DUTERONOMA 32 - Elizen Arteko Biblia (Biblia en Euskara Traducción Interconfesional)

Moisesen kantika Jauna, Israelen babes-harkaitza

¹ «Adi, zeruok, eta mintzatuko naiz, entzun, lurra, nire ahoko esanak;

² jaits bedi nire irakaspena euria bezala, isur bitez nire esanak ihintza bezala, euri-lanbroa belarretan bezala, langarra zelaian bezala.

³ Jaunaren izena aldarrikatuko dut: aitortu handi dela gure Jainkoa.

⁴ Bera babes-harkaitza: hark egina benetan bikaina, haren jokabidea zuzen-zuzena; Jainko leiala da bera, bidegabekeriarik gabea, zintzoa beti eta zuzena.

⁵ Akasgabe sortu zituen seme-alabak gaiztotu egin zaizkio: jende makur eta bide-galdua da.

⁶ Hori al da Jaunari erantzuteko era, herri ergel eta zentzugabe hori? Ez al da bera bizia eman dizun aita, egin eta finkatu zaituena?

⁷ Gogoratu antzinako egunak, pentsatu iraganeko urteetan; galdegin aitari eta kontatuko dizu, galdegin zaharrei eta azalduko:

⁸ Goi-goikoak, herriak nor bere lurraldean jartzean, gizateria munduan banatzean, lur-mugak finkatu zizkien herriei, bakoitzari bere jainko zaindaria emanez.

⁹ Baina Israel bere herritzat aukeratu zuen, Jakoben herria bere oinorde berezitzat.

¹⁰ Basamortuan aurkitu zuen, uluz beteriko bakardadean; inguratu eta bere ardurapean hartu zuen, begi-ninia bezala zaindu.

¹¹ Arranoak, habiaren gain hegaldaka, kumeak hegadarako bizkortzen dituen bezala, halaxe Jaunak ere: hegoak zabaldu, israeldarrak hartu eta luma gainean eraman zituen.

¹² Jaunak bakarrik eraman zituen, ez zuen berekin jainko arrotzik.

¹³ Mendi-gainetan ezarri zituen, landako fruituz elikatu; basaeztiz hazi zituen, harkaitzetik sorturiko olioz;

¹⁴ behi-gaztanbera eta ardi-esnea, bildots gizenen haragia, aukerako ahariak eta akerrak, ogi-irin garbi bikaina eman zizkion janari eta ardoa, mahats-odola, edari.

Israelen desleialtasuna

¹⁵ «Gizendu egin zen Jexurun eta ostikoka hasi —asebete zinen, gizendu, lodi-lodi egin—; bere egile zuen Jainkoa utzi zuen eta salbatzaile zuen harkaitza desohoratu.

¹⁶ Mindu egin zuten jainko arrotzak gurtuz, iraindu beren jokabide higuingarriaz.

¹⁷ Deabruei eskaini zizkieten sakrifizioak, ezagutzen ez zituzten sasijainkoei, arestian etorritako jainko berriei, arbasoek inoiz gurtu ez zituztenei.

¹⁸ Sortu zaituztena, berriz, zeuen Harkaitza, mespretxatu egin duzue, mundura ekarri zaituztena ahazturik utzi.

Jainkoaren zigorra

¹⁹ «Seme-alaben iraina ikustean, baztertu egin zituen Jaunak.

²⁰ Esan zuen: Ezkutatu egingo diet aurpegia, eta ikusiko dut zer amaiera duten, jende gaiztotua baita, leialtasunik gabeko seme-alabak.

²¹ Jainko ez zirenengana joz mindu ninduten, beraien idolo hutsalez iraindu; herri ez den batekin minduko ditut nik ere, nazio ergel baten bidez irainduko.

²² Sutan dago nire haserrea: Herio Leize hondoraino iritsiko da beronen garra, lurra eta bertako emaitzak irentsiko ditu, mendien oinarriak kiskaliko.

²³ Zoritxarrak bidaliko dizkiet samaldan, neure gezi guztiak jaurtiko.

²⁴ Goseak akituko ditu, sukar eta izurri gaiztoek erasango; txikituko dituzten basapiztiak bidaliko dizkiet, pozoiz akabatuko dituzten sugeak.

²⁵ Kalean ezpatak kenduko dizkie seme-alabak, etxe barruan ikara izango nagusi. Denek izango dute zori bera, mutil eta neskatxek, bularreko haur eta agureek.

