ᐃᓯᑭᐊᓕᐅᑉ ᐊᒡᓚᖏᑦ 42 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᒡᓘᒃ ᒪᕐᕉᒃ ᑐᒃᓯᐊᕐᕕᒡᔪᐊᑉ ᖃᓂᒋᔮᓃᑦᑑᒃ

¹ ᑕᕝᕙ ᑐᕐᓲᖑᔭᕐᒧᐊᕈᑎᕚᖓ, ᓯᓚᕙᓯᖕᓂᕐᓴᒧᑦ ᐅᓐᓄᐊᓪᓗᐊᑉ ᓇᓛᓃᑦᑐᒧᑦ, ᐃᒡᓗᒧᐊᕈᑎᕚᖓᓗ ᑐᒃᓯᐊᕐᕕᒡᔪᐊᑉ ᓱᓇᑕᖃᖏᓐᓂᖓᑕ ᐊᑭᐊᓃᑦᑐᒧᑦ.

² ᐃᒡᓗ ᐅᓐᓄᐊᓪᓗᐊᑉ ᓇᓛᓃᑦᑐᖅ ᑐᑭᒧᖃᕐᐳᖅ 168ᓂᒃ ᐃᑎᒐᖕᓂᒃ, 84ᓂᒡᓗ ᓴᓂᒧᑐᓂᖃᕐᓗᓂ.

³ ᑕᒪᑐᒪ ᐱᕕᑐᓂᖓ 34ᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᐳᖅ ᑐᒃᓯᐊᕐᕕᒡᔪᐊᑉ ᑭᒡᓕᖓᓃᑦᑐᖅ, ᑐᕐᓲᖑᔭᒧᑦ ᓯᓚᓪᓕᕐᒧᑦ ᖁᐊᕐᑎᑕᒐᓕᖕᒧᑦ ᓵᓐᖓᓪᓗᓂ, ᓇᑎᖏᓪᓗ ᑖᒃᑯᐊ ᐱᖓᓲᓕᖅᑲᖓᕗᑦ ᖁᓕᕇᖑᓪᓗᑎᒃ.

⁴ ᐃᒡᓗᐃᑦ ᓯᕗᕌᒍᑦ ᐊᖅᑯᑎᖃᕐᐳᖅ, 16ᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᑐᒥᒃ 168ᓂᒃ ᑕᑭᓂᖃᕐᓗᓂ, ᐃᑎᕐᑕᕐᕕᖃᐅᕐᓗᑎᒡᓗ ᐅᓐᓄᐊᓪᓗᐊᑉ ᓇᓛᒍᑦ.

⁵ ᐃᒡᓗᕈᓰᑦ ᖁᓛᓃᑦᑐᑦ ᓴᓂᒧᑭᓐᓂᕐᓴᐅᕙᓪᓕᐊᓯᒪᕗᑦ ᐊᓪᓕᕐᒦᑦᑐᓂᑦ, ᐃᓗᐊᒍᑦ ᖁᒻᒧᑦ ᒪᔫᑎᖃᕐᓂᖏᓐᓄᑦ ᓇᑎᖏᑦ ᒥᑭᒡᓕᕙᓪᓕᐊᓯᒪᖕᒪᑕ.

⁶ ᐃᒡᓗᕈᓰᑦ ᖁᓕᕇᖑᓪᓗᑎᒃ ᐱᖓᓱᓂᒃ ᓇᑎᖃᕐᐳᑦ, ᓱᑲᕐᓂᒡᓗ ᓇᐸᕕᖃᕋᑎᒃ ᑐᕐᓲᖑᔭᕐᒦᑦᑐᑎᑐᑦ ᓯᓚᓪᓕᕐᒦᑦᑐᑎᑐᑦ; ᑍᒤᒻᒪᑦ ᖁᓪᓖᑦ ᓇᑎᖏᑦ ᐊᑖᓃᑦᑐᑦ ᓇᑎᖏᓐᓂᑦ ᒥᑭᓐᓂᕐᓴᐅᕙᓪᓕᐊᓯᒪᕗᑦ.

⁷ ᐊᕙᓗᕐᔪᐊᖅ ᓯᓚᑖᓃᑦᑐᖅ ᖁᒻᒧᑦ ᑐᑭᓕᐊᑦᓯᐊᕐᓗᓂ 84ᓂᒃ ᐃᑎᒐᖕᓂᒃ ᐳᕐᑐᓂᖃᕐᐳᖅ, ᐃᓗᐊᑕ ᓴᓂᕋᖓ ᑐᕐᓲᖑᔭᕐᒧᑦ ᓯᓚᓪᓕᕐᒧᑦ ᓵᓐᖓᔪᖅ ᐃᒡᓗᕈᓯᖏᓐᓄᑦ ᖁᒻᒧᑦ ᒥᑭᒡᓕᕙᓪᓕᐊᓯᒪᒐᓗᐊᕐᑎᓪᓗᒍ.

