KANTARIK EDERRENA 4 - Elizen Arteko Biblia (Biblia en Euskara Traducción Interconfesional)

Honelakoa da ene laztana Gizasemeak

¹ Bai ederra zu, ene laztana, bai ederra! Zure begiak uso bi, musu-estalkipean. Zure adats-kizkurrak ahuntz-taldea dirudi, Galaad mendian behera bilintzi-balantza.

² Zure hortzak ardi moztu eta garbitu berriak. Denak dituzu biritxiak, bat bera ere ez lagunik gabea.

³ Zure ezpainak, zinta gorrimin, mintzaira gozokoak. Zure masailak granada ebaki baten bi erdiak, musu-estalkipean.

⁴ Zure lepoa harlanduz eraikitako Daviden dorrea. Milaka babeski daude han zintzilik, gizon ospetsuen babeskiak.

⁵ Zure bi bularrak bi gazelakume biritxi, lili artean bazkatzen.

⁶ Arrats beherean, haizeak jo eta itzala ihesi joatean, banoa neure mirra-mendira, neure intsentsu-muinora.

⁷ Guztiz ederra zara, ene laztana, ederra eta akatsik gabea!

Zatoz! Gizasemeak

⁸ Zatoz Libanotik, ene emaztegaia, zatoz! Jaitsi zaitez Libanotik, jaitsi Amanako gailurretik, Senir eta Hermon tontorretatik. Utzi lehoien eta panteren mendi-zuloak.

⁹ Maitemindua nauzu, ene arreba, ene emaztegaia! Maitemindua nauzu zeure begirada bakar batez, bihotz-lotua zeure lepoko kate-bira batez.

¹⁰ Zein ederrak zure maite-laztanak, ene arreba, ene emaztegaia! Ardoa baino gozoago dira! Zure ukenduen usaina lurrin guztiak baino gozoago!

¹¹ Zure ezpainei eztia darie, ene emaztegaia; zure mihipean, eztia eta esnea. Zure jantzien lurrina Libanoko basoen lurrina da,

Baratzea Gizasemeak

¹² Baratze itxia zara, ene arreba, ene emaztegaia! Baratze itxia eta iturri zigilatua!

¹³ Paradisu jori zara zu, granadondoak dituzu ematen, emaitzarik zoragarrienak sortzen:

¹⁴ nardoa, ipurua eta azafraia, kanela eta ereinotza; intsentsu, mirra, aloe, mota guztietako lurrin bereziak.

¹⁵ Zu nire baratzeko iturri, ur bizien iturri, Libano menditik datorren ur-jario!

Emakumeak

¹⁶ Iratzar, ipar-haize! Hator, hego-haize! Zabaldu airean nire baratzeko lurrinak. Eta zu, ene maitea, sar zeure baratzean, jan bertako fruitu zoragarriak.