ᑎᓴᓗᓁᑲᒥᐅᓄᑦ ᓯᕗᓪᓖᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑍᒤᒻᒪᑦ ᐊᑯᓂᒍᓱᓕᕋᑦᑕ, ᕿᒪᒃᑕᐅᒐᓗᐊᕈᑦᑕ ᖃᓄᐃᒃᓴᕈᓐᓃᓚᐅᕐᐳᒍᑦ ᐅᕗᖓ ᐋᑎᓐᓯᒧᑦ,

² ᑎᓕᓯᓚᐅᕐᐳᒍᓪᓗ ᑎᒧᑎᒥᒃ, ᐅᒃᐱᕐᑑᖃᑎᑎᓐᓂᒃ ᐱᓇᓱᐊᖃᑎᒋᔭᕗᓪᓗ ᒎᑎᒧᑦ ᐊᔪᕆᕐᑐᐃᑎᓪᓗᑕ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᙭ᔅᑑᓯᒥᒃ, ᓲᖑᓯᑎᑕᐅᖁᓪᓗᓯ ᐅᒃᐱᕐᓂᓯ ᐃᑲᔪᕐᑕᐅᒃᑲᓐᓂᖁᓪᓗᒍ.

³ ᓴᖑᑎᑕᐅᔪᖃᖁᓇᓯ ᐅᖁᒤᑦᑐᓄᑦ ᑕᒪᒃᑯᓄᖓ, ᓇᖕᒥᓂᖅ ᖃᐅᔨᒪᒐᑦᓯ ᐊᑭᕋᕐᑐᕐᑕᐅᓂᖅ ᑕᒪᓐᓇ ᐅᕙᑦᑎᓐᓄᑦ ᒎᑎᐅᑉ ᐱᖁᔨᓂᖓᑕ ᐃᓚᒋᖕᒪᒍ.

⁴ ᐃᓕᑦᓯᓐᓃᓪᓗᑕ ᓱᓕ, ᓯᕗᕐᖓᒍᑦ ᐃᓕᑦᓯᓐᓂᒃ ᐅᖃᐅᑦᔨᓚᐅᕋᑦᑕ ᐅᖁᒤᒃᓴᕐᑎᑕᐅᓛᕐᓂᑦᑎᓐᓂᒃ; ᑕᒪᓐᓇᓗ ᑍᒤᓚᐅᕐᐳᖅ, ᑕᒪᓐᓇ ᖃᐅᔨᒪᕙᓯ.

⁵ ᑍᒤᒻᒪᑦ ᑎᒧᑎ ᑎᓕᔭᕆᐊᖃᓕᓚᐅᕐᐸᕋ ᕿᓄᐃᓵᕈᓐᓁᓕᒐᒪ ᐅᒃᐱᕐᓂᑦᓯᓐᓂᒃ ᑐᓴᕈᒪᓪᓗᖓ, ᓵᑖᓇᓯᒧᑦ ᐆᒃᑐᕐᓗᒃᑕᐅᓂᑦᓯᓐᓄᑦ ᐱᓇᓱᐊᕐᓂᕆᓯᒪᔭᕗᑦ ᑕᒪᐅᖎᓐᓈᕐᑎᑕᐅᓂᐊᕋᓱᒋᓪᓗᒍ.

⁶ ᒫᓐᓇᓕ ᑎᒧᑎ ᐅᑎᕐᓯᒪᓕᕐᒪᑦ ᐃᓕᑦᓯᓐᓂᖔᕐᓗᓂ, ᑐᓴᕈᒥᓇᕐᑐᒥᒡᓗ ᐅᓂᒃᑲᐅᑎᖕᒪᑎᒍᑦ ᐅᒃᐱᕐᓂᖃᕐᓂᑦᓯᓐᓂᒃ ᓇᒡᓕᖕᓂᖃᕐᓂᑦᓯᓐᓂᒡᓗ ᐅᖃᐅᑎᓚᐅᕐᒪᑎᒍᑦ ᐅᕙᑦᑎᓐᓂᒎᖅ ᓱᓕ ᐃᓱᒪᕾᓐᓇᕐᐸᒃᑲᑦᓯ ᕿᓚᓈᕐᓗᓯᓗ ᑕᑯᔪᒪᓪᓗᓯ, ᑍᒫᒃᑕᐅᖅ ᐅᕙᒍᑦ ᕿᓚᓈᕐᒥᒐᑦᑕ ᐃᓕᑦᓯᓐᓂᒃ ᑕᑯᔪᒪᓪᓗᑕ.

