ᐃᓯᑭᐊᓕᐅᑉ ᐊᒡᓚᖏᑦ 40 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᒃᓯᐊᕐᕕᒡᔪᐊᒃᓴᒥᒃ ᑕᑯᑎᑕᐅᓂᖅ ( 40:1—48:35 ) ᐃᓯᑭᐊᓕᐅᑉ ᔨᕉᓴᓕᒧᐊᕈᑦᔭᐅᓂᖓ

¹ ᐊᐅᓪᓚᕈᑦᔭᐅᓯᒪᓂᑦᑕ ᐊᕐᕌᒍᖏᑕ 25ᖓᓐᓂ, ᐊᕐᕌᒎᑉ ᐱᒋᐊᕐᓂᖓᓂ, ᑕᖅᑭᐅᑉ ᐅᓪᓗᒋᑕ 10ᖓᓐᓂ, ᔨᕉᓴᓕᐅᑉ ᓵᓚᐅᓯᒪᓂᖓᑕ ᐊᕐᕌᒍᐃᑦ 14ᖓᓐᓂ, ᐅᓪᓗᒥ ᑕᕝᕙᓂᓪᓗᐊᖅ, ᐊᑕᓂᐅᑉ ᐱᔪᓐᓇᕐᓂᖓᑕ ᓇᔪᓕᕐᐹᖓ,

² ᒎᑎᐅᑉ ᑕᑯᑎᑕᐅᓂᒃᑯᑦ ᐃᓴᕆᐊᓕᒥᐅᑦ ᓄᓇᖓᓄᐊᕈᑎᕚᖓ, ᖃᖅᑳᓘᓪᓗ ᐳᕐᑐᔫᑉ ᖃᖓᓄᐊᕐᑎᑉᐹᖓ, ᐃᒡᓗᒐᓴᒡᔪᐊᑎᑐᑦ ᓴᓇᓯᒪᔫᔮᕐᑐᓂᒃ ᐊᑭᓪᓗᐊᓐᓂ ᑕᑯᓕᕐᐳᖓ.

³ ᑕᕝᕗᓐᖓᐅᑎᖕᒪᖓ, ᑕᑯᒋᑦ, ᑕᑯᓕᕐᐳᖓ ᐊᖑᒻᒥᒃ, ᑕᐅᑦᑐᖓ ᑲᓐᓄᔭᑎᑐᑦ ᕿᓪᓕᕐᑐᒥᒃ, ᐊᒃᓱᓇᐅᔭᒥᒃ ᕿᕋᑕᔪᒥᒃ ᐆᒃᑐᕋᐅᒻᒥᒡᓗ ᓱᓪᓗᓕᖕᒥᒃ ᑎᒍᒥᐊᕐᑐᒥᒃ; ᐃᑎᕐᑕᕐᕕᖕᒥ ᓇᖏᕐᑐᒥᒃ.

⁴ ᑖᑦᓱᒪᓗ ᐅᖃᐅᑎᕚᖓ, “ᐃᓅᑉ ᐃᕐᓂᖓ, ᑕᑯᔭᑎᑦ ᐃᒃᐱᒋᑦᓯᐊᒃᑭᑦ, ᑐᓴᑦᓯᐊᕐᓗᒋᓪᓗ ᓯᐅᑎᖕᓄᑦ, ᑐᑭᓯᑦᓯᐊᕋᓱᐊᕐᓗᑎᓪᓗ ᑕᒤᓐᓂᒃ ᐃᓕᖕᓄᑦ ᑕᑯᔭᐅᑎᓐᓂᐊᕐᑕᓐᓂᒃ, ᑕᒪᒃᑯᓂᖓ ᑕᑯᑎᑦᓯᖁᓪᓗᖓ ᐃᓕᖕᓄᑦ ᑕᒪᐅᓐᖓᕐᑎᑕᐅᒐᕕᑦ; ᑕᑯᔭᓕᒫᕐᓂᒃ ᐃᓴᕆᐊᓕᐅᑉ ᑭᖑᕚᖏᓐᓄᑦ ᐅᖃᐅᓯᖃᕐᑐᒃᓴᐅᕗᑎᑦ.”

ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ ᐃᑎᕐᑕᕐᕕᒃ

⁵ ᑕᑯᒋᓪᓗ, ᑐᒃᓯᐊᕐᕕᒡᔪᐊᕐᒥᒃ ᑕᑯᕗᖓ ᓯᓚᑖᒍᑦ ᐊᕙᑎᓕᒫᒥᒍᑦ ᐊᕙᓗᕐᔪᐊᓕᖕᒥᒃ, ᐊᖑᑎᐅᓪᓗ ᑎᒍᒥᐊᕐᑕᖓ ᐆᒃᑐᕋᐅᑦ ᓱᓪᓗᓕᒃ ᑕᑭᓂᖃᕐᐳᖅ 10ᓂᒃ ᐃᑎᒐᖕᓂᒃ, ᑖᑦᓱᒧᖓᓗ ᐊᕙᓗᕐᔪᐊᖅ ᐆᒃᑐᕋᖕᒪᒍ ᐃᑦᔪᓂᖃᕐᐳᖅ ᐆᒃᑐᕋᐅᑎᖓᑐᑦ, ᐆᒃᑐᕋᐅᑎᖓᑐᓪᓗ ᓯᓕᖕᓂᖃᕐᓗᓂ.

