ᐄᓱᕋᐅᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᓮᕋᓯᐅᑉ ᑎᓕᓯᓂᖓ ᔫᑏᑦ ᐅᑎᖁᓪᓗᒋᑦ

¹ ᓮᕋᓯ ᓯᕗᓪᓕᕐᐹᒥ ᐊᕐᕌᒍᒥ ᐊᖓᔪᖅᑳᕐᔪᐊᖑᑎᓪᓗᒍ ᐴᕐᓯᐊᒥ, ᐊᑕᓂᐅᑉ ᐅᖃᐅᓯᕆᓚᐅᕐᑕᖓ ᐅᖃᕐᑎᒥᒍᑦ ᔨᕆᒤᐊᒃᑯᑦ ᓇᓚᐅᑦᓯᓚᐅᕐᐳᖅ, ᓮᕋᓯ ᐊᑕᓂᐅᑉ ᐃᓱᒪᑎᓚᐅᕐᐹ ᐱᓇᓱᐊᖁᓪᓗᒍ ᑎᓕᓯᖁᓪᓗᒍᓗ ᑎᑎᕋᕐᓯᒪᔪᑎᒍᑦ ᐅᖃᓕᒫᕐᑕᐅᖁᓪᓗᒋᓪᓗ ᓂᐱᖃᕐᓗᑎᒃ ᓄᓇᓂ ᐊᖓᔪᖅᑲᐅᕕᒋᔭᓕᒫᒥᓂ ᐃᒫᒃ:

² “ᐅᓇ ᓮᕋᓯᐅᑉ ᑎᓕᓯᑦᔪᑎᖓ ᐊᖓᔪᖅᑳᕐᔪᐊᖑᔫᑉ ᐴᕐᓯᐊᒥ. ᐊᑕᓂᐅᑉ, ᕿᓚᐅᑉ ᒎᑎᖓᑕ ᐊᐅᓚᑦᓯᔨᓐᖑᕐᑎᓚᐅᕐᐹᖓ ᓯᓚᕐᔪᐊᕐᒥᐅᓕᒫᓄᑦ ᐱᔭᒃᓴᕐᑖᕐᑎᓚᐅᕐᐹᖓᓗ ᑐᒃᓯᐊᕐᕕᓕᐅᖁᓪᓗᖓ ᔨᕉᓴᓕᒥ ᔫᑎᐊᒦᑦᑐᒥ.

³ ᒎᑎᐅᑉ ᐃᓚᒋᓕᓯ ᐃᓄᖁᑕᐅᔪᓯ ᑖᑦᓱᒧᖓ. ᔨᕉᓴᓕᒧᐊᕐᑐᒃᓴᐅᕗᓯ ᐋᖅᑭᒋᐊᕐᓗᒍᓗ ᐊᑕᓂᐅᑉ ᑐᒃᓯᐊᕐᕕᖓ, ᐃᓴᕆᐊᓕᒥᐅᑦ ᒎᑎᖓ, ᒎᑎᐅᔪᖅ ᑐᒃᓯᐊᕐᕕᐅᕙᒃᑐᖅ ᔨᕉᓴᓕᒥ.

⁴ ᐃᓄᖁᑎᖏᑦ ᐊᐅᓪᓚᐅᑦᔭᐅᓯᒪᔪᑦ ᐃᑲᔪᕐᑕᐅᔭᕆᐊᖃᑐᐊᕐᐸᑕ ᐅᑎᓕᕐᑎᓪᓗᒋᑦ, ᓯᓚᖅᑲᑎᖏᑦᑕ ᐃᑲᔪᕐᑕᒃᓴᕆᕔᑦ. ᐃᑲᔪᕐᑐᒃᓴᐅᕗᑦ ᓯᐅᓪᕕᕆᓂ ᒎᓗᓂᒡᓗ, ᑕᖁᐊᒃᓴᖏᓂᒡᓗ ᐅᓯᓕᕐᑐᕐᓗᒋᓪᓗ ᐆᒪᔪᖁᑎᖏᑦ, ᑐᓂᕐᕈᑎᒃᓴᖏᓐᓂᒡᓗ ᒎᑎᐅᑉ ᑐᒃᓯᐊᕐᕕᖓᓄᑦ ᔨᕉᓴᓕᒥ.”

⁵ ᐊᖓᔪᖅᑳᕆᔭᐅᔪᑦ ᐃᓚᒌᓄᑦ ᔫᑕᐅᑉ ᐱᓐᔭᒥᓂᐅᓪᓗ ᑭᖑᕚᖏᓐᓄᑦ, ᑐᓂᕐᕈᓯᕐᑎᑦᓯᔨᓄᑦ ᓕᕔᑎᓄᓪᓗ, ᑭᓇᑐᐃᓐᓇᓕᒫᓄᓪᓗ ᒎᑎᐅᑉ ᐆᒻᒪᑎᖏᑦ ᐊᐅᓚᑦᔭᒃᓯᒪᔭᖏᓐᓂ ᐊᐅᓪᓚᑐᐃᓐᓇᕆᐊᖃᓕᓚᐅᕐᐳᑦ ᐊᑕᓂᐅᓪᓗ ᑐᒃᓯᐊᕐᕕᖓ ᐋᖅᑭᒋᐊᕆᐊᕐᑐᕐᓗᒍ ᔨᕉᓴᓕᒦᑦᑐᖅ.

