ᑯᕉᓂᑲ ᐂᑉᐸᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᓐᓄᐊᓪᓗᐊᒥᐅᑦ ᑭᖑᕚᕇᑦ ᐊᑭᕋᕐᑐᕐᓂᖓᑦ

¹ ᑕᕝᕙ ᕆᕼᐅᐳᐊᒻ ᓯᑭᒧᐊᕐᐳᖅ, ᐃᓴᕆᐊᓕᒥᐅᓕᒫᓪᓗ ᓯᑭᒻᒧᐊᕐᐳᑦ ᐊᖓᔪᖅᑳᕐᔪᐊᕈᕐᑎᑦᓱᒪᓪᓗᒍ.

² ᔨᕈᐳᐊᒻᓗ ᓂᐹᑦ ᐃᕐᓂᖓ ᑕᒪᑐᒥᖓ ᑐᓴᕋᒥ (ᐄᑦᔨᑉᑎᒦᓪᓗᓂ ᕿᒫᓯᒪᓪᓗᓂ ᐊᖓᔪᖅᑳᕐᔪᐊᕐᒥᑦ ᓲᓗᒨᓂᒥᑦ), ᑕᕝᕙ ᔨᕈᐳᐊᒻ ᐅᑎᕐᐳᖅ ᐄᑦᔨᑉᑎᒥᓐᖔᕐᓗᓂ.

³ ᐃᓄᐃᓪᓗ ᑎᓕᓯᕗᑦ ᑖᑦᓱᒧᖓ ᕾᖁᓪᓗᒍ; ᔨᕈᐳᐊᒻᓗ ᐃᓴᕆᐊᓕᒥᐅᓪᓗ ᐊᑕᐅᑦᓯᒃᑯᑦ ᐅᖃᕆᐊᕐᑐᕐᐳᑦ ᕆᕼᐅᐳᐊᒻᒧᑦ ᐅᖃᕐᓗᑎᒃ,

⁴ “ᐊᑖᑕᕕᑦ ᓇᖕᒪᒃᑎᓚᐅᕐᐹᑎᒍᑦ ᐅᖁᒤᑦᑐᓂᒃ; ᒫᓐᓇᓕ ᐅᖁᒤᒃᓴᐅᑎᕗᑦ ᐅᕿᒡᓕᒋᐊᓚᐅᒃᑭᑦ ᐊᑖᑕᕕᑦ ᐅᖁᒤᓗᐊᕐᑐᓂᒃ ᓇᖕᒪᒃᑎᓚᐅᕐᒪᑎᒍᑦ, ᑕᕝᕙ ᐃᓕᖕᓂᒃ ᐱᔨᑦᓯᑦᓯᐊᕐᓂᐊᕐᐳᒍ.”

⁵ ᑕᕝᕙ ᕆᕼᐅᐳᐊᒻ ᑭᐅᕔᑦ, “ᐅᓪᓗᑦ ᐱᖓᔪᐊᓐᓂ ᐅᑎᓛᕆᕗᓯ.” ᑕᕝᕙ ᐃᓄᐃᑦ ᑕᕝᕙᓐᖓᑦ ᕿᒪᕉᑎᕗᑦ.

⁶ ᑕᕝᕙ ᐊᖓᔪᖅᑳᕐᔪᐊᑉ ᕆᕼᐅᐳᐊᒻ ᐃᓄᑐᕾᑦ ᖃᐅᔨᒋᐊᕐᐰᑦ, ᐱᓇᓱᐊᖃᑦᑕᐅᓚᐅᕐᑐᑦ ᐊᑖᑕᖓᓄᑦ ᓲᓗᒨᓂ ᓱᓕ ᐃᓅᑎᓪᓗᒍ, ᐅᖃᕐᓗᓂ, “ᖃᓄᖅ ᐃᓱᒪᓕᐅᕆᔪᓐᓇᕐᐱᓰ ᑖᒃᑯᓄᖓ ᐃᓄᖕᓄᑦ ᑭᐅᔪᓐᓇᖁᓪᓗᖓ?”

⁷ ᑖᒃᑯᐊᓗ ᐅᖃᐅᑎᕚᑦ, “ᐃᓄᐃᑦ ᐱᑦᓯᐊᕐᓂᐊᕈᕕᒋᑦ ᐱᔪᒪᔭᖏᓐᓂᒡᓗ ᐱᓂᐊᕐᕕᒋᒍᕕᒋᑦ, ᐅᖃᐅᓯᑦᓯᐊᕙᖕᓂᒡᓗ ᐅᖃᐅᑎᒍᕕᒋᑦ, ᑕᕝᕙ ᐱᔨᑦᓯᕐᓂᐊᕐᐹᑎᑦ ᐃᓱᖃᖏᑦᑐᒧᑦ.”

