ᒨᓯᓯ ᐂᑉᐸᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᒨᓯᓯᐅᑉ ᐂᕉᓂᐅᓪᓗ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦᑕ ᓵᖓᓃᓐᓂᖏᒃ

¹ ᑕᒪᑐᒪᓕ ᑭᖑᓂᖓᒍᑦ ᒨᓯᓯᒃᑯᒃ ᐂᕉᓂᒃᑯᒃ ᐰᕉᒧᐊᕐᐴᒃ ᐅᖃᕐᓗᑎᒡᓗ, “ᐊᑕᓂᖅ ᐃᓴᕆᐊᓕᐅᑉ ᒎᑎᖓ ᐃᒫᒃ ᐅᖃᕐᐳᖅ, ‘ᐃᓄᖁᑎᒃᑲ ᐊᐅᓪᓚᕈᓐᓇᕐᑎᓚᐅᒃᑭᑦ, ᖁᕕᐊᓱᖃᑎᒌᒡᓗᑎᒃ ᐃᓄᖃᖏᑦᑐᒥ ᓂᕆᖃᑎᒌᒍᓐᓇᖁᓪᓗᒋᑦ ᐱᑦᔪᑎᒋᓗᖓ.’”

² ᐰᕉᓕ ᐅᖃᕐᐳᖅ, “ᐊᑕᓂᖅ ᖃᓄᐃᑦᑑᖕᒪᑦ, ᑖᑦᓱᒪ ᐱᖁᔨᓂᖓ ᓈᓚᒋᐊᖃᕋᔭᕈᒃᑯ ᐃᓴᕆᐊᓕᒥᐅᓂᒃ ᐊᐅᓪᓚᕐᑎᑦᓯᔪᓐᓇᖁᓪᓗᖔ? ᑖᓐᓇ ᐊᑕᓂᐅᓂᕋᕐᑕᓯ ᖃᐅᔨᒪᓐᖏᓚᕋ, ᑍᒤᒻᒪᑦ ᐃᓴᕆᐊᓕᒥᐅᑦ ᐊᐅᓪᓚᖁᓂᐊᓐᖏᓚᒃᑲ.”

³ ᑖᒃᑯᐊᒡᓕ ᑭᐅᕘᒃ, “ᐄᑉᕈᐃᑦ ᒎᑎᖓᑦ ᐅᕙᑦᑎᓐᓄᑦ ᓇᓗᓁᕐᓯᓚᐅᕐᐳᖅ; ᑍᒤᒻᒪᑦ ᐊᐅᓪᓚᕈᓐᓇᕐᑎᓚᐅᕐᑎᒍᑦ ᐅᓪᓗᓂᒃ ᐱᖓᓱᓂᒃ ᐃᖏᕐᕋᖁᓪᓗᑕ ᐃᓄᖃᖏᑦᑐᒧᑦ, ᑕᕝᕙᓂᓗ ᐊᑕᓂᕐᒧᑦ ᒎᑎᑦᑎᓐᓄᑦ ᑐᖁᑕᒃᓴᒥᒃ ᑐᓂᕐᕈᓯᕈᓐᓇᖁᓪᓗᑕ, ᑍᒤᓕᐅᕐᓂᐊᖏᒃᑯᑦᑕ ᖃᓂᒪᓇᕐᑐᒧᑦ ᑎᑭᑕᐅᑎᑐᐃᓐᓇᕆᐊᖃᕐᒪᑎᒍᑦ ᐅᕝᕙᓗ ᑐᖁᑕᐅᑎᓪᓗᑕ ᐅᓇᑕᕐᓂᒃᑯᑦ.”

⁴ ᐄᑦᔨᑉᑎᒥᐅᓪᓕ ᐊᖓᔪᖅᑳᕐᔪᐊᖓᑦᑕ ᐅᖃᐅᑎᕚᒃ, “ᒨᓯᓰ ᐂᕉᓂᓗ, ᓱᖕᒪᑦ ᐃᓄᖕᓂᒃ ᓴᓇᔪᓂᒃ ᓄᖅᑲᕐᑎᑦᓯᓇᓱᒃᐱᓰᒃ? ᐱᓇᓱᐊᒃᓴᑦᓯᓐᓂᒃ ᐱᓇᓱᐊᕆᐊᕐᑐᖔᓕᕆᑦᑎᒃ.”

