ᐃᓯᑭᐊᓕᐅᑉ ᐊᒡᓚᖏᑦ 39 - ᐊᒡᓔᑦ ᐃᑦᔪᕐᖕᓁᑦᑐᑦ

ᒑᒡᒥᐅᑦ ᓵᓚᒋᔭᐅᓂᖓᑦ

¹ “ᐃᕝᕕᓪᓕ ᐃᓅᑉ ᐃᕐᓂᖓ ᒑᒡᒥᐅᑦ ᓵᓐᖓᓗᒋᑦ ᐅᖃᐅᓯᐅᖁᔭᓐᓂᒃ ᐅᖃᕐᕕᒋᒃᑭᑦ, ᐅᖃᕐᓗᑎᓪᓗ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᓵᓐᖓᓕᕐᐸᒋᑦ, ᒑᒡ, ᐊᖓᔪᖅᑳᖑᔪᑎᑦ ᒥᓯᑭᒥᐅᓄᑦ ᑐᐸᐅᓪᒥᐅᓄᓪᓗ;

² ᓴᖑᑎᓐᓂᐊᕐᐸᒋᑦ ᑕᓯᐅᕐᓗᑎᑦ, ᑎᑭᑎᓪᓗᑎᑦ ᐅᖓᓯᒃᑐᒥᑦ ᐅᓐᓄᐊᓪᓗᐊᑉ ᓇᓛᓂᑦ, ᐂᑎᓪᓗᑎᓪᓗ ᐃᓴᕆᐊᓕᐅᑉ ᖃᖅᑲᖏᓐᓄᑦ ᐅᓇᑕᕆᐊᕐᑎᓪᓗᑎᑦ;

³ ᐱᑎᒃᓯ ᓴᐅᒥᖕᓄᑦ ᑎᒍᒥᐊᕐᑍᑦ ᑎᒍᔪᒫᕐᐸᕋ, ᖃᕐᔪᕐᓗ ᑕᓕᕐᐱᖕᓄᑦ ᑎᒍᒥᐊᕐᑍᑦ ᐊᒡᒐᖕᓂᑦ ᑲᑕᒃᑎᓪᓗᒍ.

⁴ ᐃᓴᕆᐊᓕᒥᐅᑦ ᖃᖅᑲᖏᓐᓂ ᑐᖁᑕᐅᔪᒫᕐᐳᑎᑦ, ᐅᓇᑕᕐᑎᒐᓴᒡᔪᐊᑎᓪᓗ ᐃᓄᐃᓪᓗ ᐃᓚᒋᔭᑎᑦ; ᑎᖕᒥᐊᓄᑦ ᖃᓄᐃᑦᑐᑐᐃᓐᓇᕐᓄᑦ ᓂᕿᑐᓲᓕᒫᓄᑦ ᐆᒪᔪᓄᓪᓗ ᓄᔪᐊᕐᑐᓄᑦ ᓂᕆᔭᐅᔪᒫᕐᐳᓯ.

⁵ ᓇᑎᕐᓇᒥ ᑐᖁᔪᒫᕐᐳᓯ; ᐅᕙᖓ ᐅᖃᓚᐅᕋᒪ, ᐊᑕᓂᖅ ᒎᑎ ᐅᖃᕐᐳᖅ.

⁶ ᒪᒑᒡ ᐃᑯᐊᓪᓚᒃᑎᑦᓱᒫᕐᐸᕋ ᓯᒡᔭᒦᑦᑐᓪᓗ ᓄᓇᓖᑦ ᐃᓂᓪᓚᖓᑦᓯᐊᕐᑐᑦ; ᑕᕝᕙ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ.

⁷ ᐊᑎᕋ ᐃᑦᔪᕐᓁᑦᑐᖅ ᖃᐅᔨᔭᐅᑎᑦᓱᒪᒐᒃᑯ ᐃᓄᖁᑎᓐᓄᑦ ᐃᓴᕆᐊᓕᒥᐅᓄᑦ; ᐊᑎᕋᓗ ᓇᕐᕈᓇᕐᓯᑎᑕᐅᖁᔪᓐᓁᕋᒃᑯ; ᐃᓅᖃᑎᒌᒡᔪᐊᓪᓗ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ, ᐃᓴᕆᐊᓕᒥᐅᑦ ᐃᑦᔪᕐᓁᑦᑐᖁᑎᖓᑦ.

