ᑯᕉᓂᑲ ᐂᑉᐸᖏᑦ 26 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖓᔪᖅᑳᕐᔪᐊᖅ ᐅᓮᐊ ᔫᑕᒥᐅᑕᖅ

¹ ᔫᑕᒥᐅᓪᓕ ᐃᓄᓕᒫᖏᑦ ᓂᕈᐊᕐᐳᑦ ᐅᓮᐊᒥᒃ, ᐊᕐᕌᒍᖃᕐᑎᓪᓗᒍ 16ᓂᒃ, ᐊᖓᔪᖅᑳᕐᔪᐊᕈᕐᑎᑉᐹᓪᓗ ᐊᑖᑕᖓᑕ ᐊᒪᔧᐊᐅᑉ ᐃᓂᖓᓄᑦ.

² ᓴᓇᓚᐅᕐᐳᕐᓗ ᐃᓗᑎᒥᒃ ᐃᓚᓕᐅᑎᓪᓗᒍ ᔫᑕᒥᐅᓄᑦ, ᐊᖓᔪᖅᑳᕐᔪᐊᑉ ᐃᓕᔭᐅᓯᒪᓂᖓᑕ ᑭᖑᓂᖓᓂ ᓯᕗᓕᖏᑕ ᐃᓂᖓᓄᑦ.

³ ᐅᓮᐊ ᐊᕐᕌᒍᖃᓚᐅᕐᐳᖅ 16ᓂᒃ ᐊᖓᔪᖅᑳᕐᔪᐊᓐᖑᕐᑎᓪᓗᒍ, ᐊᖓᔪᖅᑳᕐᔪᐊᖑᓚᐅᕐᐳᕐᓗ ᐊᕐᕌᒍᓂᒃ 52ᓂᒃ ᔨᕉᓴᓕᒥ. ᐊᓈᓇᖓ ᐊᑎᖃᕐᐳᖅ ᔨᑯᓔᐊᒥᒃ ᔨᕉᓴᓕᒥᐅᑕᖅ.

⁴ ᐊᑕᓂᐅᓪᓗ ᑕᑯᓐᓇᕐᑕᖓᒍᑦ ᐱᐅᔪᒥᒃ ᐱᓇᓱᐊᓚᐅᕐᐳᖅ, ᐊᑖᑕᖓᑕ ᐊᒪᔧᐊᐅᑉ ᐱᓂᐊᕐᓂᕆᓚᐅᕐᑕᖏᑦ ᒪᓕᒡᓗᒋᑦ.

⁵ ᒎᑎᒥᒃ ᑕᑎᖃᓚᐅᕐᐳᖅ ᓴᑲᕅᐊ ᐃᓅᑎᓪᓗᒍ, ᑖᑦᓱᒪ ᐃᓱᒻᒥᕐᑐᖃᑦᑕᓚᐅᕐᒪᒍ ᒎᑎᒥᒃ ᓯᕘᕋᒋᔭᖃᖁᓪᓗᒍ; ᐊᑕᓂᕐᒥᒃ ᑕᑎᖃᕐᓂᓕᒫᖓᓂ, ᒎᑎᐅᑉ ᐱᕙᓪᓕᐊᑎᑦᓯᐊᓚᐅᕐᐹ.

⁶ ᑖᓐᓇ ᐅᓇᑕᕆᐊᓚᐅᕐᐳᖅ ᐱᓕᔅᑍᓂᒥᐅᓂᒃ, ᒑᑎᐅᓪᓗ ᐊᕙᓗᕐᔪᐊᖏᑦ ᓱᕋᒃᑎᕐᐰᑦ ᔭᑉᓂᐅᓪᓗ ᐊᕙᓗᕐᔪᐊᖏᑦ ᐋᔅᑖᑦᓗ ᐊᕙᓗᕐᔪᐊᖏᑦ; ᐃᒡᓗᒐᓴᓕᐅᕐᐳᕐᓗ ᐋᔅᑖᑦᒥ ᐱᓕᔅᑍᓂᒥᐅᓂᓗ.

