ᑯᕉᓂᑲ ᐂᑉᐸᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᒃᓯᐊᕐᕕᒡᔪᐊᑉ ᑐᓂᕐᕈᑕᐅᓂᖓ

¹ ᓲᓗᒨᓂ ᑐᒃᓯᐊᕇᕐᒪᑦ, ᐃᑯᒪ ᐊᖅᑲᕐᐳᖅ ᕿᓚᖕᒥᑦ ᑐᓂᕐᕈᑏᓪᓗ ᐃᑯᐊᓚᑎᑕᒃᓮᑦ ᐃᑯᐊᓪᓚᒃᐰᑦ ᑐᓂᕐᕈᑏᓪᓗ ᑐᖁᑕᒃᓮᑦ, ᐊᑕᓂᐅᓪᓗ ᓂᕐᑐᕐᓇᕐᓂᖓᑕ ᑐᒃᓯᐊᕐᕕᒡᔪᐊᖅ ᑕᑕᑉᐹ.

² ᑐᓂᕐᕈᓯᕐᑎᑦᓯᔩᓪᓗ ᐃᑎᕈᓐᓁᓪᓕᕗᑦ ᐊᑕᓂᐅᑉ ᐃᒡᓗᖓᓄᑦ, ᐊᑕᓂᐅᑉ ᓂᕐᑐᕐᓇᕐᓂᖓᑕ ᑕᑕᒻᒪᒍ ᐊᑕᓂᐅᑉ ᐃᒡᓗᖓ.

³ ᐃᓴᕆᐊᓕᐅᓪᓗ ᑭᖑᕚᓕᒫᖏᑦ ᑕᑯᒐᒥᒃ ᐃᑯᒪᒥᒃ ᐊᖅᑲᕐᑐᒥᒃ ᐊᑕᓂᐅᓪᓗ ᓂᕐᑐᕐᓇᕐᓂᖓᑕ ᑐᒃᓯᐊᕐᕕᒡᔪᐊᕐᒧᐊᕐᓂᖓᓂᒃ, ᐹᒻᒪᒃᐳᑦ ᑮᓇᑎᑦ ᓄᓇᒧᑦ ᕿᑯᕐᒧᑦ ᐊᒃᑐᕐᓗᒋᑦ, ᑐᒃᓯᐊᕐᐳᑦ ᓂᕐᑐᐃᓪᓗᑎᒃ ᖁᔭᓕᓪᓗᑎᒡᓗ ᐊᑕᓂᕐᒥᒃ ᐅᖃᕐᓗᑎᒃ: “ᑖᓐᓇ ᐱᐅᔫᕗᖅ, ᓇᒡᓕᖕᓂᖓᓗ ᓱᖁᓯᔪᐃᑦᑐᖅ ᕿᓄᐃᑦᑑᕗᖅ ᐃᓱᖃᖏᑦᑐᒧᑦ.”

⁴ ᑕᕝᕙ ᐊᖓᔪᖅᑳᕐᔪᐊᖅ ᐃᓄᓕᒫᓪᓗ ᑐᓂᕐᕈᓯᕐᐳᑦ ᑐᖁᑕᒃᓴᓂᒃ ᐊᑕᓂᕐᒧᑦ.

⁵ ᐊᖓᔪᖅᑳᕐᔪᐊᖅ ᓲᓗᒨᓂ ᑐᓂᕐᕈᓯᕐᐳᖅ ᑐᖁᑕᒃᓴᓂᒃ 22,000ᓂᒃ ᐃᒻᒧᒃᓯᐅᒐᕐᓂᒃ 120,000ᓂᒡᓗ ᓰᐱᓂᒃ. ᑕᕝᕙ ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᐃᓄᓕᒫᓪᓗ ᒎᑎᐅᑉ ᐃᒡᓗᖓ ᑐᓂᕐᕈᑎᒋᓪᓗᒍ ᐃᑦᔪᕐᓁᑎᑉᐹᑦ.

