ဤစာအုပ်သည် ဘုရားသခင်မှ အားသွင်းပေးထားသော စာအုပ်မဟုတ်ပါ။ ၎င်းသည် ခရစ်ယာန်၏ ကာနွန် သို့မဟုတ် ယုဒလူမျိုး၏ တာနာ့ခ်၏ အစိတ်အပိုင်းမဟုတ်ပါ။ သမိုင်းနှင့် သုတေသန ရည်ရွယ်ချက်များအတွက်သာ ပြသထားပါသည်။ အပြည့်စုံသော ရှင်းလင်းချက်ကို ကြည့်ရန် DANIEL GR. 3 - Elizen Arteko Biblia (Biblia en Euskara Traducción Interconfesional)Azariasen otoitza 24 Hiru gazteak suaren erdian zebiltzan Jainko Jauna goresten eta bedeinkatzen. 25 Azariasek, suaren erdian zutik, otoitz egin zuen ozenki, esanez: 26 «Bedeinkatua eta goretsia zu, Jauna, gure arbasoen Jainkoa! Ospe zuri menderen mendetan! 27 Zuzena zara egin diguzun guztian, zuzenak zure jokabide eta egintzak, bidezkoak zure epaiak. 28 Zuzenak izan dira zure erabakiak, gure eta Jerusalemen kontra, gure gurasoen hiriaren kontra, zigorra bidaltzean. Merezia genuen geure bekatuengatik. 29 Izan ere, bekatu egin dugu eta gaizki jokatu, zuregandik aldenduz. Bai, guztiz bekatari gara, 30 ez baitiegu zure aginduei obeditu: ez ditugu gorde, ezta bete ere geure onerako agindu zeniguna. 31 Bai, zuzen jokatu duzu, egin diguzuna egitean, zigorra bidaltzean. 32 Legerik eta federik gabeko etsai zitalen esku utzi gaituzu, munduko errege zuzengabe eta gaiztoenaren esku. 33 Eta orain, ez dugu hitzik esateko eskubiderik ere: lotsaz eta desohorez beterik gaude zure zerbitzari eta gurtzaileok. 34 Baina zarena zarelako, ez gaitzazu betiko utz, ez hautsi gurekin egina duzun ituna. 35 Abraham zeure adiskideagatik, Isaak zeure zerbitzariagatik, Jakob zeure herri santuaren aitarengatik, ez aldendu guregandik zeure errukia! 36 Beraiei hitzeman zenien zeruko izarrak bezala ugarituko zenizkiela ondorengoak, itsasbazterreko hondarra bezain ugari egingo zenituela. 37 Orain, ordea, Jauna, herri guztietan txikiena gara, mundu osoan gaude mespretxatuak geure bekatuengatik. 38 Gaur egun ez dugu ez errege, ez profeta, ez buruzagirik, ezta tenplurik ere, sakrifizioak, opariak eta intsentsua eskaintzeko; ez dugu lehen fruituak non eskainirik, zure errukia lortzeko. 39 Baina damuz hautsirik eta umildurik gatozkizu: har gaitzazu onez, ahari eta zezenak edo milaka bildots gizen erre-oparitzat eskainiko bagenizkizu bezala. 40 Gerta gaitezela gaur zuretzat sakrifizio atsegin, eta izan gaitezela zure jarraitzaile leial, zuregan konfiantza dutenek ez baitute inoiz huts egiten. 41 Orain, bihotz-bihotzez jarraitu nahi dizugu, zureganako begirunez bizi eta zu bilatzen saiatu: ez gu lotsagarri utzi. 42 Joka ezazu gurekin zeure bihotz onaz, zeure neurrigabeko errukiaz. 43 Libra gaitzazu zeure egintza harrigarriez; azaldu zeure izen ospetsua, Jauna. 44 Geldi bitez lotsa gorrian zure zerbitzarion kaltetan ari direnak! Geldi bitez desohoraturik, botere guztia galdurik, indarrak deseginda. 45 Jakin bezate zu zarela Jaun eta Jainko bakarra, zure ospea mundu osora zabaltzen dela». Hiru gazteen kantika 46 Hiru gazteak labera bota zituzten errege-zerbitzariak sua indartu eta indartu ari ziren, petrolioa, bikea, amukoa eta egurra emanez. 47 Hogeita lau metro gora igotzen ziren garrak labe gainetik; 48 ingurura ere zabaldu eta labetik hurbil zeuden babiloniarrak kiskaldu egin zituzten. 49 Baina Jaunaren aingeruak, Azarias eta lagunengana labera jaitsirik, sugarrak kanpora uxatu zituen, 50 eta labe barruan haize heze eta freskoa atera zuen; hala, suak ez zien minik, ez kalterik egin, ezta ukitu ere. 51 Orduan, hirurak aho batez Jainkoa goresten, ospatzen eta bedeinkatzen hasi ziren: 52 «Bedeinkatua zu, Jauna, gure arbasoen Jainkoa, goretsia eta goraipatua menderen mendetan! Bedeinkatua zu, santu eta ospetsu zarena, goretsia eta goraipatua menderen mendetan! 