ᑯᓘᓯᐊᒥᐅᓄᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᖃᐅᓰᑦ ᐱᒋᐊᕈᑎᖏᑦ

¹ ᐸᐅᓗᓯᒥᑦ, ᒎᑎᐅᑉ ᐱᔪᒪᔭᖓᒍᑦ ᔩᓱᓯ ᙭ᔅᑑᓯᐅᑉ ᐋᐴᓯᑕᓕᖁᑎᖓᓂᑦ, ᑎᒧᑎᒥᓪᓗ ᐅᒃᐱᕐᑑᖃᑎᑎᓐᓂᑦ.

² ᐃᑦᔪᕐᓁᑎᑕᐅᓯᒪᔪᓄᑦ ᑯᓘᓯᐊᒦᑦᑐᓄᑦ, ᐅᒃᐱᕐᑑᖃᑎᑦᑎᓐᓄᑦ ᐅᒃᐱᕐᓂᕐᒥᑦᓯᐊᕐᑐᓄᑦ: ᒎᑎᐅᑉ ᐊᑖᑕᑦᑕ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᐃᓚᒋᓕᓯ ᖃᓄᐃᖏᑦᓯᐊᕐᑎᓪᓕᓯᓗ.

ᑐᒃᓯᐊᕐᓂᖅ ᖁᔭᓕᓂᕐᒧᑦ

³ ᑍᒪᓐᖓᑦ ᒎᑎᒧᑦ ᖁᔭᓕᖃᑦᑕᕐᐳᒍᑦ, ᔩᓱᓯ ᙭ᔅᑑᓯᐅᑉ ᐊᑖᑕᖓᓄᑦ, ᐃᓕᑦᓯᓐᓂᒃ ᑐᒃᓯᐅᑦᔨᓕᕌᖓᑦᑕ.

⁴ ᑐᓴᕐᑎᑕᐅᓯᒪᓕᕋᑦᑕ ᐅᒃᐱᕐᓂᑦᓯᓐᓂᒃ ᙭ᔅᑑᓯ ᔩᓱᓯᒥ, ᓇᒡᓕᒍᓱᖕᓂᑦᓯᓐᓂᒡᓗ ᐃᑦᔪᕐᓁᑎᑕᐅᓯᒪᔪᓕᒫᓂᒃ.

⁵ ᓂᕆᐅᒋᔭᒃᓴᖅ ᐱᑦᔪᑎᒋᓪᓗᒍ ᐃᓕᑦᓯᓐᓄᑦ ᖁᒥᐅᑕᐅᓯᒪᔪᒧᑦ ᕿᓚᖕᒥ. ᑕᒪᓐᓇ ᓯᕗᓂᖓᒍᑦ ᑐᓴᓚᐅᕐᑕᓯ ᐅᖃᐅᓯᒃᑯᑦ ᓱᓕᔪᒃᑯᑦ, ᐅᖃᐅᓯᕐᑎᒍᑦ ᑐᓴᕈᒥᓇᕐᑐᑎᒍᑦ.

⁶ ᐅᖃᐅᓰᑦ ᑐᓴᕈᒥᓇᕐᑐᑦ ᑎᑭᐅᑎᓯᒪᖕᒪᑕ ᐃᓕᑦᓯᓐᓄᑦ, ᓯᓚᕐᔪᐊᕐᒥᐅᓕᒫᓄᓪᓗ ᓯᐊᒻᒪᓕᕐᒪᑕ ᐱᕈᕐᑎᑦᓯᓪᓗᑎᒃ ᐊᖏᓕᕙᓪᓕᐊᑎᑦᓯᓪᓗᑎᒡᓗ, ᑍᒫᒃᑕᐅᖅ ᐃᓕᑦᓯᓐᓂ ᐱᒋᐊᕐᓯᒪᒋᕗᑦ, ᑍᒪᓐᖓᓂᑦ ᑐᓴᕋᑦᓯᐅᒃ ᒎᑎᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓ ᓱᓕᓂᖓᓗ ᑐᑭᓯᓪᓗᒍ.