Jaunak Israelen etsaiak ere zigortu

²⁶ «Israeldarrak sakabanatzea pentsatu nuen, berorien oroitzapena ere gizartetik desagerraraztea;

²⁷ baina etsaien irainen beldur nintzen, arerioek, oker ulertuz, hau pentsatuko zuten beldur: “Geure ahalmenaz nagusitu gara, hori ez da Jaunak egina”.

²⁸ Zentzua galdu duen jendea da, ezer ulertzeko gauza ez dena.

²⁹ Jakinduriarik balute, ohartuko lirateke beren azkenaz.

³⁰ Nola daiteke, izan ere, gizon batek mila pertsegitzea, bi gizonek hamar milari ihes eragitea, babes-harkaitz duten Jaunak saldu eta etsaien esku utzi dituelako ez bada?

³¹ Ez dira, ez, etsaien jainko babesleak gure Harkaitzaren pareko; etsaiek berek aitor dezakete hori.

³² Sodoma eta Gomorraren jatorriko mahatsondo dira: haien mahats-mordoak garratz eta pozoitsu,

³³ haien ardoa herensugearen pozoi, sugegorriaren pozoi hilgarri.

³⁴ Gogoan jasoa dut hori guztia, neure artxiboan ongi gordea,

³⁵ mendekatu eta merezia emango diedan arte, Israelen etsaiek lur jo dezaten arte. Hurbil dago haien hondamendia, berandu gabe etorriko da haientzat prestaturik dagoena.

³⁶ (Defendatuko du Jaunak bere herria, gupidatuko da bere zerbitzariez). Indarrak akitzen ari zaizkiela ikustean, denak, libre nahiz esklabo, galtzear daudela,

³⁷ esango die Jaunak: “Non dira zuen jainkoak, non babes-harkaitz zenituztenak?

³⁸ Haiek jaten zituzten zuen sakrifizioetako gantzak, haiek edaten isur-oparietako ardoa. Ea, datozela zuei laguntzera, izan ditzazuela gordeleku!”

³⁹ Baina orain, begira: Ni naiz, neu bakarrik, ez da ni beste jainkorik! Neuk ditut heriotza eta bizia ematen, neuk dut zauritzen eta sendatzen, ez da inor nire eskutik libratzen.

⁴⁰ Eskua zerurantz jaso eta zin eginez diot: Betiko bizi naizela bezain egia da,

⁴¹ nire ezpata distiratsua zorroztu eta justiziari ekitean, mendeku hartuko dudala etsaien aurka eta beren merezia emango gorroto didatenei;

⁴² odolez mozkortuko dira nire geziak, haragiz aseko nire ezpata, hildakoen eta atxilotuen odolaz, ile harroko etsaien buruez!

Kantikaren bukaera

⁴³ «Naziook, egin poz-oihu Jaunaren herriarekin, bere zerbitzarien odola mendekatu egingo baitu Jaunak; mendekua hartuko du etsaien aurka, eta barkamena emango bere lurralde eta herriari».

Jaunaren legeak bizi-emaile

⁴⁴ Moisesek, Nunen seme Josue lagun zuela, kantikaren bertso guztiok adierazi zituen.

⁴⁵ Eta Israel osoari zuzenduriko hitzaldi guztiok bukatzean,

⁴⁶ esan zien: «Gogoan hartu nik gaur agindu dizuedan guztia, eta agindu zeuen seme-alabei lege honen xedapen guztiak betetzen saiatzeko,

⁴⁷ ez baitira funsgabeko hitz zuentzat, zeuen bizi baizik; horien bidez, luzaro biziko zarete Jordanez beste aldean jabetzan hartzera zoazten lurraldean».

Jaunak Moisesen heriotza iragarri

⁴⁸ Egun hartan bertan, Jaunak esan zion Moisesi:

⁴⁹ «Igo Abarim mendietara, Moab lurraldean, Jeriko parean, dagoen Nebo mendi-gailurrera, eta begira israeldarrei jabetzan ematen diedan Kanaan lurraldera.

⁵⁰ Ondoren, mendi horretan hilko zara eta zure arbasoekin bilduko, zure anaia Aaron Hor mendian hil eta arbasoekin bildu zen bezala;

⁵¹ izan ere, desleial jokatu zenuten nirekin israeldarren aurrean, Tzin basamortuan, Kadexen dagoen Meribako iturrian, eta ez zenuten nire santutasuna aitortu.

⁵² Horregatik, urrutitik ikusiko duzu israeldarrei emango diedan lurraldea, baina ez zara bertan sartuko».