ᑯᕉᓂᑲ ᐂᑉᐸᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦᓰᐸᒥᐅᑦ ᑯᐃᓐᖓᑕ ᐳᓛᕆᐊᕐᓂᖓ ᐊᑕᓃᑦ ᓯᕗᓪᓖᑦ 10:1-13 1 ᓰᐸᒥᐅᑦ ᐊᖓᔪᖅᑳᕐᔪᐊᖓ ᑯᐃᓐ ᑐᓴᕋᒥ ᓲᓗᒨᓂᐅᑉ ᐅᓂᒃᑲᐅᓯᐅᑦᓯᐊᕐᓂᖓᓂᒃ, ᔨᕉᓴᓕᒧᐊᕐᐳᖅ ᓲᓗᒨᓂᒥᒃ ᐆᒃᑐᕈᒪᓪᓗᓂ ᐊᐱᕐᓱᕐᓗᓂᐅᒃ ᐱᔭᕐᓂᖏᑦᑐᓂᒃ, ᓇᒃᓴᕐᓗᓂ ᐅᓄᕐᑐᓂᒃ ᐆᒪᔪᓂᒃ, ᑳᒥᓕᖕᓂᒃ ᓇᖕᒪᒃᑐᓂᒃ ᓂᕿᓄᑦ ᐃᓚᐅᕈᑎᒃᓴᓂᒃ ᒪᒪᕐᑐᓂᒃ, ᒎᓗᓂᒡᓗ ᐊᖏᔪᓂᒃ, ᐅᔭᕋᖕᓂᒡᓗ ᑕᑯᒥᓇᕐᑐᓂᒃ. ᓲᓗᒨᓂᒧᐅᕋᒥᓗ, ᐊᐱᕐᓱᕐᐹ ᐃᓱᒪᒋᔭᓕᒫᒥᓂᒃ. 2 ᓲᓗᒨᓂᐅᓪᓗ ᑖᑦᓱᒪ ᐊᐱᖅᑯᑎᓕᒫᖏᑦ ᑭᐅᔪᓐᓇᕐᐰᑦ; ᐊᔪᕐᓇᕐᑐᖃᓚᐅᓐᖏᓚᑦ ᓲᓗᒨᓂᒧᑦ ᐊᐱᖅᑯᓯᕆᔭᓕᒫᖏᑦ ᓇᓗᓁᕐᑍᓐᓇᕆᕔᑦ. 3 ᓰᐸᐅᓪᓗ ᑯᐃᖓ ᖃᐅᔨᒐᒥ ᓲᓗᒨᓂᐅᑉ ᓯᓚᑐᓂᖓᓂᒃ, ᐃᒡᓗᓕᐊᕆᓯᒪᔭᖏᓐᓂᒡᓗ, 4 ᓂᖀᑦ ᓂᕐᕆᕕᖓᓃᑦᑐᑦ, ᐊᖓᔪᖅᑳᖁᑎᖏᑕ ᐃᒃᓯᕙᐅᑕᖃᐅᕐᓂᖏᑦ, ᐱᔨᖏᑕᓗ ᐱᖃᑕᐅᓂᖏᑦ, ᐱᔨᑦᓯᕋᕐᑎᖏᑕᓗ ᐊᓐᓄᕌᖏᑦ, ᐃᒥᕐᓂᐊᕐᑕᖏᓐᓂᒡᓗ ᖃᐅᔨᓴᕐᑎᖏᑦ, ᐊᓐᓄᕌᖏᓪᓗ, ᑐᓂᕐᕈᑎᒋᔭᖏᓪᓗ ᐊᑕᓂᐅᑉ ᐃᒡᓗᖓᓄᑦ ᐃᑯᐊᓚᑎᑕᒃᓮᑦ, ᑲᒪᓗᐊᕐᓂᕐᒧᑦ ᐅᖃᐅᓯᒃᓮᕈᑎᕗᖅ. 5 ᑖᑦᓱᒪᓗ ᐊᖓᔪᖅᑳᕐᔪᐊᖅ ᐅᖃᐅᑎᕚ, “ᐅᖃᐅᓰᑦ ᑐᓴᓚᐅᕐᑕᒃᑲ ᓄᓇᓐᓂ ᓱᓕᕗᑦ ᐃᓕᖕᓂᒃ ᓯᓚᑐᓂᕐᓂᒡᓗ. 