ᐃᓯᑭᐊᓕᐅᑉ ᐊᒡᓚᖏᑦ 37 - ᐊᒡᓔᑦ ᐃᑦᔪᕐᖕᓁᑦᑐᑦᓇᕐᓴᖅ ᐸᓂᕐᑐᓂᒃ ᓴᐅᓂᕕᓂᕐᑕᓕᒃ 1 ᐊᑕᓂᐅᑉ ᐱᔪᓐᓇᕐᓂᖓᑕ ᓇᔪᓕᕐᐹᖓ, ᐊᑕᓂᐅᓪᓗ ᐊᓂᕐᓂᖓᑕ ᐊᐅᓪᓚᕈᑎᕚᖓ, ᓇᕐᓴᐅᓪᓗ ᕿᑎᖓᓄᐊᕐᑎᑉᐹᖓ; ᓴᐅᓂᕕᓂᕐᓂᒃ ᑕᑕᑦᑐᒧᑦ. 2 ᑕᒪᒃᑯᐊᓗ ᐊᑯᓐᓂᖓᑦᑎᒍᑦ ᑕᓯᐅᕐᐹᖓ; ᑕᑯᒋᓪᓗ, ᓇᕐᓴᒦᑦᑐᖃᕐᐳᖅ ᐅᓄᕐᑐᕐᔪᐊᓂᒃ; ᑖᒃᑯᐊᓗ ᐸᓂᓪᓚᕆᐳᑦ. 3 ᐅᖃᐅᑎᕚᖓᓗ, “ᐃᓅᑉ ᐃᕐᓂᖓ, ᓴᐅᓂᕕᓃᑦ ᒪᑯᐊ ᐆᒻᒪᕈᓐᓇᕐᐹᑦ?” ᑭᐅᕙᕋᓗ, “ᐊᑕᓃᖅ ᒎᑏ, ᐃᕝᕕᑐᐊᖅ ᖃᐅᔨᒪᕗᑎᑦ.” 4 ᑕᕝᕙ ᐅᖃᐅᑎᒃᑲᓐᓂᕆᕚᖓ, “ᓴᐅᓃᑦ ᐅᑯᐊ ᐅᖃᕐᑕᐅᖁᔭᓐᓂᒃ ᐅᖃᐅᑎᒃᑭᑦ, ᐅᖃᐅᑎᓗᒋᓪᓗ, ᓴᐅᓃᑦ ᐸᓂᕐᑐᓯ, ᑐᓴᕆᑦᓯ ᐊᑕᓂᐅᑉ ᐅᖃᐅᓯᖓᓂᒃ. 5 ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ ᑖᒃᑯᓄᖓ ᓴᐅᓂᕐᓄᑦ: ᑕᑯᒋᑦ, ᐊᓂᕐᓂᕐᒧᑦ ᐃᑎᕐᑕᐅᑎᓐᓂᐊᕐᐸᑦᓯ, ᑕᕝᕙ ᐆᒻᒪᕐᓂᐊᕐᐳᓯ. 6 ᓄᑭᒃᑖᕐᑎᓐᓂᐊᕐᐸᑦᓯ, ᑎᒥᓯᓗ ᓂᕿᑖᕐᑎᓪᓗᒋᑦ, ᐅᓕᒡᓗᓯᓗ ᐅᕕᓂᖃᖁᓪᓗᓯ, ᐊᓂᕐᓂᕐᑖᕐᑎᓐᓂᐊᕐᐸᑦᓯᓗ, ᑕᕝᕙ ᐆᒻᒪᕐᓂᐊᕐᐳᓯ; ᑕᕝᕙ ᖃᐅᔨᓕᕐᓂᐊᕐᐳᓯ ᐅᕙᖓᐅᒐᒪ ᐊᑕᓂᖅ.” 7 ᐱᖁᔭᐅᓂᕋᓗ ᒪᓕᒡᓗᒍ ᐅᖃᖁᔭᐅᔪᒥᒃ ᐅᖃᕐᕕᒋᓕᓚᐅᕐᐸᒃᑲ; ᐅᖃᓪᓚᓕᕐᑎᓪᓗᖓ, ᑐᓴᕐᓴᐅᔪᖃᓕᕐᐳᖅ, ᑕᑯᒋᓪᓗ, ᐊᕕᓗᖅᑲᑑᓕᕐᐳᑦ; ᓴᐅᓃᓪᓗ ᐃᒻᒥᖕᓄᑦ ᑲᑎᑎᓕᕐᐳᑦ, ᐃᓂᒃᓴᒥᖕᓄᑦ ᐃᓕᐅᕋᑦᓯᐊᕐᓗᑎᒃ. 