⁷ ᒎᑎᐅᑉ ᐃᑲᔪᓚᐅᕐᐹ ᐅᓇᑕᕐᓂᖓᓂ ᐱᓕᔅᑍᓂᒥᐅᓂᒃ, ᐋᕋᑉᓂᒡᓗ ᒎᕐ-ᐰᓕᒥ ᓄᓇᖃᕐᑐᓂ, ᒥ-ᔫᓂᒥᐅᓂᒡᓗ.

⁸ ᐊᒧᓁᑎᒥᐅᓪᓗ ᐃᓚᓕᐅᕆᕗᑦ ᐅᓮᐊᒥᒃ, ᐊᔪᖏᓐᓂᖓᓗ ᖃᐅᔨᒪᔭᐅᑦᓯᐊᓕᓚᐅᕐᐳᖅ ᐄᑦᔨᑉᑎᒥᐅᑦ ᓄᓇᖓᑕ ᑭᒡᓕᖓᓄᑦ ᑎᑭᓪᓗᒍ, ᑖᓐᓇᓗ ᓲᖑᔪᕐᔪᐊᓐᖑᓕᓚᐅᕐᐳᖅ.

⁹ ᐅᓮᐊᓗ ᓇᐸᔪᕐᔪᐊᓕᐅᓚᐅᕐᐳᖅ ᔨᕉᓴᓕᒥ ᐃᑎᕐᑕᕐᕕᖕᒥ ᑎᕆᖅᑯᒥ ᐃᑎᕐᑕᕐᕕᖕᒥᓗ ᓇᕐᓴᒥ, ᓇᐸᔪᓕᐅᕐᐳᕐᓗ ᐊᕙᓘᑉ ᓴᖑᒋᐊᕐᓂᖓᓂ, ᑖᒃᑯᐊᓗ ᓴᐴᓗᑕᕐᔪᐊᓕᐅᕐᐰᑦ.

¹⁰ ᓇᐸᔪᕐᔪᐊᓕᐅᓚᐅᕐᐳᕐᓗ ᐃᓄᖃᖏᑦᑐᒥ, ᐃᑎᕐᓴᓕᐅᕐᐳᕐᓗ ᐃᒥᕐᑕᕐᕕᖕᓂᒃ ᐅᓄᕐᑐᓂᒃ, ᐆᒪᔪᖁᑎᖃᕐᓂᕐᒥᓄᑦ ᐅᓄᕐᑐᓂᒃ, ᓇᕐᓴᓂ ᓇᑎᕐᓇᓂᓗ, ᐱᕈᕐᓰᕕᓕᕆᔨᖃᕐᐳᕐᓗ ᕔᓂᓕᐅᕐᑎᓂᒡᓗ ᖃᖅᑲᓂ ᓄᓇᒥᓗ ᐱᕈᕐᑐᓕᖕᓂ, ᐃᑦᔪᒥᒃ ᐱᐅᒃᓴᓚᐅᕋᒥ.

¹¹ ᓱᓕᓗ ᐅᓮᐊ ᐅᓇᑕᕐᑐᒃᓴᖁᑎᖃᕐᐳᖅ ᐅᓇᑕᕆᐊᕈᓐᓇᕐᑐᓂᒃ ᑲᑎᓐᖓᔪᓂᒃ, ᐅᓄᕐᓂᖏᑦ ᔨ-ᐂᓕᐅᑉ ᐱᖁᔭᓂᒃ ᐃᓕᓯᒪᔫᑉ ᐋᖅᑭᒃᓯᒪᔭᖏᑦ ᒪᓕᒡᓗᒋᑦ ᒫ-ᐊᓯᐊᒧᓪᓗ ᐅᓇᑕᕐᑎᓄᑦ ᐊᖓᔪᖅᑳᖑᔪᒧᑦ, ᕼᐊᓇᓁᐊᐅᑉ ᐊᐅᓚᑦᓯᓂᖓᓄᑦ ᐊᐅᓚᑕᐅᓪᓗᑎᒃ, ᐊᖓᔪᖅᑳᕐᔪᐊᑉ ᐊᖓᔪᖅᑳᖁᑎᖓᑕ ᐃᓚᖓᓐᓄᑦ.

