ᑎᒧᑎᒧᑦ ᓯᕗᓪᓖᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᓇᓱᐊᒐᒃᓮᑦ ᐅᒃᐱᕐᑐᓄᑦ

¹ ᐃᓄᑐᖃᕐᒧᑦ ᐃᓕᕋᓇᕋᓱᐊᕐᓂᐊᕐᓇᒃ, ᐊᑖᑕᒃᑐᓪᓕ ᑲᔪᖏᕐᓴᕈᒃ; ᐃᓅᓱᒃᑐᓪᓗ ᐊᖑᑎᑦ ᐅᒃᐱᕐᑑᖃᑎᒃᑐᑦ ᐱᓇᓱᐊᕐᕕᒋᓗᒋᑦ,

² ᐃᓄᑐᕾᑦ ᐊᕐᓁᑦ ᐊᓈᓇᒃᑐᑦ, ᐊᕐᓁᓪᓗ ᐃᓅᓱᒃᑐᑦ ᓇᔭᒃᑐᑦ, ᐃᒃᖠᒎᕐᓂᕐᒥᒃ ᐊᑐᖁᓇᒃ.

³ ᐅᐃᒡᒐᕐᓃᑦ ᐅᐱᒋᑦᓯᐊᕐᓗᒋᑦ ᐅᐃᒡᒐᕐᓂᓚᕇᑦ.

⁴ ᐅᐃᒡᒐᕐᓂᕐᓕ ᕿᑐᕐᖓᖃᕐᐸᑦ ᐃᕐᖑᑕᖃᕐᐸᓪᓘᓐᓃᑦ, ᑖᒃᑯᐊ ᐃᓕᓐᓂᐊᖅᑳᕐᓕᑦ ᐅᒃᐱᕐᓂᒃᑯᑦ ᐱᓇᓱᐊᕆᐊᖃᕐᑕᒥᖕᓂᒃ ᐊᖓᔪᖅᑳᒥᖕᓄᑦ; ᑍᒤᒃᑯᑎᒃ ᐊᖓᔪᖅᑳᒥᖕᓄᑦ ᐱᔭᕆᐊᓕᖕᒥᖕᓂᒃ ᐊᑭᓖᔪᒫᕐᐳᑦ; ᑕᒪᓐᓇ ᖁᕕᐊᒋᔭᐅᖕᒪᑦ ᒎᑎᒧᑦ.

⁵ ᐅᐃᒡᒐᕐᓂᕐᓕ ᐃᓄᑐᐊᖑᒃᐸᑦ ᐃᑲᔪᕐᑎᒃᓴᖃᕋᓂ, ᑍᒤᑦᑐᖅ ᒎᑎᒥᑦ ᑭᓯᐊᓂ ᓂᕆᐅᒃᐳᖅ, ᑐᒃᓯᐊᖏᓐᓇᕐᐳᕐᓗ ᐃᑲᔪᕐᑕᐅᔪᒪᓪᓗᓂ ᐅᓐᓄᐊᖑᒐᓗᐊᕐᐸᑦ ᐅᓪᓘᒐᓗᐊᕐᐸᓪᓗ;

⁶ ᐅᐃᒡᒐᕐᓂᕐᓕ ᖁᕕᐊᒋᔭᑐᐃᓐᓇᕐᒥᓂᒃ ᐊᑐᕈᒪᔪᖅ ᐆᒪᒐᓗᐊᕐᓗᓂ ᑐᖁᖓᕗᖅ.

⁷ ᑕᒪᒃᑯᐊᑕᐅᖅ ᐱᖁᔨᑦᔪᑎᒋᒃᑭᑦ, ᐸᓯᔭᒃᓴᐅᔪᖃᓕᖁᓇᒋᑦ.