⁷ ᑍᒤᒻᒪᑦ ᐅᒃᐱᕐᑑᖃᑎᕗᑦ, ᐅᖁᒤᒃᓴᕐᑎᑕᐅᓂᑦᑎᓐᓂ ᐃᓗᐊᖏᑦᔪᑎᒃᓴᖃᕐᓂᑦᑎᓐᓂᓗ ᐃᓕᑦᓯᑎᒍᑦ ᐱᕙᓪᓕᕐᑎᑕᐅᓯᒪᒻᒪᕆᒃᐳᒍᑦ ᐅᒃᐱᕐᓂᑦᓯᓐᓄᑦ.

⁸ ᒫᓐᓇ ᑕᕝᕙ ᐃᓱᒫᓗᐃᕐᐳᒍᑦ, ᓱᖁᓯᔪᐃᑦᑑᓕᕈᑦᓯ ᐊᑕᓂᕐᒥᒃ ᑐᓐᖓᕕᖃᑦᓯᐊᕐᓗᓯ.

⁹ ᒫᓐᓇ ᒎᑎᕗᑦ ᖁᔭᓕᕕᒋᒃᑲᓐᓂᕈᓐᓇᓕᕐᐸᕗᑦ ᐱᓪᓗᓯ, ᐃᓗᑦᑎᒍᑦ ᖁᕕᐊᓱᒃᑎᑕᐅᒐᑦᑕ ᐱᑦᔪᑎᒋᓪᓗᓯ ᒎᑎᐅᑉ ᓵᖓᓂ,

¹⁰ ᐅᓪᓘᑎᓪᓗᒍ ᐅᓐᓄᐊᒥᓗ ᐃᓗᖏᕐᓱᕐᓗᑕ ᑐᒃᓯᐊᕐᐳᒍᑦ ᓇᖕᒥᓂᖅ ᑕᑯᒃᑲᓐᓂᕈᒪᓪᓗᑕ ᐃᓕᑦᓯᓐᓂᒃ ᐃᑲᔪᒃᑲᓐᓂᕆᐊᖃᕈᑦᑕᓗ ᐅᒃᐱᕐᓂᑦᓯᓂᒃ ᐱᓇᓱᐊᕈᒪᓪᓗᑕ.

¹¹ ᒫᓐᓇᓕ ᒎᑎᑦᑕ ᐊᑖᑖᑦᑕ ᓇᖕᒥᓂᖅ, ᐊᑕᓂᑦᑕᓗ ᔩᓱᓯᐅᑉ, ᐋᖅᑭᒃᓲᑎᓕᑎᒍᑦ ᑕᑯᖃᑎᒌᒃᑲᓐᓂᕈᓐᓇᕐᓯᖁᓪᓗᑕ;

¹² ᐊᑕᓂᐅᓪᓗ ᐱᕈᕐᐸᓪᓕᐊᑎᓪᓕᓯ ᓇᒡᓕᒃᑎᒌᖕᓂᕐᒥ ᐃᓕᑦᓯᓐᓄᑦ ᐃᓄᓕᒫᓄᓪᓗ, ᐃᓕᑦᓯᓐᓄᑦ ᓇᒡᓕᖕᓂᑦᑎᑐᑦ.

¹³ ᑕᕝᕙ ᑖᑦᓱᒪ ᓲᖑᓯᑎᓐᓂᐊᕐᐹᓯ ᐸᓯᔭᒃᓴᐅᓂᖃᖁᓇᓯ ᐃᑦᔪᕐᓁᓪᓗᓯᓗ ᒎᑎᐅᑉ ᐊᑖᑕᑦᑕᓗ ᓵᖓᓂ, ᐊᑕᓂᑦᑕ ᔩᓱᓯᐅᑉ ᑎᑭᕝᕕᐊᓂ ᐃᑦᔪᕐᓁᑦᑐᖁᑎᓂ ᑕᒤᑕ ᐃᓚᒋᓗᒋᑦ.