⁵ ᐰᕉᓗ ᐅᖃᒃᑲᓐᓂᕐᐳᖅ, “ᐃᓕᑦᓯ ᐃᓅᖃᑎᒌᖑᔪᓯ ᐄᑦᔨᑉᑎᒥᐅᓂᑦ ᐅᓄᕐᓂᕐᓴᐅᓕᕐᐳᓯ. ᒫᓐᓇᓕ ᐊᒡᓛᑦ ᓴᓇᓂᖏᓐᓂᑦ ᓄᖅᑲᖁᓕᕐᐸᓯ!”

⁶ ᐅᓪᓗᒥᓗ ᑖᑦᓱᒪᓂᑦᓮᓐᓇᖅ ᐰᕉ ᐱᖁᔨᓕᕐᐳᖅ ᓴᓇᑎᑦᓯᔨᐅᔪᓂᒃ ᐊᖓᔪᖅᑳᕆᔭᐅᔪᓂᒡᓗ ᐅᖃᐅᑎᓪᓗᒋᑦ,

⁷ “ᐃᓄᐃᑦ ᓴᓇᑎᑕᓯ ᐃᕕᖕᓂᒃ ᐅᔭᕋᓕᐊᕆᔭᒃᓴᓂᒃ ᑐᓂᓯᕕᒋᖃᑦᑕᕈᓐᓃᕐᓯᒋᒃ, ᓇᖕᒥᓂᕐᓕ ᐃᕕᖕᓂᒃ ᐅᔭᕋᓕᐊᕆᔭᒃᓴᓂᒃ ᕿᓂᕐᓗᑎᒃ ᑲᑎᑦᓯᖃᑦᑕᓕᕐᓕᑦ.

⁸ ᐅᔭᕋᓕᐊᕆᕙᒃᑕᖏᑕᓕ ᐅᓄᕐᓂᖏᑦ ᑍᒫᑦᓮᓐᓇᖅ ᐅᓄᕐᓂᖃᕐᑎᓯᐅᒃ, ᖃᑦᓰᓐᓇᕈᕆᐊᕐᓂᐊᕐᓇᒋᑦ; ᓄᖅᑲᖓᕕᒃᓴᖃᖃᑦᑕᓗᐊᒧᑦ ᐊᒡᓛᑦ ᐅᖃᖃᑦᑕᓕᕐᒪᑕ, ‘ᑐᖁᑕᒃᓴᒥᒃ ᑐᓂᕐᕈᓯᕆᐊᕐᑐᕐᓗᑕ ᒎᑎᑦᑎᓐᓄᑦ ᐊᐅᓪᓚᕐᑎᑕᐅᓚᐅᕐᑕ.’

⁹ ᓴᓇᔭᒃᓴᖏᓪᓕ ᐊᒃᓱᕈᕐᓇᕐᓯᑎᒃᑲᓐᓂᕐᑎᓚᐅᕐᓯᐅᒃ ᐊᒃᓱᕈᕐᓗᑎᒃ ᐱᓇᓱᐊᖁᓪᓗᒋᑦ, ᐅᖃᐅᓯᕐᓂᒃ ᓱᓕᖏᑦᑐᓂᒃ ᓈᓚᖃᑦᑕᕈᓐᓃᖁᓪᓗᒋᑦ.”

¹⁰ ᑕᕝᕙ ᓴᓇᑎᑦᓯᔨᐅᔪᑦ ᓴᓇᔪᓄᓪᓗ ᐊᖓᔪᖅᑳᕆᔭᐅᔪᑦ ᐃᓄᖕᓄᐊᕐᐳᑦ ᐅᖃᕐᓗᑎᒡᓗ, “ᐰᕉ ᐃᒫᒃ ᐅᖃᕐᐳᖅ, ‘ᐃᕕᖕᓂᒃ ᐅᔭᕋᓕᐊᕆᔭᒃᓴᓂᒃ ᑐᓂᓯᕕᐅᖁᔪᓐᓃᕐᐸᑦᓯ.

¹¹ ᐃᓕᑦᓯᓐᓂᒡᓕ ᓇᖕᒥᓂᖅ, ᕿᓂᕐᓗᓯ ᑲᑎᑦᓯᓗᓯᓗ ᐂᒃᓯᖃᑦᑕᕐᓂᐊᓕᕐᐳᓯ; ᓴᓇᔭᒃᓴᓯᓕ ᒥᑭᒡᓕᒋᐊᕐᑕᐅᓂᐊᓐᖏᓚᑦ ᑍᒫᒃ ᐱᓇᓱᐊᒐᒃᓴᓂᒃ ᐱᑎᑕᐅᒐᓗᐊᕈᑦᓯ.’”

