མཐོང་སྣང་ལེའུ་ 8 - རྫོང་ཁ་

ཕྱག་ཐམ་བདུན་པ་བཀྲུམ་པའི་སྐོར།

¹ ལུག་གི་ཕྱུག་ཀུ་གིས་ཕྱག་ཐམ་བདུན་པ་འདི་བཀྲུམས་ད་ ཞིང་ཁམས་ལུ་ཆུ་ཚོད་ཕྱེད་ཀ་དེ་ཅིག་ཁུ་སིམ་སི་སྦེ་སོང་ཡི།

² དེ་ལས་དཀོན་མཆོག་གི་སྐུ་མདུན་ལུ་ལོང་སྡོད་མི་ཕོ་ཉ་བདུན་པ་དེ་ལུ་ང་གིས་མཐོང་ཅི་ ཁོང་ལུ་དུང་བདུན་གནང་ཡི།

³ ད་རུང་ ཕོ་ཉ་གཞན་གྱི་ལག་པ་ལུ་ གསེར་གྱི་བསང་ཕོར་འབག་མི་གཅིག་འོངས་ཏེ་ མཆོད་ཁྲི་གི་གདོང་ཁར་ལོངས་སྦེ་ དཀོན་མཆོག་ཁོ་རའི་དམ་པའི་མི་ཚུ་གི་སྨོན་ལམ་འདི་ རྒྱལ་ཁྲི་གི་རྩ་བར་ གསེར་གྱི་མཆོད་ཁྲི་གུ་ཕུལ་བའི་དོན་ལུ་ སྤོས་དང་བཟང་དྲི་ཚུ་ལེ་ཤ་གནང་སྟེ་འདུག

⁴ དེ་ལས་ ཕོ་ཉ་གིས་མཆོད་ཁྲི་གུ་ཕུལ་མི་ སྤོས་དང་བསང་གི་དུ་པ་དེ་ དཀོན་མཆོག་ཁོ་རའི་དམ་པའི་མི་ཚུ་གི་སྨོན་ལམ་དང་གཅིག་སྦེ་ཐོན་ཏེ་ དཀོན་མཆོག་གི་སྐུ་མདུན་ལུ་ལྷོད་ཅི།

⁵ དེ་ལས་ ཕོ་ཉ་དེ་གིས་ བསང་ཕོར་འབག་སྟེ་ མཆོད་ཁྲི་ནང་ལས་མེ་འདེགས་ཞིནམ་ད་ འཛམ་བུ་གླིང་ནང་གཏོར་བཏངམ་ད་ འབྲུག་ལྡིར་བའི་སྐད་སྦོམ་སྦེ་རྐྱབ་ གློག་ཀེམ་སྟེ་ས་གཡོམ་སྦོམ་གཅིག་བརྐྱབས་ཅི།།

དུང་བདུན་འཕུ་བའི་སྐོར།

⁶ དེ་ལས་དུང་བདུན་འབག་མིའི་ཕོ་ཉ་ཚུ་གིས་ དུང་འཕུ་ནི་སྦེ་གྲ་སྒྲིག་བརྐྱབས་ཅི།

⁷ ཕོ་ཉ་དང་པ་འདི་གིས་ཁོ་རང་གི་དུང་འཕུཝ་ད་ སེརཝ་དང་ ཁྲག་ མེ་སླ་བསྲེས་བརྐྱབས་ཏེ་ འཛམ་བུ་གླིང་ནང་གཏོར་བཏངམ་ད་ འཛམ་བུ་གླིང་དཔྱ་གསུམ་མེ་གིས་འཚིག་ཅི་ དེ་ནང་ཡོད་པའི་ནགས་ཚལ་དཔྱ་གསུམ་མེ་འཚིག་སྟེ་ རྩྭ་ཧོནམོ་ག་ར་ མེ་འཚིག་ཡར་སོང་ཡི།

⁸ དེ་ལས་ ཕོ་ཉ་གཉིས་པ་དེ་གིས་ཁོ་རང་གི་དུང་འཕུཝ་ད་ གངས་རི་བཟུམ་སྦོམ་སྦེ་མཐོང་མི་ག་ཅི་གཅིག་ མེ་འབར་ཏེ་རྒྱ་མཚོ་ནང་བཀོཝ་ད་ རྒྱ་མཚོ་དཔྱ་གསུམ་ཁྲག་ལུ་འགྱུར་ཏེ།

⁹ རྒྱ་མཚོ་ནང་གི་སེམས་ཅན་དཔྱ་གསུམ་ཤི་སོངམ་མ་ཚད་ དེ་ནང་ཡོད་པའི་གྲུ་དཔྱ་གསུམ་རྩ་མེད་བཏང་ཡི།

¹⁰ དེ་ལས་ ཕོ་ཉ་གསུམ་པ་དེ་གིས་ཁོ་རང་གི་དུང་འཕུཝ་ད་ སྐརམ་སྦོམ་གཅིག་མེ་ཆག་བཟུམ་སྦེ་ འོད་ཆེམ་ཆེམ་འབར་ཏེ་ ནམ་མཁའ་ལས་མར་ གཙང་ཆུ་དཔྱ་གསུམ་དང་ ཆུ་མིག་དཔྱ་གསུམ་གྱི་གུ་བུད་འོངས་ཡི།

¹¹ སྐརམ་དེ་གི་མིང་འཁན་པ་ཤིང་ཟེར་སླབ་ཨིན་མས་ དེ་གིས་གཙང་ཆུ་དཔྱ་གསུམ་དང་ ཆུ་མིག་དཔྱ་གསུམ་གྱི་ཆུ་ ཁག་དྲགས་ལུ་འགྱུརཝ་ལས་བརྟེན་ མི་ལེ་ཤ་ཤི་སོང་ཡི།

¹² དེ་ལས་ ཕོ་ཉ་བཞི་པ་དེ་གིས་ཁོ་རང་གི་དུང་འཕུཝ་ད་ ཉིམ་དཔྱ་གསུམ་དང་ ཟླཝ་དཔྱ་གསུམ་ དེ་ལས་སྐརམ་དཔྱ་གསུམ་ འོད་ཤར་ནི་མེདཔ་བཟོ་བཏངམ་མ་ཚད་ འོད་དཔྱ་གསུམ་ གནག་དུང་དུ་ལུ་འགྱུར་ཏེ་ ཉིན་མའི་ཉིམ་དཔྱ་གསུམ་དང་ ནུབ་མོའི་ཟླཝ་དཔྱ་གསུམ་འོད་ཤར་ནི་མེདཔ་སྦེ་ཡར་སོང་ནུག

¹³ དེ་ལས་ད་རུང་ང་གིས་བལྟཝ་ད་ ཞིང་ཁམས་ཀྱི་སྦུག་ལས་ ཁྱ་རྒོད་གཅིག་ནམ་མཁའ་འཕུར་ཏེ་ དེ་གིས་སྐད་སྦོམ་སྦེ་བརྐྱབས་ཏེ་ འཛམ་བུ་གླིང་ནང་སྡོད་མི་ཚུ་ སྡི་ཆེ་བས་ སྡི་ཆེ་བས་ སྡི་ཆེ་བས་ ག་ཅི་སྨོ་ཟེར་བ་ཅིན་ འཇིགས་སྐྲག་བྱུང་དོ་ མཐའན་མཇུག་གི་ཕོ་ཉ་གསུམ་གྱིས་ཡང་ ཁོང་རང་གི་དུང་འཕུ་ནི་འབད་དོ་ཟེར་སླབ་སར་ང་གིས་གོ་ཡི།།