ᐲᑦᑐᕉᓯ ᓯᕗᓪᓖᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᑉᐸᕇᓄᑦ

¹ ᑍᒫᒃᑕᐅᖅ ᐊᕐᓇᐅᔪᓯ, ᐅᐃᑦᓯᓐᓄᑦ ᑐᓂᓯᒪᑦᓯᐊᕆᑦᓯ, ᐃᓚᖏᑦ ᒎᑎᐅᑉ ᐅᖃᐅᓯᖏᓐᓂᒃ ᐅᒃᐱᖏᑦᑐᑦ, ᐅᒃᐱᓕᖁᓪᓗᒋᑦ ᐅᐃᓖᑦ ᐃᓕᖅᑯᓯᖏᑦ ᐱᑦᔪᑎᒋᓗᒋᑦ ᐅᖃᓪᓚᖕᓂᒃᑯᑐᐃᓐᓇᐅᖏᑦᑐᖅ,

² ᑕᑯᓕᕈᑎᒃ ᑲᒪᑦᓯᐊᕐᓂᑦᓯᓐᓂᒃ ᐃᒃᓯᒎᕐᓂᕐᒥᒡᓗ ᐊᑐᖏᓐᓂᑦᓯᓐᓂᒃ.

³ ᑕᐅᑦᑐᓯᒍᑦ ᐱᐅᓴᕐᓯᒪᓗᓯ ᐱᐅᒋᔭᐅᑎᓐᓇᓱᐊᕐᑐᒃᓴᐅᓐᖏᓚᓯ ᓄᔭᓯ ᐱᐅᓴᕐᓗᒋᑦ, ᑕᑯᒥᓇᕐᓴᐅᑎᓂᒡᓗ ᒎᓗᓂᒃ ᐊᑐᕐᓗᓯ, ᐊᓐᓄᕌᑦᓯᐊᓂᒡᓗ ᐱᐅᓴᐅᑎᖃᕐᓗᓯ,

⁴ ᐱᐅᓂᓯ ᐃᔨᕐᓯᒪᔪᒃᓴᐅᕗᖅ ᐃᓗᑦᓯᓐᓂ ᐊᓯᕈᔪᐃᑦᑑᓗᓂ ᑕᑯᒥᓇᕈᑎᖃᕐᓗᓂ ᐃᓅᖃᑎᑦᓯᐊᕙᐅᓂᕐᒥᒃ ᐅᐃᒪᔮᖏᑦᑐᒥᒡᓗ ᐊᓂᕐᓂᕐᒥᒃ, ᑕᒪᓐᓇ ᒎᑎᐅᑉ ᓵᖓᓂ ᐱᓐᓇᕐᓇᕐᑐᕐᔪᐊᖑᖕᒪᑦ.

⁵ ᑍᒫᒃᑕᐅᖅ ᐊᕐᓁᑦ ᐃᑦᔪᕐᓁᑦᑑᓚᐅᕐᑐᑦ ᒎᑎᒧᑦ ᑕᑎᖃᕐᓗᑎᒃ ᐃᒻᒥᖕᓂᒃ ᐅᐱᓐᓇᕐᓯᑎᓚᐅᕐᐳᑦ ᐅᐃᒥᖕᓄᓪᓗ ᑐᓂᓯᒪᑦᓯᐊᕐᓗᑎᒃ.

⁶ ᓵᕋ ᐂᑉᕋᕼᐋᒻᒥᒃ ᓈᓚᑦᓯᐊᓚᐅᕐᐳᖅ, ᑍᓪᓗᓂᐅᒡᓗ ᐊᑕᓂᕐᒥᓂᒃ. ᑖᑦᓱᒧᖓ ᐸᓂᒋᔭᐅᓕᕐᐳᓯ ᐱᐅᔪᒥᒃ ᐱᑦᓯᐊᕈᑦᓯ ᓱᓇᒥᒡᓘᓐᓃᑦ ᑲᑉᐱᐊᓇᕐᑐᓂᒃ ᑲᑉᐱᐊᓱᖏᓪᓗᓯ.

⁷ ᑍᒫᑦᓮᓐᓇᕐᑕᐅᖅ ᐅᐃᖑᔪᓯ, ᓄᓕᐊᓯ ᐃᓅᖃᑎᒋᑦᓯᐊᒐᒃᓴᕆᕙᓯ, ᐅᐱᒋᑦᓯᐊᕐᓗᒋᓪᓗ ᑎᒥᒥᒃᑎᒍᑦ ᓴᓐᖐᓐᓂᕐᓴᐅᖕᒪᑕ, ᑖᒃᑯᐊᑦᑕᐅᖅ ᐱᑎᑕᐅᖃᑎᒋᔪᒫᕋᑦᓯᐅᒃ ᒎᑎᐅᑉ ᐱᔪᓐᓇᕐᓯᑎᑦᓯᓂᖓᓂᒃ ᐃᓅᓯᕐᒥᒃ, ᑍᒤᓕᐅᕐᑐᒃᓴᐅᕗᓯ ᑐᒃᓯᐊᖃᑦᑕᕐᓂᓯ ᐊᒡᕕᐊᕐᑕᐅᖁᓇᒋᑦ.