⁸ ᐃᒡᓗᕈᓰᑦ ᑐᕐᓲᖑᔭᕐᒧᑦ ᓯᓚᓪᓕᕐᒧᑦ ᓵᓐᖓᔪᑦ 84ᓂᒃ ᐃᑎᒐᖕᓂᒃ ᐳᕐᑐᓂᖃᕐᑐᒦᑉᐳᑦ, ᐃᒡᓗᕈᓰᑦ ᑐᒃᓯᐊᕐᕕᒡᔪᐊᕐᒧᑦ ᓵᓐᖓᔪᑦ 168ᓂᒃ ᑕᑭᓂᖃᕐᑐᒦᑎᓪᓗᒋᑦ.

⁹ ᐃᒡᓗᕈᓯᒃᑯᑦ ᐊᒃᐸᓯᖕᓂᕐᐹᒃᑯᑦ ᐃᑎᕐᑕᕐᕕᖃᕐᐳᖅ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒃᑯᑦ, ᑐᕐᓲᖑᔭᕐᒥᑦ ᓯᓚᓪᓕᕐᒥᓐᖔᖓᔪᒥᒃ,

¹⁰ ᐊᕙᓗᕐᔪᐊᑉ ᓴᓂᕋᖓᑕ ᓯᓚᑖᓂᑦ ᐱᒋᐊᕐᓯᒪᔪᒥᒃ. ᐅᓪᓗᓪᓗᐊᑉ ᓇᓛᓂ ᐃᒡᓗᑕᖃᕆᕗᖅ, ᑐᕐᓲᖑᔭᐅᑉ ᐃᒡᓗᐃᓪᓗ ᐊᑭᐊᓃᑦᑐᓂᒃ

¹¹ ᐃᒡᓗᕈᓰᑦ ᓯᕗᕌᒍᑦ ᓱᓪᓗᑯᑖᒃᑕᖃᕐᐳᖅ; ᐅᓐᓄᐊᓪᓗᐊᑉ ᓇᓛᓃᑦᑑᑉ ᐊᑦᔨᖓᓂᒃ, ᑍᒫᓪᓗᐊᖅ ᑕᑭᓂᖃᕐᐳᖅ ᓴᓂᒧᑐᓂᖃᕐᓗᓂᓗ, ᐃᑎᕐᑕᕐᕕᖓ ᐋᖅᑭᒃᓯᒪᓂᖓᓗ ᐅᒃᑯᐊᖏᓪᓗ ᐊᑦᔨᒋᒋᕔᑦ.

¹² ᐅᒃᑯᐊᕐᑕᖃᕆᕗᖅ ᐃᒡᓗᕈᓯᕐᓂ ᐊᒃᐸᓯᖕᓂᕐᓴᒦᑦᑐᒥᒃ ᐃᒡᓘᑉ ᐅᓪᓗᓪᓗᐊᖓᑕ ᓇᓛᓂ ᐊᕙᓗᐊᑕ ᐃᓱᐊᓂ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒥᒃ, ᑕᕝᕗᖓ ᐃᑎᕐᑐᖃᕈᓂ ᓱᓪᓗᑯᑖᒧᑦ, ᐊᕙᓗᕐᔪᐊᑉ ᐊᕕᒃᓯᒪᒋᐊᓕᕐᓂᖓ ᐊᑭᓪᓗᐊᖓᓃᑉᐳᖅ.

¹³ ᑕᕝᕙ ᐅᖃᐅᑎᕚᖓ, “ᑖᒃᑯᐊ ᐃᒡᓗᐃᑦ ᐅᓐᓄᐊᓪᓗᐊᑉ ᓇᓛᓃᑦᑐᑦ ᓯᕿᓂᐅᓪᓗ ᓇᓛᓃᑦᑐᑦ ᐃᑦᔪᕐᓁᑦᑑᕗᑦ, ᑖᒃᑯᓇᓂ ᑐᓂᕐᕈᓯᕐᑎᑦᓯᔩᑦ ᐊᑕᓂᐅᑉ ᓇᔪᕐᑕᖓᓄᐊᕐᓂᐊᕐᑐᑦ ᑐᓂᕐᕈᑎᕕᓂᕐᓂᒃ ᐃᑦᔪᕐᓁᓐᓂᕐᐹᓂᒃ ᓂᕆᔪᒃᓴᐅᕗᑦ; ᑐᓂᕐᕈᑏᓪᓗ ᐃᑦᔪᕐᓁᓐᓂᕐᐹᖏᑦ ᑕᕝᕗᓐᖓᕐᑕᐅᕙᖕᓂᐊᕐᐳᑦ ᑐᓂᕐᕈᑕᐅᓯᒪᔪᑦ ᓂᐊᖂᔭᒃᓮᑦ, ᐊᔪᕐᓂᕐᓄᑦ ᑐᓂᕐᕈᑎᕕᓃᑦ, ᐸᓯᔭᒃᓴᐅᓂᕐᒧᓪᓗ ᐊᑭᓕᐅᑎᒃᓴᓄᑦ ᑐᓂᕐᕈᑎᕕᓃᑦ, ᑕᒪᓐᓇ ᐃᑦᔪᕐᓁᑦᑐᒃᑯᕕᐅᖕᒪᑦ.

