ᒨᓯᓯ ᓯᕗᓪᓖᑦ 47 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑕᕝᕙ ᔫᓯᐱ ᐰᕉᒧᐊᕐᐳᖅ ᐅᖃᐅᑎᓪᓗᒍᓗ, “ᐊᑖᑕᒐ ᖃᑕᓐᖑᑎᒃᑲᓗ, ᐆᒪᔪᖁᑎᓕᒫᖏᓪᓗ ᑕᒪᕐᒥᒃ ᑲᑎᓐᖓᔪᑦ ᐅᓄᕐᑐᕐᔪᐊᓪᓗ ᐱᖁᑎᓕᒫᖏᓪᓗ ᓄᓇᒥᑦ ᑬᓇᓂᒥᑦ ᑎᑭᑉᐳᑦ; ᓄᓇᒦᓕᕐᐳᓪᓗ ᒎᓯᓂᒥ.”

² ᐊᖓᔪᒥᓗ ᐃᓚᖏᓐᓂᒃ ᑕᓪᓕᒪᓂᒃ ᐰᕉᒧᐊᖃᑎᖃᓚᐅᕐᐳᖅ.

³ ᐰᕉᓪᓗ ᔫᓯᐱᐅᑉ ᐊᖓᔪᖏᑦ ᐅᖃᐅᑎᕔᑦ, “ᓱᓇᒥᒃ ᐱᓇᓱᐊᒐᖃᕐᐱᓰ?” ᑖᒃᑯᐊ ᐰᕉᒧᑦ ᑭᐅᕗᑦ, “ᐃᓕᖕᓄᑦ ᐱᔨᐅᕗᒍᑦ ᓰᐱᓕᕆᔨᐅᓪᓗᑕ, ᓯᕗᓕᕗᑦ ᒪᓕᒡᓗᒋᑦ.”

⁴ ᐰᕉᒧᓪᓗ ᐅᖃᒃᑲᓐᓂᕐᐳᑦ, “ᑕᒪᐅᓐᖓᕐᐳᒍᑦ ᐊᐅᓪᓛᕐᓗᑕ; ᐱᔨᕕᑦ ᐆᒪᔪᖁᑎᖏᑦ ᓂᕿᒃᓴᖃᕈᓐᓃᕐᒪᑕ, ᑳᖕᓇᕐᑐᕐᔪᐊᒧᑦ ᑎᑭᐅᒪᔭᐅᓗᐊᓕᕐᒪᑦ ᑬᓇᓂᐅᑉ ᓄᓇᖓ; ᒫᓐᓇᓕ ᐃᓕᖕᓄᑦ ᕿᓄᕗᒍᑦ, ᐱᔨᑎᑦ ᓄᓇᖃᕈᓐᓇᕐᑎᓚᐅᒃᑭᑦ ᓄᓇᒥ ᒎᓯᓂᒥ.”

⁵ ᑕᕝᕙ ᐰᕉ ᔫᓯᐱᒧᑦ ᐅᖃᕐᐳᖅ, “ᐊᑖᑍᑦ ᐊᖓᔪᑎᓪᓗ ᐃᓕᖕᓄᑦ ᑎᑭᒻᒪᑕ.

⁶ ᑕᕝᕙ ᐄᑦᔨᑉᑎᐅᑉ ᓄᓇᖓ ᐃᓕᖕᓄᑦ ᒪᓂᕗᖅ; ᐊᑖᑍᑦ ᐊᖓᔪᑎᓪᓗ ᓄᓇᑖᕐᑎᓚᐅᒃᑭᑦ ᓄᓇᐅᑉ ᐱᐅᓂᕐᐹᖓᓂ; ᓄᓇᒥ ᒎᓯᓂᒥ ᓄᓇᑖᕐᑎᓚᐅᒃᑭᑦ; ᖃᐅᔨᒪᔭᖃᕈᕕᓪᓗ ᑖᒃᑯᓇᓂ ᐱᔪᓐᓇᑦᓯᐊᕐᑐᓂᒃ, ᐆᒪᔪᖁᑎᓐᓄᑦ ᑲᒪᔨᐅᔪᓄᑦ ᐊᖓᔪᖅᑳᓐᖑᕐᑎᑦᓯᓂᐊᕐᐳᑎᑦ.”