⁷ ᒎᑎᐅᑉ ᐱᑦᓯᐊᕐᓂᖓᑕ ᐱᔪᒡᓇᕐᑎᑦᑎᓂᖓᓂᒃ ᐃᓕᑦᓯᑎᑕᐅᓚᐅᕋᑦᓯ ᐃᐸᐳᕌᓯᒧᑦ, ᑖᓐᓇ ᓇᒡᓕᖕᓇᕐᓗᓂ ᐱᔨᑦᓯᖃᑎᒋᔭᕗᑦ, ᐅᒃᐱᕐᓂᕆᔭᒥᓂᒃ ᓱᕐᕋᔪᐃᑦᑑᓪᓗᓂ ᙭ᔅᑑᓯᒧᑦ ᐱᓇᓱᐊᕐᑎᒋᔭᐅᒋᔪᖅ ᐱᑦᔪᔨᓪᓗᓂ ᐅᕙᑦᑎᓐᓂᒃ.

⁸ ᐅᕙᑦᑎᓐᓄᑦ ᐅᓂᒃᑳᓚᐅᕐᒪᑦ ᓇᒡᓕᖕᓂᖃᕐᓂᕋᕐᓗᓯ ᐊᓂᕐᓂᒃᑯᑦ ᑐᓂᔭᐅᓯᒪᔪᒥᒃ.

⁹ ᑍᒤᒻᒪᑦ ᐅᓪᓗᒥᑦ ᑍᑦᓱᒪᓂ ᑐᓴᓚᐅᕐᓂᑦᑎᓂᑦ, ᑐᒃᓯᐅᑦᔩᓐᓇᕐᐳᒍᑦ ᐃᓕᑦᓯᓐᓂᒃ, ᖃᐅᔨᑎᑕᐅᖁᓪᓗᓯ ᑖᑦᓱᒪ ᐱᔪᒪᔭᖓᓂᒃ ᑕᒤᓐᓂᒡᓗ ᐊᓂᕐᓂᒃᑯᑦ ᓯᓚᑐᓂᕐᒥᒃ ᑐᑭᓯᓂᕐᒥᒡᓗ,

¹⁰ ᐃᓅᓯᖃᕈᓐᓇᖁᓪᓗᓯ ᐊᑕᓂᐅᑉ ᓈᒻᒪᒋᔭᖓᒍᑦ, ᖁᕕᐊᒋᔭᐅᓗᓯᓗ ᑖᑦᓱᒧᖓ, ᐃᓅᓯᑦᓯᒍᓪᓗ ᐱᐅᔪᓂᒃ ᐱᕈᕐᑎᑦᓯᖁᓪᓗᓯ ᐊᑦᔨᒌᖏᑦᑐᓂᒃ ᖃᐅᔨᕙᓪᓕᐊᓗᓯᓗ ᒎᑎᒥᒃ.

¹¹ ᓲᖑᓯᑎᑕᐅᖁᓪᓗᓯᓗ ᐱᔪᓐᓇᕐᓂᕐᓄᑦ ᑕᒤᓐᓄᑦ, ᒎᑎᐅᑉ ᐊᔪᒐᖃᖏᓐᓂᖓᓄᑦ ᐱᓐᓇᕐᓇᕐᑐᒧᑦ, ᓱᖁᓯᕐᑍᓕᔪᓐᓇᕐᓯᖁᓪᓗᓯ ᕿᓄᐃᓵᕈᓐᓇᕐᓯᓗᓯ ᖁᕕᐊᓱᖕᓂᖃᕐᓗᓯᓗ.

¹² ᖁᔭᓕᖁᓪᓗᓯ ᐊᑖᑕᒧᑦ, ᑖᑦᓱᒪ ᐊᔪᕈᓐᓃᕐᑎᒻᒪᑎᒍᑦ ᑭᖑᕐᖑᑦᔨᖃᑕᐅᖁᓪᓗᑕ ᐃᑦᔪᕐᓁᑦᑐᖁᑎᖏᑕ ᐱᒃᓴᖏᓐᓂᒃ ᖃᐅᒪᔪᒥ.

¹³ ᑖᑦᓱᒪ ᐱᐅᓕᓯᒪᖕᒪᑎᒍᑦ ᑖᕐᔪᐊᑉ ᐱᔪᓐᓇᕐᓂᖓᓂᑦ ᓄᒃᑎᕐᑎᓪᓗᑕᓗ ᐃᕐᓂᒥ ᓇᒡᓕᒋᒻᒪᕆᒃᑕᒥ ᐊᑕᓂᐅᕕᐊᓄᑦ,

¹⁴ ᑖᑦᓱᒨᓇ ᐱᐅᓕᔭᐅᒐᑦᑕ, ᑕᕝᕙ ᐊᔪᕐᓂᕐᓂᑦ ᐃᓱᒪᒋᔪᓐᓁᕐᑕᐅᓂᕐᒥᑦ.

᙭ᔅᑑᓯᐅᑉ ᐃᓅᓯᖓ ᐱᓇᓱᐊᕐᓂᖓᓗ

¹⁵ ᔩᓱᓯ ᑕᑯᒃᓴᐅᓪᓗᓂ ᐊᑦᔨᒋᔭᐅᖕᒪᑦ ᒎᑎᒧᑦ ᑕᑯᒃᓴᐅᖏᑦᑐᒧᑦ, ᐃᕐᓂᐊᖑᖅᑳᕐᓯᒪᕗᖅ ᐱᓐᖑᕐᑎᑕᐅᓯᒪᔪᓕᒫᓂᑦ;

¹⁶ ᑖᑦᓱᒨᓇ ᐱᓐᖑᕐᑎᑕᐅᓯᒪᕗᑦ ᓱᓇᓕᒫᑦᓯᐊᑦ ᕿᓚᖕᒥ ᓄᓇᒥᓗ, ᑕᑯᒃᓴᐅᔪᑦ ᑕᑯᒃᓴᐅᖏᑦᑐᓪᓗ, ᐊᑕᓂᐅᕖᑦ ᐱᔪᓐᓇᕐᓃᑦ ᐊᖓᔪᖅᑲᐅᓃᑦ ᐊᐅᓚᑦᓯᔩᓪᓗ; ᑖᑦᓱᒨᓇ ᐱᓐᖑᕐᑎᑕᐅᓯᒪᕗᑦ ᑖᑦᓱᒧᖓᓗ.

¹⁷ ᓱᓇᑐᐃᓐᓁᑦ ᐱᑕᖃᓚᐅᕐᑎᓐᓇᒋᑦ ᑖᓐᓇ ᐱᑕᖃᓚᐅᕐᐳᖅ, ᑖᑦᓱᒨᓇᓗ ᓱᓇᓕᒫᑦ ᑲᑎᓐᖓᑎᑕᐅᕗᑦ.

¹⁸ ᑖᓐᓇ ᑎᒥᐅᑉ ᓂᐊᖁᕆᕚ, ᑕᕝᕙ ᐅᒃᐱᕐᑑᖃᑎᒌᑦ; ᑖᓐᓇ ᐱᒋᐊᕐᓂᐅᕗᖅ, ᐊᖓᔪᒃᖠᕐᐹᒍᕗᕐᓗ ᑐᖁᖓᔪᓂᑦ ᒪᑭᑎᑕᐅᔪᓂᑦ, ᓱᓇᑐᐃᓐᓇᕐᓄᑦ ᓯᕗᓪᓕᕐᐹᖑᓗᓂ ᐊᖓᔪᖅᑳᖑᖁᓪᓗᒍ.

