ᑯᕉᓂᑲ ᐂᑉᐸᖏᑦ 14 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖓᔪᖅᑳᕐᔪᐊᑉ ᐂᓴᐅᑉ ᓵᓚᖃᕐᓂᖓ ᐃᑎᐅᐱᐊᒥᐅᓂᒃ

¹ ᑕᕝᕙ ᐊᐰᔭ ᑐᖁᓚᐅᕐᐳᖅ ᓯᕗᓕᕐᒥᓄᐊᕐᓗᓂᓗ, ᐃᓗᕕᕐᑕᐅᕗᕐᓗ ᑍᕕᑎᐅᑉ ᐃᒡᓗᒐᓴᖏᓐᓂ; ᐂᓴᓗ ᑖᑦᓱᒪ ᐃᕐᓂᖓ ᐊᖓᔪᖅᑳᕈᓚᐅᕐᐳᖅ ᑖᑦᓱᒥᖓ ᐃᓇᖐᓪᓗᓂ. ᐊᖓᔪᖅᑳᖑᑎᓪᓗᒍ ᐊᕐᕌᒍᓂᒃ ᖁᓕᓂᒃ ᐅᓇᑕᕐᓂᖃᓚᐅᓐᖏᓚᖅ.

² ᐂᓴᓗ ᐱᓇᓱᐊᑦᓯᐊᓚᐅᕐᐳᖅ ᓇᓛᒎᕐᑐᒥᒡᓗ ᐱᓂᐊᕐᓂᖃᕐᓗᓂ ᐊᑕᓂᐅᑉ ᒎᑎᖓᑕ ᑕᑯᓐᓇᕐᑕᖓᓂ.

³ ᑖᑦᓱᒪ ᔫᑎᐅᖏᑦᑐᑦ ᑐᓂᕐᕈᓯᕐᕕᖏᑦ ᒎᑎᓐᖑᐊᓄᑦ ᐲᔭᕐᐰᑦ, ᒎᑎᓐᖑᐊᓄᓪᓗ ᑐᒃᓯᐊᕐᕖᑦ, ᓇᐸᔪᓪᓗ ᓱᕋᒃᑎᕐᐰᑦ ᐅᕐᕈᑎᓪᓗᒋᑦ, ᕿᔪᐃᓪᓗ ᓴᓇᓐᖑᐊᕐᓯᒪᔪᑦ ᐊᕐᓇᓐᖑᐊᑦ ᐊᓯᕋᒥᒃ ᐊᑎᓖᑦ ᒎᑎᓐᖑᐊᑦ ᓱᕋᒃᑎᕐᐰᑦ ᐅᕐᕈᑎᓪᓗᒋᑦ.

⁴ ᔫᑕᒥᐅᓂᒡᓗ ᐱᖁᔨᕗᖅ ᐊᑕᓂᐅᑉ ᐱᔪᒪᔭᖓᓂᒃ ᕿᓂᖁᓪᓗᒋᑦ, ᓯᕗᓕᖏᑕ ᒎᑎᖓᓂᒃ, ᒪᓕᖁᓪᓗᒋᓪᓗ ᐱᓂᐊᕐᑕᖁᔭᖏᓐᓂᒃ ᐱᖁᔭᖏᓐᓂᒡᓗ.

⁵ ᒎᑎᓐᖑᐊᓄᓪᓗ ᑐᒃᓯᐊᕐᕕᓕᒫᑦ ᑐᓂᕐᕈᓯᕐᕖᓪᓗ ᐳᔫᕐᑎᑦᓯᕖᑦ ᐲᔭᕐᑕᐅᖁᕔᑦ ᔫᑕᐅᑉ ᐃᒡᓗᒐᓴᓕᒫᖏᓐᓂᑦ. ᐊᖓᔪᖅᑲᐅᕕᖓᓗ ᐅᓇᑕᕐᓂᖃᓚᐅᓐᖏᓚᖅ ᑖᓐᓇ ᐊᐅᓚᑦᓯᑎᓪᓗᒍ.

