ᑯᕉᓂᑲ ᐂᑉᐸᖏᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦᐊᑕᓔᐊᐅᑉ ᐊᑭᕋᕐᑐᕐᑕᐅᓕᕐᓂᖓ ᐊᑕᓃᑦ ᐂᑉᐸᖏᑦ 11:4-16 1 ᐊᕐᕌᒍᐃᑦ 7ᖓᓐᓂ ᔨᕼᐅᐃᐊᑕ ᓴᐱᕈᓐᓃᕐᐳᖅ, ᐊᖏᖃᑎᖃᕐᓗᓂᓗ ᐊᖓᔪᖅᑲᐅᔪᓂᒃ 100ᓄᑦ, ᐊᔭᕅᐊ ᔨᕈᕼᐋᒥᐅᑉ ᐃᕐᓂᖓ, ᐃᓯᒥᐅᓕᓗ ᔨᕼᐅᕼᐊᓇᐅᑉ ᐃᕐᓂᖓ, ᐊᔭᕅᐊᓗ ᐅᐱᑎᐅᑉ ᐃᕐᓂᖓ, ᒫ-ᐊᓯᐊᓗ ᐊᑍᐊᐅᑉ ᐃᕐᓂᖓ, ᐃᓔᓴᐸᑎᓗ ᔨᒃᕆᐅᑉ ᐃᕐᓂᖓ. 2 ᑖᒃᑯᐊ ᔫᑕ ᐃᖏᕐᕋᕕᒋᕚᑦ ᑲᑎᕐᓱᐃᓪᓗᑎᒃ ᓕᕔᑎᓂᒃ ᔫᑕᐅᑉ ᐃᒡᓗᒐᓴᓕᒫᖏᓐᓂᑦ, ᐊᖓᔪᖅᑲᐅᔪᓂᒡᓗ ᑭᖑᕚᕇᓄᑦ ᐃᓴᕆᐊᓕᒥᐅᓄᑦ, ᑖᒃᑯᐊᓗ ᔨᕉᓴᓕᒧᐊᕐᐳᑦ. 3 ᑲᑎᒪᔪᓕᒫᓪᓗ ᐊᖏᖃᑎᒌᒍᑎᓕᐅᕐᐳᑦ ᐊᖓᔪᖅᑳᕐᔪᐊᒃᓴᒧᑦ ᒎᑎᐅᑉ ᐃᒡᓗᖓᓃᑦᓱᒪᓪᓗᑎᒃ. ᔨᕼᐅᐃᐊᑕᐅᓪᓗ ᐅᖃᐅᑎᕔᑦ, “ᑕᑯᒋᑦ, ᑕᕝᕙ ᐊᖓᔪᖅᑳᕐᔪᐊᑉ ᐃᕐᓂᖓ! ᑖᓐᓇ ᐊᐅᓚᑦᓯᔨᕈᓕᕐᓕ, ᑍᕕᑎᐅᑉ ᐃᕐᓂᖏᑦ ᐊᑕᓂᐅᑉ ᑍᒫᒃ ᐅᖃᐅᓯᕆᓚᐅᕐᒪᒋᑦ. 4 ᐃᒤᓕᐅᕐᑐᒃᓴᐅᕗᓯ: ᐃᓕᑦᓯ ᑐᓂᕐᕈᓯᕐᑎᑦᓯᔩᑦ ᓕᕔᑏᓪᓗ ᓴᐸᑎᒥ ᐱᓇᓱᐊᒃᓴᖃᖏᑦᑐᑦ, ᑖᒃᑯᐊ ᐱᖓᔪᖏᑦ ᖃᐅᔨᓴᕐᑎᐅᔪᒃᓴᐅᕗᑦ ᐃᑎᕐᑕᕐᕕᖕᓂ; 