8 ᑕᑯᓐᓇᕐᑎᓪᓗᖓᓗ, ᓄᑭᒃᑖᕐᑐᓕᕐᐳᑦ, ᓂᕿᑖᕐᑐᓕᕐᓗᑎᒡᓗ, ᐅᓕᒃᑕᐅᕗᓪᓗ ᐅᕕᓂᖕᒧᑦ; ᑭᓯᐊᓂᓕ ᐊᓂᕐᓂᖃᓚᐅᓐᖏᓚᑦ. 9 ᑕᕝᕙ ᐅᖃᐅᑎᕚᖓ, “ᐃᓅᑉ ᐃᕐᓂᖓ, ᐊᓂᕐᓂᖅ ᐅᖃᖁᔭᓐᓂᒃ ᐅᖃᐅᑎᒍᒃ, ᐅᖃᕐᓗᑎᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐊᓄᕆᓂᑦ ᓯᑕᒪᓂᑦ ᐊᓄᕌᓚᐅᕆᑦ, ᐊᓂᕐᓃᖅ, ᐅᑯᐊᐅ ᑐᖁᖓᔪᑦ ᐊᓂᕐᓵᕐᕕᒋᓚᐅᒃᑭᑦ, ᐆᒻᒪᖁᓪᓗᒋᑦ.” 10 ᐱᖁᔭᐅᓂᕋᓗ ᒪᓕᒡᓗᒍ ᐅᖃᕐᑕᐅᖁᔭᖓᓂᒃ ᐅᖃᕐᕕᒋᓚᐅᕐᐸᒃᑲ, ᐊᓂᕐᓂᐅᓪᓗ ᑎᑭᕝᕕᒋᕔᑦ, ᑖᒃᑯᐊᓗ ᐆᒻᒪᕐᐳᑦ, ᓂᑯᕕᑉᐳᓪᓗ, ᐅᓄᕐᑐᕐᔪᐊᖑᓪᓗᑎᒃ ᐅᓇᑕᕐᑐᒃᓴᓐᖑᕐᐳᑦ. 11 ᑕᕝᕙ ᐅᖃᐅᑎᕚᖓ, “ᐃᓅᑉ ᐃᕐᓂᖓ, ᑖᒃᑯᐊ ᓴᐅᓃᑦ ᐃᓴᕆᐊᓕᐅᑉ ᑭᖑᕚᓕᒫᕆᕔᑦ. ᑕᑯᒋᑦ, ᐅᖃᖃᑦᑕᕐᐳᑦ, ‘ᓴᐅᓂᕗᑦ ᐸᓂᕐᓯᒪᓕᕐᐳᑦ, ᓂᕆᐅᒋᔭᒃᓴᖃᕈᓐᓃᕐᓗᑕᓗ; ᓯᕗᓂᒃᓴᖃᕈᓐᓃᕐᐳᒍᑦ.’ 12 ᑍᒤᒻᒪᑦ ᐅᖃᕐᑕᐅᖁᔭᓐᓂᒃ ᐅᖃᐅᑎᒃᑭᑦ, ᐅᖃᐅᑎᓗᒋᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᐃᓗᕕᓯ ᒪᑐᐃᕐᓂᐊᕐᐸᒃᑲ, ᐃᓗᕕᓯᓐᓂᓪᓗ ᒪᑭᑎᓪᓗᓯ, ᐆ ᐃᓄᖁᑎᒃᑲ; ᐊᖏᕐᕋᕐᑎᓐᓂᐊᕐᐸᑦᓯ ᐃᓴᕆᐊᓕᐅᑉ ᓄᓇᖓᓄᑦ. 