མཐོང་སྣང་ལེའུ་ 10 - རྫོང་ཁ་

ཕོ་ཉ་སྟོབས་ཤུགས་ཅན་དང་ཤོག་དྲིལ་ཆུང་ཀུ་གི་སྐོར།

¹ དེ་ལས་སྟོབས་ཤུགས་དང་ལྡན་པའི་ ཕོ་ཉ་གཞན་གཅིག་ ཞིང་ཁམས་ལས་མར་འོངམ་ང་གིས་མཐོང་ཅི་ ཁོ་གི་གཟུགས་གུ་ས་སྨུག་སྤུར་ མགུ་ཏོ་གུ་འཇའ་ཚོན་བཟུམ་སྦེ་བསྐོར་ གདོང་འདི་ཉིམ་བཟུམ་སྦེ་ཤར་ རྐངམ་འདི་མེའི་ཀཝ་བཟུམ་སྦེ་འདུག

² དེ་ལས་ལག་པ་ལུ་ཁ་ཕྱེ་སྟེ་ཡོད་མིའི་ ཤོག་དྲིལ་ཆུང་ཀུ་གཅིག་བཤེད་དེ་ཨིན་མས་ རྐངམ་གཡསཔ་འདི་རྒྱ་མཚོ་གུ་དང་ རྐངམ་གཡོནམ་འདི་ས་གཞི་གུ་བཀལ་ཏེ་སྡོད་ནུག

³ དེ་ལས་ ཁོ་གིས་ སེངྒེ་གི་ངར་སྐད་བཟུམ་སྦེ་སྐད་སྦོམ་སྦེ་རྐྱབ་ད་ འབྲུག་བདུན་པ་གིས་འུར་སྒྲ་ལྡིར་ཡི།

⁴ དེ་ལས་འབྲུག་བདུན་པ་འུར་སྒྲ་ལྡིརཝ་ད་ ང་གིས་འབྲི་ནི་འབད་ཡི་ དེ་འབདཝ་ད་ ཞིང་ཁམས་ལས་གསུང་སྐད་གཅིག་གོ་ཡི་ དེ་གིས་འབྲུག་བདུན་པ་གིས་ སླབ་མི་འདི་མ་འབྲི་བར་གསང་སྟེ་བཞག་ ཟེར་ང་ལུ་བཀའ་གནང་ཡི།

⁵ དེ་ལས་ང་གིས་མཐོང་མིའི་ ཕོ་ཉ་ཞབས་རྒྱ་མཚོ་དང་ས་གཞི་གུ་བཀལ་ཏེ་ ཡོད་མི་དེ་གི་ལག་པ་གཡསཔ་དེ་ཡར་ཞིང་ཁམས་ལུ་སེང་སྟེ།

⁶ དུས་རྒྱུན་དུ་རང་གསོན་པོ་སྦེ་བཞུགས་མི་ཞིང་ཁམས་དང་ དེ་ནང་ཡོད་མི་དང་ ས་གཞི་དང་རྒྱ་མཚོ་དེ་ནང་ཡོད་མི་ ག་ར་མཛད་མིའི་མཚན་ནང་མནའ་འབོ་སྟེ་ ད་དུས་ཚོད་ལེ་ཤ་མི་འགོར།

⁷ དེ་འབདཝ་ད་ ཕོ་ཉ་བདུན་པ་གིས་དུང་འཕུ་ནི་འབད་བའི་ཉིནམ་ལུ་ དཀོན་མཆོག་གི་གསང་བ་ ཧ་མ་གོ་བར་གསང་སྟེ་ཡོད་མི་དེ་ ཕྱག་ཞུ་མི་དང་ལུང་སྟོན་པ་ཚུ་ལུ་གསུངས་མི་བཟུམ་སྦེ་རང་ དོན་དག་གྲུབ་ནི་ཨིན་ཟེར་གསུངས་ཡི།

⁸ དེ་ལས་ཧེ་མ་ཞིང་ཁམས་ལས་གོ་མི་གསུང་སྐད་འདི་ ད་རུང་ཡང་ཚར་གཅིག་ང་གིས་གོ་ཡི་ འདི་གིས་ ཕོ་ཉ་རྒྱ་མཚོ་དང་ས་གཞི་གུ་ ལོང་སྡོད་མིའི་ལག་པ་ལུ་ ཤོག་དྲིལ་ཁ་ཕྱེ་སྟེ་བཤེད་མི་དེ་ལེན་པ་སོང་ཟེར་ང་ལུ་གསུངས་ཡི།

⁹ དེ་ལས་ང་གིས་ ཕོ་ཉ་གི་གདོང་ཁར་སོང་ཞིནམ་ད་ ཤོག་དྲིལ་ཆུང་ཀུ་འདི་ང་ལུ་གནང་ཟེར་སླབ་ད་ ཁོ་གིས་ང་ལུ་ ཨ་ནི་ལེན་ཞིནམ་ད་ཟ་ དེ་གིས་ཁྱོད་ཀྱི་ཕོཝ་ནང་ཁག་ཏིག་ཏི་བཟོ་འོང་ དེ་འབདཝ་ད་ ཁ་ལུ་མངར་ཏོང་ཏོ་ སྦྱང་བཟུམ་སྦེ་འོང་ཟེར་སླབ་ཅི།

¹⁰ ཕོ་ཉ་གིས་སླབ་དོཝ་བཟུམ་སྦེ་རང་ ང་གིས་ཤོག་དྲིལ་ཆུང་ཀུ་འདི་ལེན་ཏེ་ཟཝ་ད་ དེ་གི་བྲོཝ་འདི་ ངེ་གི་ཁ་ལུ་སྦྱང་བཟུམ་སྦེ་ཨིན་མས་ དེ་འབདཝ་ད་ ཕོཝ་ནང་ལྷོདཔ་ད་ ཁག་ཏིག་ཏི་ལུ་འགྱུར་སོང་ཡི།

¹¹ དེ་ལས་ཁོ་གིས་ང་ལུ་ཁྱོད་ཀྱིས་ཨིན་ཅི་མིན་ཅི་ མི་རིགས་ལེ་ཤ་དང་ ཁ་སོ་སོ་སླབ་མི་དང་ རྒྱལ་ཁབ་དང་རྒྱལཔོ་ཚུ་གི་སྐོར་ལས་ ད་རུང་ཡང་ལུང་བསྟན་བཤད་དགོ་ཟེར་སླབ་ཅི།།