⁸ “ᑕᑯᒋᑦ, ᓇᓪᓕᐅᑎᔪᒫᕐᑐᖅ ᓇᓪᓕᐅᑎᓕᕐᐳᖅ, ᐊᑕᓂᖅ ᒎᑎ ᐅᖃᕐᐳᖅ. ᑖᓐᓇ ᑕᕝᕙ ᐅᓪᓗᖅ ᓇᓪᓕᐅᑎᓛᕐᓂᕋᕐᓗᒍ ᐅᖃᐅᓯᕆᓯᒪᔭᕋ.

⁹ ᐃᓴᕆᐊᓕᐅᑉ ᓄᓇᖓᓂ ᐃᒡᓗᒐᓴᒡᔪᐊᕐᒥᐅᑦ ᓱᒋᐅᑎᕕᓂᕐᓂᒃ ᕿᔪᒃᓴᕐᑖᖃᑦᑕᕈᒫᕐᐳᑦ ᐃᑯᐊᓚᑎᑦᓯᕙᒡᓗᑎᒃ, ᓴᐴᓗᑕᕐᓂᒃ ᐊᒡᕖᕋᐅᑎᓂᒡᓗ, ᐱᑎᒃᓯᓂᒃ ᖃᕐᔪᓂᒡᓗ, ᖃᓗᒋᐊᓂᒃ ᐊᓇᐅᑕᓂᒡᓗ, ᑕᒪᒃᑯᓂᖓᓗ ᕿᔪᖃᕐᓗᑎᒃ ᐃᑯᐊᓚᑦᓯᖃᑦᑕᕈᒫᕐᐳᑦ ᐊᕐᕌᒍᓂᒃ 7ᓂᒃ;

¹⁰ ᕿᔪᒃᓴᒥᖕᓂᒃ ᐱᕈᕐᓰᕕᖕᓂᑦ ᑲᑎᑦᓯᔭᕆᐊᖃᕈᒫᓐᖏᓚᑦ ᓇᐹᕐᑐᓂᒡᓘᓐᓃᑦ ᓇᑲᑎᕆᔭᕆᐊᖃᕈᒫᓐᖏᓚᑦ ᕿᑦᔨᐅᕋᓱᐊᕐᓗᑎᒃ, ᓱᒋᐅᑎᕕᓂᕐᓂᒃ ᕿᔪᖃᖃᑦᑕᕈᒫᕐᒪᑕ, ᐱᖁᑎᒥᖕᓂᒃ ᐱᑖᕐᑐᕐᑎᒋᓚᐅᕐᑕᑎᒃ ᐱᑖᕐᕕᒋᓕᕈᒫᕆᕔᑦ, ᓄᖑᕈᑦᔨᔨᒋᓚᐅᕐᑕᑎᒡᓗ ᓄᖑᕈᑎᓕᕐᒥᓗᒋᑦ, ᐊᑕᓂᖅ ᒎᑎ ᐅᖃᕐᐳᖅ.”

ᒑᒡᒥᐅᑦ ᐃᓗᕕᕐᑕᐅᓂᖓᑦ

¹¹ “ᑕᒪᒃᑯᐊ ᑭᖑᕐᖓᒍᑦ ᐅᓪᓗᖅ ᓇᓪᓕᐅᑎᔪᒫᕐᐳᖅ ᒑᒡᒥᐅᑦ ᓄᓇᒥᒃ ᐃᓗᕕᕐᕕᒃᓴᖏᓐᓂᒃ ᓄᓇᖁᑎᑖᕐᑎᑦᓯᓂᕋ ᐃᓴᕆᐊᓕᒥ, ᓇᕐᓴᒥ ᐃᖏᕐᕋᔪᓄᑦ ᐊᖅᑯᑕᐅᕙᒃᑐᒥ ᑕᓯᐅᑉ ᑐᖁᖓᔫᑉ ᓯᕿᓐᓂᓕᕐᕕᐊᑕ ᓇᓛᓃᑦᑐᒥᒃ; ᐃᖏᕐᕋᔪᓄᑦ ᐊᖅᑯᑕᐅᕙᒍᓐᓃᕈᒫᕐᐳᖅ ᒑᒡᒥᐅᑦ ᐅᓇᑕᕐᑎᖁᑎᖏᑦ ᑍᑲᓂ ᐃᓗᕕᕐᑕᐅᔪᒫᕐᒪᑕ; ᓇᕐᓴᕐᓗ ᑍᓐᓇ ᑍᔭᐅᓕᕈᒫᕐᐳᖅ ᕼᐊᒪᓐ-ᒑᒡ ᓇᕐᓴᖓᓂᒃ.

