ᑎᒧᑎᒧᑦ ᓯᕗᓪᓖᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓚᒌᒃᑐᑦ ᑐᒃᓯᐊᖃᑎᒌᖕᓂᖏᑦ

¹ ᓯᕗᓪᓕᕐᐹᒥᒡᓕ, ᐱᖁᔨᕗᓐᖓ ᕿᓄᑦᔪᑎᖃᕐᓂᖅ ᑐᒃᓯᐊᖃᑦᑕᕐᓂᖅ ᑐᒃᓯᐅᑦᔨᓂᖅ, ᖁᔭᓕᓃᓪᓗ ᒎᑎᒧᑦ ᑐᓂᕐᕈᑕᐅᖃᑦᑕᖁᕙᒃᑲ ᐃᓄᐃᑦ ᑕᒪᕐᒥᒃ ᐱᑦᔪᑎᒋᓪᓗᒋᑦ,

² ᐊᖓᔪᖅᑳᕐᔪᐊᑦ ᐊᐅᓚᑦᓯᔨᐅᑎᑕᐅᔪᓪᓗ ᐱᑦᔪᑎᒋᖕᒥᓗᒋᑦ, ᐃᓅᑦᓯᐊᕐᓇᕐᑐᒥᒃ ᐃᓅᓯᖃᖁᓪᓗᑕ ᖃᓄᐃᓐᓇᖏᑦᓯᐊᕐᑐᒥᒡᓗ ᒎᑎ ᐅᐱᒋᑦᓯᐊᕐᓗᒍ ᓈᒻᒪᑦᓯᐊᕐᑐᒥᒡᓗ ᐃᓅᓯᖃᑦᓯᐊᕐᓗᑕ.

³ ᑕᒪᓐᓇ ᐱᐅᖕᒪᑦ ᓈᒻᒪᒋᔭᐅᓪᓗᓂᓗ ᒎᑎᒧᑦ ᐱᐅᓕᔨᑦᑎᓐᓄᑦ.

⁴ ᑖᑦᓱᒪ ᐃᓄᓕᒫᑦ ᐱᐅᓕᔭᐅᖁᖕᒪᒋᑦ ᖃᐅᔨᖁᓪᓗᓂᒋᓪᓗ ᓱᓕᓂᕐᒥᒃ.

⁵ ᒎᑎ ᐊᑕᐅᓯᐅᖕᒪᑦ; ᐊᑕᐅᓯᐅᒋᕗᕐᑕᐅᖅ ᐃᓚᒌᓕᕐᑎᑦᓯᔪᖅ ᒎᑎᒥᒃ ᐃᓄᖕᓂᒡᓗ, ᑖᓐᓇᐅᕗᖅ ᙭ᔅᑑᓯ ᔩᓱᓯ ᑎᒥᑖᓚᐅᕐᑐᖅ,

⁶ ᐃᒻᒥᓂᒃ ᑐᓂᓚᐅᕐᐳᖅ ᐊᑭᓖᑦᔪᔨᔪᒪᓪᓗᓂ ᐃᓄᓕᒫᓂᒃ; ᑕᒪᓐᓇ ᓈᒻᒪᑦᓯᐊᕐᑐᒥᒃ ᒎᑎᐅᑉ ᐱᓇᓱᐊᕈᑎᒋᓚᐅᕐᐹ ᐱᐅᓕᕐᓯᓂᓂ ᖃᐅᔨᔭᐅᖁᓪᓗᒍ.

⁷ ᑕᒪᑐᒧᖓ ᑎᓕᔭᐅᓯᒪᕗᖓ ᐊᔪᕆᕐᑐᐃᖁᓪᓗᖓ ᐋᐴᓯᑕᓕᓐᖑᕐᑎᑕᐅᓪᓗᖓᓗ, ᓱᓕᓪᓗᖓ ᐅᖃᕐᐳᖓ ᓴᒡᓗᓐᖏᓚᖓ, ᔫᑎᐅᓐᖏᑦᑐᓂᒃ ᐃᓕᓐᓂᐊᕐᑎᑦᓯᖁᓪᓗᖓ ᐅᒃᐱᕐᓂᑯᑦ ᓱᓕᓂᑯᓪᓗ.

