ᐋᐴᓯᑕᓖᑦ ᐱᓂᐊᕐᓂᖏᑦ 25 - ᐊᒡᓔᑦ ᐃᑦᔪᕐᖕᓁᑦᑐᑦ

ᐸᐅᓗᓯᐅᑉ ᐃᖅᑲᕐᑐᕐᑕᐅᔪᒪᓂᖓ ᕉᒪᒥᐅᑦ ᐊᖓᔪᖅᑳᒻᒪᕆᖓᓄᑦ

¹ ᕕᓯᑕᓯ ᐅᓪᓗᓂᒃ ᐱᖓᓱᓂᒃ ᓄᓇᖁᑎᒥᓃᓕᕋᒥ, ᓯᓴᕆᐊᒥᑦ ᔨᕉᓴᓕᒻᒧᐊᕐᐳᖅ.

² ᑕᕝᕙᓂ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ, ᔫᑎᓪᓗ ᐊᖓᔪᖅᑳᖏᑦ ᐅᖃᕆᐊᕐᑐᕐᐳᑦ ᑖᑦᓱᒧᖓ ᐸᐅᓗᓯᐅᑉ ᑎᒍᔭᐅᓯᒪᑦᔪᑎᖏᓐᓂᒃ; ᐱᑦᔪᑎᖃᕐᓗᑎᒃ.

³ ᕕᓯᑕᓯ ᐊᔪᐃᓐᓈᕆᓪᓗᒍ ᐱᖁᓇᓱᐊᕐᐹᑦ ᐊᖏᕐᑕᐅᔪᒪᓪᓗᑎᒃ ᐸᐅᓗᓯ ᔨᕉᓴᓕᒻᒧᐊᕈᑎᔭᐅᖁᓪᓗᒍ, ᑕᕝᕗᓐᖓᐅᑦᔭᐅᓕᕐᐸᑦ ᐅᐸᓗᖕᒊᕐᓯᒪᒐᒥᒃ ᐊᖅᑯᑖᓂ ᑐᖁᑦᓱᒪᓪᓗᒍ.

⁴ ᕕᓯᑕᓯᐅᑉ ᑭᐅᕔᑦ, “ᐸᐅᓗᓯ ᓯᓴᕆᐊᒦᒻᒪᑦ ᑎᒍᔭᐅᓯᒪᓪᓗᓂ, ᐅᕙᖓᓗ ᑍᑯᖓ ᐅᑎᑦᓴᐅᑎᒋᓂᐊᕋᒪ.

⁵ ᐊᖓᔪᖅᑳᓯ ᐃᓚᖏᑦ ᓯᓴᕆᐊᒧᑦ ᐱᖃᑎᒋᓂᐊᓕᕐᐸᒃᑲ, ᑍᑲᓂᓗ ᐸᐅᓗᓯᐅᑉ ᐸᓯᔭᒃᓴᐅᑦᔪᑎᖏᑦ ᓴᖅᑭᑕᐅᓚᐅᕐᓕᑦ, ᓈᒻᒪᖏᑦᑐᒥᒃ ᐱᓇᓱᐊᕐᓯᒪᒃᐸᑦ.”

⁶ ᕕᓯᑕᓯᓕ ᐅᓪᓗᓂᒃ 8ᓂᒃ 10ᓂᒃᓘᓐᓂᑦ ᖃᓂᒋᔮᓂ ᑕᕝᕙᓃᓚᐅᕐᓗᓂ, ᓯᓴᕆᐊᒧᑦ ᐅᑎᕐᐳᖅ; ᖃᐅᑎᓪᓗᒍ ᐃᖅᑲᕐᑐᐃᕕᖕᒥ ᑲᑎᒪᑎᑦᓯᕗᖅ, ᐸᐅᓗᓯ ᑕᕝᕗᓐᖓᐅᑦᔭᐅᖁᕚ.

⁷ ᐸᐅᓗᓯ ᑕᕝᕗᓐᖓᕐᒪᑦ ᔫᑎᑦ ᔨᕉᓴᓕᒻᒥᑦ ᐱᓯᒪᔪᑦ ᐊᕙᑖᓂ ᓇᖏᕐᐳᑦ, ᐊᒥᓱᓂᒃ ᐱᓪᓚᕆᐊᓗᖕᓂᒃ ᐸᓯᔭᐅᑦᔪᑎᖏᓐᓂᒃ ᓴᖅᑭᑎᑦᓯᕗᑦ, ᓇᖕᒥᓂᕐᓘᓐᓃᑦ ᓱᓕᓂᖏᓐᓂᒃ ᓇᓗᓁᕈᓐᓇᓐᖏᑕᒥᖕᓂᒃ.