⁷ ᑕᕝᕙ ᔫᓯᐱᐅᑉ ᐊᑖᑕᓂ ᑕᕝᕗᓐᖓᐅᑎᒋᕚ, ᐰᕉᒧᓪᓗ ᑕᓯᐅᕐᓗᒍ, ᔧᑰᓪᓗ ᐰᕉ ᓮᒻᒪᕐᑎᑉᐹ.

⁸ ᐰᕉᓗ ᔧᑯᒧᑦ ᐅᖃᕐᐳᖅ, “ᖃᑦᓯᓂᒃ ᐊᕐᕌᒍᖃᓕᕐᐲᑦ?”

⁹ ᔧᑯᓗ ᐅᖃᕐᐳᖅ ᐰᕉᒧᑦ, “130ᓂᒃ ᐊᕐᕌᒍᖃᓕᕐᐳᖓ; ᐃᓅᓯᓐᓂ ᐱᐅᖏᑦᑐᓂᒃ ᐊᑐᕐᓯᒪᕗᖓ, ᓯᕗᓕᕐᒪᓗ ᐃᓅᓯᕆᓚᐅᕐᑕᖏᑕ ᓴᓂᐊᓂ ᐊᕐᕌᒍᒃᑲ ᖃᑦᓰᓐᓇᐅᓂᕐᓴᒻᒪᕆᐅᕗᑦ.”

¹⁰ ᔧᑰᓪᓗ ᐰᕉ ᓮᒻᒪᕐᑎᓐᓇᒥᐅᒃ, ᑕᕝᕙᓐᖓᑦ ᐰᕉᑉ ᓇᔪᕐᑕᖓᓂᑦ ᐊᓂᕗᖅ.

¹¹ ᑕᕝᕙ ᔫᓯᐱᐅᑉ ᐊᑖᑕᓂ ᐊᖓᔪᓂᓗ, ᓄᓇᑖᕈᓐᓇᕐᑎᑉᐰᑦ ᐄᑦᔨᑉᑎᐅᑉ ᓄᓇᖓᓂ; ᓄᓇᐅᑉ ᐱᐅᓂᕐᐹᖓᓂ, ᓄᓇᒥ ᕌᒥᓯᓯᒥ, ᑍᒫᒃ ᐰᕉᑉ ᐱᖁᓚᐅᕐᒪᒍ.

¹² ᔫᓯᐱᐅᓪᓗ ᐊᑖᑕᓂ ᑲᒪᒋᓚᐅᕐᐹ, ᖃᑕᓐᖑᑎᓂᓗ ᐊᑖᑕᖓᑕᓗ ᐃᒡᓗᒥᐅᖃᑎᖏᑦ ᑕᒪᕐᒥᒃ ᓂᕿᒃᓴᖃᕐᑎᓪᓗᒋᑦ, ᑭᖑᕚᖏᑕ ᐅᓄᕐᓂᖏᑦ ᒪᓕᒡᓗᒋᑦ.

ᑳᖕᓇᕐᑐᕐᔪᐊᖅ

¹³ ᓄᓇᓕᒫᒥᓕ ᓇᓂᑐᐃᓐᓇᖅ ᓂᕿᒃᓴᖃᕈᓐᓃᕐᐳᖅ; ᑳᖕᓇᕐᑐᕐᔪᐊᖅ ᐊᖏᔪᒥᒃ ᐱᕙᓪᓕᐊᖕᒪᑦ, ᐄᑦᔨᑉᑎᐅᑉ ᓄᓇᖓ ᑬᓇᓂᐅᓪᓗ ᓄᓇᖓ ᑕᒪᖏᒃ ᓴᓐᖐᓕᕙᓪᓕᐊᓕᕐᐴᒃ ᑳᖕᓇᕐᑐᕐᔪᐊᖅ ᐱᑦᔪᑎᒋᓪᓗᒍ.