⁶ ᑕᕝᕙ ᑐᓂᕐᕈᓯᕐᑎᑦᓯᔩᑦ ᐃᓂᒥᓄᐊᕐᐳᑦ ᐱᓇᓱᐊᒐᒃᓴᒥᖕᓄᑦ; ᓕᕔᑏᓪᓗᑦᑕᐅᖅ, ᐊᑕᓂᕐᒧᑦ ᓂᑦᔭᐅᓯᔭᕈᑎᒥᖕᓂᒃ ᓇᒃᓴᕐᓗᑎᒃ ᐊᖓᔪᖅᑳᕐᔪᐊᑉ ᑍᕕᑎᐅᑉ ᐋᖅᑭᓚᐅᕐᑕᖏᑦ ᓂᕐᑐᐃᑦᔪᑎᒃᓴᐅᖁᓪᓗᒋᑦ ᐊᑕᓂᕐᒧᑦ, ᓇᒡᓕᖕᓂᖓ ᓱᖁᓯᔪᐃᑦᑑᖕᒪᑦ ᕿᓄᐃᑦᑑᓪᓗᓂ ᐃᓱᖃᖏᑦᑐᒧᑦ; ᑍᕕᑎ ᑐᓂᕐᕈᓯᓕᑐᐊᕋᒥ ᓂᕐᑐᐃᕙᓚᐅᕐᒪᑦ ᐱᓇᓱᐊᖃᑎᒌᓕᕌᖓᒥᒃ; ᐊᑭᐊᓃᑎᓪᓗᒋᑦ ᑐᓂᕐᕈᓯᕐᑎᑦᓯᔩᑦ ᑎᑦᑐᓚᐅᑎᓄᑦ ᓂᓪᓕᐊᑎᑦᓯᔪᑦ; ᐃᓴᕆᐊᓕᒥᐅᓕᒫᑦ ᓇᖏᕐᑎᓪᓗᒋᑦ.

⁷ ᓲᓗᒨᓂᐅᓪᓗ ᐊᕙᓗᓕᐅᕐᓯᒪᔫᑉ ᕿᑎᐊ ᐃᑦᔪᕐᓁᑎᑉᐹ ᐊᑕᓂᐅᑉ ᐃᒡᓗᖓᑕ ᓯᕗᕌᓃᑦᑐᖅ, ᑕᕝᕙᓂᓗ ᑐᓂᕐᕈᓯᕐᐳᖅ ᐃᑯᐊᓚᑎᑕᒃᓴᓂᒃ ᑐᓐᓄᖏᓪᓗ ᓮᒪᖃᑎᒌᖕᓂᕐᒧᑦ ᑐᓂᕐᕈᑎᒋᕔᑦ, ᑖᓐᓇ ᑐᓂᕐᕈᓯᕐᕕᒃ ᑲᓐᓄᔭ ᓲᓗᒨᓂᐅᑉ ᓴᓇᓚᐅᕐᑕᖓ ᐱᕕᑭᓗᐊᕐᒪᑦ ᑐᓂᕐᕈᑎᒃᓴᓄᑦ ᐃᑯᐊᓪᓚᒋᐊᓕᖕᓄᑦ, ᓂᐊᖂᔭᒃᓴᓄᑦ ᑐᓐᓄᕐᓄᓪᓗ ᑐᓂᕐᕈᑎᓴᓄᑦ.

⁸ ᑍᑦᓱᒪᓂᐅᑎᓪᓗᒍ ᓲᓗᒨᓂ ᓇᓪᓕᐅᓐᓂᕐᓯᐅᕐᑎᑦᓯᓚᐅᕐᐳᖅ ᐅᓪᓗᓂᒃ 7ᓂᒃ, ᐃᓴᕆᐊᓕᒥᐅᓕᒫᓪᓗ ᐃᓚᒋᓪᓗᒋᑦ, ᐅᓄᕐᑐᕐᔪᐊᖑᓪᓗᑎᒃ ᑲᑎᒪᓚᐅᕐᐳᑦ, ᕼᐊᒫᑎ ᐃᑎᕆᐊᕐᕕᖕᒥᑦ ᐄᑦᔨᑉᑎᐅᑉ ᑰᖓᓄᑦ ᑎᑭᓪᓗᒍ.

