ᑯᕉᓂᑲ ᐂᑉᐸᖏᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᐅᖃᐅᑦᔨᒋᐊᕐᓂᖓ ᔨᕼᐆᓴᐸᑦᒥᒃ

¹ ᔫᑕᒥᐅᑦ ᐊᖓᔪᖅᑳᕐᔪᐊᖓ ᔨᕼᐆᓴᐸᑦ ᔨᕉᓴᓕᒧᑦ ᐅᑎᕐᐳᖅ ᐊᖏᕐᕋᒥᓄᑦ ᖃᓄᐃᓐᓇᓂ.

² ᔨᕼᐆ ᕼᐊᓇᓁᑉ ᐃᕐᓂᖓ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᑖᑦᓱᒧᓐᖓᕐᐳᖅ ᐸᕐᕆᐊᕐᓗᓂᐅᒃ, ᐅᖃᐅᑎᕚᓗ ᐊᖓᔪᖅᑳᕐᔪᐊᖅ ᔨᕼᐆᓴᐸᑦ, “ᐃᑲᔪᕐᑐᒃᓴᐅᕖᑦ ᐱᐅᖏᑦᑐᓕᔪᓂᒃ ᓇᒡᓕᒋᔭᒃᓴᕆᕕᒋᓪᓗ ᐊᑕᓂᕐᒥᒃ ᐆᒥᓱᒃᑐᑦ? ᑍᒤᒻᒪᑦ ᐊᑕᓂᐅᑉ ᓂᓐᖓᐅᓯᖓᑕ ᖁᓚᖏᐊᓕᕐᐹᑎᑦ.

³ ᑍᒤᒃᑲᓗᐊᕐᒪᑦ, ᐱᐅᔪᓂᒃ ᓇᓂᓯᕕᐅᕗᑎᑦ, ᕿᔪᐃᑦ ᐊᓯᕅᑦ ᒎᑎᓐᖑᐊᑦ ᐃᒋᓚᐅᕋᕕᒋᑦ ᓄᓇᒥᑦ, ᐆᒻᒪᑏᓪᓗ ᐋᖅᑭᒃᓯᒪᒐᕕᐅᒃ ᒎᑎᒥᒃ ᕿᓂᕈᒪᓪᓗᑎᑦ.”

ᔨᕼᐆᓴᐸᐅᑉ ᐋᖅᑭᒋᐊᕐᓯᓂᖓ

⁴ ᔨᕼᐆᓴᐸᑦ ᔨᕉᓴᓕᒦᓚᐅᕐᐳᖅ; ᑕᕝᕙᓐᖓᑦ ᐊᐅᓪᓚᕐᓗᓂ ᐃᓄᖕᓄᐊᕐᐳᖅ, ᐱᐊᕐᓯᐸᒦᑦᑐᓂᑦ ᐃᕗᕅᑎᐅᑉ ᖃᖅᑲᖏᓐᓃᑦᑐᓄᑦ ᑎᑭᓪᓗᓂ, ᑕᕝᕙᓂᒥᐅᓪᓗ ᐅᑎᕐᑎᑉᐰᑦ ᐊᑕᓂᕐᒧᑦ, ᓯᕗᓕᖏᑕ ᒎᑎᖓᓄᑦ.

⁵ ᐋᖅᑭᒃᓱᐃᔨᓂᒡᓗ ᑎᓕᓯᕗᖅ ᓄᓇᖃᕐᑐᓕᒫᓄᑦ, ᓴᐴᓗᑕᓕᖕᓄᑦ ᐃᒡᓗᒐᓴᓕᒫᓄᑦ ᔫᑕᒦᑦᑐᓄᑦ, ᐃᒡᓗᒐᓴᖕᓂᑦ ᐃᒡᓗᒐᓴᖕᓄᑦ.

⁶ ᐋᖅᑭᒃᓱᐃᔨᓄᓪᓗ ᐅᖃᕐᐳᖅ, “ᑲᒪᑦᓯᐊᕆᑦᓯ ᖃᓄᐃᓕᐅᕐᓂᑦᓯᓐᓂᒃ, ᐃᓄᖕᓄᑦ ᐋᖅᑭᒃᓱᐃᖏᓐᓇᑦᓯ ᐊᑕᓂᕐᒧᓪᓕ; ᐃᓕᑦᓯᓐᓃᒻᒪᑦ ᖃᐅᔨᓇᓱᐊᕐᑎᓪᓗᓯ.