13 ᑕᕝᕙ ᖃᐅᔨᔪᒫᕐᐳᓯ ᐅᕙᖓᐅᒐᒪ ᐊᑕᓂᖅ, ᐃᓗᕕᓯ ᒪᑐᐃᕈᒃᑭᑦ, ᒪᑭᑎᓪᓗᓯᓗ ᐃᓗᕕᑦᓯᓐᓂᑦ, ᐆ ᐃᓄᖁᑎᒃᑲ. 14 ᐊᓂᕐᓂᕋᓗ ᐃᓗᑦᓯᓐᓄᑦ ᐃᑎᕐᑎᑦᓱᒫᕐᐸᕋ, ᐃᓅᖁᓪᓗᓯ, ᓄᓇᑖᕐᑎᓪᓗᓯᓗ ᓇᖕᒥᓂᖅ ᓄᓇᑦᓯᓐᓂ; ᑕᕝᕙ ᖃᐅᔨᔪᒫᕐᐳᓯ ᐅᕙᖓ, ᐊᑕᓂᖅ ᐅᖃᓪᓚᓚᐅᕋᒪ, ᐱᓇᓱᐊᕐᓯᒪᓕᕐᓗᒍᓗ, ᐊᑕᓂᖅ ᐅᖃᕐᐳᖅ.” ᔫᑕᒥᐅᑦ ᐃᓴᕆᐊᓕᒥᐅᓪᓗ ᐊᑕᐅᓯᕐᒥᒃ ᐊᖓᔪᖅᑳᕐᔪᐊᖃᕐᕕᖃᓕᕐᓂᖓᑦ 15 ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ: 16 “ᐃᓅᑉ ᐃᕐᓂᖓ, ᕿᔪᖕᒥᒃ ᑎᒍᓯᓗᑎᑦ ᑎᑎᕋᕐᕕᒋᒍᒃ, ‘ᔫᑕᒧᑦ ᐃᓴᕆᐊᓕᐅᓪᓗ ᕿᑐᕐᖓᖏᑕ ᑲᑐᑦᔨᖃᑎᖏᓐᓄᑦ’; ᕿᔪᒃᑲᓐᓂᕐᒥᒃ ᑎᒍᓯᓗᑎᑦ ᑎᑎᕋᕐᕕᒋᒍᒃ, ‘ᔫᓯᐱᒧᑦ ᐃᕗᕅᑎᐅᑉ ᐊᔭᐅᑉᐱᐊᖓᓄᑦ, ᐃᓴᕆᐊᓕᐅᓪᓗ ᑭᖑᕚᓕᒫᖏᑕ, ᑲᑐᑦᔨᖃᑎᖏᓐᓄᑦ.’ 17 ᑖᒃᑯᐊᒃ ᑲᓱᕐᑎᓪᓗᒋᒃ ᐊᑕᐅᓯᐅᓕᓗᒍ ᐊᔭᐅᑉᐱᐊᕈᕐᑎᒍᒃ, ᐊᑕᐅᓯᓐᖑᖁᓪᓗᒋᒃ ᑎᒍᒥᐊᕐᓗᒋᒃ ᐊᒡᒐᖕᓂ. 18 ᐃᓅᖃᑎᖕᓄᑦ ᐊᐱᕆᔭᐅᒍᕕᑦ, ‘ᑐᑭᓯᑎᑦᔮᓐᖏᓚᑦᑎᒎᑦ? ᖃᓄᖅ ᑖᒃᑯᐊᒃ ᑐᑭᖃᕐᒪᖔᑎᒃ.’ 19 ᐅᖃᐅᑎᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᔫᓯᐱᐅᑉ ᐊᔭᐅᑉᐱᐊᖓ ᐃᕗᕅᑎᐅᑉ ᑎᒍᒥᐊᕐᑕᖓ ᐃᓴᕆᐊᓕᐅᓪᓗ ᑭᖑᕚᖏᑕ ᑲᑐᑦᔨᖃᑎᖏᑦ; ᔫᑕᐅᑉ ᐊᔭᐅᑉᐱᐊᖓᓄᑦ ᑲᑎᑎᓐᓂᐊᕐᐸᕋ, ᐊᑕᐅᓯᐅᓕᕐᓗᓂ ᐊᔭᐅᑉᐱᐊᓐᖑᖁᓪᓗᒍ, ᐊᑕᐅᓯᐅᓕᖁᓗᒋᒃ ᐊᒡᒐᓐᓄᑦ ᑎᒍᒥᐊᕐᓗᒋᒃ. 20 “ᑎᒍᒥᐊᕐᑖᒃᑭᒃ ᕿᔫᒃ ᑎᑎᕋᕐᕕᒋᓯᒪᔫᒃ ᐃᓄᖕᓄᑦ ᑕᑯᔭᐅᑎᓐᓂᐊᕐᐹᒃᑭᒃ. 21 ᐅᖃᐅᑎᓗᒋᓪᓗ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᐃᓴᕆᐊᓕᐅᑉ ᐃᓄᖏᑦ ᐃᓅᖃᑎᒌᒡᔪᐊᓂᑦ ᐊᐅᓪᓚᕐᑎᑕᐅᕕᒋᓯᒪᔭᖏᓐᓂᑦ, ᑲᑎᕐᓱᕈᒫᕐᐸᒃᑲ ᓇᑭᑐᐃᓐᓇᓕᒫᖅ, ᓇᖕᒥᓂᕐᓗ ᓄᓇᖏᓐᓄᑦ ᐂᑎᓪᓗᒋᑦ. 22 ᐊᑕᐅᓯᓐᖑᑎᓪᓗᒋᑦ ᐃᓅᖃᑎᒌᒡᔪᐊᓐᖑᕐᑎᑦᓱᒫᕐᐸᒃᑲ ᓄᓇᒥ, ᐃᓴᕆᐊᓕᐅᑉ ᖃᖅᑲᖏᓐᓂ; ᐊᖓᔪᖅᑳᕐᔪᐊᒧᑦ ᐊᑕᐅᓯᕐᒧᑦ ᐊᐅᓚᑕᐅᔪᒫᕐᐳᑦ; ᐃᓅᖃᑎᒌᒡᔪᐊᖑᓂᖏᒡᓗ ᒪᕐᕈᐃᖑᔪᓐᓃᕈᒫᕐᐳᑦ, ᐊᖓᔪᖅᑳᕐᔪᐊᖃᕐᕕᖏᒡᓗ ᒪᕐᕉᓕᖅᑭᖓᔪᓐᓃᕐᓗᑎᒃ. 23 ᒎᑎᓐᖑᐊᖃᕐᓂᕐᒧᑦ ᓇᕐᕈᓇᕐᓯᑎᖃᑦᑕᕈᓐᓁᕈᒫᕐᐳᑦ ᐃᑦᔪᕐᓇᕐᑐᓕᓂᕐᓄᓪᓗ ᖃᓄᐃᑦᑐᑐᐃᓐᓇᕐᓄᑦ, ᐱᐅᖏᑦᑐᓕᓂᕐᓄᓪᓗ ᐊᓯᖏᓐᓄᑦ; ᐱᐅᓕᔪᒫᕐᐸᒃᑲᓕ ᐊᔪᕐᑐᓕᓂᕐᒧᑦ ᑲᑕᒍᑎᒋᖃᑦᑕᓚᐅᕐᑕᖏᓐᓂᑦ, ᓴᓗᒻᒪᕈᒫᕐᐸᒃᑲ; ᑖᒃᑯᐊᓗ ᐃᓄᖁᑎᒋᔪᒫᕐᐸᒃᑲ, ᒎᑎᒋᔪᒫᕐᐹᖓᓗ. 