प्रेरित 20 - डोटेली नयाँ करार

पावल माकेडोनिया प्रदेशमि रे युनान प्रदेशमि

¹ यो हुलदङ्गा रोकिया पछा पावलले प्रभु येशूका शिष्यालाइ जम्मा अर्यो रे तिननलाइ उत्साह दिइबर बिदा भया, रे माकेडोनिया प्रदेसमि गया।

² तइ प्रदेशमि गइबर तिननलाइ भौत उत्साह दिया पछा तिन ग्रीस प्रदेशमि गया, जइलाइ अखैया प्रदेस लगइ भणिन्छ।

³ ताँ तिन तीन मैना सम्म बस्या। तिन सिरिया प्रदेशमि जहाज बठेइ जान्ज्या, तिनले केइ यहुदि अगुवानले तिनलाइ जहाजमि माद्या योजना बनाइराइछ भणन्या सुण्यो तबइकिलाइ पावलले माकेडोनिया प्रदेस होइबर सिरिया प्रदेशमि जान्या पक्‍का अर्यो।

⁴ तब बेरिया सहरमि बस्सया पुरसको चेलो सोपात्रोस, थेसलोनिके सहर बठेइ अरिस्तार्खस रे सिकन्दस, डर्बि सहरका गायस, लुस्त्रा सहर बठेइ तिमोथी रे एसिया प्रदेशका तुखिकस रे त्रोफिमस तिनसित गया।

⁵ तिनन अगाडी गया रे त्रोआस सहरमि पुग्या पछा हामलाइ पखिरइथ्या।

⁶ तर हाम निस्तार काजबार पछा फिलिप्पी सहर बठेइ जहाजमि चडिबर पाँच दिन पछा तिननलाइ त्रोआस सहरमि भेट्या, रे हाम ताँ सात दिन बस्या।

युटिकस जिउनो अरिया

⁷ आइतबारका दिन जब हाम प्रभुभोज खानाइ एकहठ्ठा भया, तब पावलले भोलिबार जान्या मन अर्या हुनाले, तिननसित अधरात सम्म कुरणीकानी अर्या।

⁸ हाम एकहठ्ठा भया मल्लो तलाको कोठामी भौत बत्ति बल्लाथ्या।

⁹ युटिकस नाउँ भया एक जाना जबान मान्स झ्यालमि बसिरइथ्यो। पावलले भौत बेर सम्म कुरणीकानी अरन्ज्या तइलाइ निन लागी रे त्यो सिइय्यो, निनमि त्यो तेसरा तला हइ झड्यो, रे उतन्जेइ केइ मान्सन तल्तिर आइबर तइलाइ उठायो तर त्यो मरिसक्या थ्यो।

¹⁰ तब पावल तल्तिर तइका वाँ गया रे घोप्टिबर तइलाइ अङाल हाल्यो रे वलतिर पल्तिरका मान्सनलाइ भण्यो, “तमन जन आतिय, क्याकि यो जिउनोइ छ।”

¹¹ तब पावल मल्तिर उकल्या, रे सब मिलिबर प्रभुभोज खायो। तइ पछा बिहानइ उजालो नहुन्ज्या सम्म तिननसित भौत बेर कुरणीकानी अद्दाइ रया। तइ पछा पावल तिनन बठेइ बिदा भया।

¹² तिननले तइ जबान मान्सलाइ जिउनोइ लेइबर आया रे भौत खुशी भया।

त्रोआस सहर बठेइ मिलेटेस गाउँ सम्मको यात्रा

¹³ त्रोआस सहर बठेइ पावल बाहेक हाम सब जहाजमि चडिबर अस्सोस गाउँमी गया। पावललाइ अस्सोस गाउँ सम्म हिटबर जान्या मन भया हुनाले उनले आफलाइ अस्सोस गाउँ सम्म मान्तर जहाजमि चड्या बन्दोबस्त अर्याथ्यो।

¹⁴ हाम अस्सोस गाउँमी पुग्या पछा उन लगइ आइबर जहाजमि चड्या रे हाम सब मिलिबर मितिलेने गाउँमी गया।

¹⁵ भोलिबार ताँ बठेइ यात्रा अद्दाइ खियस टापुका नजिकै होइबर सामोस गाउँमी पुग्या, रे अर्खा दिन मिलेटस सहरमि आया।

¹⁶ पावलले एफिसस सहरमि नओल्या फैसला अर्यो, क्याकि पावल एसिया प्रदेशमि आजी भौत समय बिताउन चाहान्थेइन। उनले पेन्तिकोस काजबारका दिन यरुशलेम सहरमि पुग्द्दाइ हतार अद्दाथ्या।

एफिसस सहरमि भया मण्डलिका अगुवानसित बिदाइ

¹⁷ जब हाम मिलेटस सहरमि ओल्या, तब पावलले एफिसस सहरमि भया मण्डलिका अगुवानलाइ रैबार पठायो।

¹⁸ तिनन आया पछा पावलले भण्यो, “एसिया प्रदेशमि आया दिन बठेइ तमनसित अइल सम्म बसन्ज्या मइले तमरा बिचइनि कइ किसिमले दिन बिताया त्यो तमनलाइ था छ।