⁶ ᓴᐴᓗᑕᓕᖕᓂᒡᓗ ᐃᒡᓗᒐᓴᖕᓂᒃ ᓴᓇᕗᖅ ᔫᑕᒥ, ᓄᓇᖓᓂ ᐃᓱᒫᓗᓇᕐᑐᖃᓚᐅᓐᖏᓚᖅ; ᐊᕐᕌᒍᓂ ᑖᒃᑯᓇᓂ ᐅᓇᑕᕐᓂᖃᓚᐅᖏᒻᒪᑦ, ᐊᑕᓂᐅᑉ ᓄᓪᓚᖓᑦᓯᐊᕐᓇᕐᑐᒦᑎᓚᐅᕐᒪᒍ.

⁷ ᔫᑕᒃᑯᓐᓄᓪᓗ ᐅᖃᕐᐳᖅ, “ᒪᑯᐊ ᐃᒡᓗᒐᓮᑦ ᓴᓇᓚᐅᕐᓚᕗᑦ ᐊᕙᓗᕐᔪᐊᓕᐅᕐᓗᒋᑦ, ᐳᕐᑐᔪᓂᒡᓗ ᓇᐸᔪᓕᐅᕐᓗᑕ ᐊᕙᑖᒍᑦ, ᐃᑎᕐᑕᕐᕕᓕᐅᕐᓗᒋᑦ ᓴᕕᕋᔭᖕᓂᒡᓗ ᓴᓐᓂᕈᐊᓕᐅᕐᓗᒋᑦ; ᓄᓇ ᓱᓕ ᑕᒪᓐᓇ ᓄᓇᒋᒐᑦᑎᒍ, ᐊᑕᓂᐅᑉ ᒎᑎᑦᑕ ᐱᔪᒪᔭᖓᓂᒃ ᕿᓂᓚᐅᕋᑦᑕ; ᖃᐅᔨᓇᓱᐊᕐᕕᒋᓚᐅᕋᑦᑎᒍ ᑖᑦᓱᒪ ᐸᒡᕕᓴᒃᑕᐅᑎᓐᖏᓛᑎᒍᑦ ᐊᕙᑎᑦᑎᓐᓂᑦ.” ᑍᒤᒻᒪᑦ ᓴᓇᕗᑦ ᒪᑭᑉᐸᓪᓕᐊᓪᓗᑎᒡᓗ.

⁸ ᐂᓴᓗ ᐅᓇᑕᕐᑎᖁᑎᖃᕐᐳᖅ 300,000ᓂᒃ ᔫᑕᒥ, ᐅᓇᑕᐅᑎᓕᖕᓂᒃ ᓴᐴᓗᑕᖃᕐᓗᑎᒃ ᒥᑭᔪᓂᒃ ᖃᓗᒋᐊᖃᕐᓗᑎᒡᓗ, ᐱᓐᔭᒥᓂᒃᑯᓐᓂᑦ 280,000ᓂᒃ ᐅᓇᑕᕐᑎᖁᑎᖃᕐᐳᖅ, ᓴᐴᓗᑕᓕᖕᓂᒃ ᐱᑎᒃᓯᓕᖕᓂᒃ; ᑖᒃᑯᐊᓕᒫᑦ ᐊᔪᖏᑦᓯᐊᓚᐅᕐᐳᑦ ᐱᔭᕆᐅᕐᓴᓯᒪᑦᓯᐊᕐᓗᑎᒡᓗ.

⁹ ᔨᕋ ᐃᑎᐅᐱᐊᒥᐅᑕᖅ ᐅᓇᑕᕆᐊᓚᐅᕐᐳᖅ ᑖᒃᑯᓂᖓ 1ᒥᓕᐊᓂᒃ ᐅᓇᑕᕐᑎᖃᕐᓗᓂ 300ᓂᒡᓗ ᕿᒧᒃᓯᐅᑎᓂᒃ ᐊᒃᓴᓗᐊᓕᖁᑎᖃᕐᓗᓂ, ᒪᕇᓴᒧᓪᓗ ᑎᑭᑉᐳᖅ.

¹⁰ ᐂᓴᐅᓪᓗ ᐸᕐᕆᐊᕐᐹ, ᐅᓇᑕᕐᑎᒥᖕᓂᒡᓗ ᐅᐸᓗᖎᔭᕐᐴᒃ ᔨᐸᑕᐅᑉ ᓇᕐᓴᖓᓂ ᒪᕇᓴᒥ.