24 ᐱᔨᒐ ᑍᕕᑎ ᐊᖓᔪᖅᑳᕐᔪᐊᖑᔪᒫᕐᐳᖅ ᑖᒃᑯᓄᖓ; ᐊᑕᐅᓯᕐᒥᒡᓗ ᐰᕐᓯᔨᖃᕈᒫᕐᐳᑦ. ᐱᖁᔭᒃᑲᓗ ᒪᓕᒍᒫᕐᐰᑦ ᐊᑐᕐᑕᐅᖁᔭᒃᑲᓗ ᑲᒪᒋᑦᓯᐊᕐᓗᒋᑦ ᐊᑐᕈᒫᕐᐰᑦ. 25 ᓄᓇᖃᕈᒫᕐᐳᑦ ᐱᔨᓐᓄᑦ ᔧᑯᒧᑦ ᓄᓇᑖᕆᔭᐅᑎᓚᐅᕐᑕᓐᓂ ᓯᕗᓕᕕᓂᖏᑕ ᓄᓇᖃᕐᕕᒋᓚᐅᕐᑕᖓᓂ; ᑖᒃᑯᐊᓗ ᕿᑐᕐᖓᖏᑦ ᕿᑐᕐᖓᖏᑕᓗ ᕿᑐᕐᖓᖏᑦ ᑕᕝᕙᓂ ᓄᓇᖃᕈᒫᕐᐳᑦ ᐃᓱᖃᖏᑦᑐᒧᑦ; ᑍᕕᑎᓗ ᐱᔨᒐ ᐊᖓᔪᖅᑳᖑᔪᒫᕐᐳᖅ ᑕᕝᕙᓂ ᐃᓱᖃᖏᑦᑐᒧᑦ. 26 ᐊᖏᖃᑎᒌᒍᑎᓕᐅᕈᒫᕐᐳᖓᓗ ᑖᒃᑯᓄᖓ ᐃᓂᓪᓚᖓᑦᓯᐊᕐᓇᕐᑐᒥᒃ; ᑕᒪᓐᓇᓗ ᐊᖏᖃᑎᒌᒍᑎᓕᐅᕐᓂᕋ ᑖᒃᑯᓄᖓ ᐃᓱᖃᖏᑦᑐᒧᑦ ᐃᓕᖓᔪᒫᕐᐳᖅ; ᓮᒻᒪᕐᑎᑦᓱᒫᕐᐸᒃᑲ ᐅᓄᕐᓯᕙᓪᓕᐊᑎᓪᓗᒋᓪᓗ, ᐃᑦᔪᕐᓁᑦᑐᕕᖁᑎᖓᓗ ᐊᑯᕐᖓᓐᓂ ᐃᓂᖃᕐᑎᑦᓱᒫᕐᐸᕋ ᐃᓱᖃᖏᑦᑐᒧᑦ. 27 ᑖᒃᑯᓇᓂ ᐃᓂᖃᕈᒫᕐᐳᖓ; ᑖᒃᑯᓄᖓᓗ ᒎᑎᒋᔭᐅᓗᖓ, ᑖᒃᑯᐊᓗ ᐃᓄᖁᑎᒋᔪᒫᕐᐸᒃᑲ. 28 ᑕᕝᕙ ᐃᓅᖃᑎᒌᒡᔪᐊᑦ ᖃᐅᔨᓕᕈᒫᕐᐳᑦ ᐅᕙᖓ ᐊᑕᓂᖅ ᐃᓴᕆᐊᓕᒥᐅᓂᒃ ᐃᑦᔪᕐᓁᑎᑦᓯᒐᒪ, ᐃᑦᔪᕐᓁᑦᑐᕕᖁᑎᒪ ᑖᒃᑯᐊ ᐊᑯᕐᖓᓐᓃᓐᓂᖓᓄᑦ ᐃᓱᖃᖏᑦᑐᒧᑦ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society