མཐོང་སྣང་ལེའུ་ 6 - རྫོང་ཁ་

ལུག་གི་ཕྱུག་ཀུ་གིས་ཕྱག་ཐམ་བདུན་པ་བཀྲུམ་པའི་སྐོར།

¹ ང་གིས་བལྟཝ་ད་ ལུག་གི་ཕྱུག་ཀུ་གིས་ཕྱག་ཐམ་བདུན་པ་ལས་ དང་པ་འདི་བཀྲུམས་ད་ སེམས་ཅན་བཞི་གི་གྲལ་ལས་གཅིག་གིས་ འབྲུག་ལྡིར་བའི་འུར་སྒྲ་བཟུམ་ནང་ ཚུར་ཤོག་ཟེར་བཀའ་གནང་ས་ང་གིས་གོ་ཡི།

² དེ་ལས་ང་གིས་བལྟཝ་ད་ ངེ་གི་གདོང་ལས་ རྟ་དཀརཔོ་གཅིག་གུ་ཆིབས་མི་འདི་གི་ཕྱག་ལུ་ མདའ་གཞུ་བསྣམས་ཡོདཔ་ ང་གིས་མཇལ་ཡི་ དེ་ལས་ཁོ་ལུ་གཙུག་རྒྱན་གཅིག་ཕུལ་ཏེ་ དགྲ་ཚུ་ཕམ་གཏང་ཡི་རང་བྱོན་སོང་ཡི།

³ དེ་ལས་ལུག་གི་ཕྱུག་ཀུ་གིས་ ཕྱག་ཐམ་གཉིས་པ་འདི་བཀྲུམས་ད་ སེམས་ཅན་གཉིས་པ་འདི་གིས་ ཚུར་ཤོག་ཟེར་བཀའ་གནང་སར་ང་གིས་གོ་ཡི།

⁴ དེ་ལས་རྟ་དམརཔོ་གཅིག་འོངས་ཏེ་ དེའི་གུ་ཆིབས་མི་ལུ་ གྱི་རིངམ་གཅིག་གནང་སྟེ་ ས་གཞི་ནང་གི་ ཞི་བདེ་ལེན་འབག་ནི་སྦེ་ མི་དེ་ཚུ་གཅིག་གིས་གཅིག་ལུ་ བསད་བཅུག་ནི་གི་དབང་ཚད་གནང་ནུག

⁵ དེ་ལས་ལུག་གི་ཕྱུག་ཀུ་གིས་ ཕྱག་ཐམ་གསུམ་པ་འདི་བཀྲུམས་ད་ སེམས་ཅན་གསུམ་པ་འདི་གིས་ ཚུར་ཤོག་ཟེར་བཀའ་གནང་སར་ང་གིས་གོ་ཡི་ དེ་ལས་ང་གིས་བལྟཝ་ད་ ངེ་གི་གདོང་ཁར་ རྟ་གནགཔོ་གཅིག་མཐོང་ཅི་ དེའི་གུ་ཆིབས་མིའི་ཕྱག་ལུ་ སྲང་ཆ་གཅིག་བསྣམས་མི་གཅིག་ང་གིས་མཇལ་ཡི།

⁶ དེ་ལས་སེམས་ཅན་བཞི་གི་སྦུག་ལས་ སྐད་སྒྲ་བཟུམ་གཅིག་གིས་ དཀར་བྲེ་གང་ལུ་ ཏི་རུ་ དེ་ན་རི་གཅིག་དང་ ནག་བྲེ་གསུམ་ལུ་ ཏི་རུ་ དེ་ན་རི་གཅིག་ཨིན་ དེ་ལས་མར་ཁུ་དང་རྒུན་འབྲུམ་ཆང་དེ་ཚུ་ ཆུད་ཟོས་མ་གཏང་ཟེར་ གསུངས་སར་ང་གིས་གོ་ཡི།

⁷ དེ་ལས་ལུག་གི་ཕྱུག་ཀུ་གིས་ ཕྱག་ཐམ་བཞི་པ་འདི་བཀྲུམས་ད་ སེམས་ཅན་བཞི་གིས་ ཚུར་ཤོག་ཟེར་བཀའ་གནང་སར་ང་གིས་གོ་ཡི།

⁸ དེ་ལས་ངེ་གི་གདོང་ཁར་རྟ་སེརཔོ་གུ་ཆིབས་མི་གཅིག་དང་མཇལ་ཡི་ དེ་གི་མཚན་འཆི་བ་ཟེར་ཞུཝ་མས་ ད་རུང་གཞན་གཅིག་ གཤིན་ཡུལ་ཟེར་མི་དེ་ ཁོ་གི་ཤུལ་བདའ་སྟེ་འདུག་ དེ་ལས་ས་གཞི་གི་དཔྱ་བཞི་ནང་ལས་དཔྱ་གཅིག་ལུ་ གྱི་རིངམ་གི་ཐོག་ལས་དང་ ལ་ལུ་མུ་གེ་གི་ཐོག་ལས་ ལ་ལུ་ནད་ཡམས་ཀྱི་ཐོག་ལས་ ལ་ལུ་རི་དྭགས་གཅན་གཟན་གྱི་ཐོག་ལས་སྦེ་གསད་ནི་གི་དབང་ཚད་ ཁོང་གཉིས་ལུ་གནང་ནུག