6 ᐅᖃᐅᓯᖏᑦ ᐅᒃᐱᕆᓚᐅᓐᖏᒃᑲᓗᐊᕐᐸᒃᑲ ᑭᓯᐊᓂᓕ ᑎᑭᓐᓇᒪ ᓇᖕᒥᓂᕐᓗ ᑕᑯᒐᒪ ᐅᒃᐱᕈᓱᓕᕐᐳᖓ; ᑕᑯᒋᑦ, ᓯᓚᑐᓂᕕᑦ ᕿᑎᖅᑲᓕᒫᖓ ᐅᖃᐅᓯᐅᓚᐅᓐᖏᓚᖅ ᐅᕙᓐᓄᑦ; ᑐᓴᐅᒪᔭᒪ ᐅᖓᑎᐊᓗᐊᓂ ᓯᓚᑐᓂᖃᕐᐳᑎᑦ. 7 ᑐᓱᓐᓇᒻᒪᕆᒃᐳᑦ ᓄᓕᐊᑎᑦ! ᑐᓱᓐᓇᒻᒪᕆᒃᑭᕗᓪᓗ ᐱᔨᑎᑦ, ᓇᔪᕐᑎᒋᔭᑎᑦ ᓇᔫᑏᓐᓇᕐᑐᑦ ᐃᓕᖕᓂ ᑐᓵᖃᑦᑕᕐᑐᓪᓗ ᓯᓚᑐᓂᕐᓂᒃ! 8 ᓂᕐᑐᕐᑕᐅᓕ ᐊᑕᓂᖅ ᒎᑏᑦ, ᐃᓕᖕᓂᒃ ᖁᕕᐊᒋᔭᓕᒃ ᐊᖓᔪᖅᑳᕐᔪᐊᕈᕐᑎᑦᓯᔪᕐᓗ ᐃᒃᓯᕙᐅᑕᕐᔪᐊᕐᒥ ᐊᑕᓂᕐᒧᑦ ᒎᑎᒋᔭᕐᓄᑦ! ᒎᑎᕕᑦ ᐃᓴᕆᐊᓕᒥᐅᑦ ᓇᒡᓕᒋᖕᒪᒋᑦ ᐃᓱᖃᖏᑦᑐᒧᓪᓗ ᐃᓂᖃᖁᓪᓗᓂᒋᑦ, ᑖᒃᑯᓄᖓ ᐊᖓᔪᖅᑳᕐᔪᐊᕈᕐᑎᓚᐅᕐᐹᑎᑦ, ᓈᒻᒪᓈᕐᑐᒥᒃ ᐃᓱᐊᕐᑐᒥᒡᓗ ᐱᓇᓱᐊᖁᓪᓗᑎᑦ ᑖᒃᑯᓄᖓ.” 9 ᑕᕝᕙ ᐊᖓᔪᖅᑳᕐᔪᐊᖅ ᑐᓂᕚ ᓇᒃᓴᓚᐅᕐᑕᒥᓂᒃ ᑐᓂᕐᕈᑎᒃᓴᓂᒃ 10,000ᐸᐅᓂᒃ ᐅᖁᒤᓐᓂᓕᖕᓂᒃ ᒎᓗᓂᒃ, ᓂᕿᓄᓪᓗ ᐃᓚᐅᕈᑎᒃᓴᓂᒃ ᒪᒪᕐᑐᓂᒃ ᐊᒥᒐᖏᑦᑐᓂᒃ, ᐅᔭᕋᖕᓂᒡᓗ ᐱᕕᐊᕐᓇᕐᑐᓂᒃ; ᓂᕿᓄᑦ ᐃᓚᐅᕈᑎᒃᓴᓂᒃ ᐊᒥᒐᖏᑦᑐᕐᔪᐊᓂᒃ ᑯᐃᓐ ᓰᐸᒥᐅᖅ ᑐᓂᓯᓚᐅᕐᐳᖅ ᐊᖓᔪᖅᑳᕐᔪᐊᕐᒧᑦ ᓲᓗᒨᓂᒧᑦ. 10 ᓱᓕ ᕼᐅᕋᒥᐅᑦ ᐱᔨᖏᑦ ᓲᓗᒨᓂᐅᓪᓗ ᐱᔨᖏᑦ, ᓇᒃᓴᓚᐅᕆᕗᑦ ᒎᓗᓂᒃ ᐅᐱᕼᐃᒥᑦ, ᕿᔪᑦᓯᐊᕙᖕᓂᒡᓗ ᐊᓪᒐᒻᓂᒃ ᐊᑎᓕᖕᓂᒃ ᐅᔭᕋᖕᓂᒡᓗ ᐱᕕᐊᕐᓇᕐᑐᓂᒃ. 