⁸ ᐃᓄᑐᕾᓪᓕ ᐃᓱᒪᓕᐅᕆᑦᔪᑎᒋᔭᖏᑦ ᑲᒪᒋᓇᒋᑦ, ᐃᓅᓱᒃᑐᐃᑦ ᐱᕈᕐᓴᖃᑎᒋᓚᐅᕐᑕᖏᑕ ᐃᓱᒪᓕᐅᕆᑦᔪᑎᒋᔭᖏᑦ ᓴᐳᓐᓂᐊᕐᑎᒋᔭᖏᓪᓗ. ᓈᓚᖔᕈᒪᓚᐅᕐᐰᑦ.

⁹ ᐅᖃᐅᑎᓪᓗᒋᓪᓗ, “ᖃᓄᖅ ᐃᓱᒪᓕᐅᕆᔪᓐᓇᕐᐱᓰ? ᖃᓄᕐᓗ ᐃᓄᐃᑦ ᑭᐅᔭᒃᓴᕆᕙᒃᑳ ᐅᕙᓐᓄᑦ ᐅᖃᓚᐅᕐᑐᑦ, ‘ᓇᖕᒪᒃᑕᕗᑦ ᐅᕿᒡᓕᒋᐊᓚᐅᒃᑭᑦ ᐊᑖᑕᕕᑦ ᐅᕙᑦᑎᓐᓄᑦ ᓇᖕᒪᒃᑕᐅᑎᓚᐅᕐᑕᖏᑦ’?”

¹⁰ ᐃᓅᓱᒃᑐᓪᓕ ᐱᕈᕐᓴᖃᑎᒋᓚᐅᕐᑕᖏᑦ ᑖᑦᓱᒧᖓ ᐅᖃᕐᐳᑦ, “ᐃᓄᐃ ᐅᖃᐅᑎᔭᒃᓴᕆᕙᑎᑦ ᐃᓕᖕᓄᑦ ᐅᖃᓚᐅᕐᑐᑦ, ‘ᐊᑖᑕᕕᑦ ᐅᖁᒤᑦᑐᓂᒃ ᓇᖕᒪᒃᑎᓚᐅᕐᒪᑎᒍᑦ, ᐅᕿᒡᓕᒋᐊᕐᑎᑦᑐᓐᓇᕐᐱᒌᑦ’; ᐃᒫᒃ ᐅᖃᐅᑎᔭᒃᓴᕆᕙᑎᑦ, ‘ᐃᕿᖅᑯᕋ ᐃᑦᔪᓂᕐᓴᐅᓂᐊᕐᐳᖅ ᐊᑖᑕᒪ ᖁᒃᑐᕋᖓᓂᑦ.

¹¹ ᐊᑖᑕᒪᓗ ᐅᖁᒤᑦᑐᓂᒃ ᓇᖕᒪᒃᑎᓚᐅᕐᐹᓯ, ᓇᖕᒪᒃᑕᓯᓕ ᐃᓚᒋᐊᕈᒪᕙᒃᑲ. ᐊᑖᑕᒪ ᓱᒋᐊᖃᑦᑕᓚᐅᕐᐹᓯ ᐃᐸᕋᐅᑕᕐᒧᑦ, ᐅᕙᖓᓕ ᓱᒋᐊᕈᒫᕐᐸᑦᓯ ᑏᒐᕈᑎᓄᑦ ᓴᑯᐊᕐᐱᐅᓂᓄᑦ.’”

¹² ᐅᓪᓗᑦ ᐱᖓᔪᐊᓐᓂ ᔨᕈᐳᐊᒻ ᐃᓴᕆᐊᓕᒥᐅᓪᓗ ᕆᕼᐅᐳᐊᒧᐊᕐᐳᑦ, ᐊᖓᔪᖅᑳᕐᔪᐊᑉ ᐱᖁᔨᓂᕆᓚᐅᕐᑕᖓ ᒪᓕᒡᓗᒍ, ᐅᖃᓚᐅᕐᒪᑦ, “ᐅᓪᓗᑦ ᐱᖓᔪᐊᓐᓂ ᐅᑎᓛᕆᕗᓯ.”

¹³ ᐊᖓᔪᖅᑳᕐᔪᐊᓪᓗ ᓂᑲᒋᓇᒋᑦ ᑭᐅᕔᑦ, ᐃᓄᑐᕾᑦ ᐅᖃᐅᓯᕆᓚᐅᕐᑕᖏᑦ ᑲᒪᒋᓇᒋᑦ,

¹⁴ ᑕᕝᕙ ᐅᖃᐅᑎᕔᑦ ᐃᓅᓱᒃᑐᐃᑦ ᐅᖃᐅᓯᖏᑦ ᒪᓕᒡᓗᒋᑦ, ᐅᖃᕐᓗᓂ, “ᐊᑖᑕᒪ ᐅᖁᒤᑦᑐᓂᒃ ᓇᖕᒪᒃᑎᓚᐅᕐᐹᓯ, ᐅᕙᖓᓕ ᐃᓚᒋᐊᕈᒪᕙᒃᑲ; ᐊᑖᑕᒪ ᓱᒋᐊᓚᐅᕐᐹᓯ ᐃᐸᕋᐅᑕᕐᒧᑦ, ᐅᕙᖓᓕ ᓱᒋᐊᕈᒫᕐᐸᑦᓯ ᑏᒐᕈᑎᓄᑦ ᓴᑯᐊᕐᐱᐅᓂᓄᑦ.”