¹² ᑍᒤᒻᒪᑦ ᐃᓄᐃᑦ ᐄᑦᔨᑉᑎᐅᑉ ᓄᓇᖓᓂ ᓇᒧᑐᐃᓐᓇᖅ ᓯᐊᒻᒪᕐᓯᒪᖃᑦᑕᓕᓚᐅᕐᐳᑦ, ᐃᕕᖕᓂᒃ ᐅᔭᕋᓕᐊᕆᔭᒃᓴᓂᒃ ᑲᑎᑦᓯᓇᓱᐊᕐᓗᑎᒃ.

¹³ ᓴᓇᑎᑦᓯᔨᐅᔪᓪᓕ ᑐᐊᕕᖁᔨᕗᑦ ᐅᖃᕐᓗᑎᒃ, “ᓴᓇᔭᒃᓴᓯ ᐅᓪᓗᒥ ᐱᔭᕇᕐᓯᐅᒃ, ᐃᕕᖕᓂᒃ ᐊᑐᐃᓐᓇᖃᕐᑎᑕᐅᓪᓗᓯ ᐱᓇᓱᐊᕐᓂᕆᕙᓚᐅᕐᑕᑦᓯᑐᑦ.”

¹⁴ ᐃᓴᕆᐊᓕᒥᐅᓪᓗ ᐊᖓᔪᖅᑳᖏᑦ, ᐰᕉᑉ ᓴᓇᑎᑦᓯᔨᖁᑎᖏᑕ ᐱᓇᓱᐊᕐᑕᐅᖁᔭᖏᓐᓂᒃ ᐱᔭᕇᖁᔭᖏᓐᓂᒡᓗ ᑎᓕᔭᐅᓯᒪᔪᑦ, ᐋᓐᓂᕐᓯᕐᑕᐅᕗᑦ, ᐅᖃᐅᑦᔭᐅᓪᓗᑎᒡᓗ, “ᓱᖕᒪᑦ ᐅᓪᓗᒥ ᓯᕗᓂᖓᓂᑐᑦ ᐱᓇᓱᐊᕐᓂᕆᕙᓚᐅᕐᑕᑦᓯᑐᑦ ᐅᔭᕋᓕᐊᕆᔭᕆᐊᖃᕐᑕᑦᓯᓐᓂᒃ ᐱᔭᕇᕐᓯᓯᒪᓐᖏᓚᓰ?”

¹⁵ ᑕᕝᕙ ᓴᓇᔪᓄᑦ ᐃᓴᕆᐊᓕᒥᐅᓄᑦ ᐊᖓᔪᖅᑳᕆᔭᐅᔪᑦ ᐰᕉᒧᐊᕐᐳᑦ ᐊᒃᓱᕈᕐᓗᑎᒡᓗ ᓂᓪᓕᐊᓕᕐᐳᑦ, “ᓱᖕᒪᑦ ᐱᔨᒋᔭᕐᓄᑦ ᑍᒤᓕᐅᕐᐲᑦ?

¹⁶ ᐃᕕᖕᓂᒃ ᐅᔭᕋᓕᐊᕆᔭᒃᓴᓂᒃ ᐱᔨᒋᔭᑎᑦ ᐊᑐᐃᓐᓇᖃᕐᑎᑕᐅᓐᖏᓚᑦ, ᓱᓕᓕ ᐅᔭᕋᓕᐅᖁᔭᐅᕗᒍᑦ, ᐊᒡᓛᓪᓗ ᐱᔨᑎᑦ ᐋᓐᓂᕐᓯᕐᑕᐅᖃᑦᑕᕐᐳᑦ; ᐃᕝᕕᓪᓕ ᐃᓄᖁᑎᑎᓪᓗ ᑕᒪᑐᒧᖓ ᓵᑕᒃᓴᑑᕗᓯ.”

¹⁷ ᐰᕉᓕ ᐅᖃᕐᐳᖅ, “ᐃᕿᐊᓱᒃᑐᐊᓘᕗᓯ, ᓴᓇᔪᒪᖏᓐᓂᐊᓗᖕᒧᑦ ᐅᖃᕐᐳᓯ, ‘ᐊᐅᓪᓚᕈᓐᓇᕐᑎᓚᐅᕐᑎᒍᑦ ᐊᑕᓂᕐᒧᑦ ᑐᓂᕐᕈᓯᕆᐊᕐᑐᕐᓂᐊᕋᑦᑕ.’