5 ᐱᖓᔪᖏᑦ ᐊᖓᔪᖅᑳᕐᔪᐊᑉ ᐃᒡᓗᖓᓃᑦᑐᒃᓴᐅᕗᑦ ᐱᖓᔪᒃᑲᓐᓂᖏᓪᓗ ᑐᓐᖓᕕᐅᑉ ᐃᑎᕐᑕᕐᕕᒡᔪᐊᖓᓃᑦᑐᒃᓴᐅᕗᑦ; ᐃᓄᓕᒫᓪᓗ ᐊᑕᓂᐅᑉ ᐃᒡᓗᖓᑕ ᐱᕕᑐᓂᖓᓃᑦᑐᒃᓴᐅᕗᑦ. 6 ᓇᓪᓕᐊᓪᓘᓐᓃᑦ ᐊᑕᓂᐅᑉ ᐃᒡᓗᖓᓄᐊᕐᑐᒃᓴᐅᓐᖏᓚᖅ ᑐᓂᕐᕈᓯᕐᑎᑦᓯᔩᑦ ᓕᕔᑎᓪᓗ ᐱᓇᓱᐊᕐᑐᑦ ᑖᒃᑯᐊ ᐃᑎᕈᓐᓇᕐᑐᑑᔪᒃᓴᐅᕗᑦ, ᐃᑦᔪᕐᓁᑦᑑᖕᒪᑕ; ᐃᓄᓕᒫᓪᓕ ᓈᓚᒃᑐᒃᓴᐅᕗᑦ ᐊᑕᓂᕐᒥᒃ ᖃᓄᐃᓕᐅᖁᔨᓂᐊᕐᒪᖔᑦ. 7 ᓕᕔᑏᑦ ᐊᖓᔪᖅᑳᕐᔪᐊᒃᓴᒥᒃ ᐊᕙᓗᐃᒪᔪᒃᓴᐅᕗᑦ, ᓱᒋᐅᑦᑎᔭᕐᓗᑎᒃ; ᓇᓪᓕᐊᓪᓘᓐᓃᑦ ᐃᒡᓗᒧᑦ ᐃᑎᕐᑐᖅ ᑖᓐᓇ ᑐᖁᑕᐅᔪᒃᓴᐅᕗᖅ. ᐊᖓᔪᖅᑳᕐᔪᐊᖅ ᐃᓚᒋᔭᒃᓴᕆᕙᓯ ᐃᑎᕐᑎᓪᓗᒍ, ᐊᒻᒪ ᐊᓂᓕᕐᑎᓪᓗᒍ.” 8 ᓕᕔᑎᑦ ᔫᑕᒥᐅᓕᒫᓪᓗ ᐱᓇᓱᐊᓚᐅᕐᐳᑦ ᑐᓂᕐᕈᓯᕐᑎᑦᓯᔨᐅᑉ ᔨᕼᐅᐃᐊᑕᐅᑉ ᐱᓇᓱᐊᕐᑕᐅᖁᔭᖓᓂᒃ. ᐊᑐᓂᑦ ᐃᓚᒥᖕᓂᒃ ᓇᒃᓴᓚᐅᕐᐳᑦ ᓴᐸᑎᒥ ᐱᓇᓱᐊᒐᒃᓴᖃᖏᑦᑐᓂᒃ, ᐱᓇᓱᐊᕐᑐᒃᓴᐅᔪᓪᓗ ᓴᐸᑎᒥ ᐱᖃᑕᐅᖕᒥᑎᓪᓗᒋᑦ; ᑐᓂᕐᕈᓯᕐᑎᑦᓯᔨᐅᓪᓗ ᔨᕼᐅᐃᐊᑕᐅᑉ ᓄᖅᑲᖓᑎᓚᐅᓐᖏᓔᑦ ᐊᕕᒃᑐᓯᒪᔪᓂ ᐱᔭᒃᓴᖃᖏᑦᑐᑦ. 