⁸ ᐸᐅᓗᓯ ᐃᒻᒥᓂᒃ ᓴᐳᓐᓂᐊᕐᓗᓂ ᐅᖃᕐᐳᖅ, “ᓱᕅᓚᐅᓐᖏᓚᖓ ᔫᑎᑦ ᐱᖁᔭᖏᓐᓂᒃ, ᑐᒃᓯᐊᕐᕕᒡᔪᐊᓪᓗ ᐱᖁᔭᖏᓐᓂᒃ, ᓰᓴᕆᐅᑉ ᐱᖁᔭᖏᓐᓂᒡᓘᓐᓃᑦ.”

⁹ ᕕᓯᑕᓯ ᔫᑎᓄᑦ ᐊᑲᐅᒋᔭᐅᔪᒪᓪᓗᓂ, ᐸᐅᓗᓯ ᐊᐱᕆᕚ, “ᖃᓄᐃᒃᓴᕋᔭᓐᖏᓚᑏᑦ ᔨᕉᓴᓕᒻᒧᐊᕐᓗᑎᑦ, ᑕᒪᒃᑯᐊ ᑍᑲᓂ ᐃᓚᐅᑎᓪᓗᖓ ᐃᖅᑲᕐᑐᕐᑕᐅᑦᔪᑎᒋᒐᓗᐊᕈᕕᒋᑦ?”

¹⁰ ᐸᐅᓗᓯ ᐅᖃᕐᐳᖅ, “ᕉᒪᒥᐅᑦ ᐊᖓᔪᖅᑳᒻᒪᕆᖓᑕ ᓰᓴᕆᐅᑉ ᐃᖅᑲᕐᑐᐃᕕᖁᑎᖓᓂ ᓇᖏᕐᐳᖓ, ᑕᕝᕙᓂᓗ ᐃᖅᑲᕐᑐᕐᑕᐅᔪᒃᓴᐅᕗᖓ; ᔫᑎᓄᑦ ᓈᒻᒪᖏᑦᑐᒥᒃ ᐊᑐᓚᐅᓐᖏᓚᖓ, ᐃᕝᕕᓪᓗ ᓇᖕᒥᓂᖅ ᑕᒪᓐᓇ ᖃᐅᔨᒪᒐᕕᐅᒃ.

¹¹ ᐱᐅᖏᑦᑐᐊᓗᖕᒥᒡᓕ ᐊᑐᕐᓯᒪᒍᒪ ᑐᖁᑕᐅᑦᔪᑎᒃᓴᒥᒡᓘᓐᓃᑦ, ᑐᖁᑕᐅᑕᐃᓕᒋᐊᖃᓐᖏᓚᖓ; ᐸᓯᔭᐅᑦᔪᑎᒋᔭᒃᑲ ᔫᑎᓄᑦ ᓱᓕᖏᑉᐸᑕ ᑖᒃᑯᓄᖓ ᑐᓂᔭᐅᔪᒪᓐᖏᓚᖓ. ᓰᓴᕆᒧᑦ ᐃᖅᑲᕐᑐᕐᑕᐅᖔᕈᒪᕗᖓ.”

¹² ᕕᓯᑕᓯᐅᑉ ᐃᓱᒪᓕᐅᕐᑎᖁᑎᓂ ᐊᐱᕐᓱᓚᐅᕐᓗᒋᑦ, ᐅᖃᕐᐳᖅ: “ᓰᓴᕆᒧᑦ ᐃᖅᑲᕐᑐᕐᑕᐅᔪᒪᒐᕕᑦ, ᓰᓴᕆᒧᑦ ᐂᓂᐊᓕᕐᐳᑎ.”

ᐸᐅᓗᓯᐅᑉ ᐊᐱᕐᓱᕐᑕᐅᓂᖓ ᐊᒍᕆᐸᒧᑦ ᓄᓕᐊᖓᓄᓪᓗ

¹³ ᑕᒪᑐᒪᓕ ᑭᖑᓂᖓᒍᑦ ᐊᖓᔪᖅᑳᕐᔪᐊᖅ ᐊᒍᕆᐸ ᐱᕐᓁᓯᓗ ᓯᓴᕆᐊᒧᐊᕐᐴᒃ ᑐᓐᖓᓱᒃᑎᑦᓯᔭᕐᑐᕐᓗᑎᒃ ᕕᓯᑕᓯᒥᒃ.

