KANTARIK EDERRENA 8 - Elizen Arteko Biblia (Biblia en Euskara Traducción Interconfesional)

Besarkada Emakumeak

¹ Oi nire anaia bazina, nire amaren bularrean hazia! Musu emango nizuke kalean aurkitzean, inoren iseka-beldurrik gabe.

² Neure amaren etxera eramango zintuzket, eta han neure irakasle izango. Ardo lurrintsua emango nizuke edaten, nire granaden edari bizia.

³ Ezker besoaz dit lepotik heltzen, eta eskuinekoaz nau besarkatzen.

Gizakumeak

⁴ Jerusalemgo neskatxok, otoi, ez iratzarri ene maitea, utzi lo egiten, nahi duen arte.

Maitasuna eta Herioa Koruak

⁵ Nor da, bere maitearen besotik, basamortuan gora datorren hori? Sagarrondopean iratzarri zaitut: han egon zen erdiminez zure ama, han oinazez zutaz erdi zena.

Gizakumeak Emakumeak

⁶ Ezar nazazu bihotzean zigilu bezala, besoan zigilu bezala. Herioa bezain gogorra maitasuna, Hildakoen Egoitza bezain iraunkorra maite-grina. Su eta gar da maitasuna, Jaunarengandiko sugar.

⁷ Uholdeak maitasuna ezin itzali, ezta ibaiek ere ito. Norbaitek maitasuna erosi nahi balu, bere ondasun guztiak emanik ere, mespretxua baizik ez luke aterako.

Zorion-eskaintza Anaiek

⁸ Arreba txiki bat dugu, ez zaizkio oraindik bularrak hazi. Zer egin gure arrebatxoarekin haren esku eske etorriko direnean?

⁹ Harresia balitz, zilarrezko almenak jarriko genizkioke. Atea balitz, zedro-oholez gogortuko genuke.

Emakumeak

¹⁰ Harresia naiz ni, dorreak nire bularrak. Horregatik, zorion betea damaiot neure maiteari.

Neure mahastia Gizakumeak

¹¹ Mahasti bat zuen Salomonek Baal-Hamonen; mahastizain batzuei utzi zien: zilarrezko mila txanpon dakarzkio bakoitzak fruituen ordain.

¹² Zuretzat mila txanponak, Salomon, haietarik berrehun mahastizainentzat. Neure mahastia neuretzat dut.

Agurra Gizakumeak

¹³ Oi lorategietako erregina, nire lagunak zure mintzoari adi; uztazu zure ahotsa entzuten:

¹⁴ «Zoaz ihesi, ene maitea, gazela edo oreinkumea irudi, usain gozoko mendietan barrena».