9 ᑐᓂᕐᕈᓯᕐᑎᑦᓯᔨ ᔨᕼᐅᐃᐊᑕ ᑐᓂᓯᕗᖅ ᐅᓇᑕᕐᑐᒃᓴᓄᑦ ᐊᖓᔪᖅᑲᐅᔪᓄᑦ 100ᓄᑦ ᖃᓗᒋᐊᓂᒃ ᓴᐴᓗᑕᕐᓂᒡᓗ ᐊᖏᔪᓂᒃ ᒥᑭᔪᓂᒡᓗ ᐊᖓᔪᖅᑳᕐᔪᐊᑉ ᑍᕕᑎᐅᑉ ᐱᒋᓚᐅᕐᑕᖏᓐᓂᒃ, ᒎᑎᐅᑉ ᐃᒡᓗᖓᓃᑦᑐᓂᒃ; 10 ᐃᓄᐃᓪᓗ ᐋᖅᑭᒃᓱᕐᐰᑦ ᐃᓂᒋᓂᐊᕐᑕᖏᓐᓄᑦ ᐊᖓᔪᖅᑳᕐᔪᐊᒃᓴᒥᒃ ᓴᐳᓐᓂᐊᕐᑎᒃᓮᑦ, ᐊᑐᓂᑦ ᓱᒋᐅᑎᖃᖁᓪᓗᒋᑦ, ᑐᒃᓯᐊᕐᕕᒡᔪᐊᑉ ᑕᓕᕐᐱᐊᓂ ᓴᐅᒥᐊᓂᓗ ᑐᓂᕐᕈᓯᕐᕕᐅᓪᓗ ᓴᓂᐊᓂ ᑐᒃᓯᐊᕐᕕᒡᔪᐊᓪᓗ ᐊᕙᓗᐊᓂ. 11 ᑕᕝᕙ ᐊᖓᔪᖅᑳᕐᔪᐊᑉ ᐃᕐᓂᖓ ᑕᕝᕗᓐᖓᐅᑎᕚ, ᐊᖓᔪᖅᑳᕐᔪᐊᕐᓯᐅᒻᒥᒡᓗ ᓂᐊᖂᑎᒥᒃ ᐊᑎᑎᑉᐹ, ᐱᖁᔭᓂᒡᓗ ᑐᓂᓯᕕᒋᕚ; ᓂᓪᓕᕐᓗᑎᒡᓗ ᐊᖓᔪᖅᑳᕐᔪᐊᓐᖑᕐᓂᕋᕐᐹᑦ, ᑕᕝᕙ ᔨᕼᐅᐃᐊᑕᐅᑉ ᐃᕐᓂᖏᑕᓗ ᐅᕐᓱᕐᑎᕐᐹᑦ ᑎᓕᓪᓗᒍ, ᐅᖃᕐᓗᑎᒡᓗ, “ᐊᖓᔪᖅᑳᕐᔪᐊᖅ ᐊᑯᓂ ᐃᓅᓕ!” 12 ᐊᑕᓔᐊᓕ ᓂᐱᓂᒃ ᑐᓴᕋᒥ ᐅᓪᓚᔭᒃᑐᓂᒃ ᐊᖓᔪᖅᑳᕐᔪᐊᒥᒡᓗ ᓂᕐᑐᐃᔪᓂᒃ, ᐃᓄᖕᓄᑦ ᐂᕗᖅ ᐊᑕᓂᐅᑉ ᑐᒃᓯᐊᕐᕕᒡᔪᐊᖓᓄᑦ. 13 ᑕᑯᓴᕋᒥᓗ, ᑕᑯᕗᖅ ᐊᖓᔪᖅᑳᕐᔪᐊᕐᒥᒃ ᓇᖏᕐᑐᒥᒃ ᐃᑎᕆᐊᕐᕕᐅᑉ ᓱᑲᖓᑕ ᓴᓂᐊᓂ, ᐅᓇᑕᕐᑐᒃᓮᓪᓗ ᐊᖓᔪᖅᑳᖏᑦ ᑎᑦᑐᓚᐅᓯᔭᕐᑏᓪᓗ ᐊᖓᔪᖅᑳᕐᔪᐊᑉ ᓴᓂᐊᓃᑉᐳᑦ, ᐃᓄᓕᒫᓪᓗ ᓄᓇᓖᑦ ᖁᕕᐊᓱᒃᐳᑦ ᑎᑦᑐᓚᐅᑎᓄᓪᓗ ᓂᓪᓕᐊᑎᑦᓯᓪᓗᑎᒃ, ᐃᓐᖏᕐᑏᓪᓗ ᓂᑦᔭᐅᓯᔭᕐᑐᑦ ᓯᕗᓕᕐᓗᑎᒃ ᖁᕕᐊᓲᑎᖃᕐᐳᑦ. ᐊᑕᓔᐊᐅᓪᓗ ᐊᓐᓄᕌᓂ ᐊᓕᒃᓗᒋᑦ ᐅᖃᕐᐳᖅ, “ᐊᑭᕋᕐᑐᓕᕐᐳᓯ! ᐊᑭᕋᕐᑐᓕᕐᐳᓯ!” 14 ᑕᕝᕙ ᔨᕼᐅᐃᐊᑕ ᑐᓂᕐᕈᓯᕐᑎᑦᓯᔨ ᕾᖁᔨᕗᖅ ᐅᓇᑕᕐᑐᒃᓮᑦ ᐊᖓᔪᖅᑳᖏᓐᓂᒃ, ᐅᖃᐅᑎᓪᓗᒋᓪᓗ, “ᑎᒍᓗᓯᐅᒃ ᐊᓐᓂᓯᓯᐅᒃ ᐅᓇᑕᕐᑐᒃᓮᑦ ᐊᑯᓐᓂᖓᓄᑦ; ᒪᓕᒃᑎᖃᑐᐊᕐᐸᓪᓗ ᑐᖁᑕᐅᔪᒃᓴᐅᕗᑦ ᓴᕕᒡᔪᐊᒧᑦ.” ᑐᓂᕐᕈᓯᕐᑎᑦᓯᔨ ᐅᖃᕐᐳᖅ, “ᐊᑕᓂᐅᑉ ᐃᒡᓗᖓᓂ ᑐᖁᑦᑍᓕᓯᐅᒃ.” 15 ᑕᕝᕙ ᑎᒍᕚᑦ; ᕿᒻᒥᕐᔪᐊᓪᓗ ᐃᑎᕐᑕᕐᕕᖓᒎᕐᐳᑦ ᐊᖓᔪᖅᑳᕐᔪᐊᑉ ᐃᒡᓗᖓᓄᑦ, ᑍᑲᓂᓗ ᑐᖁᑉᐹᑦ. ᔨᕼᐅᐃᐊᑕᐅᑉ ᐱᒋᐊᑦᓯᐊᕐᑎᑦᓯᓂᖓ ᐊᑕᓃᑦ ᐂᑉᐸᖏᑦ 11:17-20 16 ᔨᕼᐅᐃᐊᑕᓗ ᐊᖏᖃᑎᒌᒍᑎᓕᐅᕐᐳᖅ ᐃᒻᒥᓄᑦ ᐃᓄᓕᒫᓄᓪᓗ ᐊᖓᔪᖅᑳᕐᔪᐊᒧᓪᓗ ᐊᑕᓂᕐᒧᑦ ᐃᓄᖁᑎᒋᔭᐅᔪᒪᓪᓗᑎᒃ. 17 ᐃᓄᓕᒫᓪᓗ ᐰᓕᐅᑉ ᑐᒃᓯᐊᕐᕕᖓᓄᐊᕐᐳᑦ, ᓱᕋᒃᑎᕐᓗᒍᓗ; ᑐᓂᕐᕈᓯᕐᕕᖏᓪᓗ ᓴᓇᓐᖑᐊᕐᓯᒪᔪᓪᓗ ᓯᖁᑦᑎᕐᐰᑦ, ᑐᓂᕐᕈᓯᕐᑎᑦᓯᔨᖓᓗ ᒫᑖᓂ ᑐᖁᑉᐹᑦ ᑐᓂᕐᕈᓯᕐᕕᖏᑕ ᓵᖓᓂ. 18 ᔨᕼᐅᐃᐊᑕᓗ ᑎᓕᓯᕗᖅ ᐊᑕᓂᐅᑉ ᐃᒡᓗᖓ ᖃᐅᔨᓴᕐᑎᑕᖃᖁᓪᓗᒍ ᑐᓂᕐᕈᓯᕐᑎᑦᓯᔨᓄᑦ ᓕᕔᑎᓄᓪᓗ ᑲᒪᒋᔭᐅᔪᓂᒃ ᑍᕕᑎᐅᑉ ᐱᒋᐊᕐᑎᓚᐅᕐᑕᖏᓐᓄᑦ ᐊᑕᓂᐅᑉ ᐃᒡᓗᖓᓂᒃ ᑲᒪᔨᐅᖁᓪᓗᒋᑦ, ᑐᓂᕐᕈᓯᕐᑎᐅᖁᓪᓗᒋᑦ ᐃᑯᐊᓚᑎᑦᓯᓗᑎᒃ ᐊᑕᓂᕐᒧᑦ, ᒨᓯᓯᐅᑉ ᐱᖁᔭᖏᓐᓂ ᑎᑎᕋᕐᑕᐅᓯᒪᓂᖓᑐᑦ, ᖁᕕᐊᓱᒡᓗᑎᒃ ᐃᓐᖏᕐᓗᑎᒡᓗ, ᑕᒪᓐᓇ ᑍᕕᑎᐅᑉ ᑎᓕᓯᑦᔪᑎᒋᓯᒪᔭᖓ ᒪᓕᒡᓗᒍ. 19 ᐃᑎᕐᑕᕐᕕᖕᓂ ᑲᒪᔨᐅᓂᐊᕐᑐᑦ ᑎᓕᕔᑦ ᐊᑕᓂᐅᑉ ᐃᒡᓗᖓᑕ ᐃᑎᕐᑕᕐᕕᖏᓐᓂ ᓇᓪᓕᐊᓪᓘᓐᓃᑦ ᓴᓗᒤᑦᑐᖅ ᐃᑎᖁᓇᒍ ᑕᕝᕗᖓ. 20 ᑖᑦᓱᒪᓗ ᑎᓕᒋᕔᑦ ᐅᓇᑕᕐᑎᓄᑦ ᐊᖓᔪᖅᑳᑦ 100ᓄᑦ, ᐊᖓᔪᖅᑳᓪᓗ, ᐃᓄᖕᓄᓪᓗ ᐊᖓᔪᖅᑳᑦ, ᐃᓄᓕᒫᓪᓗ ᓄᓇᓕᖕᓂ; ᐊᖓᔪᖅᑳᕐᔪᐊᕐᓗ ᐊᑕᓂᐅᑉ ᐃᒡᓗᖓᓂᑦ ᐊᓂᑎᑉᐹᑦ, ᐱᓱᖃᑎᒌᒡᓗᑎᒃ ᐃᑎᕐᑕᕐᕕᒃᑯᑦ ᐳᕐᑐᓂᕐᓴᒃᑯᑦ ᐊᖓᔪᖅᑳᕐᔪᐊᑉ ᐃᒡᓗᖓᓄᑦ. ᐊᖓᔪᖅᑳᕐᔪᐊᕐᓗ ᐃᒃᓯᕙᐅᑕᕐᔪᐊᕐᒧᑦ ᐃᖏᑎᑉᐹᑦ ᐊᖓᔪᖅᑳᕐᔪᐊᖑᕕᖓᓄᑦ. 21 ᐃᓄᓕᒫᓪᓗ ᓄᓇᓕᖕᓃᑦᑐᑦ ᖁᕕᐊᓱᖃᑎᒌᒃᐳᑦ; ᐃᒡᓗᒐᓮᓪᓗ ᐃᓂᓪᓚᑦᓯᐊᕐᓗᑎᒃ ᓂᐰᑦᑑᓕᓚᐅᕐᐳᑦ, ᐊᑕᓔᐊᐅᑉ ᑐᖁᑕᐅᓂᖓᑕ ᑭᖑᓂᖓᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society