¹⁴ ᐅᓪᓗᒐᓚᖕᓂᒃ ᑕᕝᕙᓃᓕᕋᒥᒃ, ᕕᓯᑕᓯᐅᑉ ᐊᖓᔪᖅᑳᕐᔪᐊᖅ ᐅᖃᖃᑎᒋᓕᕐᐹ ᐸᐅᓗᓯ ᐱᑦᔪᑎᒋᓪᓗᒍ, ᐅᖃᕐᓗᓂ, “ᐅᕙᓃᑦᑐᖃᕐᐳᖅ ᑎᒍᔭᐅᓯᒪᑎᓪᓗᒍ ᕖᓕᒃᓯᐅᑉ ᕿᒪᓚᐅᕐᑕᖓᓂᒃ;

¹⁵ ᔨᕉᓴᓕᒻᒧᐊᕐᑎᓪᓗᖓ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ, ᔫᑎᓪᓗ ᐊᖓᔪᖅᑳᖏᑦ ᐸᓯᒃᖠᕈᑎᒥᖕᓂᒃ ᓴᖅᑭᑎᑦᓯᓚᐅᕐᐳᑦ, ᐅᖃᕐᓗᑎᒃ ᑐᖁᑕᒃᓴᐅᖁᓪᓗᒍ.

¹⁶ ᐅᖃᐅᑎᓚᐅᕐᐸᒃᑲᓗ ᕉᒪᒥᐅᑦ ᐱᐅᓯᖃᖏᓐᓂᕋᕐᖢᒋᑦ ᑎᒍᔭᐅᑎᑦᓯᓲᖑᓐᖏᓚᑦ ᐊᓯᒥᖕᓄᑦ ᑎᒍᓯᒪᔭᒥᖕᓂᒃ, ᓇᖕᒥᓂᖅ ᐸᓯᒃᓯᕐᑎᒥ ᑕᒃᑯᐊᓂ ᓴᐳᑎᓇᓱᐊᓚᐅᖅᑳᕐᑎᓐᓇᒋᑦ ᐃᒻᒥᖕᓂᒃ.

¹⁷ ᔫᑎᓪᓕ ᑕᕝᕗᓐᖓᕐᒪᑕ, ᐅᑕᖅᑭᑎᑦᓯᓚᐅᓐᖏᓚᖓ, ᖃᐅᑐᐊᕐᒪᑦ ᐃᖅᑲᕐᑐᐃᕕᖕᒥ ᑲᑎᒪᑎᑦᓯᓚᐅᕐᐳᖓ, ᐸᐅᓗᓯ ᕾᑕᐅᑎᓪᓗᒍ.

¹⁸ ᑖᑦᓱᒪ ᐸᓯᒃᓯᕐᑎᖏᑦ ᐅᖃᓕᕐᒪᑕ, ᐱᕋᔭᖕᓂᕐᓂᒃ ᐱᑦᔪᑕᐅᒐᔭᕋᓱᒋᔭᓐᓂᒃ ᐅᖃᐅᓯᖃᓚᐅᓐᖏᓚᑦ.

¹⁹ ᓈᒻᒪᒃᓴᖏᑦᔪᑎᖃᓚᐅᕐᐳᓪᓕ ᓇᖕᒥᓂᖅ ᐅᒃᐱᕐᓂᕐᒥ ᒥᒃᓵᓄᑦ, ᑐᖁᓯᒪᔪᒥᒃ ᔩᓱᓯᒥᒃ ᐅᖃᐅᓯᖃᕐᓗᑎᒃ; ᐸᐅᓗᓯᐅᓪᓕ ᐆᒪᓂᕋᓚᐅᕐᐹ.

²⁰ ᓇᓗᓕᕋᒪ ᖃᓄᖅ ᑍᒤᑦᑐᒥᒃ ᐃᖅᑲᕐᑐᐃᔭᕆᐊᒃᓴᖅ, ᔨᕉᓴᓕᒻᒥ ᐃᖅᑲᕐᑐᕐᑕᐅᓗᓂ ᖃᓄᐃᒃᓴᕋᔭᖏᒻᒪᖔᑦ ᐊᐱᕆᓚᐅᕐᐸᕋ ᑕᒪᒃᑯᓄᖓ ᓵᓐᖓᔭᐅᑦᔪᑎᒋᔭᒥᓄᑦ.

²¹ ᐸᐅᓗᓯᓕ ᐃᖅᑲᕐᑐᕐᑕᐅᔪᒪᓚᐅᕐᐳᖅ ᕉᒪᒥᐅᑦ ᐊᖓᔪᖅᑳᒻᒪᕆᖓᓐᓄᑦ, ᑍᒪᓕ ᑎᒍᔭᐅᓯᒪᑎᓕᕐᐸᕋ ᐊᖓᔪᖅᑳᒻᒪᕆᖕᒧᑦ ᓰᓴᕆᒧᑦ ᐊᐅᓪᓚᓚᐅᖏᓐᓂᖓᓂ.”

²² ᐊᒍᕆᐸ ᕕᓯᑕᓯᒧᑦ ᐅᖃᕐᐳᖅ, “ᐅᕙᖓᑦᑕᐅᖅ ᓇᖕᒥᓂᖅ ᑖᑦᓱᒪᓐᖓᑦ ᑐᓴᕈᒪᒋᕗᖓ.” ᕕᓯᑕᓯᐅᑉ ᑭᐅᕙ, “ᖃᐅᒃᐸᑦ ᑐᓵᓛᕐᐸᑦ.”

