ᐊᑕᓃᑦ ᓯᕗᓪᓖᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᓁᐸᑉ ᕔᓂᓕᐅᕐᕕᖓ

¹ ᑕᒪᑐᒪ ᑭᖑᕐᖓᒍᑦ ᓁᐹᑦ ᔨᔭᕆᐅᓪᒥᐅᑕᖅ ᕔᓂᓕᐅᕐᕕᖕᒥᒃ ᓇᖕᒥᓂᖃᓚᐅᕐᐳᖅ ᔨᓴᕆᐊᓕᒥ, ᓴᒥᐊᕆᐊᒥᐅᑦ ᐊᖓᔪᖅᑳᕐᔪᐊᖓᑕ ᐂᕼᐊᐱᐅᑉ ᐊᖓᔪᖅᑳᒃᑯᕕᖓᑕ ᐃᒡᓗᖓᑕ ᓴᓂᐊᓂ.

² ᐂᕼᐊᑉᓗ ᐅᖃᕆᐊᕐᑐᕐᐳᖅ ᓁᐹᑦᒧᑦ, ᐅᖃᕐᓗᓂ, “ᕔᓂᓕᐅᕐᕖᑦ ᐅᕙᓐᓄᑦ ᑐᓂᓚᐅᕈᒃ, ᐱᕈᕐᓰᕕᑖᕆᓂᐊᕋᒃᑯ ᐱᕈᕐᑐᓄᖅ ᓂᕆᔭᒃᓴᓄᑦ, ᐃᒡᓗᑦᑎᓐᓄᑦ ᖃᓂᑦᑑᖕᒪᑦ; ᑐᓂᒐᔭᕐᐸᒋᑦ ᕔᓂᓕᐅᕐᕕᖕᒥᒃ ᐱᐅᓂᕐᓴᒥᒃ ᑖᑦᓱᒪᓐᖓᑦ; ᐅᕝᕙᓗ ᐃᓕᖕᓄᑦ ᐱᐅᓂᕐᓴᐅᒃᐸᑦ ᑮᓇᐅᔭᓂᒃ ᓈᒻᒪᒋᔭᕐᓂᒃ ᐊᑭᓕᕋᔭᕐᐸᒋᑦ.”

³ ᓁᐹᑦᓕ ᑭᐅᕗᖅ ᐂᕼᐊᑉᒧᑦ, “ᐊᑕᓂᖅ ᐅᕙᓐᓂᒃ ᓱᒋᐊᕐᓯᒐᔭᕐᐳᖅ ᑐᓂᒐᔭᕈᒃᑭᑦ ᓯᕗᓕᕕᓂᓐᓂᑦ ᐱᑖᕆᓯᒪᔭᓐᓂᒃ.”

⁴ ᐂᕼᐊᑉᓗ ᐃᓱᒪᔮᕐᓗᓂ ᕿᒃᓵᒡᓗᓂᓗ ᐊᖏᕐᕋᕐᐳᖅ ᓁᐹᑦ ᔨᔭᕆᐅᓪᒥᐅᑕᐅᑉ ᐅᖃᐅᓯᖏᑦ ᐱᓪᓗᒋᑦ, ᐅᖃᓚᐅᕐᒪᑦ, “ᑐᓂᓂᐊᓐᖏᓚᒋᑦ ᓯᕗᓕᕕᓂᓐᓂᑦ ᐱᑖᕆᓚᐅᕐᑕᓐᓂᒃ.” ᐃᒡᓕᕐᒥᓄᑦ ᓇᓪᓚᕋᒥ ᑐᓄᑉᐳᖅ, ᓂᕆᔪᒪᔪᓐᓃᕐᓗᓂᓗ.

⁵ ᓄᓕᐊᖓᑕᓕ ᔨᔨᐱᐅᓪ ᐅᐸᒃᐹ ᐅᖃᐅᑎᓪᓗᒍᓗ, “ᖃᓄᐃᒻᒪᑦ ᐊᓂᕐᓃᑦ ᕿᒃᓵᒃᐸ ᓂᕆᔪᒪᔪᓐᓃᕐᓗᑎᓪᓗ?”