¹⁹ पुरा नम्रतामि आँउस बगाउनोइ, यहुदि मान्सको जालजेलको बेलामि ठुलो संकट पड्या लगइ मइले प्रभुको सेवा अर्या।

²⁰ तमन संगति अद्द्या ठाउँमि रे घर-घरमि गइबर सब कुरणीको शिक्षा दिन्ज्या मइले तमरो भलाइ हुन्या केइ कुरणी मनमि बाकि राखेइन।

²¹ यहुदि मान्सन रे गैर-यहुदि मान्सनलाइ पाप अद्द छाडिबर परमेश्वरतिर फर्क रे हामरा प्रभु येशू ख्रीष्टमी बिश्वास अर भण्नेइ कुरणीको गवाही मइले दिइराइछु।”

²² आब हेर, म पबित्र आत्माको आज्ञामी यरुशलेम सहरतिर जान्ना छु, ताँ मलाइ कि-कसो पडि आउन्या हो त्यो म केइ जाण्नइन।

²³ तर इति मान्तर जाण्नउ, कि हरेक सहरमि झेलको द:ख रे कष्ट ममि पडि आउन्या हो भण्न्या पबित्र आत्माले मलाइ भण्या छ।

²⁴ तबइकिलाइ मेरो जीवन आफ्नि निउति केइ मोलको आथिन। इति मान्तर चाहानौ, कि परमेश्वरले मान्स जातिलाइ अनुग्रह अर्याछ भण्न्या सुसमाचार फैलाउन्या कामलाइ म पुरा अद्द सकु, जो प्रभु येशूले मलाइ दिइराइछ।

²⁵ आब हेर, म जाण्नउ कि तमनमि हइ जइ जइलाइ मइले हरेक ठाउँमि परमेश्वरको राज्यका बारेमि प्रचार अर्या, तमन मलाइ आजी कभइ धेक्द्या होनु।

²⁶ तबइकिलाइ आजका दिन म तमनलाइ गवाही दिनउ, कि यदि तमनमि हइ कोइ लगइ येशूमि बिश्वास नअरिबरइ मरन्छ भण्या यो मेरो गल्ती होइन।

²⁷ क्याकि मइले तमनलाइ सब कुरणी बताइ सक्या छु, जो तमनले जाण भणि परमेश्वर चाहानाहान।

²⁸ तमनले आफ्नो रे आफ्ना सब मान्सनको हेरचाह अर्या। पबित्र आत्माले तमनलाइ मान्सनको जिम्मा दिया हुनाले तमन, उनले आफनाइ रगतले किन्या परमेश्वरका मण्डलिको हेरचाह अर।

²⁹ क्याकि मलाइ था छ, कि म गया पछा तमरा बिचइनि झुटा शिक्षक आउन्याहुन। रे बिश्वासिनलाइ दु:ख दिन्या हुन, तब तिनन त्यो ब्वाँसा जसाइ हुन, जो भेडालाइ माद्दाहान।

³⁰ याँ सम्मकि तमरा आफ्ना बिश्वासीनका बिच बठेइ यिसा मान्सन आउन्या हुन, जइले प्रभुका शिष्यालाइ आफ्ना खराब बाटामि लैजान्या हुन।

³¹ तबइकिलाइ यो सम्जिबर होशियार बस, कि तीन बर्ष सम्म मइले रातदिन आँउस बगाइबर हरेक मान्सनलाइ चेताउनी दिनोइरया।

³² आब म तमनलाइ परमेश्वरमि रे उनरा अनुग्रहको बचनमी सुम्पिदिनउ, जइले तमनलाइ बिश्वासमि बलिया बनाउन सकन्छ, रे परमेश्वरले तमनलाइ त्यो उत्तराधिकार दिनाहान जइलाइ दिन्या बाचा उनले तिनन सब मान्सनसित अर्याछ जो उन बठेइ पबित्र पाड्या छ।

³³ मइले कसइ मान्सको सुन, चाँदी, कि लत्ताको लोभ अरेइन।

³⁴ तमनलाइ थाइछ, मइले काम अरबर मलाइ रे मेरा साथिनलाइ चाहिन्या जरुरी कुरणी पुरा अरिदिया।

³⁵ मइले सब कुरणीमि तमलाइ उदाहरण दिइराइछु कि तमनले लगइ यिसेरी कडा मेहनत अरिबर गरिबलाइ सायता अद्दु पणन्छ। प्रभु येशूको बचन याद राख, कसेरी उन आफइले भणिराइछ, कि लइजानु भण्ना दिनु आजी निको हो।

³⁶ इति भणबर पावलले घुडा टेक्यो रे तिनन सबसित प्रार्थना अर्यो।

³⁷ तिनन सब रोया, रे पावललाइ अङाल हालि भात्ति खाइबर बिदा अर्यो।

³⁸ तिननले तमन मलाइ आजी कभइ धेक्द्या होनु भणि पावलले भणेइ कुरणीमि बड्ताइ सोक अर्यो। रे तिननले पावललाइ जहाजमि पुर्यायो।