¹² ᐊᖓᔪᖅᑳᑦ ᐃᓚᒌᖕᓂᖏᓐᓂᑦ ᐱᓯᒪᔪᑦ ᐊᖑᑏᑦ ᐊᔪᖏᑦᑐᕐᔪᐊᑦ ᓯᕘᕋᖏᑦᑐᑦ ᐅᓇᑕᕈᓐᓇᕐᑐᑦ 2,600ᐅᕗᑦ.

¹³ ᑖᒃᑯᐊ ᐊᖓᔪᖅᑳᑦ ᑲᒪᒋᔭᖃᕐᐳᑦ ᐅᓇᑕᕐᑐᒃᓴᓂᒃ 307,500ᓂᒃ, ᐅᓇᑕᕈᓐᓇᕐᑐᑦ ᐱᔪᓐᓇᕐᑐᕐᔪᐊᑦ, ᐊᖓᔪᖅᑳᕐᔪᐊᕐᒥᒃ ᐃᑲᔪᕈᓐᓇᕐᑐᑦ ᐅᓇᑕᕐᓗᑎᒃ ᐊᑭᕋᖏᓐᓂᒃ.

¹⁴ ᐅᓮᐊᐅᓪᓗ ᐊᑐᐃᓐᓇᕈᕐᑎᕐᓗᒋᑦ ᑐᓂᕔᑦ, ᐅᓇᑕᕐᑎᓕᒫᑦ ᓴᐴᓗᑕᕐᓂᒃ, ᖃᓗᒋᐊᓂᒃ, ᓇᓴᕐᓂᒃ, ᑎᒥᖓᑕ ᓴᐴᓗᑕᖏᓐᓂᒃ, ᖃᕐᔪᓂᒃ, ᐅᔭᕋᖕᓂᒡᓗ ᐃᓪᓘᕆᐊᕈᑎᒃᓴᓂᒃ.

¹⁵ ᓴᓇᕝᕕᓕᐅᕐᐳᕐᓗ ᔨᕉᓴᓕᒥ, ᓴᖅᑭᑦᑎᓪᓗᓂᓗ ᐱᔪᓐᓇᑦᓯᐊᕐᑐᓂᒃ ᐊᖑᑎᓂᒃ, ᓇᐸᔪᕐᔪᐊᓃᑦᑐᒃᓴᓂᒃ ᑎᕆᖅᑯᖏᓐᓂᓗ, ᐱᓯᒋᐊᕐᑎᐅᖁᓪᓗᒋᑦ ᐅᔭᕋᖕᓄᓪᓗ ᐊᖏᔫᑎᓄᑦ ᒥᓪᓗᕐᑎᐅᖁᓪᓗᒋᑦ. ᑐᓴᐅᒪᔭᐅᓕᕐᐳᕐᓗ ᐅᖓᓯᒃᑐᒥᐅᓂᑦ ᐊᖏᔪᐊᓗᖕᒥᒃ ᒎᑎᒧᑦ ᐃᑲᔪᕐᑕᐅᓯᒪᓂᖓᓄᑦ, ᓲᖑᓯᑎᑕᐅᓯᒪᓂᖓᓂᒡᓗ.