¹⁹ ᑖᑦᓱᒪᓂ ᒎᑎᐅᓂᓂ ᐊᑕᖏᕐᓗᒍ ᖁᕕᐊᒋᓚᐅᕐᐹ ᐃᓂᒋᓗᒍ,

²⁰ ᑖᑦᓱᒨᓇᓗ ᓱᓇᓕᒫᑦᓯᐊᑦ ᐃᒻᒥᓄᑦ ᐅᑎᕐᑎᓚᐅᕐᐰᑦ, ᓄᓇᒦᑦᑐᑦ ᕿᓚᖕᒦᑦᑐᓪᓗ, ᓮᒻᒪᕐᑎᓚᐅᕐᐰᑦ ᓴᓐᓂᖓᔪᓕᖕᒥ ᐊᐅᖓᒍᑦ.

²¹ ᐃᓕᑦᓯᓗ, ᐅᖓᓯᒃᑐᒦᓚᐅᕐᑐᓯ ᐊᑭᕋᕐᑐᕐᑎᐅᓪᓗᓯᓗ ᑖᑦᓱᒧᖓ ᐃᓱᒪᑦᓯᒍᑦ ᐊᔪᕐᑐᓕᓂᑦᓯᓐᓄᓪᓗ,

²² ᒫᓐᓇᓕ ᐃᕐᓂᖓᑕ ᑐᖁᓂᖓᒍᑦ ᐅᑎᕐᑎᓯᒪᕚᓯ, ᐃᑦᔪᕐᓁᓕᖁᓪᓗᓯ ᓴᓗᒪᑦᓯᐊᓕᕐᓗᓯᓗ ᐸᓯᔭᒃᓴᐅᔪᓐᓃᕐᓗᓯᓗ ᑖᑦᓱᒪ ᓵᖓᓂ,

²³ ᑲᔪᓯᓂᐊᕈᑦᓯ ᐅᒃᐱᕐᓂᑦᓯᓐᓂ, ᑐᓐᖓᕕᖃᑦᓯᐊᕐᓗᓯ ᐊᐅᓚᖏᑦᓯᐊᕐᑐᒥᒃ, ᓴᖑᑎᑕᐅᔪᓐᓃᕐᓗᓯ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᑦ ᑐᓴᓚᐅᕐᑕᑦᓯᓐᓂᑦ, ᑕᒪᓐᓇ ᐅᖃᐅᓯᖅ ᑐᓴᕈᒥᓇᕐᑐᖅ ᐱᑦᔪᑎᒋᓪᓗᒍ ᐅᕙᖓ ᐸᐅᓗᓯ, ᐱᔨᓐᖑᕐᑎᑕᐅᓯᒪᕗᖓ; ᑕᒪᓐᓇᓗ ᐅᖃᐅᓯᖅ ᑐᓴᕈᒥᓇᕐᑐᖅ ᐊᔪᕆᕐᑐᐃᑦᔪᑕᐅᓯᒪᓕᕐᐳᖅ ᓯᓚᕐᔪᐊᕐᒥᐅᓕᒫᓄᑦ.

ᐸᐅᓗᓯᐅᑉ ᐱᓇᓱᐊᕐᓂᖓ ᐅᒃᐱᕐᑑᖃᑎᒌᓄᑦ

²⁴ ᒫᓐᓇ ᖁᕕᐊᓲᑎᒋᕙᕋ ᐅᖁᒤᒃᓴᕐᓇᕐᑐᑰᕐᑎᑕᐅᓂᒃᑲ ᐃᓕᑦᓯ ᐱᑦᔪᑎᒋᓪᓗᓯ, ᑎᒥᒃᑯᑦ ᐋᓐᓂᐊᓇᑐᑰᑎᑕᐅᓂᒃᑲ ᐱᔭᕇᓯᖃᑕᐅᑦᔪᑎᒋᒐᒃᑭᑦ ᙭ᔅᑑᓯᐅᑉ ᑎᒥᖁᑎᒥᓂ ᐋᓐᓂᐊᕈᑎᒋᒐᔭᕐᑕᖏᓐᓂ, ᐅᒃᐱᕐᑑᖃᑎᒌᑦ ᐱᓪᓗᒋᑦ.

