ᓴᒧᐃᓕ ᓯᕗᓪᓖᑦ 24 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᐱᐅᓕᒃᓯᓂᖓ ᓴᐅᓕᒥᒃ

¹ ᓴᐅᓕ ᐅᑎᕐᒪᑦ ᐅᓇᑕᕆᐊᕐᓯᒪᓚᐅᕐᓗᓂ ᐱᓕᔅᑍᓂᒥᐅᓂᒃ, ᐅᖃᐅᑦᔭᐅᓕᕐᐳᖅ, “ᑕᑯᒋᑦ, ᑍᕕᑎ ᐃᓐ-ᒋᑎᐅᑉ ᐃᓄᖃᔪᐃᑦᑐᖓᓃᓕᕐᐳᖅ.”

² ᑕᕝᕙ ᓴᐅᓕ ᐅᓇᑕᕐᑐᒃᓴᓂᒃ 3,000ᓂᒃ ᓂᕈᐊᕐᑕᐅᓯᒪᔪᓂᒃ ᐃᓚᖃᕐᓗᓂ ᐃᓴᕆᐊᓕᒥᐅᓂᒃ, ᕿᓂᕆᐊᓕᕐᐳᖅ ᑍᕕᑎᒥᒃ ᐃᓄᖁᑎᖏᓐᓂᒡᓗ ᕾᕈᓱᖕᓄᑦ ᓄᔪᐊᕐᑐᑦ ᒎᑦᓰᑦ ᐃᓂᒋᔭᖏᑕ ᖃᓂᒋᔮᓃᑦᑐᓄᑦ.

³ ᕾᕈᓱᖕᒧᐊᓚᐅᕐᐳᕐᓗ ᓰᐱᖃᐅᑎᒥᒃ ᐊᑎᓕᐅᑉ ᐊᖅᑯᑖᑕ ᓴᓂᐊᓃᑦᑐᒧᑦ, ᑕᕝᕙᓂ ᕾᕈᓱᒃᑕᖃᕐᒪᑦ; ᑕᕝᕗᖓᓗ ᓴᐅᓕ ᐃᑎᕐᐳᖅ ᐊᓇᕆᐊᕐᑐᕐᓗᓂ. ᑍᕕᑎᓕ ᐃᓚᖏᓪᓗ ᐃᔨᕐᓯᒪᓚᐅᕐᐳᑦ ᐃᓗᐊᓂ, ᕾᕈᓲᑉ ᕿᓐᖑᐊᓃᑦᓱᑎᒃ.

⁴ ᑍᕕᑎᐅᓪᓗ ᐃᓄᖁᑎᖏᑦ ᐅᖃᕐᐳᑦ, “ᐅᓪᓗᖅ ᑕᕝᕙ ᐊᑕᓂᐅᑉ ᕾᑎᑉᐹ ᐅᖃᓚᐅᕐᑕᖓ ᐃᓕᖕᓄᑦ, ‘ᑕᑯᒋᑦ ᐊᑭᕋᑎᑦ ᐃᓕᖕᓄᑦ ᑐᓂᔪᒫᕐᐸᒃᑲ, ᐃᓱᒪᕐᓲᑎᒋᔪᒫᕐᐸᑎᓪᓗ ᖃᓄᐃᓕᐅᕈᒪᑐᐊᕈᕕᒋᑦ.’” ᑕᕝᕙ ᑍᕕᑎ ᒪᑭᑉᐳᖅ ᑎᕐᓕᐊᕐᓗᒍ ᐲᕐᓯᕗᖅ ᓴᐅᓕᐅᑉ ᐅᓕᒡᔪᐊᖓᑕ ᐃᓚᖓᓂᒃ.

⁵ ᑕᒪᑐᒪ ᑭᖑᕐᖓᒍᑦ ᑍᕕᑎ ᐆᒻᒪᑎᕈᕐᑕᐅᕗᖅ, ᐲᕐᓯᓚᐅᕋᒥ ᓴᐅᓕᐅᑉ ᐅᓕᒡᔪᐊᖓᑕ ᐃᓚᖓᓂᒃ.