¹² ᐃᓴᕆᐊᓕᐅᑉ ᑭᖑᕙᖏᑦ ᑕᖅᑭᓂᒃ 7ᓂᒃ ᑖᒃᑯᓂᖓ ᐃᓗᕕᕐᓯᒌᕋᓱᐊᕈᒫᕐᐳᑦ, ᓄᓇ ᓴᓗᒻᒪᕐᑕᐅᖁᓪᓗᒍ.

¹³ ᑕᒫᓂ ᓄᓇᖃᕐᑐᓕᒫᑦ ᐃᓗᕕᕐᓯᖃᑕᐅᔪᒫᕐᐳᑦ ᑖᒃᑯᓂᖓ; ᑕᒪᓐᓇᓗ ᐅᐱᒋᔭᐅᑦᔪᑎᒋᔪᒫᕐᐹᑦ ᓂᕐᑐᕐᓇᕐᓂᓐᓂᒃ ᓴᖅᑭᑎᑦᓯᓂᕐᒪ ᐅᓪᓗᖓᓂ, ᐊᑕᓂᖅ ᒎᑎ ᐅᖃᕐᐳᖅ.

¹⁴ ᑕᖅᑮᑦ 7 ᓈᒃᐸᑕ ᐊᖑᑎᓂᒃ ᑎᓕᔭᐅᔪᖃᕈᒫᕐᐳᖅ ᑎᒥᕕᓂᕐᓯᐅᕐᑎᒃᓴᓂᒃ, ᐃᓗᕕᕐᓯᒪᖏᑦᑐᓪᓗ ᓄᓇᒥ ᐃᓗᕕᕐᑕᐅᖃᑦᑕᕈᒫᕐᐳᑦ, ᓄᓇ ᑕᒪᓐᓇ ᓴᓗᒻᒪᕐᑕᐅᖁᓪᓗᒍ.

¹⁵ ᐃᓅᑉ ᓴᐅᓂᕕᓂᖏᓐᓂᒃ ᓇᓂᓯᔭᕌᖓᒥᒃ ᓇᓗᓁᒃᑯᑦᓰᖃᑦᑕᕈᒫᕐᐳᑦ, ᐃᓗᕕᕐᓯᔨᓄᑦ ᐃᓗᕕᕐᑕᐅᖁᓪᓗᒋᑦ ᒑᒡᒥᐅᑦ ᐅᓇᑕᕐᑎᖁᑎᖏᑕ ᐃᓗᕕᕐᑕᐅᕕᖓᓄᑦ ᓇᕐᓴᒦᑦᑐᒧᑦ.

¹⁶ ᐃᒡᓗᒐᓴᒡᔪᐊᓪᓗ ᕼᐊᒨᓇᒥᒃ ᐊᑎᖃᓕᕈᒫᕐᐳᑦ. ᑖᒃᑯᓇᓐᖓᑦ ᓄᓇ ᓴᓗᒻᒪᕐᑕᐅᔪᒫᕐᒪᑦ.

¹⁷ “ᐃᕝᕕᓪᓕ, ᐃᓅᑉ ᐃᕐᓂᖓ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑎᖕᒥᐊᑦ ᐊᑦᔨᒌᖏᑦᑐᑦ ᐅᖃᐅᑎᒃᑭᑦ ᐆᒪᔪᓕᒫᓪᓗ ᓇᑎᕐᓇᒦᑦᑐᑦ, ‘ᑲᑎᓪᓗᓯ ᕾᒋᑦᓯ, ᓇᑭᓕᒫᖅ ᑲᑎᕐᓱᕐᓗᓯ ᓂᕆᔭᕐᑐᕆᑦᓯ ᑐᓂᕐᕈᑎᒃᓴᒥᒃ ᓂᕆᕕᒡᔪᐊᕈᑎᒃᓴᒥᒃ ᐃᓕᑦᓯᓐᓄᑦ ᐅᐸᓗᖎᔭᕐᓯᒪᔭᓐᓂᒃ, ᐊᖏᔪᕐᔪᐊᒥᒃ ᑐᓂᕐᕈᑎᒃᓴᒥᒃ ᓂᕆᕕᒡᔪᐊᕐᑐᖃᕈᒫᕐᐳᖅ ᐃᓴᕆᐊᓕᐅᑉ ᖃᖅᑲᖏᓐᓂ, ᓂᕿᓂᒃ ᓂᕆᔪᒃᓴᐅᕗᓯ ᐃᒥᕐᓗᓯᓗ ᐊᐅᖕᒥᒃ.