⁶ ᑕᕝᕙᓐᖓᓪᓗ ᐃᑎᕐᑕᕐᕕᖕᒧᐊᕐᐳᖅ ᓯᕿᓂᐅᑉ ᓄᐃᕕᐊᑕ ᓇᓛᓄᑦ ᓵᓐᖓᔪᒧᑦ, ᑐᓪᓕᕌᑎᒍᑦ ᒪᔪᕋᕐᓗᓂ, ᐃᑎᕐᑕᕐᕕᐅᑉ ᑐᓪᓕᕌᖓ ᐆᒃᑐᕋᕐᒪᒍ ᐆᒃᑐᕋᐅᑎᖓᑐᑦ ᑍᒤᓪᓗᐊᕐᐳᖅ.

⁷ ᐃᑎᕐᑕᕐᕕᐅᓪᓗ ᓴᓂᕌᒍᑦ ᐃᒡᓗᐊᕈᓯᕐᑕᖃᐅᕐᐳᖅ ᐆᒃᑐᕋᐅᑎᖓᑐᑦ ᑕᑭᓂᓕᖕᓂᒃ, ᓴᓂᒧᓪᓗ ᓯᓕᖕᓂᖃᕐᓗᑎᒃ ᐆᒃᑐᕋᐅᑎᖓᑐᑦ; ᐃᒡᓗᕈᓰᓪᓗ ᐊᑯᓐᓂᖏᑕ ᓱᓪᓗᖓ ᓯᕕᑐᓂᖃᕐᐳᖅ ᐃᑎᒐᖕᓂᒃ ᓯᑕᒪᐅᔪᕐᑐᓂᒃ; ᑖᒃᑯᐊᓗ ᐃᒡᓗᕈᓰᑦ ᐅᖓᑖᒍᑦ ᐃᑎᕐᑕᕐᕕᖓ ᑐᒃᓯᐊᕐᕕᒡᔪᐊᒧᑦ ᓵᓐᖓᔪᖅ, ᐆᒃᑐᕋᐅᑎᖓᑐᑦ ᑕᑭᓂᖃᕐᐳᖅ.

⁸ ᐃᑎᕆᐊᕐᕕᐅᑉ ᑐᕐᓲᖑᔭᖓ ᐆᒃᑐᕋᕐᒪᒍ ᐃᑎᒐᖕᓂᒃ 14ᓂᒃ ᐊᖏᓂᖃᕐᐳᖅ.

⁹ ᓱᓪᓗᑯᑖᑉ ᐃᓱᐊᓃᑦᑐᖅ ᑐᒃᓯᐊᕐᕕᒡᔪᐊᒧᑦ ᖃᓂᓐᓂᕐᐹᖅ ᐆᒃᑐᕋᕐᒪᒍ ᓴᓂᕋᖏᒃ ᐊᑐᓂᑦ ᐃᑦᔪᓂᖃᕐᐴᒃ ᓯᑕᒪᓂᒃ ᐃᑎᒐᖕᓂᒃ.

¹⁰ ᑖᒃᑯᐊᓗ ᐃᒡᓗᕈᓰᑦ ᐱᖓᓱᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᑦ ᐊᖏᓂᖏᑦ ᐊᑦᔨᒌᒃᐳᑦ; ᐃᒡᓗᕈᓯᖏᑕᓗ ᐊᑯᑦᑐᓂᖏᑦ ᐊᑐᓂᑦ ᐊᑦᔨᒌᒥᒃ ᓴᓂᒧᑐᓂᖃᕐᓗᑎᒃ.

¹¹ ᐊᒻᒪ ᐆᒃᑐᕋᕆᕚ ᐃᑎᕐᑕᕕᐅᑉ ᓱᓪᓗᑲᑖᖓᑕ ᓴᓂᒧᑐᓂᖓ, ᓴᓂᒧᑐᓂᖃᕐᐳᖅ 22ᓂᒃ ᐃᑎᒐᖕᓂᒃ; ᐃᑎᕐᑕᕐᕕᖓᓗ 16ᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᓗᓂ.

¹² ᐃᒡᓗᕈᓰᓪᓗ ᐊᑯᓐᓂᖏᑎᒍᑦ ᐊᑯᓐᓈᖅᑯᑕᖃᕐᐳᑦ, ᐳᒃᑭᑦᑐᓂᒃ ᐃᑎᒐᒃᑐᑦ ᒪᕐᕈᑲᓴᒃᑎᑐᑦ ᐊᑐᓂᑦ ᐳᕐᑐᑎᒋᔪᓂᒃ; ᐊᑐᓂᓪᓗ 10ᓂᒃ ᐃᑎᒐᖕᓂᒃ ᐊᖏᓂᖃᕐᑐᐃᓐᓇᐅᓪᓗᑎᒃ.

¹³ ᐃᑎᕐᑕᕐᕕᐅᑉ ᓯᓚᑖᑕ ᓴᓂᕋᖓᓂᑦ ᐃᑎᕐᑕᕐᕕᐅᑉ ᐂᑉᐸᖓᑕ ᓯᓚᑖᑕ ᓴᓂᕋᖓᓄᑦ ᐆᒃᑐᕋᕐᒪᒋᑦ ᐊᑐᓂᑦ ᐊᑯᑦᑐᓂᖃᕐᐳᑦ 42ᓂᒃ ᐃᑎᒐᖕᓂᒃ.

