KANTARIK EDERRENA 7 - Elizen Arteko Biblia (Biblia en Euskara Traducción Interconfesional)

Dantza Koruak

¹ —Itzul zaitez, itzuli, Xulamita; itzul zaitez, itzuli, ikus zaitzagun. —Zer nahi diozue ikusi Xulamitari? —Bi gudari-taldeen dantza.

Gizakumeak Koruak

² —Bai politak zure oinak abarka horiekin, errege-alaba! Zure izterretako bihurguneak, zilarginaren egiazko artelan.

³ Erdian, kopa biribila duzu: eduki dezala beti ardo goxoa! Zure sabela liliz inguraturiko gari-piloa.

⁴ Zure bi bularrak bi gazelakume biritxi.

⁵ Zure lepoa marfilezko dorrea. Zure begiak Hexbongo bi uraska, hiri jendetsu horren sarreran. Zure sudur-hegia Damaskora begira dagoen Libanoko dorre.

⁶ Zure burua tente Karmel mendia bezala. Zure adatsaren distira purpurarena; errege bat dago preso zure ile-mototsetan.

Elkarren irrikaz Gizakumeak

⁷ Zu bai eder, bai atsegin, ene bihotzekoa, emazteki zoragarria!

⁸ Zure taxua palmondoarena, eta bularrak palmondo-lukuak.

⁹ Hau nioen neurekiko: «Palmondora igoko naiz haren fruituak hartzera». Mahats-lukuen gozoa dute niretzat zure bularrek, sagar-usain eztia zure arnasak.

¹⁰ Zure ahoaren jarioa ardorik bikainena… … bai, ardo bikaina nire maitearentzat; lotan daudenen ezpainak eztiki bustitzen ditu.

Emakumeak

¹¹ Ni neure maitearena naiz, eta nire irrikaz dago bera.

¹² Zatoz, ene maitea, goazen landara, ipuruen babesean emango dugu gaua.

¹³ Goizean goiz, mahastietara joango gara, ernamuinak irekitzen hasiak diren, granadondoak loretan dauden ikustera. Hantxe emango dizut neure maite-laztana.

¹⁴ Maitasun-sagarrei usain eztia darie, milaka fruitu gozo dago gure atean zain, fruitu zahar eta berri. Zuretzat nituen gordeak, ene maitea!