⁶ ᑖᑦᓱᒪ ᑭᐅᕚ, “ᓁᐹᑦ ᔨᔭᕆᐅᓪᒥᐅᑕᖅ ᐅᖃᖃᑎᒋᓚᐅᕋᒃᑯ, ᐅᖃᐅᑎᓪᓗᒍ, ‘ᕔᓂᓕᐅᕐᕖᑦ ᓂᐅᕕᐊᕆᔪᒪᕙᕋ ᐊᑭᓕᕐᓗᑎᑦ, ᐅᕝᕙᓘᓐᓃᑦ ᓈᒻᒪᒋᒍᕕᐅᒃ ᐊᓯᐊᓂᒃ ᕔᓂᓕᐅᕐᕕᖕᒥᒃ ᑐᓂᔪᒪᕙᒋᑦ.’ ᑭᐅᓚᐅᕐᐹᖓ, ‘ᕔᓂᓕᐅᕐᕕᒐ ᐃᓕᖕᓄᑦ ᑐᓂᓂᐊᓐᖏᓚᕋ.’”

⁷ ᓄᓕᐊᖓᑕ ᔨᔨᐱᐊᓕᐅᑉ ᐅᖃᐅᑎᕚ, “ᐃᓴᕆᐊᓕᒥᐅᓄᑦ ᐊᖓᔪᖅᑳᕐᔪᐊᖑᓐᖏᓚᑏᑦ? ᒪᑭᓕᕆᑦ, ᓂᕆᓗᑎᓪᓗ, ᐆᒻᒪᑏᓪᓗ ᖁᕕᐊᓱᓕᕐᓕ; ᓁᐹᑦ ᔨᔭᕆᐅᓪᒥᐅᑕᐅᑉ ᕔᓂᓕᐅᕐᕕᖓ ᑐᓂᓂᐊᕐᐸᕋ ᐃᓕᖕᓄᑦ.”

⁸ ᑕᕝᕙ ᑎᑎᕋᓕᕐᐳᖅ, ᐂᕼᐊᑉ ᐊᑎᖓ ᐊᑐᕐᓗᒍ, ᓇᕿᑦᔪᓯᕐᐹᓗ ᓇᕿᑦᔪᑎᖓᓄᑦ, ᐊᐅᓪᓚᕐᑎᓪᓗᒍᓗ ᐊᖓᔪᖅᑳᓄᑦ ᐱᒻᒪᕆᐅᔪᓄᓪᓗ ᓄᓇᖃᕐᑐᓄᑦ ᓁᐹᑦ ᐃᒡᓗᒐᓴᖏᓐᓂ.

⁹ ᐃᒫᒃ ᑎᑎᕋᕐᐳᖅ, ᐅᖃᕐᓗᓂ, “ᓂᕆᑦᑍᓕᖁᔨᒋᑦᓯ, ᓁᐹᑦᓗ ᐃᖏᑎᓪᓗᒍ ᐅᐱᒋᔭᐅᓇᕐᓂᕐᐹᒥ ᐃᓄᐃᑦ ᓵᖓᓂ;

¹⁰ ᐊᖑᑏᖕᓂᒃ ᒪᕐᕉᖕᓂᒃ ᐊᕙᑖᓄᑦ ᐃᖏᑎᑦᓯᓗᓯ, ᐊᑭᕋᕐᑐᕐᓂᐊᕐᑑᖕᓂᒃ ᑖᑦᓱᒥᖓ ᓱᓕᖏᑦᑐᒥᒃ, ᐅᖃᕐᓂᕐᓘᑎᖃᕐᑐᒃᓵᖕᓂᒃ ᐅᖃᕐᓗᑎᒃ, ‘ᒎᑎᒥᒃ ᐊᖓᔪᖅᑳᕐᔪᐊᒥᒡᓗ ᐅᖃᕐᓂᕐᓘᑎᖃᓚᐅᕐᐳᑎᑦ.’ ᐊᓐᓂᓯᓗᒍ, ᐅᔭᖅᑲᓄᑦ ᒥᓪᓗᕆᐊᕐᑐᕐᓯᐅᒃ ᑐᖁᓪᓗᒍ.”