¹⁴ ᐃᒡᓗᕈᓯᖅ ᓱᓪᓗᑯᑖᑉ ᐃᓱᐊᓃᑦᑐᖅ ᐊᓂᕕᖕᒧᐊᖓᔪᖅ ᐆᒃᑐᕋᕐᒪᒍ; ᓴᓂᒧᑐᓂᖃᕐᐳᖅ 34ᓂᒃ ᐃᑎᒐᖕᓂᒃ.

¹⁵ ᐃᑎᕐᑕᕐᕕᐅᑉ ᐅᒃᑯᐊᖓᓂᑦ ᓱᓪᓗᑯᑖᑉ ᐃᓱᐊᓃᑦᑐᖅ ᐃᑎᕐᑕᕐᕕᒃ ᑎᑭᓪᓗᒍ ᓯᕕᑐᓂᖃᕐᐳᑦ 84ᓂᒃ ᐃᑎᒐᖕᓂᒃ.

¹⁶ ᐃᒡᓗᕈᓰᓪᓗ ᐃᒐᓛᖃᐅᕐᐳᑦ ᑕᑭᔪᑯᑖᓂᒃ, ᒪᑐᑦᑕᐅᑎᓕᖕᓂᒃ ᓯᓚᒧᐊᖓᔪᓂᒃ, ᐃᒡᓗᕈᓰᓪᓗ ᐊᑯᓐᓂᖏᑎᒍᑦ ᐊᑭᓐᓇᖏᑦ ᐃᑎᕐᓴᓕᐅᕈᑎᓯᒪᔪᓂᒃ ᓇᐹᕐᑐᓐᖑᐊᓂᒃ ᐹᒥᓂᒃ ᑕᕐᓯᕐᓱᕐᓯᒪᓪᓗᑎᒃ.

ᓯᓚᓪᓕᖅ ᑐᕐᓲᖑᔭᖅ

¹⁷ ᑕᕝᕙ ᑖᑦᓱᒪ ᑐᕐᓲᖑᔭᕐᒧᐊᕈᑎᕚᖓ ᓯᓚᓪᓕᕐᒧᑦ; ᑕᑯᒋᓪᓗ, ᐃᒡᓗᕈᓯᕐᑕᖃᐅᕐᐳᖅ 30ᓂᒃ, ᐊᕙᓗᕐᔪᐊᑉ ᐃᓗᖔᖓᓃᑦᑐᓂᒃ; ᐃᒡᓗᕈᓰᓪᓗ ᓯᕗᕋᓕᒫᖏᑦ ᕿᑯᕐᓯᒪᔪᒥᒃ ᓇᑎᓕᐅᕐᓯᒪᕗᑦ.

¹⁸ ᕿᑯᕐᓯᒪᔪᕐᓗ ᓈᔨᓯᒪᕗᖅ ᓂᕈᑐᓂᐅᔭᓕᒫᖓᓂᒃ ᐃᑎᕐᑕᕐᕕᖏᑦ ᓴᓂᕌᓃᑦᑐᑦ ᐱᖃᓯᐅᑎᓯᒪᓪᓗᒋᑦ, ᐃᑎᕐᑕᕐᕕᖏᑕᓕ ᓇᑎᖏᑦ ᐊᒃᐸᓯᖕᓂᕐᓴᐅᕗᑦ ᑐᕐᓲᖑᔭᕐᒥᑦ ᐃᓗᕙᓯᖕᓂᕐᓴᒥᑦ.

¹⁹ ᐊᖑᑎᐅᑉ ᐆᒃᑐᕋᕐᒪᒍ ᐃᑎᕐᑕᕐᕕᐅᑉ ᐃᓗᖔᖓᓃᑦᑑᑉ ᐃᓗᐊᓂᑦ ᐃᑎᕐᑕᕐᕕᐅᑉ ᓯᓚᑖᓃᑦᑑᑉ ᓯᓚᑖᓄᑦ ᓯᕕᑐᓂᖃᕐᐳᑦ ᐊᑯᓐᓂᖏᒃ 168ᓂᒃ ᐃᑎᒐᖕᓂᒃ. ᑕᕝᕙ ᓯᕗᓂᓐᓄᑦ ᐅᓐᓄᐊᓪᓗᐊᑉ ᓇᓛᓄᐊᕐᐳᖅ.

ᐃᑎᕐᑕᕐᕕᒃ ᐅᓐᓄᐊᓪᓗᐊᑉ ᓇᓛᓃᑦᑐᖅ

²⁰ ᑕᑯᒋᓪᓗ, ᓯᓚᓪᓕᕐᒥ ᑐᕐᓲᖑᔭᕐᒥ ᐃᑎᕐᑕᕐᕕᒃᑕᖃᕐᐳᖅ ᐅᓐᓄᐊᓪᓗᐊᒧᑦ ᓵᓐᖓᔪᒥᒃ, ᑖᑦᓱᒪᓗ ᐆᒃᑐᕋᕐᐹ ᑐᑭᒧᑦ ᓴᓂᒧᓪᓗ.