11 ᐊᖓᔪᖅᑳᕐᔪᐊᕐᓗ ᕿᔪᑦᓯᐊᕙᖕᓂᒃ ᐊᓪᒐᒻᓂᒃ ᐊᑎᓕᖕᓂᒃ ᓇᒃᓴᕐᑕᐅᓯᒪᔪᓂᒃ ᒪᔪᕋᐅᑎᓕᐅᕐᐳᖅ ᐊᑕᓂᐅᑉ ᐃᒡᓗᖓᓄᑦ ᐊᖓᔪᖅᑳᕐᔪᐊᓪᓗ ᐃᒡᓗᖓᓄᑦ, ᑖᒃᑯᓇᓐᖓᓪᓗ ᕼᐊᕐᐱᓂᒃ ᑯᑭᑦᑕᐸᐅᑎᐅᔭᓂᒡᓗ ᓄᖃᕐᑎᓕᖕᓂᒃ ᐃᓐᖏᕐᑎᓄᑦ ᓴᓇᓚᐅᕆᕗᖅ; ᑍᒤᑦᑐᓂᒃ ᓯᕗᓂᖓᒍᑦ ᑕᑯᔪᖃᓚᐅᕐᓯᒪᓐᖏᓚᖅ ᔫᑕᐅᑉ ᓄᓇᖓᓂ. 12 ᐊᖓᔪᖅᑳᕐᔪᐊᕐᓗ ᓲᓗᒨᓂ ᑐᓂᓯᕗᖅ ᓰᐸᒥᐅᑦ ᑯᐃᖓᓄᑦ ᐱᔪᒪᔭᓕᒫᖏᓐᓂᒃ, ᐊᖓᔪᖅᑳᕐᔪᐊᕐᒧᑦ ᑐᓂᓚᐅᕐᑕᖏᑕ ᐅᓄᖅᑭᔭᖏᓐᓂᒃ. ᑕᕝᕙ ᑯᐃᓐ ᐱᔨᖏᓪᓗ ᐊᖏᕐᕋᓕᓚᐅᕐᐳᑦ ᓄᓇᒥᖕᓄᑦ. ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᐊᔪᕐᓴᖏᓐᓂᖓ ᐊᑕᓃᑦ ᓯᕗᓪᓖᑦ 10:14-25 13 ᒎᓗᐃ ᐅᖁᒤᓐᓂᖏᑦ ᐊᕐᕌᒍᑕᒫᑦ ᓲᓗᒨᓂᐅᑉ ᐱᖃᑦᑕᓚᐅᕐᑕᖏᑦ ᐅᖁᒤᓐᓂᖃᖃᑦᑕᓚᐅᕐᐳᑦ 50,000ᐸᐅᓂᒃ. 14 ᐊᓯᐊᒍᑦ ᓱᓕ ᑐᓂᓯᕕᐅᖃᑦᑕᓚᐅᕆᕗᖅ ᓂᐅᕐᕈᓯᕐᑎᑦᓯᔨᓄᑦ ᓂᐅᕕᕐᑎᓄᓪᓗ; ᐊᖓᔪᖅᑳᕐᔪᐊᓕᒫᓪᓗ ᐊᕋᐱᐊᒥᐅᑦ ᐊᐅᓚᑦᓯᔨᐅᔪᓪᓗ ᓄᓇᓂ ᒎᓗᓂᒃ ᓯᐅᓪᕕᕆᓂᒡᓗ ᑐᓂᓯᖃᑦᑕᓚᐅᕆᕗᑦ ᓲᓗᒨᓂᒧᑦ. 