⁶ ᐃᓄᖁᑎᒥᓄᓪᓗ ᐅᖃᕐᐳᖅ, “ᐊᑕᓂᐅᑉ ᐱᐅᖏᑦᑐᒥᒃ ᐱᓇᓱᐊᕐᑎᑦᑍᓕᓛᖓ ᐊᖓᔪᖅᑳᓐᓄᑦ, ᐊᑕᓂᐅᑉ ᐅᕐᓱᕐᑎᕐᓯᒪᔭᖓᓄᑦ, ᐊᒡᒐᒃᑲ ᑖᑦᓱᒥᖓ ᐊᒃᑐᐃᖁᓇᒋᑦ, ᐊᖓᔪᖅᑳᕐᔪᐊᖑᖕᒪᑦ ᐊᑕᓂᐅᑉ ᐅᕐᓱᕐᑎᕐᓯᒪᔭᖓ.”

⁷ ᑕᕝᕙ ᑍᕕᑎᐅᑉ ᐃᓄᖁᑎᓂᒃ ᓴᖑᑎᑉᐰᑦ ᐅᖃᐅᓯᕐᓄᑦ ᑖᒃᑯᓄᖓ, ᑐᖁᑦᓯᖁᓇᒋᑦ ᓴᐅᓕᒥᒃ. ᓴᐅᓕᓗ ᒪᑭᓐᓇᒥ, ᕾᕈᓱᖕᒥᑦ ᐊᓂᕗᖅ ᐅᑎᕐᐸᓪᓕᐊᓕᕐᓗᓂ.

⁸ ᑍᕕᑎᐅᓪᓗ ᒪᑭᓐᓇᒥ ᒪᓕᒃᓴᕐᐹ ᕾᕈᓱᖕᒥᑦ ᐊᓂᓪᓗᓂ ᓴᐅᓕ ᐅᖃᐅᑎᕚ, “ᐊᑕᓃᖅ ᐊᖓᔪᖅᑳᕋ!” ᓴᐅᓕᓗ ᑭᖑᒧᑦ ᑕᑯᓴᕐᐳᖅ, ᑍᕕᑎ ᐹᒻᒪᒃᐳᖅ ᓄᓇᒧᑦ ᒪᓂᖅᑲᒧᑦ, ᐅᑯᓪᓗᓂᓗ.

⁹ ᑍᕕᑎᐅᓪᓗ ᓴᐅᓕ ᐅᖃᐅᑎᕚ, “ᖃᓄᐃᒻᒪᑦ ᐃᓄᐃᑦ ᐅᖃᐅᓯᖏᓐᓂᒃ ᓈᓚᖃᑦᑕᕐᐲᑦ ᐅᖃᕐᑐᓂᒃ, ‘ᐃᓛ ᑍᕕᑎᐅᑉ ᕿᓂᕐᐹᑎᑦ ᑐᖁᑦᓱᒪᓪᓗᑎᑦ?’

¹⁰ ᑕᑯᒋᑦ, ᐅᓪᓗᒥ ᐃᔨᖕᓄᑦ ᑕᑯᕗᑎᑦ ᐊᑕᓂᐅᑉ ᑐᓂᓚᐅᕐᐹᑎᑦ ᐊᒡᒐᓐᓄᑦ ᕾᕈᓲᑉ ᐃᓗᐊᓂ, ᐅᖃᐅᑦᔭᐅᓚᐅᕐᐳᖓ ᑐᖁᑕᐅᖁᔭᐅᓪᓗᑎᑦ, ᐅᕙᖓᓕ ᓴᐳᑎᓚᐅᕐᐸᒋᑦ, ᐅᖃᓚᐅᕋᒪ, ‘ᐊᒡᒐᓐᓄᑦ ᐱᓇᓱᐊᕐᓂᐊᓐᖏᓚᖓ ᐊᑕᓂᓐᓄᑦ; ᑖᓐᓇ ᐊᑕᓂᐅᑉ ᐅᕐᓱᕐᑎᕐᓯᒪᖕᒪᒍ.’