²¹ ᐃᒡᓗᕈᓯᕐᑕᖃᕐᐳᖅ ᓴᓂᕌᒍᑦ, ᐱᖓᓱᓂᒃ ᐊᑭᓕᕇᓂᒃ, ᐊᑯᓐᓂᖏᓪᓗ ᐃᑎᕐᑕᕐᕕᖏᓪᓗ ᐊᑦᔨᒌᓂᒃ ᓴᓂᒧᑐᓂᖃᕐᐳᑦ, ᐃᑎᕐᑕᕐᕕᐅᓪᓗ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᑎᑐᑦ ᐊᖏᓂᖃᕐᐳᑦ; ᑐᑭᒧᖃᕐᐳᑦ 84ᓂᒃ ᐃᑎᒐᖕᓂᒃ, ᓴᓂᒧᑐᓂᖃᕐᓗᑎᒡᓗ 42ᓂᒃ.

²² ᐃᒡᓗᕈᓰᓪᓗ ᐃᒐᓛᖏᑦ ᐊᑭᓐᓇᖏᓪᓗ ᑕᕐᓯᕐᓱᕐᓯᒪᕗᑦ ᓇᐹᕐᑐᓐᖑᐊᓂᒃ ᐹᒥᓂᒃ ᐃᑎᕐᓴᓕᐅᕈᑎᓯᒪᔪᓂᒃ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᑎᑐᑦ; ᑐᖕᒥᕌᖃᕐᓗᑎᒡᓗ ᒪᔪᕋᐅᑎᓂᒃ 7ᓂᒃ; ᐃᑎᕐᑕᕐᕕᖓᓗ ᓵᓐᖓᕗᖅ ᑐᕐᓲᖑᔭᕐᒧᑦ.

²³ ᐃᑎᕐᑕᕐᕕᒃ ᐅᓐᓄᐊᓪᓗᐊᑉ ᓇᓛᓃᑦᑐᖅ, ᓯᕿᓂᐅᓪᓗ ᓄᐃᕕᐊᑕ ᓇᓛᓃᑦᑑᖅ ᐃᑎᕐᑕᕐᕕᒃ, ᑐᕐᓲᖑᔭᕐᒧᑦ ᐃᑎᕐᑕᕐᕖᒃ; ᐆᒃᑐᕋᕐᒪᒋᒃ ᐊᑯᓐᓂᖏᒃ ᐃᑎᕐᑕᕐᕕᖕᒧᑦ ᓴᓂᒧᑐᓂᖃᕐᐴᒃ ᐃᑎᒐᖕᓂᒃ 168ᓂᒃ.

ᐃᑎᕐᑕᕐᕕᒃ ᐅᓪᓗᓪᓗᐊᑉ ᓇᓛᓃᑦᑐᖅ

²⁴ ᐊᒻᒪ ᐅᓪᓗᓪᓗᐊᑉ ᓇᓛᓄᐊᕈᑎᒋᕚᖓ, ᑕᑯᕗᖓᓗ ᐃᑎᕐᑕᕐᕕᖕᒥᒃ ᐅᓪᓗᓪᓗᐊᑉ ᓇᓛᓃᑦᑐᒥᒃ; ᐆᒃᑐᕋᕐᒪᒋᓪᓗ ᐊᑯᓐᓂᖏᑦ ᐃᑎᕐᑕᕐᕕᖏᓪᓗ; ᓴᓂᒧᑐᓂᖃᕐᐳᑦ ᐊᓯᖏᑎᑐᑦ ᐆᒃᑐᕋᖃᑦᑕᖅᑲᐅᔭᖏᑎᑐᑦ.

²⁵ ᐃᒡᓗᕈᓯᖏᓪᓗ ᐊᑐᓂᑦ ᐃᒐᓛᖃᐅᕆᓪᓗᑎᒃ ᑍᒫᑦᓮᓐᓇᖅ ᐊᓯᖏᑎᑐᑦ; ᐃᑎᕐᑕᕐᕕᓕᒫᑦ ᐊᑐᓂᑦ ᑐᑭᒧᖃᕐᐳᑦ 84ᓂᒃ ᐃᑎᒐᖕᓂᒃ, ᓴᓂᒧᑐᓂᖃᕐᓗᑎᒡᓗ 42ᓂᒃ.

²⁶ ᑐᖕᒥᕌᖃᕆᕗᑦ ᒪᔪᕋᐅᑎᓂᒃ 7ᓂᒃ ᐃᑎᕐᑕᕐᕕᖕᒧᐊᖓᔪᓂᒃ, ᐃᑎᕐᑕᕐᕕᐅᓪᓗ ᐃᓗᐊᒍᑦ ᐃᒡᓗᕈᓯᖃᐅᕐᓗᓂ; ᓇᐹᕐᑐᓐᖑᐊᓂᒃᑕᐅᖅ ᐹᒥᓐᖑᐊᓂᒃ ᐊᑭᓐᓇᖓᒍᑦ ᑕᕐᓯᕐᑐᕐᓯᒪᕗᑦ, ᐃᒡᓗᒃᑐᑦ ᐊᑭᓕᕇᓂᒃ.