15 ᐊᖓᔪᖅᑳᕐᔪᐊᖅ ᓲᓗᒨᓂ ᓴᐴᓗᑕᕐᓂᒃ ᐊᖏᔪᓂᒃ 200ᓂᒃ ᒎᓗᓂᑦ ᑲᐅᒐᕐᓗᒋᑦ ᖄᐹᕐᓯᒪᔪᓂᒃ ᓴᓇᓚᐅᕐᐳᖅ; ᐊᑕᐅᓯᖅ ᓴᐴᓗᑕᖅ ᐅᖁᒤᓐᓂᖃᕐᓗᓂ 15ᐸᐅᓐ ᖃᓂᒋᔮᓂ. 16 300ᓂᒃ ᓴᐴᓗᑕᕐᓂᒃ ᓴᓇᒋᕗᖅ ᒎᓗᒥᑦ ᑲᐅᒐᕐᓗᒋᑦ ᖄᐹᕐᓯᒪᔪᓂᒃ, ᐊᑕᐅᓯᖅ ᓴᐴᓗᑕᖅ 8ᐸᐅᓐ ᖃᓂᒋᔮᓂ ᐅᖁᒤᓐᓂᖃᕐᓗᓂ; ᐊᖓᔪᖅᑳᕐᔪᐊᓪᓗ ᑖᒃᑯᐊ ᓕᐸᓇᓂᒦᑦᑐᒧᑦ ᐃᒡᓗᒧᐊᕐᐰᑦ ᓇᐹᕐᑐᓕᖕᒦᑦᑐᒧᑦ. 17 ᐊᖓᔪᖅᑳᕐᔪᐊᖅ ᐊᒻᒪ ᓴᓇᒋᕗᖅ ᐊᖏᔪᒥᒃ ᐃᒃᓯᕙᐅᑕᕐᔪᐊᕐᒥᒃ ᑑᒑᕐᒥᒃ, ᖃᐹᕐᓗᒍᓗ ᒎᓗᓪᓚᕆᖕᒥᒃ. 18 ᑖᓐᓇ ᐃᒃᓯᕙᐅᑕᕐᔪᐊᖅ ᑐᖕᒥᕌᖃᕐᐳᖅ ᐱᖓᓲᔪᕐᑐᓂᒃ ᖄᐹᕐᓯᒪᔪᓂᒃ ᒎᓗᒥᒃ ᐃᑎᒐᖏᑕᓗ ᐃᑯᕐᕋᖓ ᒎᓘᓪᓗᓂ, ᐊᑕᓪᓗᓂ ᐃᒃᓯᕙᐅᑕᕐᔪᐊᕐᒧᑦ, ᑕᓕᖏᓐᓄᑦ ᐃᑯᓯᒡᕕᖃᕐᐳᖅ ᓛᔭᓐᖑᐊᖕᓂᒃ ᐃᒡᓗᒃᑐᑦ ᓯᓚᑖᓂ ᓇᖏᕐᑑᖕᓂᒃ. 19 12ᓂᒃ ᓛᔭᓐᖑᐊᖃᕐᐳᑦ ᒪᔪᕋᐅᑎᖏᑦ ᐃᒡᓗᒃᑐᑦ ᐱᖓᓲᔪᕐᑐᓂᒃ ᓇᖏᕐᑐᓂᒃ; ᑍᒤᑦᑐᒥᒃ ᐃᒃᓯᕙᐅᑕᕐᔪᐊᕐᑕᖃᓚᐅᕐᓯᒪᓐᖏᓚᖅ ᐊᖓᔪᖅᑳᕐᔪᐊᖃᕐᕕᖕᓂ ᐊᓯᖏᓐᓂ. 20 ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᐃᒥᐅᑎᓕᒫᖏᑦ ᒎᓘᓚᐅᕐᐳᑦ, ᓕᐸᓇᓂᒦᑦᑐᓪᓗ ᐃᒡᓘᑉ ᓇᐹᕐᑐᓕᖕᒦᑦᑑᑉ ᓂᕐᕆᑎᓕᒫᖏᑦ ᒎᓗᓪᓚᕇᓐᓇᐅᓚᐅᕐᐳᑦ; ᓯᐅᓪᕕᕇᑦ ᓱᓇᐅᔪᕆᔭᐅᓚᐅᖏᒻᒪᑕ ᑍᑦᓱᒪᓂ ᓲᓗᒨᓂ ᐃᓅᑎᓪᓗᒍ. 