²³ ᖃᐅᑎᓪᓗᒍ ᐊᒍᕆᐸ ᐱᕐᓁᓯᓗ ᕾᓕᕆᕘᒃ ᑕᑯᒥᓇᕐᑐᓂᒃ ᐊᓐᓄᕌᕐᓯᒪᓪᓗᑎᒃ ᐅᐱᒋᔭᐅᓪᓗᑎᒡᓗ, ᖃᐅᔨᓇᓱᐊᕐᕕᖕᒧᑦ ᐃᑎᕐᐳᑦ ᐃᓚᖃᕐᓗᑎᒃ ᐅᓇᑕᕐᑐᒃᓴᓄᑦ ᐊᖓᔪᖅᑳᖑᔪᓂᒃ, ᓄᓇᓕᖕᓂᓗ ᐱᓪᓗᐊᑕᕆᔭᐅᔪᓂᒃ. ᕕᓯᑕᓯᓗ ᐱᖁᔨᖕᒪᑦ ᐸᐅᓗᓯ ᐃᑎᕐᑎᑕᐅᕗᖅ ᑕᕝᕗᖓ.

²⁴ ᕕᓯᑕᓯᓗ ᐅᖃᕐᐳᖅ, “ᐊᖓᔪᖅᑳᕐᔪᐊᖅ ᐊᒍᕆᐸ, ᐃᓄᐃᓪᓗ ᑕᕝᕗᓐᖓᕐᓯᒪᔪᓕᒫᑦ; ᑕᑯᕗᓯ ᐆᒥᖓ ᐊᖑᒻᒥᒃ ᔫᑎᓕᒫᑦ ᐊᑲᐅᒋᓇᒍ ᐅᖃᐅᑎᒋᓚᐅᕐᑕᖓᓂᒃ ᐅᕙᓐᓄᑦ, ᔨᕉᓴᓕᒻᒥ ᐅᕙᓂᓗ ᓯᓴᕆᐊᒥ, ᕾᒐᓛᓚᐅᕐᐳᓪᓗ ᐃᓅᔪᒃᓴᐅᖏᓐᓂᕋᕐᓗᒍ.

²⁵ ᑐᖁᑕᐅᑦᔪᑎᒃᓴᖓᓂᒃ ᐱᓂᐊᕐᓂᖓᓂᑦ ᓇᓂᓯᓚᐅᓐᖏᓚᖓ ᓇᖕᒥᓂᖅ ᐊᖓᔪᖅᑳᒻᒪᕆᖕᒧᑦ ᓰᓴᕆᒧᑦ ᐃᖅᑲᕐᑐᕐᑕᐅᔪᒪᖕᒪᑦ ᑍᑦᓱᒧᖓ ᐊᐅᓪᓚᕐᑎᓛᕈᒪᓕᕐᐸᕋ.

²⁶ ᐅᕙᖓ ᐊᖓᔪᖅᑳᒻᒪᕆᖕᒧᑦ ᓰᓴᕆᒧᑦ ᑎᑎᕋᐅᓯᒃᓴᒥᒃ ᑖᑦᓱᒪ ᒥᒃᓵᓄᑦ ᐅᖃᐅᓯᒃᓴᖃᒻᒪᕆᓐᖏᓚᖓ. ᑍᒤᒻᒪᑦ ᐃᓕᑦᓯᓐᓄᑦ ᓴᖅᑭᑎᑉᐸᕋ ᐱᓗᐊᕐᑐᒥ ᐃᓕᖕᓄᑦ ᐊᖓᔪᖅᑳᕐᔪᐊᖅ ᐊᒍᕆᐹ, ᖃᐅᔨᓇᓱᐊᓚᐅᕐᑎᓪᓗᑎᑦ ᑖᑦᓱᒥᖓ, ᐃᒻᒪᖄ ᑎᑎᕋᓕᕈᒪ ᐅᖃᐅᓯᒃᓴᖃᕐᓂᕐᓴᐅᒐᔭᕆᐊᒃᓴᖅ ᐃᓱᒪᓪᓗᖓ.

²⁷ ᐊᑲᐅᓇᓱᒋᖏᓐᓇᒃᑯ ᑎᒍᔭᐅᓯᒪᔪᖅ ᐊᐅᓪᓚᕐᑎᓐᓇᓱᒋᐊᒃᓴᖅ ᑎᑎᖅᑲᓂᒃ ᑎᒍᔭᐅᔪᑎᖓᓂᒃ ᓇᒃᓴᕐᑎᖏᓪᓗᒍ.”