²⁷ ᐃᑎᕐᑕᕐᕕᖃᕐᐳᕐᓗ ᑐᕐᓲᖑᔭᕐᒧᑦ ᐃᓗᓪᓕᕐᒧᐊᖓᔪᒥᒃ; ᐅᓪᓗᓪᓗᐊᑉ ᓇᓛᓃᑦᑐᒧᑦ ᓵᖓᔪᒥᒃ; ᐆᒃᑐᕋᕐᒪᒋᓪᓗ ᐃᑎᕐᑕᕐᕕᖕᒥᑦ ᐃᑎᕐᑕᕐᕕᖕᒧᑦ ᓴᓂᒧᑐᓂᖃᕐᐳᑦ 168ᓂᒃ ᐃᑎᒐᖕᓂᒃ.

ᑐᕐᓲᖑᔭᕐᒥ ᐃᓗᓪᓕᕐᒥ: ᐃᑎᕐᑕᕐᕕᒃ ᐅᓪᓗᓪᓗᐊᑉ ᓇᓛᓃᑦᑐᖅ

²⁸ ᑕᕝᕙ ᐅᓪᓗᓪᓗᐊᑉ ᓇᓛᓃᑦᑐᒧᑦ ᐃᑎᕐᑕᕐᕕᖕᒧᐊᕈᑎᕚᖓ, ᐃᑎᕐᑕᕐᕕᒡᓗ ᐆᒃᑐᕋᕐᒪᒍ; ᐊᖏᓂᖓ ᐊᑦᔨᒋᔭᐅᕗᖅ ᐆᒃᑐᕋᖃᑦᑕᖅᑲᐅᔭᖏᓐᓄᑦ ᐃᑎᕐᑕᕐᕕᖕᓄᑦ.

²⁹ ᖃᐅᔨᓴᕐᑏᑦ ᐃᒡᓗᕈᓯᖏᑦ, ᐃᑎᕐᑕᕐᕕᐅᓪᓗ ᓱᓪᓗᐊᓃᑦᑐᑦ ᐃᒡᓗᕈᓰᑦ ᐊᖏᓂᖏᑦ ᐃᑎᕐᑕᕐᕕᖕᓂ ᐊᓯᖏᓐᓃᑦᑐᑎᑐᑦ ᑍᒤᓪᓗᐊᕐᐳᑦ; ᑍᒫᑦᓮᓐᓇᕐᓗ ᐃᒐᓛᖃᐅᕆᓪᓗᑎᒃ ᐃᒡᓗᕈᓯᖏᑦ; ᑐᑭᒧᖃᕆᕗᑦ 84ᓂᒃ ᐃᑎᒐᖕᓂᒃ, ᓴᓂᒧᑐᓂᖃᕐᓗᑎᒡᓗ 42ᓂᒃ.

³⁰ ᐃᓗᐊᓃᑦᑐ ᐃᒡᓗᕈᓯᖏᑦ, ᑍᒫᓪᓗᐊᖅ ᐃᒡᓗᕈᓯᕐᑎᑐᑦ ᐊᓯᖏᑎᑐᑦ ᐊᖏᓂᖃᕆᕗᑦ.

³¹ ᐃᑎᕐᑕᕐᕕᖓᓗ ᑐᕐᓲᖑᔭᕐᒧᑦ ᓯᓚᓪᓕᕐᒧᑦ ᓵᓐᖓᕗᖅ, ᓴᓂᕋᖓᓗ ᑖᕐᓯᕐᑐᕐᓯᒪᕗᖅ ᓇᐹᕐᑐᓐᖑᐊᓂᒃ ᐹᒥᓂᒃ, ᒪᔪᕋᐅᑎᖏᓪᓗ ᑐᖕᒥᕌᖃᕐᐳᑦ ᓯᑕᒪᐅᔪᕐᑐᓂᒃ.

ᑐᕐᓲᖑᔭᕐᒥ ᐃᓗᓪᓕᕐᒥ: ᐃᑎᕐᑕᕐᕕᒃ ᓯᕿᓂᐅᑉ ᓄᐃᕕᐊᓃᑦᑐᖅ

³² ᐊᖑᑎᐅᑉ ᐃᑎᕐᑕᕐᕕᒃᒨᕐᑎᑉᐹᖓ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒧᑦ, ᐃᑎᕐᑕᕐᕕᒃ ᐆᒃᑐᕋᕐᒪᒍ; ᐊᑦᔨᒋᔭᐅᕗᖅ ᐊᓯᖏᓐᓄᑦ ᐆᒃᑐᕋᖃᑦᑕᖅᑲᐅᔭᖏᓐᓄᑦ.

³³ ᐃᒡᓗᕈᓰᑦ, ᐃᑎᕐᑕᕐᕕᖓᑕᓗ ᓴᓂᕌᓃᑦᑐᑦ ᐃᒡᓗᕈᓰᑦ, ᐊᑭᓐᓇᖏᓪᓗ ᐊᑐᓂᑦ ᐆᒃᑐᕋᕐᑕᐅᓂᖏᑦ ᐊᑦᔨᒋᔭᐅᒋᕗᑦ ᐊᓯᖏᓐᓄᑦ; ᐃᒡᓗᕈᓯᓕᒫᖏᓪᓗ ᐃᒐᓛᖃᐅᕆᓪᓗᑎᒃ; ᑐᑭᒧᖃᕐᐳᓪᓗ 84ᓂᒃ ᐃᑎᒐᖕᓂᒃ, ᓴᓂᒧᑐᓂᖃᕐᓗᑎᒡᓗ 42ᓂᒃ.