¹¹ ᐂᓴᓗ ᑐᒃᓯᐊᕐᐳᖅ ᐊᑕᓂᕐᒧᑦ ᒎᑎᒥᓄᑦ, ᐅᖃᓪᓗᓂ, “ᐊᑕᓃᖅ, ᐊᑦᔨᖃᓐᖏᓚᑎᑦ ᐃᑲᔪᕈᓐᓇᕐᑐᒥᒃ, ᓴᓐᖏᔪᓂᒃ ᓴᓐᖐᑦᑐᓂᒡᓗ. ᐊᑕᓃᖅ ᒎᑎᕗᑦ ᐃᑲᔪᓚᐅᕐᑎᒍᑦ, ᐃᓕᖕᓂᒃ ᑕᑎᖃᕋᑦᑕ, ᑕᒪᐅᓐᖓᕐᐳᒍᑦ ᐱᔪᓐᓇᕐᓂᕐᓄᑦ ᐅᓇᑕᕆᐊᕐᓗᑕ ᐅᓄᕐᑐᕐᔪᐊᓄᑦ. ᐊᑕᓃᖅ ᒎᑎᒋᒐᑦᑎᒋᑦ; ᐃᓄᖕᒧᑦ ᓇᓪᓕᐊᓐᓄᓪᓘᓐᓃᑦ ᓵᓚᐅᔪᓐᓇᖏᑦᑐᑎᑦ.”

¹² ᑕᕝᕙ ᐊᑕᓂᐅᑉ ᐃᑎᐅᐱᐊᒥᐅᑦ ᐂᓴᒃᑯᑦ ᔫᑕᒃᑯᓪᓗ ᐊᖅᑯᑎᒋᓪᓗᒋᑦ ᓵᓚᒋᕔᑦ, ᐃᑎᐅᐱᐊᒥᐅᓪᓗ ᕿᒪᒃᓯᕗᑦ.

¹³ ᐂᓴᐅᓪᓗ ᐃᓚᒋᔭᖏᑕᓗ ᒪᓕᒃᐰᑦ ᒋᕌᕆᒧᑦ ᑎᑭᓪᓗᑎᒃ, ᐃᑎᐅᐱᐊᒥᐅᓪᓗ ᓵᓚᐅᕗᑦ ᐊᒥᐊᒃᑯᔭᐅᓇᑎᒃ; ᓯᖁᒥᑕᐅᕗᑦ ᐅᓇᑕᕐᑐᒃᓴᖏᑦ ᐊᑕᓂᐅᑉ ᓵᖓᓂ ᐅᓇᑕᕐᑎᖏᓐᓄᓪᓗ. ᔫᑕᐅᓪᓗ ᐃᓄᖏᑦ ᐱᑖᓚᐅᕐᐳᑦ ᐅᓄᕐᑐᕐᔪᐊᓂᒃ ᐱᖁᑎᕕᓂᖏᓐᓂᒃ.

¹⁴ ᐃᒡᓗᒐᓮᑦ ᒋᕌᕆᐅᑉ ᖃᓂᒋᔭᖓᓃᑦᑐᓕᒫᑦ ᓵᓚᒋᕔᑦ, ᐊᑕᓂᐅᑉ ᓯᕘᕋᓂᕐᒥᒃ ᑐᓂᓚᐅᕐᒪᒋᑦ. ᐃᒡᓗᒐᓴᓕᒫᓪᓗ ᓇᒡᕚᕐᑕᕐᕕᒋᕔᑦ, ᐱᖁᑎᕐᔪᐊᖃᓚᐅᕐᒪᑕ.

¹⁵ ᐅᓇᑕᕆᐊᕐᐰᓪᓗ ᑐᐱᓖᑦ ᐆᒪᔪᓂᒃ ᑲᒪᔨᐅᔪᑦ, ᑎᒍᓪᓗᒋᓪᓗ ᓰᐲᑦ ᑳᒥᓖᓪᓗ ᐅᓄᕐᑐᕐᔪᐊᑦ. ᑭᖑᓂᖓᒍᑦ ᔨᕉᓴᓕᒧᑦ ᐅᑎᕐᐳᑦ.