ᐃᓯᑭᐊᓕᐅᑉ ᐊᒡᓚᖏᑦ 30 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᓱᒋᐊᕐᓯᔪᒫᕐᓂᖓ ᐄᑦᔨᑉᑎᒥᒃ

¹ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ, ᐱᔪᒫᕐᑐᒃᓴᓂᒃ ᐅᖃᓪᓚᓕᕆᑦ, ᐅᖃᕐᓗᑎᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐅᓪᓗᖅ ᐅᒡᒍᐊᕐᓇᕐᑐᖅ ᕾᓕᕐᐳᖅ!

³ ᐅᓪᓗᖅ ᖃᒡᓕᓕᕐᐳᖅ, ᐊᑕᓂᐅᑉ ᐅᓪᓗᖓ ᖃᒡᓕᓕᕐᐳᖅ; ᐅᓪᓗᖅ ᓄᕗᔭᔪᑎᑐᑦ ᑍᒤᑉᐳᖅ, ᐃᓅᖃᑎᒌᒡᔪᐊᑦ ᓱᒋᐊᕐᑕᐅᕕᒃᓴᖓᑦ.

⁴ ᐄᑦᔨᑉᑎᒧᑦ ᐅᓇᑕᕐᓂᖅ ᑎᑭᑦᓱᒫᕐᐳᖅ, ᑲᑉᐱᐊᓱᕕᒡᔪᐊᕐᓂᕐᑕᖃᕈᒫᕐᐳᖅ ᐃᑎᐅᐱᐊᒥ, ᐄᑦᔨᑉᑎᒥᐅᑦ ᐅᓄᕐᑐᑦ ᑐᖁᕋᕐᑕᐅᒃᐸᑕ; ᓄᓇᖓᑕ ᐊᔪᕐᓴᖏᑦᔪᑎᖏᑦ ᐊᐅᓪᓚᕈᑦᔭᐅᔪᒫᕐᐳᑦ, ᑐᓐᖓᕕᖏᓪᓗ ᓯᖅᑯᑦᑎᕐᑕᐅᓗᑎᒃ.

⁵ “ᑕᕝᕙᓂ ᐅᓇᑕᕐᓂᕐᒥ ᐅᓇᑕᕆᐊᕐᓯᒪᔪᑦ ᐃᑎᐅᐱᐊᒥᑦ, ᐳᑎᒥᓪᓗ, ᓗᑦᒥᑦ, ᐊᕅᐱᐊᓕᒫᒥᓪᓗ, ᑰᑉᒥᓪᓗ, ᐃᓄᖁᑎᓐᓂᓪᓗ ᐱᓯᒪᔪᑦ ᐊᖏᖃᑎᒌᒃᓯᒪᔪᓕᒫᑦ ᑐᖁᕋᕐᑕᐅᔪᒫᕐᐳᑦ.

⁶ “ᐊᑕᓂᖅ ᐃᒫᒃ ᐅᖃᕐᐳᖅ: ᐄᑦᔨᑉᑎᒥᐅᑦ ᐃᑲᔪᕐᑎᒋᔭᓕᒫᖏᑦ ᑐᖁᕋᕐᑕᐅᔪᒫᕐᐳᑦ, ᐅᓇᑕᕐᑎᖁᑎᖏᑕᓗ ᐱᔪᓐᓇᕐᑐᕐᔪᐊᖁᑎᖏᑦ ᓄᖑᑕᐅᔪᒫᕐᐳᑦ; ᒥᒡᑐᓕᒥᑦ ᓮᓂᒧᑦ ᑎᑭᓪᓗᒍ ᐃᓄᖏᑦ ᑐᖁᕋᕐᑕᐅᔪᒫᕐᐳᑦ, ᐊᑕᓂᖅ ᒎᑎ ᐅᖃᕐᐳᖅ.