³⁴ ᐃᑎᕐᑕᕐᕕᖓᑕ ᐃᓗᐊᓃᑦᑐᖅ ᐃᒡᓗᕈᓯᖅ ᐊᓂᕕᖃᕐᐳᖅ ᑐᕐᓲᖑᔭᕐᒧᑦ ᓵᓐᖓᔪᒥᒃ, ᐃᒡᓗᕈᓰᓪᓗ ᐊᑯᓐᓂᖏᑦ ᓇᐹᕐᑐᓐᖑᐊᓂᒃ ᐹᒥᓂᒃ ᑕᕐᓯᕐᑐᕐᓯᒪᕗᑦ, ᐊᑭᓐᓇᖏᑦ ᐊᑐᓂᑦ ᐃᒡᓗᒌᓂᒃ; ᒪᔫᑎᖏᓪᓗ ᑐᖕᒥᕌᖃᕐᐳᑦ ᓯᑕᒪᐅᔪᕐᑐᓂᒃ.

ᑐᕐᓲᖑᔭᕐᒥ ᐃᓗᓪᓕᕐᒥ: ᐃᑎᕐᑕᕐᕕᒃ ᐅᓐᓄᐊᓪᓗᐊᑉ ᓇᓛᓃᑦᑐᖅ

³⁵ ᑕᕝᕙ ᐃᑎᕐᑕᕐᕕᖕᒧᐊᕐᑎᑉᐹᖓ ᐅᓐᓄᐊᓪᓗᐊᑉ ᓇᓛᓃᑦᑐᒧᑦ, ᑍᒫᑦᓮᓐᓇᖅ ᐆᒃᑐᕋᕐᒪᒍ; ᐊᑦᔨᒋᔭᐅᒋᕗᖅ ᐆᒃᑐᕋᖃᑦᑕᖅᑲᐅᔭᖏᓐᓄᑦ.

³⁶ ᑍᒫᑦᓮᓐᓇᖅ ᐃᓗᖔᖓᒍᑦ ᐃᒡᓗᕈᓯᖃᕆᕗᖅ, ᐊᖏᓂᖏᓪᓗ ᐊᓯᖏᓐᓄᑦ ᐊᑦᔨᒋᔭᐅᒋᓪᓗᑎᒃ; ᐃᒡᓗᕈᓯᓕᒫᖏᓪᓗ ᐃᒐᓛᖃᕆᓪᓗᑎᒃ; ᑐᑭᒧᖃᕐᐳᕐᓗ 84ᓂᒃ ᐃᑎᒐᖕᓂᒃ, ᓴᓂᒧᑐᓂᖃᕐᓗᑎᒡᓗ 42ᓂᒃ.

³⁷ ᐃᑎᕐᑕᕐᕕᐅᑉ ᐃᓗᐊᓃᑦᑐᖅ ᐊᓂᕕᖃᕐᐳᖅ ᑐᕐᓲᖑᔭᕐᒧᑦ ᓯᓚᓪᓕᕐᒧᑦ, ᐃᒡᓗᕈᓰᓪᓗ ᐊᑭᓐᓇᖏᑦ ᓇᐹᕐᑐᓐᖑᐊᓂᒃ ᐹᒥᓂᒃ ᑕᕐᓯᕐᑐᕐᓯᒪᕗᑦ, ᐊᑭᓐᓇᖏᑦ ᐊᑐᓂᑦ ᐃᒡᓗᒌᓂᒃ; ᒪᔫᑎᖏᓪᓗ ᑐᖕᒥᕌᖃᕐᐳᑦ ᓯᑕᒪᐅᔪᕐᑐᓂᒃ.

ᐃᒡᓗᐃᑦ ᐃᑎᕐᑕᕐᕕᐅᑉ ᐅᓐᓄᐊᓪᓗᐊᑉ ᓇᓛᓃᑦᑑᑉ ᖃᓂᒋᔮᓃᑦᑐᑦ

³⁸ ᑐᕐᓲᖑᔭᕐᒥ ᓯᓚᕙᓯᖕᓂᕐᓴᒥ ᐃᒡᓗᕈᓯᒃᑲᓐᓂᕐᒥᒃ ᐊᒃᑐᐊᔪᖃᕐᐳᖅ ᐃᑎᕐᑕᕐᕕᖕᒧᑦ ᐃᓚᒋᓕᐅᓯᒪᔪᒥᒃ ᐅᓐᓄᐊᓪᓗᐊᑉ ᓇᓛᓃᑦᑐᒥ, ᑕᕝᕙᓂ ᐃᑯᐊᓪᓚᒡᓗᒋᑦ ᑐᓂᕐᕈᑎᒃᓮᑦ ᐃᕐᕈᕐᑐᕐᑕᐅᕕᖃᕐᐳᑦ.