ᐅᓮᐊᐅᑉ ᓱᒋᐊᕐᑕᐅᓂᖓ ᐱᐅᔪᕆᓂᖓᓄᑦ

¹⁶ ᐱᔪᓐᓇᕐᓯᒐᒥ ᐆᒻᒪᑎᒥᒍᑦ ᐱᐅᔪᕆᓂᖃᓕᓚᐅᕐᐳᖅ, ᑕᒪᓐᓇᓗ ᑲᑕᒍᑎᒋᓪᓗᓂᐅᒃ. ᓱᓕᖏᑦᑐᒦᓕᓚᐅᕐᒪᑦ ᐊᑕᓂᕐᒧᑦ ᒎᑎᒥᓄᑦ, ᐃᓯᓚᐅᕐᒪᑦ ᐊᑕᓂᐅᑉ ᑐᒃᓯᐊᕐᕕᒡᔪᐊᖁᑎᖓᓄᑦ ᐃᑯᐊᓪᓔᒋᐊᕐᑐᕐᓗᓂ ᑎᐱᑦᓯᐊᕆᒃᑐᒥᒃ ᑐᓂᕐᕈᓯᕐᕕᖕᒥ.

¹⁷ ᐊᔭᕅᐊᓕ ᑐᓂᕐᕈᓯᕐᑎᑦᓯᔨ ᒪᓕᒡᓗᓂ ᐃᑎᕐᐳᖅ ᑭᖑᓂᐊᒍᑦ, ᐊᑕᓂᐅᑉ ᑐᓂᕐᕈᓯᕐᑎᑦᓯᔨᖁᑎᖏᑦ 80 ᐃᓚᒋᓪᓗᒋᑦ ᓯᕘᕋᖏᑦᑐᑦ ᐊᖑᑏᑦ;

¹⁸ ᑖᒃᑯᐊᓗ ᐅᓮᐊ ᐊᖓᔪᖅᑳᕐᔪᐊᖅ ᓵᓐᖓᓕᕐᐹᑦ, ᐅᖃᐅᑎᓪᓗᒍᓗ, “ᑍᒤᓕᐅᕐᑐᒃᓴᐅᓐᖏᓚᑎᑦ ᐅᓮᐊ, ᐃᑯᐊᓪᓔᓗᑎᑦ ᑎᐱᑦᓯᐊᕆᒃᑐᒥᒃ ᐊᑕᓂᕐᒧᑦ, ᑐᓂᕐᕈᓯᕐᑎᑦᓯᔩᑦ ᐂᕉᓂᐅᑉ ᑭᖑᕚᖏᑦ ᑖᒃᑯᐊᑐᐊᖅ ᑍᒤᓕᐅᕐᑐᒃᓴᐅᕗᑦ, ᑖᒃᑯᐊ ᐃᑦᔪᕐᓁᑎᑕᐅᓯᒪᕗᑦ ᐃᑯᐊᓪᓔᖁᓪᓗᒋᑦ ᑎᐱᑦᓯᐊᕆᒃᑐᒥᒃ. ᑕᕝᕙᓐᖓᑦ ᐊᓂᓕᕆᑦ ᐃᑦᔪᕐᓁᑦᑐᒃᑯᕕᖕᒥᑦ; ᑕᒻᒪᓚᐅᕋᕕᑦ, ᐃᓕᖕᓂᒃ ᐅᐱᓐᓇᕈᓐᓃᕐᑎᑉᐳᑎ ᐊᑕᓂᕐᒧᑦ ᒎᑎᒧᑦ.”

¹⁹ ᐅᓮᐊᓕ ᓂᓐᖓᒃᐳᖅ, ᑎᒍᒥᐊᕐᓗᓂᓗ ᑎᐱᑦᓯᐊᕆᒃᑐᒥᒃ ᐃᑯᐊᓪᓔᑦᔪᑎᒥᒃ, ᓂᓐᖓᐅᑦᔨᒐᒥ ᑐᓂᕐᕈᓯᕐᑎᑦᓯᔨᓂᒃ ᐸᕐᑎᕐᓂᕐᒧᑦ ᐱᒋᐊᕐᕕᐅᓕᕐᐳᖅ ᖃᐅᖓᒍᑦ, ᑐᓂᕐᕈᓯᕐᑎᑦᓯᔩᑦ ᓇᔫᑎᑎᓪᓗᒋᑦ ᐊᑕᓂᐅᑉ ᐃᒡᓗᖓᓂ, ᑐᓂᕐᕈᓯᕐᕕᐅᑉ ᐃᑯᐊᓚᑦᓯᕕᖓᑕ ᓴᓂᕌᓂ.