¹⁸ ᐅᑎᕐᓗᓯ ᓴᓇᔭᕐᑐᓕᕆᑦᓯ; ᐃᕕᖕᓂᒡᓕ ᐅᔭᕋᓕᐊᕆᔭᒃᓴᓂᒃ ᑐᓂᓯᕕᐅᓂᐊᓐᖏᓚᓯ, ᑭᓯᐊᓂᓕ ᓱᓕ ᑍᒫᓪᓗᐊᖅ ᐃᕕᖕᓂᒃ ᐊᑐᐃᓐᓇᖃᕐᑎᑕᐅᑎᓪᓗᓯ ᐅᔭᕋᓕᐅᕐᓂᕆᕙᓚᐅᕐᑕᑦᓯᑐᑦ ᐱᓇᓱᐊᕆᐊᖃᕐᓂᐊᕐᐳᓯ.”

¹⁹ ᐃᓴᕆᐊᓕᒥᐅᓪᓕ ᓴᓇᔨᖏᓐᓄᑦ ᐊᖓᔪᖅᑳᖑᑎᑕᐅᔪᑦ ᖃᐅᔨᕗᑦ ᓯᕗᓂᖓᓂᑦ ᐅᖁᒤᓐᓂᕐᓴᒥᒃ ᐱᑎᑕᐅᓕᕐᓂᕐᒥᖕᓂᒃ, ᐅᖃᐅᑦᔭᐅᓚᐅᕋᒥᒃ ᓯᕗᓂᖓᓂᑐᑦ ᐃᕕᖕᓂᒃ ᐊᑐᐃᓐᓇᖃᖃᑦᑕᕐᓗᑎᒃ ᐅᔭᕋᓕᐅᕐᓂᕆᕙᓚᐅᕐᑕᒥᒃᑎᑐᑦ ᑍᒫᓪᓗᐊᖅ ᖃᐅᑕᒫᑦ ᐱᖁᔭᐅᓚᐅᕋᒥᒃ.

²⁰ ᑖᒃᑯᐊᓗ ᐰᕉᒥᓐᖔᕐᓗᑎᒃ ᒨᓯᓯᒥᒃ ᐂᕉᓂᒥᒡᓗ ᑲᑎᓯᕗᑦ, ᑖᒃᑯᓇᓐᖓᑦ ᐅᑕᖅᑭᔭᐅᓚᐅᕋᒥᒃ;

²¹ ᐅᖃᕐᐳᓪᓗ, “ᐊᑕᓂᐅᑉ ᑕᑯᓐᓇᕐᐹᓯᒃ ᐊᑭᓂᐊᕐᓕᓯᒡᓗ ᖃᓄᐃᓕᐅᕐᑕᐅᑎᑦᓯᓂᑦᓯᖕᓂᒃ, ᐰᕉᒧᑦ ᐱᔨᒋᔭᖏᓐᓄᓪᓗ ᐊᑭᕋᕐᑐᕐᑕᐅᓕᕐᑎᑦᓯᒐᑦᓯᒃ ᐅᕙᑦᑎᓐᓂᒃ, ᑖᒃᑯᓄᖓᓗ ᑐᖁᑕᐅᑦᔪᑎᒃᓴᑦᑎᓐᓂᒃ ᐋᖅᑭᒃᓯᓯᒪᕗᓯ.”

ᒨᓯᓯᐅᑉ ᓈᒻᒪᒃᓴᖏᓐᓂᖓ ᐊᑕᓂᕐᒥᒃ

²² ᑕᕝᕙ ᒨᓯᓯ ᐊᑕᓂᕐᒧᑦ ᓵᓕᕐᐳᖅ ᐅᖃᕐᓗᓂᓗ, “ᐊᑕᓃᖅ, ᓱᖕᒪᑦ ᐱᐅᖏᑦᑐᒥᒃ ᐱᓇᓱᐊᕐᑕᐅᑎᑦᓯᕖᑦ ᐅᑯᓄᖓ ᐃᓄᖕᓄᑦ? ᓱᖕᒪᓪᓗ ᑕᒪᐅᖓ ᑎᓕᓚᐅᕐᐱᖔ?

²³ ᑍᒪᓐᖓᑦ ᐰᕉᒧᑦ ᐅᖃᕆᐊᕐᑐᓚᐅᕐᓂᓐᓂᑦ ᐱᑦᔪᑎᒋᓪᓗᑎᑦ, ᐃᓄᖕᓄᑦ ᐅᑯᓄᖓ ᐱᑦᓯᐊᕈᓐᓃᒃᑲᓐᓂᑐᐃᓐᓇᕐᐳᖅ, ᐃᓄᖁᑎᑎᓪᓗ ᐊᐅᓪᓚᕐᑎᓚᐅᓐᖏᓚᑎᑦ ᐃᑲᔪᓚᐅᕐᓇᒋᓪᓘᓐᓃᑦ.”