¹¹ ᑍᒤᒻᒪᑦ ᐊᖑᑏᑦ ᐃᒡᓗᒐᓴᖕᒥᐅᑍᑦ, ᐊᖓᔪᖅᑳᑦ ᐱᒻᒪᕆᐅᔪᓪᓗ ᐃᒡᓗᒐᓴᖕᓂ ᓄᓇᓖᑦ, ᐱᓇᓱᐊᕐᐳᑦ ᔨᔨᐱᐊᓕᐅᑉ ᑐᓂᓚᐅᕐᑕᖏᓐᓂᒃ, ᑎᑎᕋᖏᓐᓂᒃ ᒪᓕᒡᓗᑎᒃ.

¹² ᓂᕆᑦᑍᓕᖁᔨᕗᑦ, ᓁᐹᑦᓗ ᐃᖏᖁᕚᑦ ᐅᐱᓐᓇᕐᓂᕐᐹᒥ ᐃᓄᐃᑦ ᓵᖓᓂ.

¹³ ᐊᖑᑏᒡᓗ ᒪᕐᕉᒃ, ᓴᒡᓗᔪᒃᓵᒃ, ᐃᑎᕋᒥᒃ ᐃᒃᓯᕚᕐᕕᖓᑕ ᐊᑭᐊᓄᑦ ᐃᖏᑉᐴᒃ, ᐅᖃᕐᓂᕐᓘᑎᖃᕐᐳᒡᓗ ᓁᐹᑦᒥᒃ ᐃᓄᐃ ᓵᖓᓂ, ᐅᖃᕐᓗᑎᒃ, “ᓁᐹᑦ ᐅᖃᕐᓂᕐᓘᑎᖃᓚᐅᕐᐳᖅ ᒎᑎᒥᒃ ᐊᖓᔪᖅᑳᕐᔪᐊᕐᒥᒡᓗ.” ᑕᕝᕙ ᐊᓐᓂᓯᕚᑦ ᐃᒡᓗᒐᓮᑦ ᓯᓚᑖᓄᑦ ᒥᓪᓗᕐᐹᓪᓗ ᐅᔭᖅᑲᓄᑦ ᑐᖁᓪᓗᒍ.

¹⁴ ᑭᖑᓂᖓᒍᑦ ᐅᖃᕆᐊᕐᑐᕐᑎᑦᓯᕗᑦ ᔨᔨᐱᐊᓕᒧᑦ ᐅᖃᕐᓗᑎᒃ, “ᓁᐹᑦ ᐅᔭᖅᑲᓄᑦ ᒥᓪᓗᕐᑕᐅᓪᓗᓂ; ᑐᖁᕗᖅ.”

¹⁵ ᑕᒪᑐᒪ ᑭᖑᕐᖓᒍᑦ, ᔨᔨᐱᐅᓪ ᑐᓴᕋᒥ ᓁᐹᑦ ᒥᓪᓗᕐᑕᐅᓪᓗᓂ ᑐᖁᓂᖓᓂᒃ, ᐂᕼᐊᑉ ᐅᖃᐅᑎᕚ, “ᒪᑭᓪᓗᑎᑦ, ᓁᐹᑦ ᔨᔭᕆᐅᓪᒥᐅᑕᐅᑉ ᕔᓂᓕᐅᕐᕕᖓ ᐱᑖᕆᓕᕈᒃ, ᐃᓕᖕᓄᑦ ᑐᓂᔪᒪᓚᐅᓐᖏᑕᖓ ᑮᓇᐅᔭᒧᑦ; ᓁᐹᑦ ᐃᓅᔪᓐᓃᕐᒪᑦ, ᑐᖁᕗᕐᓕ.”

¹⁶ ᐂᕼᐊᑉᓗ ᑐᓴᑐᐊᕋᒥ ᓁᐹᑦ ᑐᖁᓂᖓᓂᒃ, ᒪᑭᑉᐳᖅ ᐂᓪᓗᓂᓗ ᓁᐹᑦ ᔨᔭᕆᐅᓪᒥᐅᑕᐅᑉ ᕔᓂᓕᐅᕐᕕᖓᓄᑦ ᐱᑖᕆᔭᕐᑐᕐᓗᒍ.