³⁹ ᑕᕝᕙᓂᓗ ᐃᒡᓗᕈᓯᕐᒥ ᓵᑕᖃᕐᐳᖅ ᓯᑕᒪᓂᒃ ᐊᑐᓂᑦ ᒪᕐᕉᓪᓗᑎᒃ ᐊᑭᓕᕇᒃᑐᓂᒃ, ᑖᒃᑯᓇᓂ ᓵᓂ ᑐᖁᑕᐅᖃᑦᑕᕆᐊᖃᕐᐳᑦ ᐃᑯᐊᓪᓚᒡᓗᒋᑦ ᑐᓂᕐᕈᑎᒃᓮᑦ ᐊᔪᕐᓃᓪᓗ ᐃᓱᒪᒋᔪᓐᓁᕐᑕᐅᓂᒃᓴᖏᓐᓄᑦ ᑐᓂᕐᕈᑎᒃᓮᑦ ᐸᓯᔭᒃᓴᐅᓂᕐᒧᓪᓗ ᐊᑭᓕᐅᑎᒃᓴᒧᑦ ᑐᓂᕐᕈᑎᒃᓮᑦ.

⁴⁰ ᐃᒡᓗᕈᓯᐅᑉ ᑖᑦᓱᒪ ᓯᓚᑖᓂ ᓵᑕᖃᕆᕗᖅ ᓯᑕᒪᓂᒃ ᐊᑐᓂᑦ ᒪᕐᕉᓪᓗᑎᒃ ᐊᑭᓕᕇᓂᒃ ᐃᑎᕐᑕᕐᕕᖕᒥ ᐅᓐᓄᐊᓪᓗᐊᒦᑦᑑᑉ ᐊᕙᑖᓃᑦᑐᓂᒃ.

⁴¹ ᓵᑦ ᑲᑎᓪᓗᒋᑦ ᓯᑕᒪᐅᔪᕐᑑᕗᑦ ᑐᓂᕐᕈᑎᒃᓴᓂᒃ ᑐᖁᕅᕕᒃᓮᑦ, ᓯᑕᒪᑦ ᐃᒡᓗᕈᓯᐅᑉ ᐃᓗᐊᓃᑉᐳᑦ, ᓯᑕᒪᑦᑕᐅᖅ ᑐᕐᓲᖑᔭᐅᑉ ᐃᑎᕐᑕᕐᕕᖓᑕ ᓴᓂᐊᓃᓪᓗᑎᒃ.

⁴² ᓯᑕᒪᓂᒃᑕᐅᖅ ᓵᑕᖃᕆᕗᖅ ᐅᔭᕋᖕᓂᒃ ᓴᓇᓯᒪᔪᓂᒃ ᑐᓂᕐᕈᑎᒃᓴᓄᑦ ᐃᑯᐊᓚᑎᑕᒃᓴᓄᑦ ᐊᑐᕐᑕᐅᔪᒃᓴᓂᒃ, ᐳᕐᑐᓂᖃᕐᑐᓂᒃ ᐃᑎᒑᒃ ᒪᕐᕈᑲᓵᖕᓂᒃ, ᖄᖏᑦ ᑐᑭᒧᓪᓗ ᓴᓂᒧᓪᓗ ᐃᑎᒑᒃ ᒪᕐᕉᒃ ᕿᑎᖅᑲᕐᓗ ᐊᖏᓂᖃᕐᐳᑦ ᓯᒃᑭᑕᓪᓗᐊᖑᓪᓗᑎᒃ, ᑖᒃᑯᓇᓂᓗ ᑐᖁᓮᑦᔪᑎᒃᓴᑦ ᐃᓂᖃᕐᐳᑦ ᑐᓂᕐᕈᑎᒃᓴᑦ ᐃᑯᐊᓚᑎᑕᒃᓴᓪᓗ ᑐᖁᑕᐅᕕᖏᓐᓂ.

⁴³ ᓂᒃᓯᖕᓂᒡᓗ ᓯᓈᓃᑦᑐᖃᐅᕐᐳᑦ ᓵᒧᑦ ᐊᑦᑐᖏᕐᓯᒪᔪᓂᒃ; ᐊᒡᒊᑦ ᓴᓂᒧᑐᓂᖓᑐᑦ ᑕᑭᓂᖃᕐᑐᓂᒃ. ᑐᓂᕐᕈᑎᒃᓴᓕᒫᑦ ᓂᕿᖏᑦ ᓵᑉ ᖄᖏᓐᓄᐊᖃᕐᑕᐅᕕᒃᓴᖏᓐᓂ.

⁴⁴ ᑕᕝᕙ ᑖᑦᓱᒪ ᑐᕐᓲᖑᔭᕐᒧᑦ ᐃᓗᕙᓯᖕᓂᕐᓴᒧᐊᕈᑎᕚᖓ, ᑕᑯᒋᓪᓗ, ᑕᕝᕙᓂ ᐃᒡᓗᕈᓯᕐᑕᖃᕐᐳᖅ ᒪᕐᕉᖕᓂᒃ ᑐᕐᓲᖑᔭᕐᒧᑦ ᐊᓂᕕᖃᕐᑑᖕᓂᒃ, ᐃᑎᕐᑕᕐᕕᐅᑉ ᐅᓐᓄᐊᓪᓗᐊᑉ ᓇᓛᓃᑦᑐᖅ ᐅᓪᓗᓪᓗᐊᑉ ᓇᓛᓄᑦ ᓵᓐᖓᕗᖅ, ᐃᒡᓗᕈᓯᐅᓪᓗ ᐱᖃᑖ ᐅᓪᓗᓪᓗᐊᑉ ᓇᓛᓃᑦᑐᖅ ᐅᓐᓄᐊᓪᓗᐊᑉ ᓇᓛᓄᑦ ᓵᓐᖓᓪᓗᓂ.

