ᑯᕉᓂᑲ ᐂᑉᐸᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ1 ᑕᕝᕙ ᓲᓗᒨᓂ ᓴᓇᒋᐊᓯᕗᖅ ᐊᑕᓂᐅᑉ ᐃᒡᓗᖓᓂᒃ ᔨᕉᓴᓕᒥ ᖃᖅᑲᐅᑉ ᒧᕅᐊᑉ ᖄᖓᓂ, ᑕᕝᕙᓂ ᐊᑕᓂᐅᑉ ᓴᖅᑭᕝᕕᒋᓚᐅᕐᑕᖓᓂ ᐊᑖᑕᖓᓄᑦ ᑍᕕᑎᒧᑦ, ᑕᕝᕙᓂᓗ ᑍᕕᑎᐅᑉ ᓴᓇᔭᐅᖁᓚᐅᕐᒪᒍ, ᐅᐊᕐᓇᓂᐅᑉ ᔨᐳᓮᑎᒥᐅᑕᐅᑉ ᐃᕖᔧᕕᖓᑕ ᓇᑎᖓᓂ. 2 ᓴᓇᒋᐊᓯᓚᐅᕐᐳᖅ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᐃᑦ ᓯᑕᒪᖓᑕ ᑕᖅᑭᐅᑉ ᐂᑉᐸᕆᓕᕐᑕᖓᓂ. 3 ᓲᓗᒨᓂ ᑐᓐᖓᕕᓕᐅᓚᐅᕐᐳᖅ ᒎᑎᐅᑉ ᐃᒡᓗᖓᓂᒃ: ᑕᑭᓂᖃᕐᑐᒥᒃ 90ᓂᒃ ᐃᑎᒐᖕᓂᒃ, ᓴᓂᒧᑐᓂᖃᕐᓗᓂᓗ ᐃᑎᒐᖕᓂᒃ 30ᓂᒃ. 4 ᐃᑎᕆᐊᕐᕕᖓ ᐃᑦᔪᕐᓁᑦᑐᒃᑯᕕᐅᑉ ᓵᖓᓃᑦᑐᖅ ᑐᒃᓯᐊᕐᕕᒡᔪᐊᑉ ᓯᓕᖕᓂᖓᑐᑦ ᓴᓂᒧᑐᓂᖃᕐᐳᖅ 30ᓂᒃ ᐃᑎᒐᖕᓂᒃ, ᐳᕐᑐᓂᖃᕐᓗᓂ 180ᓂᒃ ᐃᑎᒐᖕᓂᒃ. ᐃᓗᐊ ᐃᓗᐱᐊᕈᑦᓯᕐᐹ ᒎᓗᓪᓚᕆᖕᒥᒃ. 5 ᐃᒡᓗᕈᓯᖅ ᐊᖏᓂᕐᓴᖅ ᐊᑭᓐᓇᓕᐅᕐᐹ ᓮᐳᕋᔅᒥᒃ, ᖄᓕᕐᓗᒍᓗ ᒎᓗᑦᓯᐊᒥᒃ, ᓇᐹᕐᑐᓐᖑᐊᓕᕐᐰᓪᓗ ᐹᓪᒥᓐᖑᐊᓂᒃ ᐊᕐᓵᕐᑑᔭᓐᖑᐊᖃᕐᓗᒋᓪᓗ. 6 ᐃᒡᓗᓗ ᑕᑯᒥᓇᕐᓴᐅᓯᕐᐹ ᐅᔭᕋᖕᓂᒃ ᐱᕕᐊᕐᓇᕐᑐᓂᒃ ᐱᐅᓴᐅᑎᖃᕐᓗᒍ. ᒎᓗᓂᒡᓗ ᐹᕐᕔᒻᒥᑦ ᐱᓯᒪᔪᓂᒃ. 