⁹ ᐅᓪᓗᐃᓪᓗ ᓯᑕᒪᐅᔪᕐᑐᖓᓐᓂ ᑲᑎᒪᓕᓚᐅᕐᐳᑦ ᓇᓪᓕᐅᓐᓂᕐᓯᐅᕐᓂᖏᑕ ᓄᖅᑲᐅᓯᕈᑎᒋᓕᕐᑕᖓᓐᓂᒃ; ᑐᓂᕐᕈᓯᕐᓂᒃᑯᑦ ᐃᑦᔪᕐᓁᑎᑦᓯᓂᕐᒥᒃ ᐊᑐᓚᐅᕐᐳᑦ ᐅᓪᓗᓂᒃ 7ᓂᒃ, ᓇᓪᓕᐅᓐᓂᕐᓯᐅᕐᓗᑎᒡᓗ ᑖᒃᑯᓇᓂ ᐅᓪᓗᓂᒃ 7ᓂᒃ.

¹⁰ ᑕᖅᑮᑦ 7ᖓᓂ ᐅᓪᓗᖏᑕ 23ᖓᓂ ᐃᓄᐃᑦ ᐊᖏᕐᕋᖁᓕᕐᐰᑦ ᐊᖏᕐᕋᖏᓐᓄᑦ, ᖁᕕᐊᓱᒡᓗᑎᒃ ᐆᒻᒪᑎᒥᖕᓂ ᐊᑕᓂᐅᑉ ᐱᑦᓯᐊᕐᓂᖏᑦ ᐱᓪᓗᒋᑦ ᑍᕕᑎᒧᑦ ᓲᓗᒨᓂᒧᓪᓗ ᐃᓴᕆᐊᓕᓄᓪᓗ ᐃᓄᖁᑎᒥᓄᑦ.

ᒎᑎᐅᑉ ᓴᖅᑭᒃᑲᓐᓂᕐᓂᖓ ᓲᓗᒨᓂᒧᑦ

¹¹ ᑕᕝᕙ ᓲᓗᒨᓂ ᐱᔭᕇᓚᐅᕐᐳᖅ ᐊᑕᓂᐅᑉ ᐃᒡᓗᖓᓂᒃ ᐊᖓᔪᖅᑳᕐᔪᐊᓪᓗ ᐃᒡᓗᕐᔪᐊᖓᓂᒃ; ᐱᓇᓱᐊᕈᒪᓚᐅᕐᑕᓂ ᑲᔪᓯᑦᓯᐊᕐᓗᓂ ᐱᔭᕇᑦᓯᐊᓚᐅᕐᐰᑦ ᐊᑕᓂᐅᑉ ᐃᒡᓗᖓᓂᒃ ᓇᖕᒥᓂᕐᓗ ᐃᒡᓗᒥᓂᒃ.

¹² ᑕᕝᕙ ᐊᑕᓂᖅ ᓲᓗᒨᓂᒧᑦ ᓴᖅᑭᑉᐳᑦ ᐅᓐᓄᐊᒃᑯᑦ ᐅᖃᕐᓗᓂᓗ, “ᑐᒃᓯᐊᕐᓂᑎᑦ ᑐᓴᓚᐅᕐᐸᒃᑲ, ᑖᓐᓇᓗ ᐃᒡᓗ ᓂᕈᐊᓚᐅᕐᐸᕋ ᐅᕙᓐᓄᑦ ᐃᒡᓗᒃᓴᐅᖁᓪᓗᒍ ᑐᓂᕐᕈᓯᕐᕕᒃᓴᐅᓗᓂ ᑐᖁᑕᒃᓴᓄᑦ.