¹⁴ ᔫᓯᐱᓗ ᑕᒤᓐᓂᒃ ᑮᓇᐅᔭᓂᒃ ᐄᑦᔨᑉᑎᒥᑦ ᑬᓇᓂᒥᓪᓗ ᓂᐅᕕᕈᑕᐅᔪᓕᒫᓂᒃ ᑕᒤᓐᓂᒃ ᑲᑎᕐᓱᐃᓚᐅᕐᐳᖅ, ᓂᐊᖂᔭᒃᓴᓄᑦ ᓂᐅᕕᐅᑕᐅᓯᒪᔪᓂᒃ; ᑖᒃᑯᐊᓗ ᔫᓯᐱᐅᑉ ᑮᓇᐅᔧᑦ ᐰᕉᑉ ᐃᒡᓗᖓᓄᐊᕈᑎᕔᑦ.

¹⁵ ᐄᑦᔨᑉᑎᐅᓪᓕ ᓄᓇᖓᓂ ᑬᓇᓂᐅᓪᓗ ᓄᓇᖓᓂ ᑮᓇᐅᔧᕈᑎᓕᕋᒥᒃ, ᐄᑦᔨᑉᑎᒥᐅᑦ ᑕᒪᕐᒥᒃ ᔫᓯᐱᒧᐊᕐᐳᑦ ᐅᖃᕐᓗᑎᒡᓗ, “ᓂᕿᒃᓴᑦᑎᓐᓂᒃ ᑐᓂᓯᕕᒋᓚᐅᕐᑎᒍᑦ; ᓱᖕᒪᑦ ᓵᖕᓂ ᐱᕐᓕᕐᑐᒃᓴᐅᕕᑖ? ᑮᓇᐅᔧᕈᑎᒐᑦᑕ.”

¹⁶ ᔫᓯᐱᐅᑉ ᑭᐅᕔᑦ, “ᐆᒪᔪᖁᑎᓯ ᑐᓂᕐᕈᑎᒋᓚᐅᕐᓯᒋᒃ, ᑕᕝᕙ ᓂᕿᒃᓴᑦᓯᓐᓂᒃ ᑐᓂᓂᐊᕐᐸᑦᓯ ᑕᐅᕐᓯᐅᑎᓗᒋᑦ ᐆᒪᔪᖁᑎᑦᓯᓐᓄᑦ, ᑮᓇᐅᔧᕈᑎᑐᐊᕈᑦᓯ.”

¹⁷ ᑕᕝᕙ ᐃᒻᒧᒃᓯᐅᒐᖁᑎᒥᖕᓂᒃ ᔫᓯᐱᒧᐊᕈᑦᔨᕗᑦ; ᔫᓯᐱᐅᓪᓗ ᓂᕿᒃᓴᓂᒃ ᑐᓂᓯᕕᒋᕔᑦ ᑕᐅᕐᓯᐅᑎᓪᓗᒋᑦ ᕿᒻᒥᕐᔪᐊᓄᑦ, ᐆᒪᔪᖁᑎᓄᓪᓗ ᑲᑎᓐᖓᔪᓄᑦ, ᐅᓄᕐᑐᕐᔪᐊᖑᔪᓄᑦ, ᓯᐅᑎᖅᑯᕐᑐᔪᓄᓪᓗ. ᓂᕿᒃᓴᓄᓪᓗ ᑕᒪᒃᑯᐊ ᐆᒪᔪᖁᑎᖏᑦ ᑕᐅᕐᓯᐅᑎᓚᐅᕐᐰᑦ ᑕᒫᓂ ᐊᕐᕌᒍᒥ.