⁷ ᒫᓐᓇᓕ ᑕᕝᕙ, ᐊᑕᓂᐅᑉ ᓯᕘᕋᓇᕐᓂᖓ ᐃᓕᑦᓯᓐᓃᓪᓕ; ᑲᒪᑦᓯᐊᕆᑦᓯ ᐱᓇᓱᐊᕐᑎᓪᓗᓯ, ᐊᑕᓂᖅ ᒎᑎᕗᑦ ᓈᒻᒪᓈᖏᓐᓂᖃᖏᒻᒪᑦ, ᐃᓔᓐᓇᕐᓯᐅᕋᓂᓗ, ᐊᑭᓕᕐᑕᐅᓂᒃᑯᓪᓗ ᐊᓯᑦᔨᕐᓱᐃᓲᖑᓇᓂ.”

⁸ ᓱᓕ ᔨᕉᓴᓕᒥ ᔨᕼᐆᓴᐸᑦ ᑎᓕᓯᕗᖅ ᓕᕔᑎᓂᒃ ᑐᓂᕐᕈᓯᕐᑎᑦᓯᔨᓂᒡᓗ ᐊᖓᔪᖅᑳᓂᒡᓗ ᐃᓴᕆᐊᓕᒥᐅᑦ ᑭᖑᕚᕇᖏᓐᓂ, ᑖᒃᑯᐊ ᐋᖅᑭᒃᓱᐃᖃᑦᑕᖁᓪᓗᒋᑦ ᐊᑕᓂᖅ ᐱᓪᓗᒍ ᐊᑭᕋᕐᑑᑎᔪᓂᒃ ᑐᑭᑖᕆᔨᐅᖁᓪᓗᒋᑦ. ᔨᕉᓴᓕᒥ ᐱᓇᓱᐊᕐᕕᖃᕐᓗᑎᒃ.

⁹ ᐃᒤᓕᐅᖁᕔᓪᓗ: “ᐱᓇᓱᐊᕐᑐᒃᓴᐅᕗᓯ ᐊᑕᓂᖅ ᓯᕘᕋᒋᓗᒍ, ᐅᒃᐱᕐᓇᑦᓯᐊᕐᓗᓯ, ᐆᒻᒪᑎᑦᓯᒍᓪᓗ ᓇᓛᒎᕐᓗᓯ;

¹⁰ ᐋᖅᑭᒃᓱᐃᔭᕆᐊᖃᓕᕈᑦᓯ ᖃᑕᓐᖑᑎᑦᓯᓐᓂᒃ ᐃᒡᓗᒐᓴᖕᓃᑦᑐᓂᒃ, ᑐᖁᑦᓯᔪᖃᕐᓯᒪᓂᕐᒧᑦ, ᐱᖁᔭᓂᒃ, ᒪᓕᒐᕐᓂᒡᓗ, ᐊᑐᕐᑕᐅᔭᕆᐊᓕᖕᓂᒃ ᐱᓇᓱᐊᕐᑕᐅᔭᕆᐊᓕᖕᓂᒡᓗ, ᖃᓄᐃᓕᐅᕆᐊᖃᕐᓂᖏᓐᓂᒃ ᐅᖃᐅᑦᔪᕐᑕᒃᓴᕆᕙᓯ, ᐊᑕᓂᐅᑉ ᓂᓐᖓᐅᓯᖓᓄᑦ ᑎᑭᑕᐅᖁᓇᓯ ᖃᑕᓐᖑᑎᓯᓗ. ᑕᕝᕙ ᑍᒫᒃ ᐱᓇᓱᐊᕐᑐᒃᓴᐅᕗᓯ, ᐸᓯᔭᒃᓴᐅᓕᖁᓇᓯ.

¹¹ ᑕᑯᒋᓪᓗ, ᐊᒪᕅᐊ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦ ᐃᓕᑦᓯᓐᓂᒃ ᑲᒪᔨᒻᒪᕆᐅᕗᖅ ᓱᓇᑐᐃᓐᓁᑦ ᐊᑕᓂᐅᑉ ᐱᖁᔭᖏᑦ ᐱᓪᓗᒋᑦ; ᔨᐸᑍᐊᓗ ᐃᓯᒥᐅᓕᐅᑉ ᐃᕐᓂᖓ, ᔫᑕᐅᑉ ᑎᖑᕚᖏᑕ ᐊᐅᓚᑦᓯᔨᖓ, ᑲᒪᔨᒻᒪᕆᐅᕗᖅ ᐊᖓᔪᖅᑳᕐᔪᐊᖅ ᐱᖁᑎᖏᓪᓗ ᐱᑦᔪᑎᒋᓪᓗᒋᑦ; ᓕᕔᑏᓪᓗ ᐃᓕᑦᓯᓐᓂᒃ ᐱᔨᑦᓯᕐᑎᐅᓂᐊᕐᐳᑦ ᖃᐅᔨᓴᕐᑎᐅᓗᑎᒃ. ᐱᓇᓱᐊᕆᑦᓯ ᓴᐱᖏᓪᓗᓯ, ᐊᑕᓂᐅᓪᓗ ᐱᑦᓯᐊᕐᑐᑦ ᐃᓚᒋᓕᒋᑦ!”