⁴⁵ ᐅᖃᐅᑎᕚᖓᓗ, “ᑖᓐᓇ ᐃᒡᓗᕈᓯᖅ ᐅᓪᓗᓪᓗᐊᑉ ᓇᓛᓄᑦ ᓵᓐᖓᔪᖅ ᐃᒡᓗᕈᓯᕆᔭᐅᕗᖅ ᑐᓂᕐᕈᓯᕐᑎᑦᓯᔨᓄᑦ ᑐᒃᓯᐊᕐᕕᒡᔪᐊᕐᒥ ᑲᒪᔨᐅᔪᓄᑦ.

⁴⁶ ᐃᒡᓗᕈᓯᕐᓗ ᐅᓐᓄᐊᓪᓗᐊᑉ ᓇᓛᓄᑦ ᓵᓐᖓᔪᖅ ᐃᒡᓗᕈᓯᕆᔭᐅᕗᖅ ᑐᓂᕐᕈᓯᕐᑎᑦᓯᔨᓄᑦ ᑐᓂᕐᕈᓯᕐᕕᖕᒥ ᐱᓕᕆᖃᑦᑕᕐᑐᓄᑦ ᑲᒪᔨᐅᔪᓄᑦ; ᔭᑑᑭᐅᑉ ᑭᖑᕚᖏᓐᓄᑦ, ᑖᒃᑯᐊ ᓕᕔᑎᑦ ᑭᖑᕚᖏᓐᓂᑦ ᐱᓯᒪᔪᓂᑦ ᐊᑕᓂᐅᑉ ᓇᔪᕐᑕᖓᓄᑦ ᐃᑎᕈᓐᓇᕐᑐᑑᖕᒪᑕ ᐊᑕᓂᕐᒥᒃ ᐱᔨᑦᓯᕆᐊᕐᑐᕐᓗᑎᒃ.”

ᐃᓗᕙᓯᖕᓂᕐᓴᖅ ᑐᕐᓲᖑᔭᖅ ᑐᒃᓯᐊᕐᕕᒡᔪᐊᕐᓗ

⁴⁷ ᑖᑦᓱᒪᓗ ᑐᕐᓲᖑᔭᖅ ᐆᒃᑐᕋᕐᒪᒍ, ᐊᑦᔨᒌᒥᒃ ᓂᕈᑐᓂᖃᕐᐳᖅ ᐃᑎᒐᖕᓂᒃ 168ᓂᒃ ᑐᑭᒧᑦ ᓴᓂᒧᓪᓗ, ᑭᒃᐹᕆᓪᓗᐊᕐᓗᓂ; ᓯᕗᕌᓂᓗ ᑐᓂᕐᕈᓯᕐᕕᒃᑕᖃᕐᐳᖅ ᑐᒃᓯᐊᕐᕕᒡᔪᐊᕐᒥ.

⁴⁸ ᑕᕝᕙ ᐃᑎᕐᑎᑉᐹᖓ ᑐᒃᓯᐊᕐᕕᒡᔪᐊᑉ ᑐᕐᓲᖑᔭᖓᓄᑦ, ᑕᒪᓐᓇᓗ ᐆᒃᑐᕋᕐᒪᒍ ᑐᑭᒧᑦ ᑕᑭᓂᖃᕐᐳᖅ 9ᓂᒃ ᐃᑎᒐᖕᓂᒃ ᑐᕐᓲᖑᔭᓕᒫᖓ, ᓴᓂᒧᑐᓂᖃᕐᓗᑎᒡᓗ 24ᓂᒃ ᐃᑎᒐᖕᓂᒃ; ᐃᑎᕐᑕᕐᕕᐅᓪᓗ ᐊᑭᓐᓇᖏᑕ ᐊᑯᓐᓂᖏᑦ ᓴᓂᒧᑐᓂᖃᕐᐳᑦ ᑕᓪᓕᒪᓂᒃ ᐃᑎᒐᖕᓂᒃ ᐊᑐᓂᑦ.

⁴⁹ 34ᓂᒡᓗ ᐃᑎᒐᖕᓂᒃ ᓴᓂᒧᑐᓂᖃᕐᐳᑦ, ᑐᑭᒧᖃᕐᓗᑎᒡᓗ ᐊᕙᑎᓂᒃ; ᒪᔫᑎᖃᕐᓗᑎᒡᓗ ᑐᖕᒥᕌᖃᕐᑐᓂᒃ ᖁᓕᓂᒃ; ᖁᒻᒧᓪᓗ ᓱᑲᖃᕐᐳᑦ ᐊᑭᓕᕇᖕᓂᒃ ᐃᑎᕐᑕᕐᕕᐅᑉ ᐊᕙᑖᓃᑦᑑᖕᓂᒃ.