ᑯᕆᓐᑎᐊᒥᐅᓄᑦ ᐂᑉᐸᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᖃᐅᓰᑦ ᐱᒋᐊᕈᑎᖏᑦ

¹ ᐸᐅᓗᓯᒥᑦ, ᙭ᔅᑑᓯ ᔩᓱᓯᐅᑉ ᐋᐴᓯᑕᓕᖓᓂᑦ ᒎᑎᐅᑉ ᐱᖁᔨᓂᖓᒍᑦ, ᐅᒃᐱᕐᑑᖃᑎᑦᑎᓐᓂᓪᓗ ᑎᒧᑎᒥᑦ. ᒎᑎᐅᑉ ᐃᓚᒌᒃᑐᖁᑎᖏᓐᓄᑦ ᐅᒃᐱᕐᑐᓄᑦ ᑯᕆᓐᑎᒦᑦᑐᓄᑦ, ᒎᑎᐅᓪᓗ ᐃᓄᖁᑎᖏᓐᓄᑦ ᐊᑬᐊᒦᑦᑐᓄᑦ.

² ᒎᑎᐅᑉ ᐊᑖᑕᑦᑕ ᐊᑕᓂᐅᓪᓗ ᔩᓱᓯᐅᑉ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᓮᒻᒪᕐᑎᑦᓯᓂᖓᑕᓗ ᐃᓚᒋᓕᓯ.

ᐸᐅᓗᓯᐅᑉ ᖁᔭᓕᓂᖓ ᒎᑎᒥᒃ

³ ᒎᑎ ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᐊᑖᑕᖓ ᓂᕐᑐᕐᑕᐅᓕ, ᓂᑲᒍᓱᒃᑑᓪᓗᓂ ᐊᑖᑕᐅᖕᒪᑦ, ᒎᑎᐅᓪᓗᓂᓗ ᐃᑲᔪᕐᑕᐅᔭᕆᐊᓕᓕᒫᓄᑦ.

⁴ ᑖᑦᓱᒪ ᐃᑲᔪᕐᒪᑎᒍᑦ ᐅᖁᒤᒃᓴᕈᑎᒋᔭᑦᑎᓐᓂᑦ, ᐅᕙᒍᑦᑕᐅᖅ ᐃᑲᔪᕈᓐᓇᖁᓪᓗᑕ ᐊᓯᑦᑎᓐᓂᒃ ᖃᓄᐃᑦᑐᑐᐃᓐᓇᕐᓄᑦ ᐅᖁᒤᒃᓴᕈᑎᖃᕐᑐᓄᑦ, ᓇᖕᒥᓂᖅ ᐃᑲᔪᕐᑕᐅᑦᔪᑎᒋᓯᒪᔭᑦᑎᓐᓄᑦ ᒎᑎᒥᑦ.

⁵ ᙭ᔅᑑᓯᐅᑦᑕᐅᖅ ᐊᖏᔪᒥᒃ ᐋᓐᓂᐊᑎᑕᐅᓯᒪᓂᖓ ᐱᖃᑕᐅᕕᒋᒐᑦᑎᒍ, ᑍᒫᒃᑕᐅᖅ ᙭ᔅᑑᓯᒃᑯᑦ ᐱᖃᑕᐅᒋᕗᒍᑦ ᒎᑎᐅᑉ ᐃᑲᔪᕐᓂᖓᓂᒃ ᐊᒥᒐᖏᑦᑐᒥᒃ.

⁶ ᐋᓐᓂᐊᑎᑕᐅᒍᑦᑕ, ᑍᒤᑕᐅᕗᒍᑦ ᐃᑲᔪᕐᑕᐅᖁᓪᓗᓯ ᐱᐅᓕᔭᐅᕕᒃᓴᖃᖁᓪᓗᓯᓗ; ᐃᑲᔪᕐᑕᐅᒍᑦᑕᓕ, ᐃᑲᔪᕐᑕᐅᒋᕗᓯ ᐱᔪᓐᓇᐅᑎᑖᖁᓪᓗᓯᓗ ᕿᓄᐃᓵᕐᓂᕐᒥᒃ ᐊᑐᕈᓐᓇᕐᓯᖁᓪᓗᓯ, ᐋᓐᓂᐊᑎᑕᐅᑎᓪᓗᑕ ᐊᓂᒍᐃᑦᔪᑎᒋᖃᑦᑕᕐᑕᑦᑎᓐᓄᑦ.