¹⁸ ᑕᒪᓐᓇ ᐊᕐᕌᒍᖅ ᓈᖕᒪᑦ, ᐊᕐᕌᒍᑉ ᐂᑉᐸᖓᓂ ᐅᐸᓚᐅᕆᕚᑦ ᐅᖃᐅᑎᓪᓗᒍᓗ, “ᐊᖓᔪᖅᑳᑦᑎᓐᓄᑦ ᐃᔨᕋᕐᑐᕈᒪᖏᓐᓇᑦᑕ ᑮᓇᐅᔭᓕᒫᕗᑦ ᓄᖑᒻᒪᑕ; ᐆᒪᔪᖁᑎᓕᒫᕗᓪᓗ ᑐᓂᓯᒪᓕᕋᑦᑎᒍ ᐊᖓᔪᖅᑳᑦᑎᓐᓄᑦ; ᐊᑭᓕᐅᑎᒃᓴᖃᕈᓐᓃᕐᐳᒍᑦ ᐊᖓᔪᖅᑳᑦᑎᓐᓄᑦ ᑎᒥᑦᑎᓐᓂᒃ ᐱᕈᕐᓰᕕᖁᑎᑦᑎᓐᓂᒡᓗ ᑭᓯᐊᓂ.

¹⁹ ᖃᓄᐃᒻᒪᑦ ᑕᑯᓐᓇᕐᑎᓪᓗᑎᑦ ᓵᖕᓂ ᐱᕐᓕᕐᑐᒃᓴᐅᕕᑖ, ᑕᒪᑦᑕ ᐅᕙᒍᑦ ᓄᓇᕗᓪᓗ? ᓂᐅᕕᐊᕆᓚᐅᕐᑎᒍᑦ ᓄᓇᕗᓪᓗ ᓂᕿᒃᓴᖃᖁᓪᓗᑕ, ᑕᒪᑦᑕ ᐅᕙᒍᑦ ᓄᓇᕗᓪᓗ ᓯᐊᓛᖑᓗᑕ ᐱᔨᑖᕆᔭᐅᓂᐊᕋᑦᑕ ᐰᕉᒧᑦ; ᑲᓐᖓᕐᓲᑎᒃᓴᓂᒃ ᑐᓂᓯᕕᒋᓚᐅᕐᑎᒍᑦ ᐃᓅᖁᓪᓗᑕ ᐱᕐᓕᖁᓇᑕᓗ, ᐱᕈᕐᓰᕕᖁᑎᕗᓪᓗ ᐱᕈᕐᕕᐅᔪᓐᓁᓪᓕᖁᓇᒋᑦ.”

²⁰ ᑕᕝᕙ ᔫᓯᐱᐅᑉ ᐄᑦᔨᑉᑎᐅᑉ ᓄᓇᖓ ᑕᒪᕐᒥᒃ ᓂᐅᕕᐊᕆᓚᐅᕐᐹ ᐰᕉᒧᑦ; ᐄᑦᔨᑉᑎᒥᐅᑦ ᑕᒪᕐᒥᒃ ᐱᕈᕐᓰᕕᖁᑎᑎᒃ ᓂᐅᕐᕈᑎᒋᓚᕐᐰᑦ, ᑳᖕᓇᕐᑐᕐᔪᐊᒧᑦ ᑎᑭᐅᒪᔭᐅᒻᒪᕆᓕᕋᒥᒃ. ᐰᕉᓪᓗ ᓄᓇ ᑕᒪᕐᒥᒃ ᐱᑖᕆᓚᐅᕐᐹ;

²¹ ᐃᓄᐃᓪᓗ ᔫᓯᐱᐅᑉ ᓯᐊᓛᓐᖑᕐᑎᓚᐅᕐᐰᑦ ᐄᑦᔨᑉᑎᐅᑉ ᓄᓇᖓᑕ ᑭᒡᓕᖓᓂᑦ ᐃᓱᐊᓄᑦ ᑎᑭᓪᓗᒋᑦ.