¹³ ᕿᓔᑦ ᒪᑐᑐᐊᕈᒃᑭᑦ ᓯᓚᓗᒍᓐᓃᕐᐸᑕ, ᐱᒡᓕᕐᑕᐅᔮᕐᑐᓪᓗ ᑎᓕᒍᒃᑭᑦ ᓄᓇᒥᒃ ᓱᕅᓕᕐᐸᑕ, ᐅᕝᕙᓗ ᐃᓄᖁᑎᒃᑲ ᖃᓂᒪᓇᕐᑐᓄᑦ ᐅᖁᒤᑦᑐᒦᑎᑕᐅᓕᕐᐸᑕ,

¹⁴ ᑕᕝᕙ ᐃᓄᖁᑎᒃᑲ ᐊᑎᓐᓂ ᑐᒃᓯᐊᕐᓗᑎᒃ ᐃᒻᒥᖕᓂᒃ ᒥᑭᒡᓕᑎᕐᐸᑕ, ᑐᒃᓯᐊᕐᓗᑎᒡᓗ ᑮᓇᓐᓂᒃ ᕿᓂᓕᕐᐸᑕ, ᐱᐅᖏᑦᑐᓕᓂᕐᒥᓂᒡᓗ ᕿᒤᒃᐸᑕ, ᑕᕝᕙ ᑐᓴᕐᓂᐊᕐᐸᒃᑲ ᕿᓚᖕᒥᑦ, ᐊᔪᕐᓂᖏᓪᓗ ᐃᓱᒪᒋᔪᓐᓁᕐᓗᒋᑦ ᓄᓇᖓᓗ ᐆᒻᒪᕐᑎᓐᓂᐊᕐᐸᕋ.

¹⁵ ᒫᓐᓇ ᐃᔩᒃᑲᒃ ᐅᐃᑕᓂᐊᕐᐴᒃ ᓯᐅᑏᒃᑲᒡᓗ ᓈᓚᒡᓗᑎᒃ ᑕᕝᕙᓂ ᑐᒃᓯᐊᕈᑕᐅᔪᓂᒃ.

¹⁶ ᒫᓐᓇ ᐃᒡᓗ ᑖᓐᓇ ᓂᕈᐊᕐᓯᒪᕙᕋ ᐃᑦᔪᕐᓁᑎᓪᓗᒍᓗ ᐊᑎᕋ ᑕᕝᕙᓂ ᐃᓂᖃᖁᓪᓗᒍ ᐃᓱᖃᖏᑦᑐᒧᑦ; ᐃᔩᒃᑲᒃ ᐆᒻᒪᑎᒐᓗ ᑕᕝᕙᓃᑦᓮᓐᓇᕐᓂᐊᕐᐴᒃ ᑍᒪᓐᖓᓕᒫᖅ.

¹⁷ ᐃᕝᕕᓪᓗ, ᐃᓅᓂᐊᕈᕕᑦ ᐊᑖᑕᕕᑦ ᑍᕕᑎᐅᑉ ᐃᓅᓂᕆᓚᐅᕐᑕᖓᑐᑦ, ᐱᓇᓱᐊᕐᓂᐊᕈᕕᒋᓪᓗ ᑎᓕᓯᑦᔪᑎᒋᔭᓕᒫᒃᑲ ᐃᓕᖕᓄᑦ, ᐱᓂᐊᕐᓂᐅᖁᔭᒃᑲᓗ ᐊᑐᕐᓂᐊᕈᕕᒋᑦ ᐊᑐᕐᑕᐅᖁᔭᒃᑲᓗ.