¹¹ ᓱᓕᓗ ᐊᑕᑖᒃ, ᑕᑯᒋᑦ! ᐅᓕᒡᔪᐊᕕᑦ ᐃᓚᖓ ᑎᒍᒥᐊᕐᑕᕋ ᑕᑯᕕᐅᒃ; ᐅᓕᒡᔪᐊᕕᑦ ᓯᓇᕐᔪᐊ ᐅᑭᓚᐅᕐᐸᕋ, ᑐᖁᓐᓇᓱᓚᐅᓐᖏᓚᒋᓪᓗ, ᖃᐅᔨᒪᓕᕆᑦ ᑕᑯᓗᑎᓪᓗ ᐃᓕᖕᓂᒃ ᐊᑭᕋᕐᑐᖏᓐᓇᒪ, ᐊᔪᕐᑐᓕᓚᐅᕐᓇᖓᓗ ᐃᓕᖕᓄᑦ, ᐃᕝᕕᓪᓕ ᐅᕙᓐᓂᒃ ᐱᓇᓱᐊᕐᐳᑎᑦ ᑐᖁᓐᓇᓱᐊᕐᓗᖓ.

¹² ᐊᑕᓂᐅᑉ ᐃᖅᑲᕐᑐᕐᓕᑎᒍᒃ, ᐊᑕᓂᐅᓪᓗ ᐊᑭᓂᐊᕐᓕᖓ ᐃᕝᕕᑦ ᐱᓪᓗᑎᑦ; ᐊᒡᒐᓐᓄᓪᓕ ᐃᓕᖕᓄᑦ ᓵᓐᖓᓂᐊᓐᖏᓚᖓ.

¹³ ᐅᖃᐅᓯᕐᑕᖃᕐᒪᑦ ᐅᖃᐅᓯᑐᖃᕐᒥᒃ ᐃᒫᒃ, ‘ᐱᐅᖏᑦᑐᒥᑦ ᐱᒋᐊᕐᐳᖅ ᐱᐅᖏᑦᑐᓕᓂᖅ’; ᐊᒡᒐᒃᑲᓕ ᓵᓐᖓᓂᐊᓐᖏᓚᑦ ᐃᓕᖕᓄᑦ.

¹⁴ ᐃᓴᕆᐊᓕᒥᐅᑦ ᐊᖓᔪᖅᑳᔪᐊᖓ ᑭᓇᒦᒃ ᕿᓂᕆᐊᕐᐸ? ᑭᓇᒦᒃ ᒪᓕᒃᐱᑦ? ᑐᖁᖓᔪᒦᒃ ᕿᒻᒥᒦᒃ! ᑯᒪᖕᒥᒡᓘᓐᓃᑦ!

¹⁵ ᑍᒤᒻᒪᑦ ᐊᑕᓂᖅ ᐃᖅᑲᕐᑐᐃᓕᕐᓕ, ᓇᓗᓁᕐᓯᓗᓂᓗ ᓇᓕᕐᐳᒃ ᐸᓯᔭᒃᓴᐅᖕᒪᖔᑦ, ᑕᑯᓕᕐᓕ ᐱᓂᐊᕐᓂᑦᑎᓐᓂᒃ, ᖃᐅᔨᓴᕐᓗᖓ, ᐱᐅᓕᓗᖓᓗ ᐊᒡᒐᖕᓂᑦ.”