⁸ ᐃᓚᒋᔭᒥᓂᒡᓕ ᐃᑲᔪᖏᑦᑐᖅ, ᐃᒡᓗᒥᐅᖃᑎᒥᓂᒃ ᐱᓗᐊᕐᓗᓂ, ᑍᒤᑦᑐᖅ ᐅᒃᐱᕐᓂᕐᒥ ᐃᓅᓐᖏᓚᖅ ᐅᒃᐱᖏᑦᑐᓂᓪᓗ ᐱᐅᖏᓐᓂᕐᓴᐅᕗᖅ.

⁹ ᐅᐃᒡᒐᕐᓂᖅ ᐊᑎᖁᑎᑦᓯᓄᑦ ᐃᓚᓕᐅᑎᑍᓕᓯᐅᒃ 60ᐅᖓᑖᓂ ᐅᑭᐅᖃᖏᒃᐸᑦ, ᐊᒻᒪᓗ ᐊᑕᐅᓯᐊᕐᓗᓂ ᐅᐃᖃᕐᓯᒪᓐᓂᕐᐸᑦ ᐃᓚᓕᐅᑎᔭᐅᔪᓐᓇᕐᐳᖅ.

¹⁰ ᐱᓇᓱᐊᑦᓯᐊᖃᑦᑕᕐᓯᒪᓗᓂ ᐅᖃᐅᓯᐅᑦᓯᐊᖃᑦᑕᓗᓂ; ᕿᑐᕐᖓᒥᓂᒃ ᐱᕈᕐᓮᑦᓯᐊᕐᓯᒪᓗᓂ, ᑐᓐᖓᒋᔭᐅᓗᓂ, ᐃᑦᔪᕐᓁᑦᑐᓪᓗ ᐃᑎᒐᖏᓐᓂᒃ ᐅᐊᓴᖃᑦᑕᕐᓗᓂ, ᐃᑲᔪᕆᐊᓕᖕᓂᒃ ᐃᑲᔪᖃᑦᑕᕐᓗᓂ, ᐱᐅᔪᒥᒡᓗ ᐱᓇᓱᐊᖃᑦᑕᕐᓗᓂ ᓱᓇᓕᒫᓂᒃ.

¹¹ ᐅᐃᒡᒐᕐᓃᓪᓕ ᐃᓅᓱᖕᓂᕐᓮᑦ ᐅᐃᒡᒐᕐᓃᑦ ᐊᑎᖏᓐᓄᑦ ᐃᓚᓕᐅᑎᓂᐊᕐᓇᒋᑦ; ᐱᔪᒪᓂᕐᒥᖕᓄᑦ ᐅᐃᓂᒃᑲᓐᓂᕈᒪᑎᑕᐅᓕᕐᐸᑕ, ᙭ᔅᑑᓯᒥᑦ ᕿᒪᕉᑎᑐᐃᓐᓇᕆᐊᖃᕐᒪᑕ.

¹² ᓯᕗᓪᓕᕐᒥᒡᓗ ᐊᖏᕈᑎᒋᓚᐅᕐᑕᒥᖕᓂᒃ ᑖᑦᓱᒧᓐᖓ ᐊᑐᕈᒃᓃᓲᖑᓪᓗᑎᒃ.

¹³ ᓱᓕᒃᑲᓐᓂᖅ, ᓱᓇᓕᕆᔪᒪᔪᓐᓃᕐᐸᒃᑭᕗᑦ, ᐳᓚᕋᑐᐃᓐᓇᓕᕐᓗᑎᒃ, ᐳᓚᕋᑐᐃᓐᓇᕋᑎᒡᓗ ᐃᓅᖃᓐᓂᐊᕐᐸᒃᐳᑦ ᑲᒪᒋᔭᒃᓴᕆᓐᖏᑕᒥᖕᓂᒡᓗ ᐅᖃᐅᓯᖃᕐᐸᓕᕐᓗᑎᒃ.