7 ᐃᒡᓘᓪᓗ ᓴᐅᓂᖏᑦ, ᐃᑎᕐᕕᖏᓪᓗ, ᐊᑭᓐᓇᖏᓪᓗ, ᐅᒃᑯᐊᖏᓪᓗ ᖄᐹᕐᐰᑦ ᒎᓗᒥᒃ; ᓯᕋᐱᓐᖑᐊᓂᒡᓗ ᐊᑭᓐᓇᖏᑎᒍᑦ ᐃᑎᕐᓴᓕᐅᕐᓯᒪᔪᓂᒃ ᑎᑎᕋᐅᔭᕐᐳᖅ. 8 ᐃᑦᔪᕐᓁᓐᓂᕐᐹᕐᓗ ᓴᓇᕚ; ᑕᑭᓂᖓ ᐃᒡᓗᒧᑦ ᓈᒻᒪᒃᓯᓕᕐᓯᒪᓪᓗᓂ ᑕᑭᓂᖃᕐᐳᖅ, ᑐᑭᒧᑦ 30ᓂᒃ ᐃᑎᒐᖕᓂᒃ ᓴᓂᒧᓪᓗ 30ᓂᒃ; ᐃᓗᐊᓗ ᖄᐹᕈᑦᑎᕐᐹ ᒎᓗᒥᒃ 50,000ᐸᐅᓂᒃ ᐅᑯᒤᓐᓂᖃᕐᑐᒥᒃ. 9 ᑭᑭᐊᑦ ᐊᑐᕐᑕᐅᔪᑦ ᑕᕝᕗᖓ ᒎᓘᕗᑦ ᐅᖁᒤᓐᓂᖃᕐᓗᑎᒃ 1ᐸᐅᑦ ᐅᖓᑎᑦᑎᐊᖓᓂ; ᐃᒡᓗᐊᕈᓰᓪᓗ ᖁᑦᑎᖕᓂᕐᓮᑦ ᖄᐹᓕᕐᐰᑦ ᒎᓗᓂᒃ. 10 ᐃᑦᔪᕐᓁᓐᓂᕐᐹᒥ ᓴᓇᕗᖅ ᒪᕐᕉᖕᓂᒃ ᓯᕋᐱᓐᖑᐊᖕᓂᒃ ᕿᔫᖕᓂᒃ, ᖄᐹᓕᕐᓗᒋᒡᓗ ᒎᓗᒥᒃ. 11 ᓯᕋᐱᓐᖑᐊᑉ ᐃᓴᕈᖏᑦ ᑕᑭᓂᖃᕐᐴᒃ ᐃᑎᒐᖕᓂᒃ 7ᓂᒃ ᕿᑎᖅᑲᒥᒡᓗ ᐊᑐᓂᑦ: ᐃᒡᓗᐊᕈᓯᐅᑉ ᐊᑭᓐᓇᖓ ᐊᒃᑐᐊᓪᓗᒍ, ᐃᒻᒥᖕᓄᓪᓗ ᓯᕋᐱᓐᖑᐊᒃ ᐃᓴᕈᖏᒃ ᐊᒃᑐᐊᖃᑦᑕᐅᑎᓪᓗᑎᒃ. 12 ᐃᓴᕈᐊ ᐃᒡᓗᐃᓐᓇᖅ ᑕᑭᓂᖃᕐᐳᖅ ᐃᑎᒐᖕᓂᒃ 7ᓂᒃ ᕿᑎᖅᑲᒥᒡᓗ, ᐊᒃᑐᐊᓪᓗᓂ ᐃᒡᓗᐊᕈᓯᐅᑉ ᐊᑭᓐᓇᖓᓄᑦ, ᐃᓴᕈᐊᑕᓗ ᐃᒡᓗᐊ 7ᓂᒃ ᕿᑎᖅᑲᒥᒡᓗ ᐃᑎᒐᖕᓂᒃ ᑕᑭᓂᖃᕆᕗᖅ, ᐃᓴᕈᖏᑦ ᐃᒻᒥᖕᓄᑦ ᐊᒃᑐᐊᖃᑦᑕᐅᑎᓪᓗᑎᒃ. 13 ᐃᓴᕈᖏᑦ ᓯᕋᐱᐅᑉ ᑕᑭᓂᖃᕐᐴᒃ ᐃᑎᒐᖕᓂᒃ 7ᓂᒃ ᕿᑎᖅᑲᒥᒡᓗ, ᓇᖏᕐᓗᑎᒃ ᓇᑎᕐᒥ ᐃᑎᕐᕕᖓᓄᑦ ᓵᓐᖓᖔᕐᓗᑎᒃ. 