⁸ ᐱᖁᔨᕗᖓ ᐊᖑᑏᑦ ᓇᓂᓕᒫᖅ ᑐᒃᓯᐊᖃᑦᑕᖁᓪᓗᒋᑦ, ᐊᒡᒐᖕᒥᖕᓂᒃ ᐃᑦᔪᕐᓁᑦᑐᓂᒃ ᖁᒻᒧᐊᒃᑎᑦᓯᔪᓐᓇᕐᓗᑎᒃ ᓂᓐᖓᐅᒪᓇᑎᒃ ᐂᕙᓇᑎᒡᓗ.

⁹ ᐊᕐᓁᑦᑕᐅᖅ ᐊᑐᕐᑕᒥᖕᓂᒃ ᐃᒃᐱᒍᓱᑦᓯᐊᕐᑐᒃᓴᐅᕗᑦ ᐊᓐᓄᕌᕐᓯᒪᑦᓯᐊᕐᓗᑎᒃᓗ, ᓄᔭᕐᒥᖕᓂᒃ ᑕᑯᒥᓇᕐᓮᓗᐊᖏᓪᓗᑎᒃ, ᒎᓗᓂᒃ, ᓴᐸᖓᕐᓂᒃ, ᐊᑭᑐᔪᓂᒃ ᐊᑎᔭᒃᓴᕐᓯᐅᑐᐃᓐᓇᕋᑎᒃ.

¹⁰ ᐱᐅᔪᒥᒃ ᐱᓇᓱᐊᕐᓗᑎᒃ, ᐊᕐᓇᑎᑐᑦ ᓈᒻᒪᒃᑐᒥᒃ ᐱᓇᓱᐊᕐᓗᑎᒃ ᒎᑎᒥᒃ ᐅᐱᒋᔭᖃᕐᓗᑎᒃ.

¹¹ ᐊᕐᓁᑦ ᓂᐰᑦᑑᓗᑎᒃ ᐃᓕᓐᓂᐊᕐᑐᒃᓴᐅᕗᑦ ᐃᓘᓐᓈᒍᑦ ᑐᓂᓯᒪᑦᓯᐊᕐᓗᑎᒃ.

¹² ᐊᕐᓇᓂᒃ ᐊᔪᕆᕐᑐᐃᖃᑦᑕᖁᔨᓐᖏᓚᖓ; ᐊᖑᑎᓄᓪᓗ ᐊᖓᔪᖅᑲᐅᓯᓗᐊᖁᓇᖏᑦ; ᓂᐱᖃᖏᑉᐸᑕ ᓈᒻᒪᖕᓂᕐᓴᐅᕗᑦ.

¹³ ᐋᑕᒥ ᓯᕗᓪᓕᐅᓪᓗᓂ ᐱᓐᖑᕐᑎᑕᐅᖄᓚᐅᕐᒪᑦ, ᑭᖑᓂᖓᒍᑦ ᐄᕕ;

¹⁴ ᐋᑕᒥ ᐅᐃᕖᕐᕆᔭᐅᖅᑳᓚᐅᓐᖏᓚᖅ, ᐊᕐᓇᕐᓕ ᐅᐃᕖᕐᕆᔭᐅᓚᐅᕐᐳᖅ ᐱᖁᔭᓂᒡᓗ ᓱᕅᓪᓗᓂ.

¹⁵ ᐊᕐᓇᕐᓕ ᐱᐅᓕᔭᐅᔪᒫᕐᐳᖅ ᕿᑐᕐᖓᕐᑖᖃᑦᑕᕐᓗᓂ, ᐅᒃᐱᕐᓂᕐᒦᖏᓇᕈᓂ ᓇᒡᓕᖕᓂᕐᒥᓗ ᐃᑦᔪᕐᓁᓐᓂᕐᒥᓗ, ᐱᐅᔪᕆᖏᓪᓗᓂ.