¹⁴ ᑍᒤᒻᒪᑦ ᐅᐃᒡᒐᕐᓃᑦ ᐃᓅᓱᖕᓂᕐᓮᑦ ᐅᐃᓂᖁᒐᔭᕐᐸᒃᑲ, ᕿᑐᕐᖏᐅᕐᓗᑎᒃ, ᐊᖏᕐᕋᒥᖕᓂᒃ ᑲᒪᖁᓪᓗᒋᑦ, ᐊᑭᕋᕐᑐᕐᑎᕗᑦ ᐱᐅᖏᑦᑐᒥᒃ ᐅᖃᐅᓯᒃᓴᖃᖁᓇᒋᑦ.

¹⁵ ᐅᐃᒡᒐᕐᓃᑦ ᐃᓚᖏᑦ ᓴᖑᓯᒪᖕᒪᑕ ᓵᑖᓇᓯᒧᑦ ᒪᓕᓕᕐᓗᑎᒃ.

¹⁶ ᐊᕐᓇᖅ ᐅᒃᐱᕐᑐᖅ ᐅᐃᒡᒐᕐᓂᕐᓂᒃ ᐃᓚᖃᕈᓂ, ᑖᒃᑯᐊ ᑲᒪᒋᔭᕆᐊᖃᕐᐰᑦ; ᐅᒃᐱᕐᑑᖃᑎᒌᑦ ᐅᖁᒤᑎᑕᐅᖁᓇᒋᑦ, ᑲᒪᖔᕈᓐᓇᖁᓪᓗᒋᓪᓕ ᐅᐃᒡᒐᕐᓂᕐᓂᒃ ᐃᓅᖃᑎᒃᓴᖃᓐᖏᓗᐊᕐᑐᓂᒃ.

¹⁷ ᐅᒃᐱᕐᑑᖃᑎᒌᓄᑦ ᓈᒻᒪᒃᑐᒥᒃ ᓯᕗᓕᕐᑏᑦ ᐱᔭᒃᓴᒥᖕᓂᒃ ᐱᓇᓱᐊᑦᓯᐊᕐᑐᑦ ᐅᐱᒋᔭᐅᔭᕆᐊᖃᕐᓂᖏᑕ ᐅᖓᑖᓄᑦ ᐊᑭᓕᕐᑕᐅᖃᑦᑕᕐᑐᓴᐅᕗᑦ, ᐱᓗᐊᕐᑐᒥᒃ ᐊᒃᓱᕈᕐᓗᑎᒃ ᐊᔪᕆᕐᑐᐃᖃᑦᑕᕐᑐᑦ ᐃᓕᓮᖃᑦᑕᕐᑐᓪᓗ;

¹⁸ ᒎᑎᐅᑉ ᐅᖃᐅᓯᖏᑦ ᐅᖃᕐᒪᑕ, “ᐃᒻᒧᒃᓯᐅᒐᕐᒥᒃ ᐃᑦᔭᕈᓯᕐᓯᓂᐊᕐᓇᒃ ᓂᐊᖂᔭᒃᓴᓂᒃ ᑐᓪᓕᕋᕐᑎᑕᐅᔪᒥᒃ,” ᐊᒻᒪᓗ, “ᐱᓇᓱᐊᕐᑐᖅ ᐊᑭᓕᕐᑕᐅᔭᕆᐊᖃᕐᒪᑦ.”

¹⁹ ᐅᒃᐱᕐᑑᖃᑎᒌᑦ ᓯᕗᓕᕐᑎᖓᓂᒃ ᐸᓯᔭᒃᓴᓐᖑᕐᑎᑦᓯᔪᒃᓴᐅᓐᖏᓚᑎᑦ ᑭᓯᐊᓂ ᒪᕐᕉᖕᓂᑦ ᐱᖓᓱᓂᓪᓘᓐᓃᑦ ᖃᐅᔨᓯᒪᔪᓂᑦ ᐅᖃᐅᓯᐅᓯᒪᒃᐸᑦ.