²⁵ ᑕᕝᕙ ᐱᔨᓐᖑᕐᑎᑕᐅᓯᒪᕗᖓ ᑖᑦᓱᒪ ᑐᓂᓚᐅᕐᒪᖓ ᐅᖃᐅᓯᖃᖁᓪᓗᖓ ᐃᓕᑦᓯᓐᓄᑦ, ᒎᑎᐅᑉ ᐅᖃᐅᓯᖏᑦ ᖃᐅᔨᔭᐅᑎᑦᓯᐊᖁᓪᓗᒋᑦ,

²⁶ ᑕᒪᓐᓇ ᓇᓗᓇᕐᑐᖅ ᐃᔨᕐᓯᒪᓚᐅᕐᐳᖅ ᐊᕐᕌᒍᓂ ᐊᓂᒍᕐᑐᓂ ᑭᖑᕚᖑᖃᑎᒌᓄᓪᓗ, ᒫᓐᓇᓕ ᓴᖅᑭᑎᑕᐅᓯᒪᓕᕐᐳᖅ ᐃᑦᔪᕐᓁᑦᑐᖁᑎᖏᓐᓄᑦ.

²⁷ ᒎᑎᐅᑉ ᑕᒪᓐᓇ ᐃᔨᕐᓯᒪᔪᖅ ᖃᐅᔨᔭᐅᑎᑦᓱᒪᓚᐅᕐᐹ ᔫᑎᐅᖏᑦᑐᓄᑦ ᐊᒥᒐᖏᑦᑐᕐᔪᐊᖅ ᓂᕐᑐᕐᓇᕐᑐᕐᔪᐊᕐᓗ ᐃᔨᕐᓯᒪᓚᐅᕐᑐᖅ ᐃᓄᓕᒫᓄᑦ, ᑕᕝᕙ ᙭ᔅᑑᓯ ᐃᓗᑦᓯᓐᓃᑦᑐᖅ, ᓂᕆᐅᒍᑎᒃᓴᐅᖁᓪᓗᒍ ᐱᓐᓇᕐᓇᕐᑐᕐᔪᐊᒥᒃ.

²⁸ ᑍᒤᒻᒪᑦ ᙭ᔅᑑᓯ ᐊᔪᕆᕐᑐᐃᑦᔪᑎᒋᕙᕗᑦ ᐃᓄᓕᒫᓄᑦ, ᓯᕘᕋᒋᔭᒃᓴᖏᓐᓂᒃ ᐅᖃᐅᑦᔪᐃᑦᔪᑎᒋᓪᓗᒍ ᐊᔪᕆᕐᑐᐃᑦᔪᑎᒋᕙᕗᓪᓗ ᑕᒤᓐᓄᑦ ᓯᓚᑐᓂᖃᕐᓗᑕ, ᑕᒪᕐᒥᒃ ᐱᕈᕇᕐᓯᒪᓗᑎ ᐅᒃᐱᕐᓂᒃᑯᑦ ᓴᖅᑭᑎᑦᓱᒪᓪᓗᑎᒍ ᙭ᔅᑑᓯᒥ.

²⁹ ᑕᒪᓐᓇ ᐱᔭᕇᕈᒪᓪᓗᒍ ᐊᒃᓱᕉᑎᒋᕙᕋ ᐃᓗᖏᕐᑐᕐᓗᖓ, ᐱᔪᓐᓇᕐᓂᕐᒥᒃ ᐊᖏᔪᒥᒃ ᐊᑐᕐᑎᑕᐅᓪᓗᖓ ᑖᑦᓱᒪ ᐅᕙᓐᓄᑦ ᕾᓯᒪᔭᖓᓂᒃ.