¹⁶ ᑍᕕᑎ ᐅᖃᕇᕐᒪᑦ ᓴᐅᓕᒧᑦ ᐅᖃᐅᓯᕐᓂ ᑖᒃᑯᓂᖓ, ᓴᐅᓕ ᐅᖃᓕᕐᐳᖅ, “ᐃᕝᕕᓪᓚᕆᖏᓐᓈ, ᐃᕐᓃᒃ ᑍᕕᑏ?” ᓴᐅᓕᓗ ᓂᐱᖅᑯᕐᑐᓪᓗᓂ ᕿᐊᓕᕐᐳᖅ.

¹⁷ ᑍᕕᑎᒧᓪᓗ ᐅᖃᕐᐳᖅ, “ᐃᓱᐊᕐᑐᓕᓂᕐᓴᐅᕗᑎᑦ ᐅᕙᓐᓂᑦ; ᐱᐅᔪᒥᒃ ᐊᑭᓕᖔᕋᕕᖓ; ᐅᕙᖓᓕ ᐱᐅᖏᑦᑐᒥᒃ ᐃᓕᖕᓄᑦ ᐱᓇᓱᐊᓚᐅᕐᑎᓪᓗᖓ.

¹⁸ ᐅᓪᓗᒥ ᓇᓗᓁᕐᓯᕗᑎᑦ ᐅᕙᓐᓄᑦ ᐱᓂᐊᑦᓯᐊᕐᓂᕐᓂᒃ, ᐊᑕᓂᐅᑉ ᐊᒡᒐᖕᓄᑦ ᑐᓂᒐᓗᐊᕐᒪᖓ ᑐᖁᓚᐅᖏᓐᓇᕕᓐᖓ.

¹⁹ ᐊᖑᑎᐅᑉ ᐊᑭᕋᓂᒃ ᓇᓂᒍᓂᐅᒃ, ᐊᐅᓪᓚᕐᑎᒃᑲᔭᕐᐸᐅᒃ ᖃᓄᐃᓕᖏᓪᓗᓂᐅᒃ? ᐊᑕᓂᐅᑉ ᐊᑭᓕᕐᓕᑎᑦ ᐅᓪᓗᒥ ᐅᕙᓐᓄᑦ ᐱᑦᓯᐊᕐᓂᕆᔧᑦ ᐱᓪᓗᒍ!

²⁰ ᒫᓐᓇᓗ ᖃᐅᔨᕗᖓ, ᐃᓴᕆᐊᓕᒥᐅᓄᑦ ᐊᖓᔪᖅᑳᕐᔪᐊᓐᖑᕐᑐᒃᓴᐅᒐᕕᑦ, ᐃᓴᕆᐊᓕᒥᐅᓪᓗ ᐊᖓᔪᖅᑲᐅᕕᖓ ᑲᔪᓯᑎᑕᐅᓂᐊᕐᐳᖅ ᐊᐅᓚᑦᓯᓂᕐᓄᑦ.

²¹ ᑍᒤᒻᒪᑦ ᐊᖏᕐᕕᒋᓐᖓ ᐊᑕᓂᐅᑉ ᐊᑎᖓᓂ ᐃᓚᒃᑲ ᐱᑦᓯᐊᕐᕕᒋᓗᒋᑦ ᑐᖁᑦᓱᒫᓐᖏᓚᑎᑦ, ᐊᑎᕋ ᐊᓯᕈᕐᑕᐅᖁᓇᒍ, ᐊᑖᑕᒪᓗ ᐃᒡᓗᒥᐅᖃᑎᖏᑦ.”

²² ᑍᕕᑎᓗ ᐊᖏᒻᒪᕆᒃᐳᖅ ᑕᒪᑐᒥᖓ ᓴᐅᓕᒧᑦ. ᑕᕝᕙ ᓴᐅᓕ ᐅᑎᓕᕐᐳᖅ ᐊᖏᕐᕋᒧᑦ; ᑍᕕᑎᓕ ᐃᓄᖁᑎᖏᓪᓗ ᐅᑎᕆᕗᑦ ᕾᕈᓱᖕᓄᑦ.