²⁰ ᐊᔪᕐᑐᓕᓐᓇᕐᑐᑦ ᐃᓂᕐᑎᒃᑭᑦ, ᐃᓄᓕᒫᑦ ᓵᖏᓐᓂ, ᐊᓯᖏᑦ ᐊᔪᕐᑐᓕᓂᕐᒥᒃ ᓯᕘᕋᓕᖁᓪᓗᒋᑦ.

²¹ ᒎᑎᐅᑉ ᓇᔪᒐᓐᖓᓂ ᙭ᔅᑑᓯ ᔩᓱᓯᐅᓪᓗ ᐂᖏᓖᓪᓗ ᓂᕈᐊᕐᑕᐅᓯᒪᔪᑦ ᓇᔪᕐᑕᖏᓐᓂ ᑕᒪᒃᑯᐊ ᐅᖃᐅᓯᕆᔭᒃᑲ ᐃᓕᖕᓄᑦ ᒪᓕᒃᑕᐅᖁᓪᓚᕆᒃᐸᒃᑲ; ᐃᓅᖃᑎᑐᖃᕆᓐᖏᑕᕐᓂᒃ ᓇᕐᕈᖏᓪᓗᑎᑦ, ᓇᓪᓕᐊᑐᐃᓐᓇᖅ ᓇᕐᕈᓇᕐᓯᑎᑦᑍᓕᓗᒍ ᐊᑦᔨᒌᒃᑎᑦᓯᐊᕐᓗᒋᓕ ᐱᓇᓱᐊᕐᕕᒋᒃᑭᑦ.

²² ᐊᑕᓂᕐᒧᑦ ᐱᔨᑦᓯᕐᑐᒃᓴᓂᒃ ᑐᐊᕕᕐᓗᑎᑦ ᐸᑎᒻᒥᓯᓂᐊᕐᓇᒃ, ᐊᓯᕕᑦ ᐊᔪᕐᑐᓕᓂᖏᓐᓄᑦ ᐃᓚᐅᑦᑍᓕᒋᑦ; ᓇᖕᒥᓂᖅ ᐃᑦᔪᕐᓁᑎᑦᓯᐊᕆᑦ.

²³ ᐃᒥᑐᐃᓐᓇᕐᒥᒃ ᐃᒥᖃᑦᑕᕈᓐᓃᕆᑦ, ᐅᐂᓂᒥᒡᓕ ᒥᑭᔪᒥᒃ ᐃᒥᖃᑦᑕᕆᑦ ᐊᕿᐊᕈᐃᑦ ᐋᓐᓂᐊᕐᓴᕅᑦᑑᖃᑦᑕᕐᓃᓪᓗ ᐱᑦᔪᑎᒋᓪᓗᒍ.

²⁴ ᐃᓄᐃᑦ ᐃᓚᖏᑕ ᐊᔪᕐᑐᓕᕙᖕᓂᖏᑦ ᓇᓗᓇᖏᒻᒪᑕ, ᐊᔪᕐᑐᓕᓂᕐᒥᖕᓄᓪᓗ ᐃᖅᑲᕐᑐᕐᑕᐅᑦᔪᑎᖃᕐᓗᑎᒃ, ᐊᓯᖏᑕᓕ ᐊᔪᕐᑐᓕᓂᖏᑦ ᓴᖅᑭᑦᓱᒫᕐᐳᑦ ᑭᖑᕐᖓᒍᑦ.

²⁵ ᑍᒫᒃᑕᐅᖅ ᐱᓇᓱᐊᕐᓂᐅᕙᒃᑐᑦ ᓇᓗᓇᖏᒻᒥᒪᑕ; ᐃᓚᖏᑦ ᐱᓇᓱᐊᕐᓂᐅᕙᒃᑐᑦ ᑕᑯᒃᓴᐅᓗᐊᓐᖏᑦᑑᒐᓗᐊᑦ ᓇᓗᓇᕈᓐᓃᓂᐊᕐᒥᔪᑦ.