⁷ ᓂᕆᐅᖕᓂᖃᕐᓂᕗᑦ ᐱᓪᓗᓯ ᐊᐅᓚᑦᔭᒃᑕᐅᔪᓐᓇᖏᓚᖅ; ᖃᐅᔨᒪᒐᑦᑕ ᐋᓐᓂᐊᑎᑕᐅᓂᑦᑎᓐᓂᒃ ᐱᖃᑕᐅᖕᒥᒐᑦᓯ, ᐃᑲᔪᕐᑕᐅᑦᔪᑎᒋᔭᑦᑎᓐᓄᑦᑕᐅᖅ ᐃᑲᔪᕐᑕᐅᑦᔪᑎᖃᕐᓂᐊᕐᒥᒐᑦᓯ.

⁸ ᓇᓗᖁᔪᒪᓐᖏᓚᑦᓯᓕ ᐃᓚᒃᑳ, ᐅᖁᒤᒃᓴᕐᑎᑕᐅᓚᐅᕐᓂᑦᑎᓐᓂᒃ ᐂᓯᐊᒥ; ᐅᖁᒤᒃᓴᕐᑎᑕᐅᓚᐅᕋᑦᑕ ᐊᖏᔪᐊᓗᖕᒥᒃ ᐊᒡᓛᑦ ᓴᐱᓕᕐᓇᑲᓴᒃᑐᒥᒃ, ᐃᓅᓂᐊᕆᐊᒃᓴᕐᓘᓐᓃᑦ ᖁᓚᓕᒻᒪᕆᓚᐅᕐᐳᒍᑦ.

⁹ ᐃᒃᐱᒍᓱᓕᓚᐅᕋᑦᑕ ᐊᒡᓛᑦ ᑐᖁᑕᒃᓴᓐᖑᕐᑎᑕᐅᓯᒪᓕᕐᓂᑦᑎᓐᓂᒃ; ᑍᒤᑦᑐᒃᑰᓚᐅᕐᐳᒍᓪᓕ ᐅᕙᑦᑎᓐᓂᑐᐃᓐᓇᖅ ᐊᐅᓚᓐᓇᓱᐊᖁᓇᑕ ᒎᑎᒥᒡᓕ ᑕᑎᖃᖔᖁᓪᓗᑕ ᑐᖁᖓᔪᓂᑦ ᒪᑭᑎᑦᓯᔪᒧᑦ.

¹⁰ ᑖᑦᓱᒪ ᓴᐳᑎᓚᐅᕐᐹᑎᒍᑦ ᑐᖁᒦᓐᓇᕐᑐᓂᑦ, ᓱᓕᓗ ᓴᐳᑎᓂᐊᕆᕚᑎᒍᑦ; ᑖᑦᓱᒪᓐᖓᑦ ᓂᕆᐅᒃᐳᒍᑦ ᓱᓕ ᓴᐳᑎᓯᒪᓂᐊᕐᒪᑎᒍᑦ.

¹¹ ᑐᒃᓯᐅᑦᔨᖃᑦᑕᕐᓂᑦᓯᒍᑦ ᐅᕙᑦᑎᓐᓂᒃ ᐃᑲᔪᕐᓯᓚᐅᕐᐳᓯ, ᐅᓄᕐᑐᓪᓗ ᑐᒃᓯᐅᑦᔨᓂᖏᑕ ᑭᐅᔭᐅᓂᖏᓐᓄᑦ, ᒎᑎᐅᑉ ᓮᒻᒪᕐᑎᓐᓂᐊᕐᐹᑎᒍᑦ ᐅᓄᕐᑐᓪᓗ ᒎᑎᒧᑦ ᖁᔭᓕᓕᕐᓂᐊᕐᐳᑦ ᐱᑦᔪᑎᒋᓗᑕ.