²² ᑐᓂᕐᕈᓯᕐᑎᑦᓯᔩᑦ ᓄᓇᖁᑎᖏᑦ ᐊᒥᐊᒃᑯᑐᐊᖑᓚᐅᕐᐳᑦ ᓂᐅᕕᐊᕆᓚᐅᖏᒻᒪᒋᑦ; ᑐᓂᕐᕈᓯᕐᑎᑦᓯᔩᑦ ᓂᕿᒃᓴᖃᕐᑎᑕᐅᖁᓪᓗᒋᑦ ᐰᕉᒧᑦ ᐋᖅᑭᒃᑕᐅᓯᒪᓚᐅᕐᒪᑕ, ᐃᓅᑦᔪᑎᒃᓴᖃᕈᓐᓇᓚᐅᕐᐳᑦ ᐰᕉᑉ ᑐᓂᕐᕈᑎᒋᔭᖏᓐᓄᑦ; ᑍᒤᒻᒪᑦ ᓄᓇᖁᑎᒥᖕᓂᒃ ᓂᐅᕕᐅᑎᖃᕆᐊᖃᓚᐅᓐᖏᓚᑦ.

²³ ᑕᕝᕙ ᔫᓯᐱ ᐃᓄᖕᓄᑦ ᐅᖃᕐᐳᖅ, “ᑕᑯᒋᑦ ᐅᓪᓗᒥ ᐃᓕᑦᓯᓐᓂᒃ ᓄᓇᖁᑎᑦᓯᓐᓂᒡᓗ ᓂᐅᕕᕐᓯᒪᓕᕐᐳᖓ ᐰᕉᒧᑦ. ᑕᕝᕙ ᑲᓐᖓᕐᓲᑎᒃᓴᓯ ᐃᓕᑦᓯᓐᓄᑦ ᑐᓂᕙᒃᑲ, ᓄᓇᒧᑦ ᑲᓐᖓᕐᓲᑎᒋᓂᐊᕋᑦᓯᐅᒃ.

²⁴ ᑲᑎᕐᓱᐃᕕᒃᓴᖅ ᓇᓪᓕᐅᑎᒃᐸᑦ ᐱᕈᕐᑎᑕᓯ ᐊᕕᒡᓗᒋᑦ ᑕᓪᓕᒪᖏᑦ ᑐᓂᔭᒃᓴᕆᕙᓯ ᐰᕉᒧᑦ, ᐊᕕᒃᑕᑦᓯ ᓯᑕᒪᖏᑦ ᓇᖕᒥᓂᕐᑖᕆᔭᒃᓴᕆᕙᓯ, ᐱᕈᕐᓰᕕᖕᒧᑦ ᑲᓐᖓᕐᓲᑎᐅᖁᓪᓗᒋᑦ ᐃᓕᑦᓯᓐᓄᓪᓗ ᐃᒡᓗᒥᐅᖃᑎᑦᓯᓐᓄᓪᓗ ᓂᕿᒃᓴᐅᖁᓪᓗᒋᑦ, ᕿᑐᕐᖓᑦᓯᓐᓄᓪᓗ ᑕᒤᓐᓄᑦ.”

²⁵ ᑖᒃᑯᐊ ᐅᖃᕐᐳᑦ, “ᐃᓅᓯᑦᑎᓐᓂᒃ ᐱᐅᓕᒃᓯᓯᒪᓕᕐᐳᑎᑦ; ᐊᖓᔪᖅᑳᒃ ᐃᓕᖕᓂᒃ ᖁᕕᐊᓱᒃᑎᑦᓯᖁᓪᓗᑕ ᐰᕉᒧᑦ ᓯᐊᓛᕆᔭᐅᓂᐊᓕᕐᐳᒍᑦ ᐱᔨᒋᔭᐅᓗᑕ.”

²⁶ ᑕᕝᕙ ᔫᓯᐱ ᐱᖁᔭᓕᐅᓚᐅᕐᐳᖅ ᐄᑦᔨᑉᑎᒥᐅᑦ ᓄᓇᖁᑎᖏᑦ ᐱᓪᓗᒋᑦ, ᑕᒪᓐᓇᓗ ᓱᓕ ᐅᓪᓗᒥᒧᑦ ᐊᑐᕐᑕᐅᕗᖅ, ᓄᓇᐅᑉ ᐱᕈᕐᑎᑕᖏᑕ ᐊᕕᒡᓗᒋᑦ ᑕᓪᓕᒪᖏᑦ ᐰᕉᒧᑦ ᐱᒋᔭᐅᖁᓪᓗᒋᑦ; ᑭᓯᐊᓂ ᑐᓂᕐᕈᓯᕐᑎᑦᓯᔩᑦ ᓄᓇᖁᑎᖏᑦ ᐰᕉᒧᑦ ᐱᑖᕆᔭᐅᓚᐅᓐᖏᓚᑦ.

