐅᒃ ᓯᓚᕐᔪᐊᕐᒧᑦ, ᐅᖃᓚᐅᕐᐳᖅ, “ᒎᑎᐅᑉ ᐂᖏᓕᖁᑎᓕᒫᖏᑕ ᑐᒃᓯᐊᕐᕕᒋᔭᒃᓴᕆᕚᑦ.”

⁷ ᒎᑎᓕ ᐂᖏᓕᓂᒃ ᐅᖃᐅᓯᖃᓚᐅᕐᐳᖅ, “ᐂᖏᓕᖁᑎᓂ ᐊᓄᕆᓐᖑᕐᑎᑉᐰᑦ, ᐱᔨᓂᓗ ᐃᑯᐊᓚᔪᓐᖑᕐᑎᓪᓗᒋᑦ.”

⁸ ᐃᕐᓂᕐᓕ ᐱᓪᓗᒍ ᐅᖃᓚᐅᕐᐳᖅ, “ᒎᑏ ᐃᒃᓯᕙᐅᑕᕐᔪᐊᑦ, ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ ᑍᒤᓕᖓᓂᐊᕐᐳᖅ, ᐊᑕᓂᐅᕖᓪᓗ ᐊᐅᓚᓐᓂᐊᕐᐸᑦ ᐊᔭᐅᑉᐱᐊᕐᓄᑦ ᓇᓛᒎᑦᓯᐊᕐᑐᒥᒃ.

⁹ ᓇᓛᒎᕐᓂᖅ ᖁᕕᐊᒋᕙᑦ ᐱᐅᖏᑦᑐᓕᓂᕐᓗ ᐆᒥᒋᓪᓗᒍ; ᑍᒤᒻᒪᑦ ᒎᑎᐅᑉ, ᒎᑎᕕᑦ ᐅᕐᓱᕐᑎᓚᐅᕐᐹᑎᑦ, ᐅᕐᓱᒧᑦ ᖁᕕᐊᓱᖕᓂᕐᒧᑦ ᐃᓅᖃᑎᒌᓄᑦ ᑐᓂᓯᒪᔭᖓᓂᑦ ᐱᐅᓂᕐᓴᒥᒃ.”

¹⁰ ᓱᓕᓗ ᐅᖃᓚᐅᕆᕗᖅ, “ᐃᕝᕕᑦ, ᐊᑕᓃᖅ, ᐱᒋᐊᕐᓂᖓᓂᑦ ᓄᓇᕐᔪᐊᖅ ᐱᓐᖑᕐᑎᓚᐅᕐᐸᑦ, ᕿᓔᓪᓗ ᐊᒡᒐᖕᓄᑦ ᓴᓇᓚᐅᕐᐸᑎᑦ.

¹¹ ᑖᒃᑯᐊᓕ ᓄᖑᑦᓱᒫᕐᐳᑦ, ᐃᕝᕕᓪᓕ ᑍᒤᖏᓐᓇᕐᓂᐊᕐᐳᑎᑦ; ᑖᒃᑯᐊᓗ ᐊᑕᖏᕐᓗᑎᒃ ᓄᑕᐅᔪᓐᓃᕐᐸᓪᓕᐊᔪᒫᕐᐳᑦ ᐊᓐᓄᕌᑎᑐᑦ,

¹² ᐅᓕᒡᔪᐊᑎᑐᑦ ᐃᒧᔪᒫᕐᐸᑎᑦ, ᑕᕝᕙ ᐊᓯᑦᔨᕐᕈᒫᕐᐳᑦ. ᐃᕝᕕᓪᓕ ᑖᓐᓇᐅᑦᓮᓐᓇᕐᐳᑎᑦ, ᐊᕐᕌᒍᑎᓪᓗ ᐃᓱᓕᓐᓂᐊᓐᖏᓚᑦ.”

¹³ ᐂᖏᓖᑦ ᓇᓪᓕᐊᓐᓄᑦ ᐅᖃᓚᐅᕐᓯᒪᓐᖏᓚᖅ ᐃᒫᒃ: “ᑕᓕᕐᐱᓐᓄᑦ ᐃᖏᓕᕆᑦ, ᐊᑭᕋᕐᑐᕐᑎᖕᓂᒃ ᐃᑎᒐᖕᓄᑦ ᐃᑯᕐᕋᓕᐅᑦᔨᖅᑳᕐᑎᓐᓇᖓ.”

¹⁴ ᐂᖏᓖᓪᓕ ᐊᓂᕐᓂᐅᕗᑦ ᑎᓕᔭᐅᓯᒪᔪᑦ ᐱᔨᑦᓯᖁᓪᓗᒋᑦ, ᐃᑲᔪᕐᑎᐅᖁᓪᓗᒋᑦ ᐱᐅᓕᔭᐅᓂᕐᒥᒃ ᑭᖑᕐᖑᑦᔨᓂᐊᕐᑐᓄᑦ.