⁹ དེ་ལས་ལུག་གི་ཕྱུག་ཀུ་གིས་ ཕྱག་ཐམ་ལྔ་པ་འདི་བཀྲུམས་ད་ མཆོད་ཁྲི་གི་འོག་ལུ་ དཀོན་མཆོག་གི་གསུང་ལུ་བརྟེན་ཏེ་ འཛོམ་དཔང་འབདཝ་ད་ བསད་མིའི་སྲོག་འདི་ཚུ་ ག་ར་འདི་ནང་ཡོདཔ་ང་གིས་མཐོང་ཅི།

¹⁰ ཁོང་གིས་དེ་ཁར་ལས་སྐད་སྦོམ་སྦེ་བརྐྱབས་ཏེ་ ཀྱེ་ཀུན་དབང་བའི་གཙོ་བོ་ མཆོག་ཏུ་གྱུར་པ་ བདེན་པ་དང་ལྡན་མི་གིས་ འཇིག་རྟེན་པ་གི་མི་ ང་བཅས་ཀྱི་སྲོག་བཅད་མི་ཚུ་ལུ་ ཁྲིམས་ཕྱེ་སྟེ་ སྲོག་ལན་འཇལ་ནིའི་དོན་ལུ་ དུས་ཡུན་ག་དེམ་ཅིག་འགོར་ནི་སྨོ་ཟེར་ཞུཝ་མས།

¹¹ དེ་ལས་ཁོང་ལུ་ན་བཟའ་དཀརཔོ་རེ་རེ་གནང་སྦེ་ ཁྱེད་བཟུམ་སྦེ་རང་ངེ་གི་ཞབས་ཕྱི་ཞུ་མི་དེ་ གཞན་གྱི་ལག་པར་ ཤི་དགོཔ་བྱུང་མི་སྤུན་ཆ་ད་རུང་ལེ་ཤ་ཡོད་ ཁོང་གི་གྱངས་ཁ་མ་ཚང་ཚུན་ཚོད་ ཁྱེད་ཨ་ཙི་སྒུག་སྟེ་ངལ་འཚོ་ཟེར་གསུངས་ཡི།

¹² དེ་ལས་ཁོ་གིས་ཕྱག་ཐམ་དྲུག་པ་འདི་བཀྲུམས་ད་ གནམ་མེད་ས་མེད་ས་གཡོམ་སྦོམ་བརྐྱབས་ཏེ་ ཉིམ་འདི་རས་གནགཔོ་བཟུམ་ལུ་འགྱུར་ ཟླཝ་འདི་ཁྲག་བཟུམ་སྦེ་དམརཔོ་ལུ་འགྱུར་སོངམ་ང་གིས་མཐོང་ཅི།

¹³ དེ་ལས་ད་རུང་རླུང་འཚུབ་འཕུཝ་ད་ ཅོང་སེ་ཤིང་སྡོང་གཡུགས་ཏེ་ དོག་མ་ས་ཁར་བུད་དོཝ་བཟུམ་སྦེ་ ནམ་མཁའ་ལས་སྐརམ་དེ་ཚུ་ས་ཁར་བུདཝ་ཨིན་མས།

¹⁴ དེ་ལས་གནམ་དེ་ཡང་ ཤོག་དྲིལ་ཡར་སྒྲིལ་དོཝ་བཟུམ་སྦེ་སྒྲིལ་ཏེ་ཡལ་འགྱོཝ་མ་ཚད་ གངས་རི་དང་གླིང་ཕྲན་དེ་ཚུ་ག་ར་ རང་གི་ས་གནས་ལས་སྤོར་སོང་ཡི།

¹⁵ འཛམ་བུ་གླིང་སྐྱོང་མི་རྒྱལཔོ་དང་ མི་སྦོམ་དང་ དམག་དཔོན་ མི་ཕྱུགཔ་ མི་སྟོབས་ཅན་ རྒྱོབོ་རྒྱམོ་ རང་དབང་ཡོད་མི་ཚུ་ མི་ག་ར་བྱག་ཕུག་དང་བྱག་གི་འོག་ལུ་གཡིབ་སྟེ།

¹⁶ ཁོང་གིས་ གངས་རི་དང་བྱག་ལུ་ང་བཅས་ཀྱི་གུ་ལུ་བུད་ཤོག་ ཡར་རྒྱལ་ཁྲིའི་གུ་བཞུགས་མིའི་ཞལ་ལས་དང་ ལུག་གི་ཕྱུག་ཀུ་གི་ཐུགས་ཁྲོ་བོ་ལས་ ང་བཅས་ལུ་སྦ་བཞག་གནང་།

¹⁷ ག་ཅི་སྨོ་ཟེར་བ་ཅིན་ ཁོ་གི་ཁོང་ཁྲོ་བའི་ཉིནམ་སྦོམ་འདི་འོངས་ཡི་ འདི་གི་གདོང་ཁར་ག་གིས་ལོངས་སྡོད་ཚུགས་ནི་སྨོ་ཟེར་སླབ་ས་ང་གིས་གོ་ཡི།།