ᔧᑰᑉ ᑭᖑᓪᓕᕐᐹᒥᒃ ᑐᐱᕐᓲᒻᒫᓂᖓ

²⁷ ᑕᕝᕙ ᐃᓴᕆᐊᓕ ᓄᓇᖃᓚᐅᕐᐳᖅ ᐄᑦᔨᑉᑎᐅᑉ ᓄᓇᖓᓂ, ᓄᓇᒥ ᒎᓯᓂᒥ; ᑖᓐᓇᓗ ᓄᓇᒋᔭᖓᑦ ᐊᖏᒡᓕᕙᓪᓕᐊᓚᐅᕐᐳᖅ, ᐊᔪᕐᓴᖏᑦᑐᕐᔪᐊᖑᓕᕐᓗᑎᒃ ᐃᓄᒋᐊᒃᓯᕙᓪᓕᐊᓪᓗᑎᒡᓗ ᓱᒃᑲᔪᒥᒃ.

²⁸ ᔧᑯᓗ ᐄᑦᔨᑉᑎᐅᑉ ᓄᓇᖓᓃᓚᐅᕐᐳᖅ ᐊᕐᕌᒍᓂᒃ 17ᓂᒃ; ᔧᑰᓪᓗ ᐊᕐᕌᒍᖏᑦ ᑕᒪᕐᒥᒃ 147ᐅᓕᓚᐅᕐᐳᑦ.

²⁹ ᐃᓴᕆᐊᓕᐅᓪᓕ ᐃᓅᓯᖓᑦ ᐃᓱᓕᓕᕐᒪᑦ, ᐃᕐᓂᓂ ᔫᓯᐱ ᕾᖁᓪᓗᒍ ᐅᖃᐅᑎᕚ, “ᐃᓕᖕᓄᑦ ᖁᕕᐊᒋᔭᐅᒍᒪ, ᐊᒡᒐᑎᑦ ᖁᒃᑐᕋᕐᒪ ᐊᑖᓄᐊᓚᐅᒃᑭᑦ, ᐅᖃᕕᒡᓗᑎᓪᓗ ᑲᔪᓯᑦᓯᐊᕐᓗᑎᑦ ᓱᓕᓂᐊᕐᓂᕋᕐᓗᑎᑦ ᐅᕙᓐᓄᑦ. ᐄᑦᔨᑉᑎᒥ ᐃᓗᕕᕐᓂᐊᕐᓇᖓ,

³⁰ ᓯᕗᓕᓐᓂᓕ ᐃᓗᕕᕐᓯᒪᖃᑕᐅᔪᒪᕗᖓ; ᐄᑦᔨᑉᑎᒥᑦ ᐊᐅᓪᓚᕈᑎᓗᖓ ᑍᒃᑯᐊ ᐃᓗᕕᕐᑕᐅᕕᒋᓯᒪᔭᖏᓐᓂ ᐃᓗᕕᕐᑕᐅᔪᒃᓴᐅᕗᖓ.” ᔫᓯᐱᐅᑉ ᑭᐅᕚ, “ᐅᖃᐅᓯᕆᔭᑎᑦ ᐊᑐᕐᓂᐊᕐᐸᒃᑲ.”

³¹ ᔧᑯᓗ ᐅᖃᕐᐳᖅ, “ᐊᖏᒻᒪᕆᒡᕕᒋᓕᓐᖓ”; ᑕᕝᕙ ᔫᓯᐱ ᐊᖏᒻᒪᕆᒃᐳᖅ ᑖᑦᓱᒧᖓ. ᐃᓴᕆᐊᓕᐅᓪᓗ ᓂᐊᖁᓂ ᐅᑯᕚ ᓇᓪᓚᖓᕕᖕᒥᓂ.