⁷ ᓄᓇᓕᖕᓄᑦ ᓱᓇᖃᖏᑦᑐᓄᑦ ᓱᓇᖃᖏᑦᑑᖃᑕᐅᓕᕈᒫᕐᐳᖅ, ᐃᒡᓗᒐᓴᒡᔪᐊᓄᓪᓗ ᓯᖁᑦᑎᕐᓯᒪᔪᓄᑦ ᓯᖁᑦᑎᕐᓯᒪᖃᑕᐅᓕᕐᓗᓂ.

⁸ ᐄᑦᔨᑉᑎᒥᐅᑦ ᐃᑯᐊᓪᓚᒃᑎᒃᑯᒃᑭᑦ, ᓄᓇᓖᓪᓗ ᑕᐱᕆᔭᖏᑦ ᑐᖁᑕᐅᒃᐸᑕ. ᑕᕝᕙ ᑐᑭᓯᔪᒫᕐᐳᑦ ᐅᕙᖓᐅᒐᒪ ᐊᑕᓂᖅ.

⁹ “ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐃᑎᐅᐱᐊᒥᐅᑦ ᓂᕆᐅᖏᑦᑐᑦ ᓱᒃᑲᓂᕐᐹᒃᑯᑦ ᑐᓴᕐᑎᑕᐅᑎᑦᓱᒫᕐᐸᒃᑲ ᑲᑉᐱᐊᓱᓕᖁᓪᓗᒋᑦ; ᑐᓴᕈᑎᒃ ᐄᑦᔨᑉᑎᒥᐅᑦ ᐊᓯᕈᕐᑕᐅᕕᖓᓂ ᑲᑉᐱᐊᓱᕕᒡᔪᐊᓕᕈᒫᕐᐳᑦ, ᐅᓪᓗᖅ ᑕᒪᓐᓇ ᑎᑭᒻᒪᑦ!

¹⁰ “ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐄᑦᔨᑉᑎᒥᐅᑦ ᐃᓄᒐᓴᒡᔪᐊᖏᑦ ᓄᖑᑎᑦᓱᒫᕐᐸᒃᑲ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᒍᑦ ᓂᐱᑯᓁᓴᒃᑯᑦ.

¹¹ ᐅᓇᑕᕐᑎᖁᑎᖏᑦ ᐃᓅᖃᑎᒌᒡᔪᐊᓂᑦ ᓂᑲᒍᓱᖏᓐᓂᕐᐹᑦ, ᑎᑭᑦᓱᒫᕐᒪᑕ ᓱᕅᓗᑎᒃ ᓄᓇᒥᒃ; ᐄᑦᔨᑉᑎᒥᐅᑦ ᐅᓇᑕᕈᒫᕐᐰᑦ ᓴᕕᒡᔪᐊᕐᒧᑦ, ᓄᓇᖓᓪᓗ ᓇᓂᓕᒫᖅ ᑐᖁᖓᔪᖃᐅᓕᕈᒫᕐᐳᖅ.

¹² ᓁᓕᓗ ᐃᒤᕈᑎᑎᑦᓱᒫᕐᐸᕋ, ᓄᓇᖓᓪᓗ ᓂᐅᕐᕈᑎᒋᓗᒍ ᐃᓄᖕᓄᑦ ᐱᐅᖏᑦᑐᓕᔪᓄᑦ; ᓄᓇᖓ ᐊᓯᕈᕐᑕᐅᔪᒫᕐᐳᖅ ᓱᓇᓕᒫᖏᓪᓗ ᑕᕝᕙᓃᑦᑐᑦ, ᓄᓇᓕᑐᖃᐅᖏᑦᑐᓄᑦ; ᐅᕙᖓ ᐊᑕᓂᖅ ᐅᖃᕐᐳᖓ.

¹³ “ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᒎᑎᓐᖑᐊᖏᑦ ᐊᓯᕈᕈᒫᕐᐸᒃᑲ, ᒥᒻᐱᓯᒥᐅᓪᓗ ᐃᓄᓐᖑᐊᖁᑎᖏᑦ ᓯᖁᑦᑎᕈᒫᕐᐸᒃᑲ; ᐄᑦᔨᑉᑎᒥᐅᑦ ᐊᖓᔪᖅᑳᖃᕈᓐᓃᕈᒫᕐᐳᑦ; ᑕᕝᕙᓃᑦᑐᓪᓗ ᓯᕘᕋᓕᕐᑎᑦᓱᒫᕐᐸᒃᑲ.