¹⁵ ᑍᒫᒃ ᐊᖓᔪᖅᑳᕐᔪᐊᖅ ᓈᓚᓚᐅᓐᖏᓚᖅ ᐃᓄᖕᓂᒃ; ᐱᓂᐊᕐᓃᑦ ᒎᑎᐅᑉ ᑍᒤᑎᓚᐅᕐᐰᑦ, ᐊᑕᓂᐅᑉ ᐅᖃᐅᓯᖏᑦ ᓇᓚᐅᑦᓯᖁᓪᓗᒋᑦ, ᐊᕼᐂᔭᐅᑉ ᓮᓗᓁᑎᒥᐅᑕᐅᑉ ᐅᖃᐅᓯᕆᓚᐅᕐᑕᖏᑦ ᔨᕈᐳᐊᒻᒧᑦ ᓂᐹᑉ ᐃᕐᓂᖓᓄᑦ.

¹⁶ ᐃᓴᕆᐊᓕᒥᐅᓕᒫᑦ ᑕᒪᑐᒥᖓ ᑕᑯᒐᒥᒃ ᐊᖓᔪᖅᑳᕐᔪᐊᑉ ᐃᓄᖕᓂᒃ ᓈᓚᖏᓐᓂᖓᓂᒃ, ᐃᓄᐃᑦ ᐊᖓᔪᖅᑳᕐᔪᐊᕐᒧᑦ ᑭᐅᕗᑦ, “ᓱᓇᒦᒃ ᐃᓚᖏᐅᑎᕕᖃᕐᐱᑕ ᑍᕕᑎᒥᑦ? ᑭᖑᕐᖑᑎᔭᒃᓴᖃᓐᖏᓚᒍᑦ ᔨᓯᐅᑉ ᐃᕐᓂᖓᓂᑦ. ᐃᓴᕆᐊᓕᒥᐅᓕᒫᑦ ᐂᓕᕐᓕᑦ ᑐᐱᕐᒥᖕᓄᑦ! ᐃᕝᕕᓪᓗ ᐃᒡᓗᖕᓄᑦ ᓇᖕᒥᓂᖅ ᕿᓂᓕᕆᑦ ᑍᕕᑏ!” ᑕᕝᕙ ᐃᓴᕆᐊᓕᒥᐅᓕᒫᑦ ᑐᐱᕐᒥᖕᓄᐊᕐᐳᑦ.

¹⁷ ᕆᕼᐅᐳᐊᒻᓕ ᐊᐅᓚᑦᓯᓕᓚᐅᕐᐳᖅ ᐃᓴᕆᐊᓕᒥᐅᑦ ᐃᓄᖏᓐᓂᒃ ᔫᑕᐅᑉ ᐃᒡᓗᒐᓴᖏᓐᓂ ᓄᓇᖃᕐᑐᓂᒃ.

¹⁸ ᑕᕝᕙ ᐊᖓᔪᖅᑳᕐᔪᐊᑉ ᕆᕼᐅᐳᐊᒻ ᕼᐂᑐᕌᒻ ᑎᓕᕚ, ᐃᓄᖕᓄᑦ ᐃᓱᒪᓯᐅᕐᑕᐅᓇᑎᒃ ᓴᓇᑎᑕᐅᔪᓄᑦ ᑲᒪᔨ; ᐃᓴᕆᐊᓕᒥᐅᓪᓗ ᒥᓪᓗᕐᓗᒍ ᑐᖁᑉᐹᑦ. ᐊᖓᔪᖅᑳᕐᔪᐊᕐᓗ ᕆᕼᐅᐳᐊᒻ ᕿᒧᒃᓯᐅᑎᒥᓄᑦ ᐊᒃᓴᓗᐊᓕᖕᒧᑦ ᐃᑭᕗᖅ, ᕿᒫᓪᓗᓂᓗ ᔨᕉᓴᓕᒧᑦ.

¹⁹ ᑍᒪᓐᖓᓂᑦ ᑕᕝᕙ ᐃᓴᕆᐊᓕᒥᐅᑦ ᐊᑭᕋᕐᑐᓕᕐᐳᑦ ᑍᕕᑎᐅᑉ ᑭᖑᕚᖏᓐᓄᑦ ᐅᓪᓗᒥᒧᑦ ᑎᑭᓪᓗᒍ.