ᐊᒃᓱᕈᕐᓇᑐᑰᕐᑎᑕᐅᓂᖅ ᓈᒻᒪᑦᓯᐊᕐᑐᒥᒃ ᐱᓇᓱᐊᕐᓂᕐᒧᑦ

⁸ ᑭᖑᓪᓕᕐᐹᒥᒡᓕ, ᑕᒪᑦᓯ ᐊᑦᔨᒌᒃᑐᒥᒃ ᐃᓱᒪᖃᖃᑎᒌᒃᑐᒃᓴᐅᕗᓯ, ᐃᓚᑦᓱᒋᖃᑦᑕᐅᑎᓗᓯ, ᓇᒡᓕᒃᑎᒌᒡᓗᓯ ᐃᓚᒌᒃᑐᑎᑐᑦ, ᓈᒃᑭᒍᓱᒡᓗᓯ ᒥᑭᒡᓕᑎᕐᓯᒪᓗᓯᓗ.

⁹ ᐱᐅᖏᑦᑐᖅ ᐊᑭᓂᐊᕐᑍᓕᓗᒍ ᐱᐅᖏᑦᑐᒧᑦ ᐅᕝᕙᓗ ᐅᖃᕐᓂᕐᓗᖕᓂᖅ ᐅᖃᕐᓂᕐᓗᖕᓂᕐᒧᑦ; ᓮᒻᒪᕐᑎᑕᐅᖁᔨᒋᑦᓯ, ᑕᒪᑐᒧᖓ ᕾᖁᔭᐅᓯᒪᒐᑦᓯ, ᓮᒻᒪᕐᑎᑕᐅᖁᓪᓗᓯᑦᑕᐅᖅ.

¹⁰ ᐊᒡᓔᑦ ᐅᖃᕐᒪᑕ, “ᐃᓄᒃ ᐃᓅᓯᕐᒥᓂ ᐃᓅᑦᓯᐊᕈᒪᒍᓂ ᖁᕕᐊᓇᕐᑐᓂᒡᓗ ᐃᓅᓯᕐᒥᓂ ᑕᑯᔪᒪᒍᓂ, ᐅᖃᐅᓯᕐᓗᖕᒥᒃ ᐅᖃᕐᑍᓕᔪᒃᓴᐅᕗᖅ ᓴᒡᓗᑦᑍᓕᓗᓂᓗ;

¹¹ ᐊᔪᕐᓂᕐᒥᒃ ᑐᓄᐃᓗᓂ ᐊᑲᐅᔪᒥᒃ ᐃᓅᓯᖃᓕᕐᓕ; ᓮᒪᓂᕐᒥᒃ ᕿᓂᕐᑐᒃᓴᐅᕗᖅ ᐱᓇᓱᐊᓪᓚᕆᒡᓗᒍ.

¹² ᐊᑕᓂᐅᑉ ᑕᑯᓐᓇᕐᐰᑦ ᐃᓗᐊᕐᑐᓕᔪᑦ, ᑐᓵᓪᓗᒋᓪᓗ ᑐᒃᓯᐊᕐᓂᖏᑦ. ᐱᐅᖏᑦᑐᒥᒃᓕ ᐱᓇᓱᐊᕐᑐᑦ ᐊᑕᓂᐅᑉ ᐊᓚᕐᐰᑦ.”

¹³ ᑭᐊ ᐋᓐᓂᕈᓐᓇᕐᐹᑎᑦ ᐱᐅᔪᒥᒃ ᐃᓅᓯᖃᕈᒪᒍᕕᑦ?

¹⁴ ᐊᒃᓱᕈᕐᑎᑕᐅᒐᓗᐊᕈᑦᓯ ᐃᓗᐊᕐᑐᓕᓂᖅ ᐱᑦᔪᑎᒋᓗᒍ, ᓮᒻᒪᕐᑎᑕᐅᓂᐊᕐᐳᓯ. ᓇᓪᓕᐊᓐᓂᒡᓘᓐᓃᑦ ᓯᕘᕋᓂᐊᕋᓯ, ᐃᓱᒪᔮᕐᓂᐊᕋᓯᓗ.