¹⁴ ᐹᑐᕉᓯᒥᐅᑦ ᓄᖑᑕᐅᑎᑦᓱᒫᕐᐸᒃᑲ, ᔪᐊᓐᒥᐅᓪᓗ ᐃᑯᐊᓪᓚᒃᑎᓪᓗᒋᑦ, ᑎᐱᓯᒥᐅᓪᓗ ᓱᒋᐊᕈᒫᕐᐸᒃᑲ.

¹⁵ ᐱᓗᓯᓐᒥᐅᑦ ᓂᓐᖓᐅᓯᓐᓄᑦ ᐱᓂᐊᕐᕕᒋᔪᒫᕐᐸᒃᑲ, ᑖᓐᓇ ᐄᑦᔨᑉᑎᒥᐅᑦ ᓴᐴᓗᑕᖓ, ᑎᐱᓯᒥᐅᓪᓗ ᐃᓄᒐᓴᒡᔪᐊᑦ ᓄᖑᑎᑦᓱᒫᕐᐸᒃᑲ.

¹⁶ ᐄᑦᔨᑉᑎᒥᐅᑦ ᐃᑯᐊᓪᓚᒃᑎᑦᓱᒫᕐᐸᒃᑲ; ᐱᓗᓯᓐᒥᐅᓪᓗ ᐋᓐᓂᐊᓂᕐᒧᑦ ᓂᐹᔪᒫᕐᐳᑦ; ᑎᐱᓯᒥᐅᓪᓗ ᐃᒡᓗᒐᓴᒡᔪᐊᖏᑦ ᐊᕙᓗᕐᔪᐊᖓᓗ ᐅᕐᕉᕋᕐᓗᓂ ᓯᖁᑦᑎᕈᒫᕐᐳᖅ.

¹⁷ ᐆᓂᒥᐅᑦ ᐰᐱᓯᑎᒥᐅᓪᓗ ᐃᓅᓱᒃᑐᖁᑎᖏᑦ ᐅᓇᑕᕐᑐᓂ ᑐᖁᕋᕐᑕᐅᔪᒫᕐᐳᑦ; ᐊᓯᖏᓪᓗ ᑎᒍᔭᐅᓗᑎᒃ ᐊᐅᓪᓚᕈᑦᔭᐅᔪᒫᕐᐳᑦ.

¹⁸ ᑎᕼᐊᐸᓂᕼᐃᒥᐅᑦ ᑖᕐᓯᐅᓕᕈᒫᕐᐳᑦ, ᐄᑦᔨᑉᑎᒥᐅᑦ ᐱᔪᓐᓇᕐᓂᖏᑦ ᓵᓚᒋᒍᒃᑭᑦ, ᐱᐅᔪᕆᓂᖏᑦ ᐃᓱᓕᑦᓱᒫᕐᐳᑦ; ᓄᕗᔭᒧᑦ ᐅᓕᒃᑕᐅᔪᒫᕐᐳᑦ, ᐃᓄᖏᑦ ᑎᒍᔭᐅᓗᑎᒃ ᐊᐅᓪᓚᕈᑦᔭᐅᔪᒫᕐᒪᑕ.

¹⁹ ᑍᒤᓕᐅᕐᓗᖓ ᐄᑦᔨᑉᑎᒥᐅᑦ ᓱᒋᐊᕈᒫᕐᐸᒃᑲ. ᑕᕝᕙ ᖃᐅᔨᔪᒫᕐᐳᑦ ᐅᕙᖓᐅᒐᒪ ᐊᑕᓂᖅ.”

ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦᑕ ᐰᕉᑉ ᐱᔪᓐᓇᕐᓂᖃᕈᓐᓁᕐᓂᖓ

²⁰ ᐊᐅᓪᓚᕈᑦᔭᐅᓯᒪᓂᑦᑕ ᐊᕐᕌᒍᐃᑦ 11ᒋᓕᕐᑕᖓᓐᓂ, ᑕᖅᑮᑦ ᓯᕗᓪᓕᕐᐹᖓᓐᓂ, ᐅᓪᓗᖏᑕ 7ᖓᓐᓂ, ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ, ᐅᖃᕐᓗᓂ:

²¹ “ᐃᓅᑉ ᐃᕐᓂᖓ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑕ ᐰᕉᑉ ᑕᓕᖓ ᓇᐱᕙᕋ; ᑕᑯᒋᓪᓗ, ᒪᑦᑐᓯᕐᓯᒪᓐᖏᓚᖅ, ᒪᒥᑦᔪᑎᒃᓴᖓᓂᒡᓗ ᐃᑯᓯᔭᕐᑎᑕᐅᓇᓂ, ᒪᒥᑐᐊᕈᓂ ᓴᕕᒡᔪᐊᓕᔭᓕᕋᔭᕐᒥᖕᒪᑦ.

²² ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓ ᐰᕉ ᓵᓐᖓᓕᕐᐸᕋ, ᑕᓕᖏᒃ ᓇᐱᓂᐊᕐᐹᒃᑲᒃ, ᓇᑲᓯᒪᖏᑦᑐᖅ ᓇᐱᓯᒪᔪᕐᓗ; ᑎᒍᒥᐊᕐᑕᖓᓂᒡᓗ ᓴᕕᒡᔪᐊᒥᒃ ᑲᑍᑎᓐᓂᐊᕐᐸᕋ.

²³ ᐄᑦᔨᑉᑎᒥᐅᑦ ᐃᓅᖃᑎᒌᒡᔪᐊᓄᑦ ᓯᐊᒻᒪᕐᑎᑦᓱᒫᐸᒃᑲ, ᓄᓇᓕᒡᔪᐊᓄᓪᓗ ᐂᑎᓪᓗᒋᑦ.

²⁴ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᑕᓕᖏᑦ ᓴᓐᖏᒃᑎᑎᓐᓂᐊᕐᐹᒃᑲᒃ, ᓴᕕᒡᔪᐊᖁᑎᓐᓂᒡᓗ ᑎᒍᓯᑎᓐᓂᐊᕐᐸᕋ; ᐰᕉᓪᓕ ᑕᓕᖏᑦ ᓇᐱᔪᒫᕐᐹᒃᑲᒃ, ᐋᓐᓂᐊᓂᕐᒧᑦ ᓂᐹᔪᒫᕐᐳᖅ ᐃᑭᓕᕐᑕᐅᓯᒪᔪᑎᑐᑦ ᑖᑦᓱᒪ ᓵᖓᓂ.

²⁵ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓ ᐱᔪᓐᓇᕐᓂᕐᑖᕐᑎᑦᓱᒫᕐᐸᕋ, ᐰᕉᓪᓕ ᑕᓕᖏᒃ ᑲᑕᒃᑎᓪᓗᒋᒃ; ᖃᐅᔨᓕᖁᓪᓗᒋᑦ ᐅᕙᖓᐅᒐᒪ ᐊᑕᓂᖅ. ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓ ᓴᕕᒡᔪᐊᓐᓂᒃ ᑎᒍᓯᑎᒃᑯᒃᑯ, ᑎᒃᑯᐊᕐᑎᑦᓱᒫᕐᐹ ᐄᑦᔨᑉᑎᒥᐅᑦ ᓄᓇᖓᓄᑦ.

²⁶ ᐄᑦᔨᑉᑎᒥᐅᓪᓗ ᐃᓅᖃᑎᒌᒡᔪᐊᓄᑦ ᓯᐊᒻᒪᕐᑎᑦᓱᒫᕐᐸᒃᑲ ᓄᓇᓕᒡᔪᐊᓄᓪᓗ ᓇᒧᑐᐃᓐᓇᖅ ᐂᑎᓪᓗᒋᑦ. ᑕᕝᕙ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ.”