¹⁸ ᓂᕆᔪᒃᓴᐅᕗᓯ ᐊᔪᖏᑦᑐᕐᔪᐊᑦ ᑎᒥᖏᓐᓂᒃ, ᐃᒥᕐᓗᓯᓗ ᓄᓇᒥ ᐊᖓᔪᖅᑳᕐᔪᐊᑦ ᐊᐅᖏᓐᓂᒃ, ᓰᐲᑦ ᐊᖑᓴᓪᓗᖏᑎᑐᑦ, ᓄᕐᕋᐅᔭᕐᑎᑐᓪᓗ, ᒎᑦᓯᑎᑐᑦ, ᐊᖑᓴᓪᓗᕐᑎᑐᓪᓗ, ᖁᐃᒃᓯᑦᓯᐊᕆᔭᐅᓯᒪᔪᑎᑐᑦ ᐹᓴᓂᒥ.

¹⁹ ᓂᕆᔪᒃᓴᐅᕗᓯ ᐅᕐᓱᖏᓐᓂᒃ ᐊᕿᐊᑦᑐᕐᓗᓯ, ᐊᐅᖕᒥᒡᓗ ᐃᒥᕐᓗᓯ ᐋᖓᔮᓕᖏᓐᓂᑦᓯᓐᓂ, ᑕᒪᒃᑯᐊ ᑐᓂᕐᕈᑕᐅᓯᒪᕗᑦ ᓂᕆᕕᒡᔪᐊᒃᓴᑦ ᐃᓕᑦᓯᓐᓄᑦ ᐅᐸᓗᖎᔭᕐᓯᒪᔭᒃᑲ.

²⁰ ᓂᕆᕕᖁᑎᓐᓂ ᓂᕆᔪᒃᓴᐅᕗᓯ ᕿᒻᒥᕐᔪᐊᕕᓂᕐᓂᒃ ᐃᑭᒪᔨᐊᕕᓂᖏᓐᓂᒡᓗ, ᐅᓇᑕᕐᑎᓂᒡᓗ ᐊᔪᖏᑦᑐᕐᔪᐊᕕᓂᕐᓂᒃ ᖃᓄᐃᑦᑐᑐᐃᓐᓇᓂᒡᓗ ᐅᓇᑕᕐᑎᕕᓂᕐᓂᒃ,’ ᐊᑕᓂᖅ ᒎᑎ ᐅᖃᕐᐳᖅ.”

ᐃᓴᕆᐊᓕᒥᐅᑦ ᐅᑎᕐᑎᑕᐅᓂᖏᑦ

²¹ “ᐃᓅᖃᑎᒌᒡᔪᐊᑦ ᐊᑯᕐᖓᓐᓂ ᓂᕐᑐᕐᓇᕐᓂᕐᔪᐊᕋ ᐃᓂᑖᕐᑎᑦᓱᒫᕐᐸᕋ; ᐃᓅᖃᑎᒌᒡᔪᐊᓕᒫᓪᓗ ᑕᑯᔪᒫᕐᐳᑦ ᐋᖅᑭᒃᓱᐃᓂᒃᑯᑦ ᐱᓇᓱᐊᕐᓯᒪᓂᓐᓂᒃ, ᐱᔪᓐᓇᕐᓂᕋᓗ ᐊᑐᕐᓗᒍ ᐱᓇᓱᐊᕐᕕᒋᓯᒪᒐᒃᑭᑦ.

²² ᐃᓴᕆᐊᓕᐅᑉ ᑭᖑᕚᖏᑦ ᖃᐅᔨᔪᒫᕐᐳᑦ ᐅᕙᖓᐅᒐᒪ ᐊᑕᓂᖅ ᑖᒃᑯᐊ ᒎᑎᖓᑦ, ᐅᓪᓗᒥᑦ ᑕᕝᕙᓐᖓᑦ ᐱᒋᐊᕐᓗᓂ ᑭᖑᓂᖓᓂᓗ.

²³ ᐃᓅᖃᑎᒌᒡᔪᐊᓪᓗ ᖃᐅᔨᔪᒫᕐᐳᑦ ᐃᓴᕆᐊᓕᐅᑉ ᑭᖑᕚᖏᑦ ᓄᓇᒋᓐᖏᑕᒥᖕᓄᑦ ᐊᐅᓪᓚᕈᑦᔭᐅᓚᕿᓯᒪᖕᒪᑕ ᐱᐅᖏᑦᑐᓕᓯᒪᓂᖏᓐᓄᑦ, ᐊᖏᔪᕐᔪᐊᒥᒃ ᐅᕙᓐᓄᑦ ᐊᔪᕐᑐᓕᓚᐅᕐᒪᑕ ᑮᓇᕋ ᐃᔨᓚᐅᕐᐸᕋ ᑖᒃᑯᓄᖓ ᑐᓂᓚᐅᕐᐸᒃᑲᓗ ᐊᑭᕋᖏᑕ ᐱᔪᓐᓇᕐᓂᖏᓐᓄᑦ, ᓴᕕᒡᔪᐊᒧᓪᓗ ᑐᖁᑕᐅᔪᐃᓐᓇᐅᓚᐅᕐᐳᑦ.