¹⁵ ᐆᒻᒪᑎᑦᓯᒍᑦ ᙭ᔅᑑᓯ ᐅᐱᒋᑦᓯᐊᕐᓯᐅᒃ ᐊᑕᓂᕆᓗᒍᓗ. ᑍᒪᓐᖓᓕᒫᖅ ᐅᐸᓗᖕᒊᕐᓯᒪᓗᓯ ᓇᓗᓁᕐᓯᖁᔭᐅᒍᑦᓯ ᓂᕆᐅᖕᓂᕆᔭᑦᓯᓐᓂᒃ, ᑭᐅᑦᔪᑎᒋᔭᓯ ᓂᑲᒍᓱᖕᓂᖃᕐᓗᑎᒃ ᐅᐱᒍᓱᖕᓂᖃᑦᓯᐊᖁᓪᓗᒋᑦ;

¹⁶ ᐃᓱᒪᑦᓯᒍᑦ ᐸᓯᔭᐅᑦᔪᑎᖃᕐᑍᓕᓗᓯ, ᐅᖃᕐᓂᕐᓘᑎᒋᔭᐅᓕᕈᑦᓯ, ᐊᑭᕋᕐᑐᕋᓱᒃᑐᑦ ᙭ᔅᑑᓯᒥ ᐱᑦᓯᐊᕐᓂᑦᓯᓐᓂᒃ ᑕᑯᓕᕈᑎᒃ ᑲᓐᖑᓱᖁᓪᓗᒋᑦ.

¹⁷ ᒎᑎᓕ ᑍᒤᖁᔨᒃᐸᑦ, ᓈᒻᒪᖕᓂᕐᓴᐅᕗᖅ ᐊᒃᓱᕈᕐᑎᑕᐅᒍᑦᓯ ᐱᐅᔪᒥᒃ ᐱᓇᓱᐊᕐᓂᑦᓯᓐᓄᑦ, ᓈᒻᒪᖏᑦᑐᓕᓂᑦᓯᓐᓄᑦ ᓵᑕᐅᒐᔭᕐᓂᑦᓯᓐᓂᑦ.

¹⁸ ᙭ᔅᑑᓯᑦᑕᐅᖅ ᐊᑕᐅᓯᐊᕐᓗᓂ ᐋᓐᓂᐊᑎᑕᐅᓚᐅᕐᒪᑦ ᐊᔪᕐᓃᑦ ᐱᑦᔪᑎᒋᓪᓗᒋᑦ, ᐃᖢᐊᕐᑐᖅ ᐃᓗᐃᑦᑐᓕᔪᑦ ᐱᑦᔪᑎᒋᓪᓗᒋᑦ, ᒎᑎᒧᑦ ᐱᑎᑦᓱᒪᓪᓗᑕ, ᑎᒥᒥᒍᑦ ᑐᖁᑕᐅᓚᐅᕐᐳᖅ ᐊᓂᕐᓂᒃᑯᓪᓕ ᐆᒻᒪᕐᑎᑕᐅᓚᐅᕐᐳᖅ;

¹⁹ ᐊᓂᕐᓂᕐᒦᓪᓗᓂ ᐊᔪᕆᕐᑐᐃᓚᐅᕐᐳᖅ ᑎᒍᔭᐅᓯᒪᕕᖕᒦᑦᑐᓄᑦ ᐊᓂᕐᓂᕐᓄᑦ,

²⁰ ᑖᒃᑯᐊ ᐊᓂᕐᓃᑦ ᓈᓚᓚᐅᖏᑦᑐᑦ, ᒎᑎᐅᑉ ᐅᑕᖅᑭᓚᐅᕐᒪᒋᑦ ᕿᓄᐃᓵᕐᓗᓂ ᑍᑦᓱᒪᓂ ᓄᐊᖅ ᐅᒥᐊᕐᔪᐊᓕᐅᕐᑎᓪᓗᒍ, ᐃᓄᐃᑦ ᐅᓄᖏᑦᑐᑦ ᐱᐅᓕᔭᐅᓚᐅᕐᒪᑕ, ᓯᑕᒪᐅᔪᕐᑐᑐᐃᓐᓁᑦ ᐃᒫᓂᑦ ᐊᓐᓇᓚᐅᕐᐳᑦ,

²¹ ᑕᒪᓐᓇ ᓇᓗᓁᒃᑯᑕᐅᕗᖅ ᐹᑉᑎᑕᐅᓂᕐᒧᑦ, ᐱᐅᓕᒃᓯᔪᒧᑦ ᐃᓕᑦᓯᓐᓂᒃ, ᑎᒥᐅᑉ ᐃᑉᐸᖕᓂᖓᓂᒃ ᓴᓗᒻᒪᕐᓴᐅᑕᐅᖏᑦᑐᖅ ᒎᑎᒧᓪᓕ ᐊᖏᒻᒪᕆᒍᑕᐅᕗᖅ ᐃᓱᒪᒃᑯᑦ ᐸᓯᔭᒃᓴᐅᓂᕐᒥᑦ, ᔩᓱᓯ ᙭ᔅᑑᓯᐅᑉ ᒪᑭᓐᓂᖓᒍᑦ,

²² ᑖᓐᓇ ᕿᓚᓕᐊᓚᐅᕐᐳᖅ ᒫᓐᓇᓗ ᒎᑎᐅᑉ ᑕᓕᕐᐱᐊᓃᑉᐳᖅ, ᐂᖏᓖᓂᒃ ᐃᓚᖃᕐᓗᓂ, ᐱᔪᓐᓇᕐᑎᑕᐅᔪᑦ, ᐱᔪᓐᓇᕐᓃᓪᓗ ᑖᑦᓱᒥᖓ ᓈᓚᒐᖃᕐᐳᑦ.