21 ᐊᖓᔪᖅᑳᕐᔪᐊᑉ ᐅᒥᐊᕐᔪᐊᖁᑎᖏᑦ ᑖᕐᓯᓯᒧᐊᖃᑦᑕᓚᐅᕐᐳᑦ ᕼᐅᕋᐅᑉ ᐱᔨᖏᑦ ᐱᖃᑎᒋᓪᓗᒋᑦ; ᐊᕐᕌᒍᐃᑦ ᐱᖓᓱᑦ ᓈᔭᕌᖓᑕ ᑕᒫᑦ ᓇᒃᓴᖃᑦᑕᕐᓗᑎᒃ ᒎᓗᓂᒃ, ᓯᐅᓪᕕᕆᓂᒃ, ᑑᒑᓂᒃ, ᒪᖓᑭᐊᓗᖕᓂᒃ, ᒪᖓᑭᑐᐃᓐᓇᓂᒡᓗ. 22 ᐊᖓᔪᖅᑳᕐᔪᐊᖅ ᓲᓗᒨᓂ ᐊᒃᓗᐃᓐᓂᕐᓴᐅᓚᐅᕐᐳᖅ ᓯᓚᑐᓂᕐᓴᐅᓪᓗᓂᓗ ᐊᖓᔪᖅᑳᕐᔪᐊᓂᑦ ᓄᓇᒦᑦᑐᓕᒫᓂᑦ. 23 ᐊᖓᔪᖅᑳᕐᔪᐊᓕᒫᑦ ᓄᓇᒦᑦᑐᑦ ᓲᓗᒨᓂᒥᒃ ᑲᑎᓯᕕᒃᓴᕐᓯᐅᖃᑦᑕᓚᐅᕐᐳᑦ ᑐᓴᕈᒪᓪᓗᑎᒃ ᓯᓚᑐᓂᖓᓂᒃ, ᒎᑎᐅᑉ ᑐᓂᓯᒪᔭᖓᓂᒃ ᐃᓱᒪᖓᓄᑦ. 24 ᑲᑎᓯᔭᕐᑐᕐᑐᓕᒫᑦ ᑐᓂᓯᖃᑦᑕᓚᐅᕐᐳᑦ ᑖᑦᓱᒧᖓ: ᓯᐅᓪᕕᕆᓂᒃ ᒎᓗᓂᒡᓗ, ᐊᓐᓄᕌᓂᒃ, ᑎᐱᑦᓯᐊᕆᒃᓴᐅᑎᓂᒃ ᒨᕋᓂᒃ, ᓂᕿᓄᑦ ᐃᓚᐅᕈᑎᒃᓴᓂᒃ ᒪᒪᕐᑐᓂᒃ, ᕿᒻᒥᕐᔪᐊᓂᒃ, ᓯᐅᑎᖅᑯᕐᑐᔪᓂᒃ, ᐊᕐᕌᒍᑕᒫᑦᓯᐊᖅ ᑲᔪᓯᕙᒃᓗᑎᒃ. 25 ᓲᓗᒨᓂ 4,000ᓂᒃ ᕿᒻᒥᕐᔪᐊᒃᑯᕕᖃᓚᐅᕐᐳᖅ ᕿᒧᒃᓯᐅᑎᓄᓪᓗ ᐊᒃᓴᓗᐊᓕᖕᓄᑦ, 12,000ᓂᒡᓗ ᕿᒻᒥᕐᔪᐊᒃᑰᕐᑎᖁᑎᖃᕐᓗᓂ, ᑖᒃᑯᐊ ᐃᒡᓗᒐᓴᖕᓂ ᕿᒧᒃᓯᐅᑎᓄᑦ ᐊᒃᓴᓗᐊᓕᒃᑯᕕᖕᒥᓂ ᐃᓂᖃᕐᑎᑉᐰᑦ ᔨᕉᓴᓕᒥᓗ ᐊᖓᔪᖅᑳᕐᔪᐊᖃᕐᕕᖕᒥ. 26 ᐊᐅᓚᑦᓯᓚᐅᕐᐳᖅ ᐊᖓᔪᖅᑳᕐᔪᐊᓕᒫᓂᒃ ᐃᕗᕅᑎᒥᑦ ᑰᖕᒥᑦ ᐱᒋᐊᕐᓗᒍ ᐱᓕᔅᑍᓂᒥᐅᑦ ᓄᓇᖓᓄᑦ ᑎᑭᓪᓗᒍ, ᐄᑦᔨᑉᑎᐅᓪᓗ ᓄᓇᖓᑕ ᑭᒡᓕᖓᓄᑦ ᑎᑭᓪᓗᒍ. 