ᐸᐅᓗᓯᐅᑉ ᐃᓱᒪᒋᔭᒥᓂᒃ ᐊᓯᑦᔩᓂᖓ

¹² ᐅᕙᑦᑎᓐᓂᒃ ᑕᕝᕙ ᖁᕕᐊᓲᑎᒋᔭᕗᑦ, ᐃᒃᐱᒋᔭᑦᑎᒍᑦ ᓄᓇᒥ ᐃᓅᑎᓪᓗᑕ ᐃᓕᑦᓯᓐᓂᒃ ᐃᓚᖃᕐᓂᕗᑦ, ᐊᐅᓚᑕᐅᓯᒪᖕᒪᑦ ᒎᑎᐅᑉ ᐃᑦᔪᕐᓁᑎᑦᓯᓂᖓᓄᑦ ᓇᓛᒎᕐᓂᖓᒍᓪᓗ, ᓯᓚᕐᔪᐊᕐᒥᐅᑦ ᓯᓚᑐᓂᖓᓅᖏᑦᑐᖅ ᒎᑎᐅᓪᓕ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ.

¹³ ᐃᓕᑦᓯᓐᓄᑦ ᑎᑎᕋᕐᐳᒍᑦ ᐅᖃᓕᒫᕈᓐᓇᕐᑕᑦᓯᓐᓂᒃ ᑐᑭᓯᔪᓐᓇᕐᑕᑦᓯᓐᓂᒡᓗ ᑭᓯᐊᓂ; ᑕᒤᓐᓂᒡᓕ ᑐᑭᓯᑦᓯᐊᖁᒐᓗᐊᕐᐸᑦᓯ.

¹⁴ ᐃᓔᓐᓇᖓᓂᒃ ᐅᕙᑦᑎᓐᓂᒃ ᑐᑭᓯᓯᒪᒐᑦᓯ, ᑐᑭᓯᓂᑦᓯᒍᑦ ᐅᕙᑦᑎᓐᓂᒃ ᖁᕕᐊᓱᒍᑎᖃᖁᓪᓗᓯ, ᐅᕙᒍᑦᑕᐅᖅ ᐃᓕᑦᓯᓐᓂᒃ ᖁᕕᐊᓱᒍᑎᖃᕈᓐᓇᖁᓪᓗᑕ, ᐊᑕᓂᑦᑕ ᔩᓱᓯᐅᑉ ᐅᓪᓗᒃᓴᖓᓂ.

¹⁵ ᑕᒪᓐᓇ ᖁᓚᖏᑦᔪᑎᒋᓪᓗᒍ ᐃᓕᑦᓯᓐᓄᑦ ᑎᑭᑦᓱᒪᓚᐅᕋᓗᐊᕐᐳᖓ ᓯᕗᓂᖓᒍᑦ, ᖁᕕᐊᓱᒃᑎᑕᐅᒃᑲᓐᓂᖁᓪᓗᓯ ᓲᕐᓗ ᒪᕐᕈᐃᕐᓱᓪᓗᐊᕐᑐᒥᒃ.

¹⁶ ᐊᖅᑯᓵᕈᒪᓚᐅᕋᓗᐊᕐᐸᑦᓯ ᒫᓯᑑᓂᐊᒧᐊᓕᕐᓗᖓ, ᐊᒻᒪᓗ ᒫᓯᑑᓂᐊᒥᑦ ᐅᑎᓕᕈᒪ ᐃᓕᑦᓯᓐᓄᐊᕈᒪᓪᓗᖓ ᐃᓱᒪᖃᓚᐅᕋᓗᐊᕐᐳᖓ, ᐃᓕᑦᓯᓐᓄᑦ ᐃᑲᔪᕐᑕᐅᔪᒪᓪᓗᖓ ᔫᑎᐊᒧᑦ ᐊᐅᓪᓚᓕᕈᒪ.

¹⁷ ᑍᒫᒃ ᐃᓱᒪᑎᓪᓗᖓ ᓴᖑᓴᕅᑦᑐᑎᑐᑦ ᐱᐅᓯᖃᓚᐅᕐᐳᖔ? ᐅᕝᕙᓘᓐᓃᑦ ᓯᓚᕐᔪᐊᕐᒥᐅᑦ ᐱᐅᓯᖏᓐᓂᒃ ᒪᓕᓚᐅᕐᐳᖔ? ᐅᖃᕐᐸᒃᑐᑎᑐᑦ ᐊᑕᐅᑦᓯᒃᑯᑦ ᐊᖏᕐᓗᑎᒡᓗ ᐊᖏᖏᓪᓗᑎᒡᓘ?