⁶ ᓯᓚᖅᑲᑎᓕᒫᖏᓐᓄᑦ ᐃᑲᔪᕐᑕᐅᓚᐅᕐᐳᑦ ᑐᓂᔭᐅᓪᓗᑎᒃ ᐅᓄᕐᑐᓂᒃ: ᓂᕆᑦᔪᑎᓂᒃ ᓯᐅᓪᕕᕆᓂᒃ, ᒎᓗᓂᒃ, ᑕᖁᐊᒃᓴᓂᒡᓗ, ᐆᒪᔪᖁᑎᖏᓪᓗ ᐅᓯᓕᕐᑐᕐᓱᒋᑦ, ᐊᓯᖏᓐᓂᒡᓗ ᐱᔪᒥᓇᕐᑐᓂᒃ, ᑐᓂᕐᕈᑎᒃᓴᓂᒡᓗ ᑐᒃᓯᐊᕐᕕᖕᒧᑦ.

⁷ ᐊᖓᔪᖅᑳᕐᔪᐊᑉ ᓮᕋᓯᐅᑉ ᐅᑎᕐᑎᓚᐅᕐᐰᑦ ᐴᒍᑍᑦ ᐃᒥᐅᑏᓪᓗ ᐊᖓᔪᖅᑳᕐᔪᐊᑉ ᓂᐱᑯᓁᓴᐅᑉ ᑎᒍᔭᕕᓂᖏᑦ ᔨᕉᓴᓕᐅᑉ ᑐᒃᓯᐊᕐᕕᖓᓂᑦ ᐃᓕᔭᕕᓂᖏᓪᓗ ᑐᒃᓯᐊᕐᕕᖁᑎᒥᓄᑦ ᒎᑎᓐᖑᐊᖁᑎᒥᓄᓪᓗ.

⁸ ᓮᕋᓯᐅᓪᓗ ᐴᕐᓯᐊᒥᐅᑦ ᐊᖓᔪᖅᑳᕐᔪᐊᖓᑕ ᑐᓂᓚᐅᕐᐰᑦ ᒥᓱᕆᑕᒧᑦ, ᑖᓐᓇ ᐊᖓᔪᖅᑳᖑᓚᐅᕐᑐᖅ ᐊᖓᔪᖅᑳᕐᔪᐊᑉ ᑮᓇᐅᔭᖁᑎᖏᓐᓄᑦ, ᓈᓮᓚᐅᕐᑐᕐᓗ ᑖᒃᑯᓂᖓ ᑕᒤᓐᓂᒃ ᑖᑦᓱᒧᖓ ᓯᓯᐸᔮᕐᒧᑦ ᔫᑕᐅᑉ ᓄᓇᖁᑎᖓᓄᑦ ᑲᒪᔨᐅᔪᒧᑦ,

⁹ ᑖᒃᑯᐊ ᑕᕝᕙ ᐅᓄᕐᓂᖃᓚᐅᕐᐳᑦ ᐃᒫᒃ: ᒎᓗᐃᑦ ᐴᒍᑍᑦ ᑐᓂᕐᕈᓯᕐᑐᕐᓯᐅᑎᑦ 30 ᓯᐅᓪᕕᕇᑦ, ᐴᒍᑍᑦ ᑐᓂᕐᕈᓯᕐᑐᕐᓯᐅᑎᑦ 1,000, ᐴᒍᑍᑦ ᐊᓯᖏᑦ 29 ᒥᑭᔪᐃᑦ ᒎᓗᐃᑦ ᓴᕖᑦ,

¹⁰ 30 ᒥᑭᔪᑦ ᒎᓗᐃᑦ ᐴᒍᑍᑦ, 410 ᐴᒍᑍᑦ ᐊᑦᔨᐸᓗᖏᑦ, ᐊᓯᖏᓪᓗ 1,000 ᓂᕆᑦᔪᑏᑦ ᐊᑦᔨᒌᖏᑦᑐᑦ.

¹¹ ᑲᑎᓕᒫᕐᓗᑎᒃ 5,400ᖑᓚᐅᕐᐳᑦ ᒎᓗᐃᑦ ᓯᐅᓪᕕᕇᓪᓗ ᐴᒍᑍᑦ ᐊᓯᖏᓪᓗ ᓯᓯᐸᔮᑉ ᓇᒃᓴᓚᐅᕐᑕᖏᑦ ᐊᐅᓪᓚᓕᕋᒥᒃ ᐊᐅᓪᓚᕈᑦᔭᐅᕕᒋᓯᒪᔭᕕᓂᕐᒥᖕᓂᑦ ᐹᐱᓘᓂᒥᑦ ᔨᕉᓴᓕᒧᑦ.