²⁴ ᐱᓂᐊᕐᕕᒋᓚᐅᕐᐸᒃᑲ ᓴᓗᒪᖏᑦᑐᒥᒃ ᐱᓂᐊᕐᓯᒪᓂᖏᑦ ᐊᔪᕐᑐᓕᓂᖏᓪᓗ ᒪᓕᒡᓗᒋᑦ, ᑮᓇᕋᓗ ᐃᔨᓚᐅᕐᐸᕋ ᑖᒃᑯᓄᖓ.

²⁵ “ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᒫᓐᓇ ᔧᑰᑉ ᑭᖑᕚᖏᑦ ᐅᑎᕐᑎᓐᓂᐊᕐᐸᒃᑲ, ᐃᓴᕆᐊᓕᐅᓪᓗ ᑭᖑᕚᓕᒫᖏᑦ ᓈᒃᑭᒋᓂᐊᕐᐸᒃᑲ; ᐊᑎᕋᓗ ᐃᑦᔪᕐᓁᑦᑐᖅ ᓯᖕᓇᒋᓂᐊᕐᐸᕋ.

²⁶ ᑲᓐᖑᓇᕐᑐᒦᓚᐅᕐᓂᑎᒃ ᐳᐃᒍᕈᒫᕐᐹᑦ, ᐅᒃᐱᕆᔭᒃᓴᐅᖏᑦᑐᓂᒡᓗ ᐱᓂᐊᕐᓂᖃᖃᑦᑕᓚᐅᕐᓂᑎᒃ ᐅᕙᓐᓄᑦ, ᓄᓇᒥᖕᓂ ᐃᓂᓪᓚᖓᑦᓯᐊᓕᕈᑎᒃ ᑲᑉᐱᐊᓱᒃᑎᑕᐅᖃᑦᑕᕈᓐᓁᕈᑎᒡᓗ ᓇᐅᑐᐃᓐᓇᓄᑦ.

²⁷ ᐃᓄᖁᑎᒃᑲ ᐅᑎᕐᑎᓯᒪᓕᕈᒃᑭᑦ ᐃᓄᖕᓂᑦ ᑲᑎᕐᓱᕐᓯᒪᓕᕈᒃᑭᓪᓗ ᐊᑭᕋᖏᑕ ᓄᓇᖏᓐᓂᑦ, ᑖᒃᑯᑎᒎᓇᖅ ᐃᓅᖃᑎᒌᒡᔪᐊᑦ ᖃᐅᔨᑎᑦᓱᒫᕐᐸᒃᑲ ᐃᑦᔪᕐᓁᑦᑑᓂᓐᓂᒃ.

²⁸ ᑕᕝᕙ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ ᑖᒃᑯᐊ ᒎᑎᖓᑦ ᐊᐅᓪᓚᕈᑦᔭᐅᑎᑦᓯᓚᐅᕋᒪ ᐃᓅᖃᑎᒌᒡᔪᐊᑦ ᐊᑯᕐᖓᓐᓄᑦ, ᑲᑎᕐᓱᓕᕐᒥᒍᒃᑭᓪᓗ ᓇᖕᒥᓂᖅ ᓄᓇᖏᓐᓄᑦ. ᕿᒪᒃᑕᐅᑎᑦᓯᓂᐊᕈᓐᓃᕐᐳᖓᓗ ᐊᒥᐊᒃᑰᔪᓂᒃ ᐃᓅᖃᑎᒌᒡᔪᐊᑦ ᐊᑯᕐᖓᓐᓂ;

²⁹ ᑮᓇᕋᓗ ᐃᔨᓚᐅᕐᓯᒪᓂᐊᕈᓐᓃᕐᐸᕋ ᑖᒃᑯᓄᖓ, ᐊᓂᕐᓂᕋ ᑯᕕᒍᒃᑯ ᐃᓴᕆᐊᓕᐅᑉ ᑭᖑᕚᖏᓐᓄᑦ, ᐊᑕᓂᖅ ᒎᑎ ᐅᖃᕐᐳᖅ.”