27 ᐊᖓᔪᖅᑳᕐᔪᐊᑉ ᓯᐅᓪᕕᕇᑦ ᐅᔭᕋᑐᐃᓐᓇᕐᑎᑐᑦ ᔨᕉᓴᓕᒦᑦᑐᑎᑐᑦ ᐃᓱᒪᒋᓚᐅᕐᐰᑦ, ᓇᐹᕐᑐᐃᓪᓗ ᓰᑕᕇᑦ ᐅᓄᕐᑐᐊᓘᓚᐅᕐᐳᑦ ᓇᐹᕐᑐᑎᑐᑦ ᓯᑲᒧᐊᑎᑐᑦ ᓇᕐᓴᒦᑦᑐᑎᑐᑦ. 28 ᕿᒻᒥᕐᔪᐊᓪᓗ ᓲᓗᒨᓂᒧᑦ ᑐᓂᔭᐅᖃᑦᑕᓚᐅᕐᐳᑦ ᐄᑦᔨᑉᑎᒥᑦ ᓄᓇᓕᓕᒫᓂᓪᓗ ᐊᓯᖏᓐᓂᑦ. ᓲᓗᒨᓂᐅᑉ ᐊᐅᓚᑦᓯᓂᖓᑕ ᐅᓂᒃᑲᐅᓯᐅᓂᖓ ᐊᑕᓃᑦ ᓯᕗᓪᓖᑦ 11:41-43 29 ᓲᓗᒨᓂᐅᑉ ᐱᓂᐊᕐᓂᕆᓚᐅᕐᑕᖏᑕ ᐃᓚᖏᑦ, ᐱᒋᐊᕐᓂᖓᓂᑦ ᐃᓱᐊᓄᑦ, ᑎᑎᕋᕐᑕᐅᓯᒪᕗᑦ ᓁᑕᓂᐅᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐱᕙᓪᓕᐊᓯᒪᔪᓂᒃ ᐊᒡᓚᖁᑎᖏᓐᓂ, ᐊᕼᐂᔭᐅᓪᓗ ᓮᓗᓁᑎᒥᐅᑦ ᐅᖃᓪᓚᖕᓂᖏᓐᓂ, ᐃᑑᓪᓗ ᑕᑯᑎᑕᐅᓂᖓᒍᑦ ᓯᕗᓂᒃᓴᒥᒃ ᔨᕈᐳᐊᒻ ᓂᐹᑦ ᐃᕐᓂᖓᓂᒃ ᐱᑦᔪᑎᖃᕐᓗᓂ. 30 ᓲᓗᒨᓂ ᐊᐅᓚᑦᓯᓚᐅᕐᐳᖅ ᔨᕉᓴᓕᒥ ᐃᓴᕆᐊᓕᒥᐅᓕᒫᓂᒃ ᐊᕐᕌᒍᓂᒃ 40ᓂᒃ. 31 ᓲᓗᒨᓂᓗ ᑐᖁᒐᒥ ᓯᕗᓕᕕᓂᕐᒥᓄᐊᕐᐳᖅ, ᐃᓗᕕᕐᑕᐅᕗᕐᓗ ᐊᑖᑕᖓᑕ ᑍᕕᑎᐅᑉ ᐃᒡᓗᒐᓴᖏᓐᓂ; ᐃᕐᓂᖓᓗ ᕆᕼᐅᐳᐊᒻ ᐊᖓᔪᖅᑳᕐᔪᐊᕈᓚᐅᕐᐳᖅ ᑖᑦᓱᒥᖓ ᐃᓇᖐᓪᓗᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society