¹⁷ ᑕᕝᕙ ᐊᑕᓂᐅᑉ ᐅᖃᐅᓯᖓ ᑎᑭᑉᐳᖅ ᐃᓔᑦᔭᒧᑦ ᑎᓯᐰᑎᒥᐅᑕᕐᒧᑦ, ᐅᖃᕐᓗᓂ,

¹⁸ “ᒪᑭᓪᓗᑎᑦ, ᐂᕼᐊᑉ ᐃᓴᕆᐊᓕᒥᐅᑉ ᐊᖓᔪᖅᑳᕐᔪᐊᖓ ᐅᐸᓕᕈᒃ, ᓴᒥᐊᕆᐊᒦᑦᑐᖅ; ᑕᑯᒋᑦ, ᓁᐹᑦ ᕔᓂᓕᐅᕐᕕᖓᓃᑉᐳᖅ, ᑖᑦᓱᒥᖓ ᐱᑖᕆᐊᕐᑐᕐᓗᓂ.

¹⁹ ᐅᖃᐅᑎᔪᒫᕐᐸᑦ, ᐅᖃᕐᓗᑎᑦ, ‘ᐊᑕᓂᖅ ᐃᒫᒃ ᐅᖃᕐᐳᖅ, “ᑐᖁᑦᓯᓚᐅᕐᐲᑦ, ᐱᖁᑎᖓᓂᒡᓗ ᐱᑖᕐᓗᑏᑦ?”’ ᐅᖃᐅᑎᔪᒫᕐᐸᑦ, ᐅᖃᕐᓗᑎᑦ, ‘ᐊᑕᓂᖅ ᐃᒫᒃ ᐅᖃᕐᐳᖅ: “ᓁᐹᑦ ᐊᐅᖓᓂᒃ ᕿᒻᒦᑦ ᐊᓗᒃᑐᓚᐅᕐᑐᑦ ᐃᕝᕕᑦ ᓇᖕᒥᓂᖅ ᐊᐅᖕᓂᒃ ᐊᓗᒃᑐᕈᒫᕐᐳᑦ.”’”

²⁰ ᑕᕝᕙ ᐂᕼᐊᑉ ᐃᓔᑦᔭᒧᑦ ᐅᖃᕐᐳᖅ, “ᓇᓂᕕᖔ, ᐊᑭᕋᕐᑐᕐᑎᒐ?” ᑖᑦᓱᒪ ᑭᐅᕚ, “ᓇᓂᕙᒋᑦ, ᐃᓕᖕᓂᒃ ᑐᓂᕐᕈᑎᒋᓚᐅᕋᕕᑦ ᐱᐅᖏᑦᑐᓕᓂᕐᒧᑦ ᐊᑕᓂᐅᑉ ᑕᑯᓐᓇᕐᑕᖓᒍᑦ.

²¹ ‘ᑕᑯᒋᑦ, ᐃᓕᖕᓄᑦ ᐱᐅᖏᑦᑐᒥᒃ ᑎᑭᕝᕕᐅᑎᓐᓂᐊᕐᐸᒋᑦ; ᐊᕐᓵᕐᓂᐊᓕᕐᐸᒋᑦ ᓄᖑᑕᐅᑎᓪᓚᕆᒡᓗᑎᑦ, ᐂᕼᐊᐱᐅᓪᓗ ᐃᓚᓕᒫᖏᑦ ᐊᖑᑎᑦ ᓄᖑᑎᓐᓂᐊᕐᐸᒃᑲ, ᕿᓚᒃᓱᕐᓯᒪᔪᑦ ᕿᓚᒃᓱᕐᓯᒪᖏᑦᑐᓪᓗ, ᐃᓴᕆᐊᓕᒥᐅᓂ.

²² ᐃᓚᑎᑦ ᔨᕈᐳᐊᑎᑐᑦ ᓂᐹᑦ ᐃᕐᓂᖓᑐᑦ ᑍᒤᑎᓐᓂᐊᕐᐸᒃᑲ, ᐹᓴᐅᓪᓗ ᐃᓚᖏᑎᑐᑦ ᐊᕼᐂᔭᐅᑉ ᐃᕐᓂᖓᑐᑦ, ᓂᓐᖓᒃᓮᓚᐅᕐᓃᑦ ᐅᕙᓐᓂᒃ ᐱᓪᓗᒍ, ᐃᓴᕆᐊᓕᒥᐅᑦ ᐊᔪᕐᑐᓕᑎᓚᐅᕋᕕᒋᑦ.’

²³ ᔨᔨᐱᐅᓪ ᐱᓪᓗᒍ ᐊᑕᓂᖅ ᐅᖃᕆᕗᖅ, ‘ᕿᒻᒦᑦ ᔨᔨᐱᐊᓪᒥᒃ ᓂᕆᔪᒫᕐᐳᑦ, ᔨᔭᕆᐅᓕᐅᑉ ᐊᕙᓗᖏᑕ ᐃᓗᐊᓂ.’