²⁰ ᐊᔭᕅᐊᐅᓪᓗ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑕ ᐊᓯᖏᑕᓗ ᑐᓂᕐᕈᓯᕐᑎᑦᓯᔩᑦ ᑕᑯᓐᓇᕐᐹᑦ, ᑕᑯᒋᓪᓗ, ᖃᐅᖓᒍᑦ ᐸᕐᑎᓕᕐᐸᓪᓕᐊᓕᕐᐳᖅ! ᑕᕝᕙ ᑐᐊᕕᕐᓗᑎᒃ ᐊᓂᑎᒋᐊᓯᕚᑦ ᑕᕝᕙᓐᖓᑦ, ᐃᒻᒥᓂᒡᓗ ᑐᐊᕕᕐᓗᓂ ᐊᓂᓇᓱᐊᕆᓪᓗᓂ, ᐊᑕᓂᐅᑉ ᓱᒋᐊᓚᐅᕐᒪᒍ.

²¹ ᐊᖓᔪᖅᑳᕐᔪᐊᕐᓗ ᐅᓮᐊ ᐸᕐᑎᓕᓚᐅᕐᐳᖅ ᐅᓪᓗᖅ ᑐᖁᕕᐊ ᑎᑭᓪᓗᒍ, ᐸᕐᑎᕐᓂᖓᓄᓪᓗ ᐃᓂᖃᓕᓚᐅᕐᐳᖅ ᐃᓄᖃᖏᑦᑐᒥ ᐃᒡᓗᒥ; ᐃᑎᕐᑎᑕᐅᔪᓐᓁᓪᓕᓪᓗᓂᓗ ᐊᑕᓂᐅᑉ ᐃᒡᓗᖓᓄᑦ. ᔫᑕᒻᓗ ᑖᑦᓱᒪ ᐃᕐᓂᖓ ᐊᖓᔪᖅᑳᕐᔪᐊᑉ ᐃᒡᓗᖓᓂᒃ ᑲᒪᔨᐅᓕᕐᐳᖅ, ᐊᐅᓚᑦᓯᔨᒻᒪᕆᐅᓪᓗᓂ ᐃᓄᖕᓂᒃ ᓄᓇᓕᖕᓂ.

²² ᐅᓮᐊᐅᓪᓕ ᐱᓂᐊᕐᓂᖏᑕ ᐃᓚᖏᑦ, ᓯᕗᓪᓕᕐᐹᒥᑦ ᑭᖑᓪᓕᕐᐹᒧᑦ, ᐂᓮᐊᓯᐅᑉ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐂᒨᓯᐅᑉ ᐃᕐᓂᖓᑕ ᑎᑎᕋᕐᓯᒪᕔᑦ.

²³ ᐅᓮᐊᓗ ᑐᖁᖕᒪᑦ ᓯᕗᓕᖏᑕ ᐃᓂᖏᓐᓄᐊᕐᐳᖅ, ᐃᓗᕕᕐᐹᓪᓗ ᓯᕗᓕᖏᑦᑕ ᐃᓗᕕᖃᕐᕕᖏᓐᓂ ᐱᕈᕐᓰᕕᖕᒥ ᐊᖓᔪᖅᑳᕐᔪᐊᑦ ᐃᓗᕕᖃᕐᕕᖏᓐᓂ, ᐅᖃᓚᐅᕐᒪᑕ, “ᑖᓐᓇ ᐸᕐᑎᕐᑑᕗᖅ.” ᔫᑕᒻᓗ ᑖᑦᓱᒪ ᐃᕐᓂᖓ ᐊᖓᔪᖅᑳᕐᔪᐊᓐᖑᓚᐅᕐᐳᖅ ᑖᑦᓱᒥᖓ ᐃᓇᖐᓪᓗᓂ.