¹⁸ ᒎᑎ ᓱᕐᕋᔪᐃᑦᑑᖕᒪᑦ, ᐃᓕᑦᓯᓐᓄᑦ ᑎᑭᑦᓱᒪᓂᕆᔭᕋ ᐊᖏᕐᓂᐅᓗᓂᓗ ᐊᖏᖏᓐᓂᐅᓗᓂᓗ ᐊᑕᐅᑦᓯᒃᑯᑦ ᑍᒤᓕᖓᓚᐅᓐᖏᓚᖅ.

¹⁹ ᒎᑎᐅᑉ ᐃᕐᓂᖓ, ᔩᓱᓯ ᙭ᔅᑑᓯ, ᓮᓚᓯᐅᓪᓗ ᑎᒧᑎᐅᓪᓗ ᐅᕙᖓᓗ ᐃᓕᑦᓯᓐᓄᑦ ᐊᔪᕆᕐᑐᐃᑦᔪᑎᒋᔭᕗᑦ, ᐊᑕᐅᑦᓯᒃᑯᑦ ᐊᖏᕐᓂᐅᓗᓂᓗ ᐊᖏᖏᓐᓂᐅᓗᓂᓗ ᐱᓐᖏᓚᖅ, ᑖᑦᓱᒪᓂᓕ ᑍᒪᓐᖓᑦ ᐊᖏᕐᓂᐅᕗᖅ.

²⁰ ᑖᑦᓱᒪᓂ ᒎᑎᐅᑉ ᐊᖏᕈᑎᒋᓯᒪᔭᓕᒫᖏᑦ ᐊᖏᕐᓂᐅᕗᑦ, ᑖᑦᓱᒨᓇ ᑕᕝᕙ “ᐋᒦᓐᕈᓐᓇᕐᐳᒍᑦ”, ᒎᑎᐅᑉ ᓂᕐᑐᕐᑕᐅᑦᔪᑎᒃᓴᖓᓄᑦ.

²¹ ᒎᑎᓕ ᑕᕝᕙ ᐃᓕᑦᓯᓐᓂᒃ ᐅᕙᑦᑎᓐᓂᒡᓗ ᐋᖅᑭᒃᓯᓯᒪᕗᖅ ᙭ᔅᑑᓯᒃᑯᑦ; ᑖᑦᓱᒪᓗ ᑕᕝᕙ ᐅᓱᕐᑎᓚᐅᕐᐹᑎᒍᑦ;

²² ᓇᓗᓁᒃᑯᓯᕐᐹᑎᒍᓪᓗ ᓇᕿᑦᔪᑎᒥᓄᑦ ᐅᕙᑦᑎᓐᓂᒃ ᐱᖃᕐᓂᕐᒥᓂᒃ ᓇᓗᓁᕐᓯᔪᒥᒃ, ᐊᓂᕐᓂᕐᓗ ᐃᑦᔪᕐᓁᑦᑐᖅ ᐃᓗᑦᑎᓐᓄᑦ ᐱᑎᑉᐹ, ᓇᓗᓇᖁᓇᒍ ᐊᖏᕈᑎᒋᓯᒪᔭᖏᓐᓂᒃ ᐱᑖᓛᕐᓂᕗᑦ ᑖᑦᓱᒪᓐᖓᑦ.

²³ ᒎᑎ ᖃᐅᔨᒪᔨᒋᕙᕋ ᐅᖃᐅᓯᕆᓂᐊᕐᑕᒃᑲ ᐱᓪᓗᒋᑦ, ᐅᕙᓐᓂᒃ ᖃᐅᔨᒪᖕᒪᑦ ᓱᓇᑐᐃᓐᓇᕐᒧᑦ ᐅᖁᒤᑦᑐᒦᖁᓇᓯ ᑯᕆᓐᑎᒧᐊᕈᒪᔪᓐᓃᓚᐅᕋᒪ.

²⁴ ᐊᖓᔪᖅᑲᐅᓯᕐᕕᖃᕋᓱᐊᓐᖏᓚᒍᑦ ᐅᒃᐱᕐᓂᕆᔭᕆᐊᓕᑦᓯᓐᓄᑦ; ᐅᒃᐱᕐᓂᕐᒧᓪᓕ ᓇᖏᕋᑦᓯ ᐊᐅᓚᖏᑦᑐᒥᒃ. ᐱᓇᓱᐊᕐᕕᒋᕙᑦᓯ ᖁᕕᐊᓱᖕᓂᖃᑦᓯᐊᖁᓪᓗᓯ.