14 ᑖᓗᑕᕐᑖᕐᑎᑉᐹᓗ ᑐᖑᔪᕐᑕᒥᒃ ᐊᐅᐸᓪᓚᕆᒃᑐᒥᒡᓗ, ᐊᐅᐸᕐᑐᒥᒡᓗ, ᕿᑐᒪᔪᒥᒃ ᖃᓪᓗᓈᕐᑕᒥᒃ ᓵᑦᑐᒥᒃ ᓯᕋᐱᓐᖑᐊᒥᒃ ᑕᕐᓴᖃᕐᓗᓂ. ᒪᕐᕉᓕᖅᑲᖓᒃᔫᒃ ᑲᓐᓄᔮᒃ ᐊᑕᓃᑦ ᓯᕗᓪᓖᑦ 7:15-22 15 ᐃᒡᓘᑉ ᓯᕗᕌᓂ ᒪᕐᕉᖕᓂᒃ ᓱᑳᖕᓂᒃ ᐋᖅᑭᒃᓯᒋᕗᖅ 52ᓂᒃ ᐃᑎᒐᓂᒃ ᑕᑭᓂᖃᕐᑑᖕᓂᒃ ᐊᑐᓂᑦ, ᐃᓕᓪᓗᒋᓪᓗ ᑐᒃᓯᐊᕐᕕᒡᔪᐊᑉ ᐃᑎᕐᑕᕐᕕᖓᑕ ᓴᓂᕋᖏᖕᓄᑦ, ᐊᑐᓂᑦ ᖄᒥᐅᑕᖃᕐᓗᑎᒃ ᐊᖏᓂᖃᕐᑑᖕᓂ ᐃᑎᒐᖕᓂᒃ 7ᓂᒃ ᕿᑎᖅᑲᒥᒡᓗ. 16 ᓴᓇᓐᖑᐊᕐᓯᒪᔪᖃᕐᓗᑎᒃ ᕿᓚᐅᕐᖑᔭᓐᖑᐊᓂᒃ ᐱᕐᕋᕐᓯᒪᔪᓂᒃ ᐅᔭᒥᒃᑎᑐᑦ, ᐃᓕᓪᓗᒋᓪᓗ ᓱᑬᑦ ᖄᖏᓐᓄᑦ; ᓴᓇᒋᕗᖅ 100ᓂᒃ ᓴᓇᓐᖑᐊᕐᓯᒪᔪᓂᒃ ᐸᒥᒍᕌᓐᖑᐊᓂᒃ, ᐃᓕᓪᓗᒋᓪᓗ ᕿᓚᐅᕐᖑᔭᓐᖑᐊᓄᑦ ᐱᕐᕋᕐᓯᒪᔪᑦ ᖄᖓᓄᑦ. 17 ᑖᒃᑯᐊᒃ ᓱᑳᒃ ᓇᑉᐸᕐᐰᒃ ᑐᒃᓯᐊᕐᕕᒡᔪᐊᑉ ᐃᑎᕐᑕᕐᕕᖓᑕ ᓴᓂᕋᖏᖕᓄᑦ, ᐂᑉᐸᖓ ᑕᓕᕐᐱᐊᓄᑦ ᐅᓪᓗᓪᓗᐊᑉ ᓇᓛᓄᑦ ᐂᑉᐸᖓᓗ ᓴᐅᒥᐊᓄᑦ ᐅᓐᓄᐊᓪᓗᐊᑉ ᓇᓛᓄᑦ; ᑕᓕᕐᐱᐊᓃᑦᑐᖅ ᐊᑦᑎᕐᐹ ᔭᑭᓐᒥᒃ, ᓴᐅᒥᐊᓃᑦᑐᕐᓗ ᐊᑦᑎᕐᓗᓂᐅᒃ ᐳᐊᓯᒥᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society