²⁴ ᐂᕼᐊᐱᐅᑉ ᓇᖕᒥᓂᖏᑦ ᐃᒡᓗᒐᓴᖕᓂ ᑐᖁᔪᑦ ᕿᒻᒥᓄᑦ ᓂᕆᔭᐅᔪᒫᕐᐳᑦ, ᓇᖕᒥᓂᖏᓪᓗ ᓄᓇᑐᐃᓐᓇᒥ ᑐᖁᔪᑦ ᑎᖕᒥᐊᓂᑦ ᓂᕆᔭᐅᔪᒫᕐᐳᑦ.”

²⁵ (ᐂᕼᐊᑉᑐᑦ ᐱᔪᖃᓚᐅᓐᖏᓚᖅ ᐃᒻᒥᓂᒃ ᑐᓂᕐᕈᑎᒋᔪᑎᑐᑦ ᐊᔪᕐᑐᓕᓂᕐᒧᑦ ᐊᑕᓂᐅᑉ ᑕᑯᓐᓇᕐᑕᖓᒍᑦ, ᓄᓕᐊᒥᓄᑦ ᔨᔨᐱᐅᓪᒧᑦ ᑎᓕᐅᕐᑕᐅᓚᐅᕐᒪᑦ.

²⁶ ᓇᕐᕈᓇᕐᑐᒻᒪᕆᐊᓗᖕᒥᒃ ᐱᓇᓱᐊᓚᐅᕐᒪᑦ ᒎᑎᓐᖑᐊᓂᒃ ᒪᓕᒃᓴᕐᓗᓂ, ᐊᒧᕅᑎᑦ ᐱᓂᐊᕐᓂᕆᓚᐅᕐᑕᖏᑎᑐᑦ, ᐊᑕᓂᐅᑉ ᐃᓇᖏᕐᑕᐅᑎᓚᐅᕐᑕᖏᓐᓄᑦ ᐃᓴᕆᐊᓕᒥᐅᓄᑦ.)

²⁷ ᐂᕼᐊᐱᐅᓪᓗ ᐅᖃᐅᓰᑦ ᑕᒪᒃᑯᐊ ᑐᓴᕋᒥᒋᑦ, ᐊᓐᓄᕌᓂ ᐊᓕᒃᐰᑦ, ᐊᓐᓄᕌᕐᓗᓂᓗ ᐳᑐᕐᓛᓂᒃ ᖃᕿᐊᓕᕐᑐᕐᓯᐅᑎᓂᒃ, ᓂᕆᑦᑍᓕᓚᐅᕐᐳᖅ ᓯᓂᖃᑦᑕᕐᓗᓂᓗ ᐳᑐᕐᓛᓂᒃ ᐊᑐᕐᓗᓂ, ᑕᑯᑦᓱᓇᕐᓗᓂ ᕿᒃᓵᒡᓗᓂᓗ.

²⁸ ᐊᑕᓂᐅᓪᓗ ᐅᖃᐅᓯᖓ ᐃᓔᑦᔭᒧᑦ ᑎᓯᐰᑎᒥᐅᑕᕐᒧᑦ ᑎᑭᑉᐳᖅ, ᐅᖃᕐᓗᓂ,

²⁹ “ᑕᑯᓚᐅᕐᐲᑦ, ᐂᕼᐊᑉ ᐃᒻᒥᓂᒃ ᒥᑭᒡᓕᑎᕐᓂᖓᓂᒃ ᓵᓐᓂ? ᑖᓐᓇ ᓵᓐᓂ ᒥᑭᒡᓕᑎᓚᐅᕐᒪᑦ, ᐱᐅᖏᑦᑐᑦ ᑎᑭᑎᑦᓱᒫᕈᓐᓃᕐᐸᒃᑲ ᐃᓅᑎᓪᓗᒍ; ᐃᕐᓂᖓᓕ ᐃᓅᑎᓪᓗᒍ ᐱᐅᖏᑦᑐᑦ ᑎᑭᑎᑦᓱᒫᕐᐸᒃᑲ ᓇᖕᒥᓂᖏᓐᓄᑦ.”