¹⁴ ᑐᓂᕐᕈᓯᕐᑎᑦᓯᔩᑦ ᐃᑦᔪᕐᓁᑦᑐᒃᑯᕕᖕᒧᑦ ᐃᑎᕐᑐᕕᓂᐅᒍᑎᒃ, ᑐᕐᓲᖑᔭᕐᒧᑦ ᐊᓂᔪᒃᓴᐅᓐᖏᓚᑦ ᐊᓐᓄᕌᑦ ᐊᑐᕐᑕᑎᒃ ᐊᑐᐃᓐᓇᕐᓗᒋᑦ ᑕᕝᕗᖓᓕ ᕿᒪᒃᑕᒃᓴᕆᕔᑦ ᐱᔨᑦᓯᕐᕕᒋᔭᒥᖕᓄᑦ, ᑕᒪᒃᑯᐊ ᐃᑦᔪᕐᓁᒻᒪᑕ; ᐊᓐᓄᕌᓂᒃ ᐊᓯᖏᓐᓂᒃ ᐊᑎᓗᑎᒃ ᑭᓯᐊᓂ ᐊᓂᖃᑦᑕᕆᐊᖃᕐᐳᑦ ᐃᓄᐃᑦ ᓇᔪᕐᐸᒃᑕᖏᓐᓅᓕᕈᑎᒃ.”

ᑐᒃᓯᐊᕐᕕᒡᔪᐊᑉ ᓇᔪᕐᑕᖓᑕ ᐆᒃᑐᕋᕐᑕᐅᓂᖓ

¹⁵ ᑐᒃᓯᐊᕐᕕᒡᔪᐊᓪᓕ ᐃᓗᐊ ᐆᒃᑐᕋᕇᕋᒥᐅᒃ, ᐃᑎᕐᑕᕐᕕᒃᑯᑦ ᓯᕿᓂᐅᑉ ᓄᐃᕕᐊᓄᑦ ᓵᓐᖓᔪᒃᑯᑦ ᐊᓂᖃᑎᒋᕚᖓ, ᑐᒃᓯᐊᕐᕕᒡᔪᐊᓪᓗ ᐊᕙᑎᓕᒫᖓ ᐆᒃᑐᕋᓕᕆᕚ.

¹⁶ ᐆᒃᑐᕋᐅᑎᓂ ᓱᓪᓗᓕᒃ ᐱᓪᓗᓂᐅᒃ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ ᐆᒃᑐᕋᕐᒪᒍ, ᑕᑭᓂᖃᕐᐳᖅ 840ᓂᒃ ᐃᑎᒐᖕᓂᒃ.

¹⁷ ᐊᒻᒪ ᐅᓐᓄᐊᓪᓗᐊᑉ ᓇᓛᓃᑦᑐᖅ ᐆᒃᑐᕋᕐᒪᒍ, ᑕᑭᓂᖃᕐᐳᑦ 840ᓂᒃ ᐃᑎᒐᖕᓂᒃ,

¹⁸ ᐊᒻᒪ ᐅᓪᓗᓪᓗᐊᑉ ᓇᓛᓃᑦᑐᖅ ᐆᒃᑐᕋᕐᒪᒍ, ᑕᑭᓂᖃᕐᐳᑦ 840ᓂᒃ ᐃᑎᒐᖕᓂᒃ,

¹⁹ ᐊᒻᒪ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᖅ ᐆᒃᑐᕋᕐᒪᒍ, ᑕᑭᓂᖃᕐᐳᑦ 840ᓂᒃ ᐃᑎᒐᖕᓂᒃ.

²⁰ ᐊᑭᓐᓇᓕᒫᖏᑦ ᓯᑕᒪᑦ ᐆᒃᑐᕋᕇᕐᒪᒋᑦ. ᐊᕙᑖᒍᑦ ᐊᕙᓗᕐᔪᐊᖓ, 840ᓂᒃ ᐃᑎᒐᖕᓂᒃ ᑕᑭᓂᖃᕐᐳᖅ ᓴᓂᒧᖃᕐᓗᓂᓗ ᑭᒃᐹᕆᓪᓗᐊᕐᓗᓂ, ᐊᕙᓗᕐᔪᐊᕐᓗ ᐊᕕᒃᓯᒪᑎᑦᓯᕗᖅ ᐃᑦᔪᕐᓁᑦᑐᓂᒃ ᐃᑦᔪᕐᓁᑦᑑᖏᑦᑐᓂᒡᓗ.