¹⁸ ᑕᕝᕙ ᐊᖓᔪᖅᑲᐅᕖᑦ ᑲᔪᓯᑎᓐᓂᐊᕐᐸᕋ, ᐊᑖᑕᖕᓄᑦ ᑍᕕᑎᒧᑦ ᐊᖏᕈᑎᒋᓚᐅᕐᑕᕋ, ᐅᖃᐅᑎᓪᓗᒍ, ‘ᑭᖑᕚᕐᓂᑦ ᐊᐅᓚᑦᑕᐅᖏᓐᓇᕐᓂᐊᕐᐳᖅ ᐃᓴᕆᐊᓕ.’

¹⁹ ᐊᓚᕐᓂᐊᕈᕕᓪᓕ ᕿᒤᓗᑎᓪᓗ ᐱᓂᐊᕐᓂᐅᖁᔭᓐᓂᒃ ᐱᖁᔭᓐᓂᒡᓗ ᐃᓕᖕᓄᑦ ᑐᓂᓯᒪᔭᓐᓂᒃ, ᒎᑎᓐᖑᐊᓄᓪᓗ ᓵᓪᓗᑎᑦ ᑐᒃᓯᐊᕐᕕᖃᓕᕐᓂᐊᕈᕕᑦ,

²⁰ ᑕᕝᕙ ᓄᓱᒍᒫᕐᐸᒋᑦ ᓄᓇᒥᑦ ᑐᓂᓚᐅᕐᑕᓐᓂᑦ ᐃᓕᖕᓄᑦ; ᐃᒡᓗᒥᓪᓗ ᑕᕝᕙᓐᖓᑦ ᐃᑦᔪᕐᓁᑎᓚᐅᕐᑕᓐᓂᑦ ᐊᑎᓐᓂ, ᕿᒪᒍᒫᕐᐸᕋ ᓵᓐᖓᔪᓐᓃᕐᓗᒍ, ᐅᖃᐅᓯᐅᖃᑦᑕᓕᕈᒫᕐᐳᕐᓗ ᐅᖃᕐᓂᕐᓘᑕᐅᓗᓂ ᐃᓄᓕᒫᓄᑦ ᐊᖅᑯᓵᕐᑐᓄᑦ.

²¹ “ᑖᓐᓇᓗ ᐃᒡᓗ, ᓂᕐᑐᕐᓇᕐᓯᑎᑕᐅᓯᒪᔪᖅ, ᓴᓂᖅᑯᑦᑐᓕᒫᓄᑦ ᑲᒪᓂᐊᕈᑕᐅᖃᑦᑕᕈᒫᕐᐳᖅ, ᐅᖃᕐᓗᑎᒡᓗ, ‘ᓱᖕᒪᑦ ᐊᑕᓂᐅᑉ ᑍᒫᒃ ᑕᒪᓐᓇ ᓄᓇ ᐱᓂᐊᕐᕕᐅᑎᓯᒪᕚ ᑖᓐᓇᓗ ᐃᒡᓗ?’

²² ᑕᕝᕙ ᐅᖃᓕᕈᒫᕐᐳᑦ, ‘ᐊᑕᓂᕐᒥᒃ ᓯᕗᓕᖏᑦᑕ ᒎᑎᖓᓂᒃ ᕾᒤᓚᐅᕐᒪᑕ ᐄᑦᔨᑉᑎᐅᑉ ᓄᓇᖓᓂᑦ ᐊᐅᓪᓚᕐᑎᑦᓯᔨᒋᓚᐅᕐᑕᒥᖕᓂᒃ, ᒎᑎᐅᓪᓗ ᐊᓯᐊᓄᑦ ᓵᓐᖓᖔᓕᕐᓗᑎᒃ, ᑐᒃᓯᐊᕐᕕᒋᓪᓗᒋᓪᓗ ᐱᔨᑦᓯᓕᕐᓗᒋᑦ; ᑍᒤᒻᒪᑦ ᑎᑭᑕᐅᑎᓚᐅᕐᐰᑦ ᑕᒪᑐᒧᖓ ᐱᐅᖏᑦᑐᒧᑦ.’”