53 Bedeinkatua zu, tenpluan zeure ospea agertzen duzuna, goretsia eta ospatua menderen mendetan! 54 Bedeinkatua zu, kerubinen gainean eseririk, leizeak arakatzen dituzuna, goretsia eta goraipatua menderen mendetan! 55 Bedeinkatua zu, errege-tronuan eseria zaudena, goretsia eta goraipatua menderen mendetan! 56 Bedeinkatua zu, zeru-sabaian, goretsia eta ospatua menderen mendetan! 57 «Jaunaren sorkari guztiok, bedeinka ezazue Jauna, goretsi eta goraipatu menderen mendetan! 58 Zeruok, bedeinka ezazue Jauna, goretsi eta goraipatu menderen mendetan! 59 Jaunaren aingeruok, bedeinka ezazue Jauna, goretsi eta goraipatu menderen mendetan! 60 Ortzi gaineko ur guztiok, bedeinka ezazue Jauna, goretsi eta goraipatu menderen mendetan! 61 Zeruko astrook, bedeinka ezazue Jauna, goretsi eta goraipatu menderen mendetan! 62 Eguzki-ilargiok, bedeinka ezazue Jauna, goretsi eta goraipatu menderen mendetan! 63 Zeruko izarrok, bedeinka ezazue Jauna, goretsi eta goraipatu menderen mendetan! 64 Euri eta ihintz, bedeinka ezazue Jauna, goretsi eta goraipatu menderen mendetan! 65 Haize guztiok, bedeinka ezazue Jauna, goretsi eta goraipatu menderen mendetan! 66 Su eta bero, bedeinka ezazue Jauna, goretsi eta goraipatu menderen mendetan! 67 Hotz eta sargori, bedeinka ezazue Jauna, goretsi eta goraipatu menderen mendetan! 68 Ihintz eta elurte, bedeinka ezazue Jauna, goretsi eta goraipatu menderen mendetan! 69 Gau-egunok, bedeinka ezazue Jauna, goretsi eta goraipatu menderen mendetan! 70 Argi-ilunpeok, bedeinka ezazue Jauna, goretsi eta goraipatu menderen mendetan! 71 Izotz eta antzigar, bedeinka ezazue Jauna, goretsi eta goraipatu menderen mendetan! 72 Jela eta elur, bedeinka ezazue Jauna, goretsi eta goraipatu menderen mendetan! 73 Tximist eta hodei, bedeinka ezazue Jauna, goretsi eta goraipatu menderen mendetan! 74 Lurra, bedeinka ezazu Jauna, goretsi eta goraipatu menderen mendetan! 75 Mendi eta muino, bedeinka ezazue Jauna, goretsi eta goraipatu menderen mendetan! 76 Lurreko landare guztiok, bedeinka ezazue Jauna, goretsi eta goraipatu menderen mendetan! 77 Itsaso eta ibai, bedeinka ezazue Jauna, goretsi eta goraipatu menderen mendetan! 78 Iturriok, bedeinka ezazue Jauna, goretsi eta goraipatu menderen mendetan! 79 Arrain handi eta txiki guztiok, bedeinka ezazue Jauna, goretsi eta goraipatu menderen mendetan! 80 Zeruko hegazti guztiok, bedeinka ezazue Jauna, goretsi eta goraipatu menderen mendetan! 81 Piztia eta abere guztiok, bedeinka ezazue Jauna, goretsi eta goraipatu menderen mendetan! 82 Gizaki guztiok, bedeinka ezazue Jauna, goretsi eta goraipatu menderen mendetan! 83 Israeldarrok, bedeinka ezazue Jauna, goretsi eta goraipatu menderen mendetan! 84 Jaunaren apaizok, bedeinka ezazue Jauna, goretsi eta goraipatu menderen mendetan! 85 Jaunaren zerbitzariok, bedeinka ezazue Jauna, goretsi eta goraipatu menderen mendetan! 86 Bihotz zintzook, bedeinka ezazue Jauna, goretsi eta goraipatu menderen mendetan! 87 Santu eta bihotz-apalok, bedeinka ezazue Jauna, goretsi eta goraipatu menderen mendetan! 88 Hananias, Azarias eta Mixael, bedeinka ezazue Jauna, goretsi eta goraipatu menderen mendetan! «Berak libratu gaitu Hilen Egoitzatik, heriotzaren menpetik salbatu, labeko su bizitik gorde eta garretan zegoen labetik eta suaren erditik askatu. 89 «Eman eskerrak Jaunari, ona baita, haren maitasuna betikoa baita. 90 Jaunaren gurtzaile guztiok, bedeinka ezazue jainkoen Jainkoa, goretsi eta eman eskerrak, haren maitasuna betikoa baita». |
Elizen Arteko Biblia (EAB) Biblia en Euskara, Traducción Interconfesional) Copyright © Sociedad Bíblica de España, 2008 Utilizada con permiso
Bible Society of Spain