Yuána 1 - Fayam Midhab Yiesu Kiristoká He Hol Af Iđiny Kaanaká

ˈDee máádhat yie

¹ Erkob-, Waag hátlé hé níínní ka kuonne mánká ˈDee hé biiy gaa ije. Máá gaalí ˈDéé yegetallá Waago hol af ije, ˈDee íínííllá he Waag.

² Máállá in erkob Waag hátlé hé níínní ka kuonne mánká Waag hol af ije.

³ He met lullé Waag hí ká kuonnééllá mú ˈdaallé he ká nadhe, ki ija. Máállá muuninyka, he met lullé úr ubaa les gaa ijóóllá hé onnônyka mán.

⁴ Mu íínííllá in luolmít hí yé gáá ˈdeˈdeenne. Luolmit kinaallá he édhúm gálaat gaa verenoká.

⁵ Édhúmallá he édhúm bííy gaa ongʼoˈdeká gaa eedhdhesuo-, bííy gaa ongʼoˈdeká hí ma ˈdiđisinyká.

⁶ Aalé máá gaalí Yuána yegieká Waag hí ali gáá kaayye.

⁷ Mu ka yimíéllá he giri mu édhúm kinaallá ˈduuwle gálaat geđuo-, gálaat lulle édhum iiy yegetká.

⁸ Mu íín dhúrle hé édhúm kinaallá muuniny. Mu ka yimíéllá édhum ˈduuwlé he ká sidhe.

⁹ Édhúmallá he édhúm ˈdúwa-, lésallá ká yimie-, máádhat lulle édhum ˈdú kokuoká.

¹⁰ Édhúmallá hé lésallá gaa ije. Mu íínííllá har úba les hí ˈdaalle ká naate-, les hí ki iđoka, les gálle hé mú ali gaa moonnodhe.

¹¹ Mu hé lésle ká yimie, kor mú gálle hé mú điidhe.

¹² Tá gál mú ma đíin-, mú iiy yieká lulle íín hé muí ˈduuw gálle um Waaˈgiet yegetká shie.

¹³ Gál mú iiy yíéllá ˈdalmaat káána-, he kí ˈdalidhééllá hé ˈdalmaat aađa-, fás gonniet-, gálaat hí hol kí hođuoká muuniny, hééllá he ˈdalmaat Waag yé gáá ˈdiiyyeká.

¹⁴ Aaléka, Máá gaalí ˈDéé yegetallá máádhat yie, múún gáál hurt gáá yíéđie. Mú guchlé ˈdúˈjím ubaa ˈduuw guđoká ˈgayyóóllá íl kínyaa nyí ki argiyye. Guch muí ˈgúóllá he ˈdaa giri mu íín he Iny ali ka takach-, ˈJaalle Waagká.

¹⁵ Aalé Yuána mú fayamle ˈdiiyime, af úr ki eey, kieye, Máá yú hí geđie-, yú kieye, Máá yú met ká nadhe-, ka yiimet-, yú hátlé ma ka ˈdaláanká kíssóótí ali ije-, hé ye ˈdú ˈdúwa-, yú hí yegieká hállá! yie.

¹⁶ Mú ˈdúˈjímlé-, ˈdúˈjím ke hemuumurít gaa argeká a mé iđóóllá hé muun lulkúnno gáál ˈdú ookoˈdmoote.

¹⁷ Hemuumurít íín Móshe hí gáál ká hilsie. ˈDúˈjím ubaa ˈgíérích ˈdúwáállá íín Yiesu Kirísto hí gáál ká hilie.

¹⁸ Waag hé kálta máá hí argeká mán. Máá ke Waag gaa onnodheká, he Iny ali ka takach-, Waaˈgiet-, ˈJaalle túmus ki koyká.

Yuána hát Messíya muuninyká gálaat geey

¹⁹ Aaléka, gál guguđo-, Yuuˈdi-, Yerusalemká gállé suoryoká ubaa gállé Leviká ˈbaal Yuána gáál ali ˈdú fie, giri gaal Yuána ka hegeset-, Kúún mááya? mú yegetká. Aalé gaal mú heeteká Yuána ˈdeenylé gáál hol ˈdú nieká kieye,

²⁰ Yú yáá Messíya muuniny, muí gáál yie. Mu hatallá yíéllá, hé hé níínní gáál af ki mannisieká mán. Mu hé ˈdúwaká he gáál geey.

²¹ Aaléka, gaal mú yiete, kieye, Tá kuun mááya? Kuun he Elíya? gaalí yie. Yuána kieye, Yú yáá máá kinaallá muuniny. Gaal geđi mú yiete, kieye, Kuun he Máá giri Waag hí ˈdeem ka shigichoká? yie. Mu gáál ˈdéé hol ˈdú nie, Híʼi, yie.

²² Aalé gaal mú yiete, kieye, Tá kuun mááya? Ebá hol ka ˈdáákash! Gál nyí ali ká fieká nyí fayám ˈdú sita, gaalí mú yie.

²³ Aalé Yuána kieye, Yú he ˈdéé hót ˈbakat gáá ˈgiˈgite-, kieye, ˈGíérích Máá Guđoká lođuđugul kóo, chegie-, Waag máállé ˈdéé ka shigiche-, Yisááya hí ˈdeenyle hodheká, yie.

²⁴ Aalé gál gál Farisaay hí ali ka fíéllá,

²⁵ mú yiete, kieye, Kuun in Messíya máámaʼ, Elíya máámaʼ, Máá giri Waag hí ˈdéé ka shigichoká in úba muuniny háluke, tá háteka gálaat bie gim nanniyyóol? mú yie.

²⁶ Yuána gáál ˈdéé hol ˈdú nie, kieye, Yú bie gálaat gim nannaa, tá máá hí muogká hé hurt kíchiallá gaa ijo.

²⁷ Máá kinaallá he máá yú met ká nadhe-, ka yiimetká. Tá yú yáá ˈduuw ˈguo-, mú koiyle saawle fuuroká mán, yie.

²⁸ Hééllá lulle Bédhene giri wár Yorˈdan-, ílung ˈdaati-, álle Yuána hí gálaat bie gim gaa nannieká, he yiem gáá ˈdie.

Yíésu he Élíny Waaˈgiet

²⁹ Bííy éíy taaka ka biˈdeká Yuána Yíésu hí ˈdu gáá yiimie-, argeká, đo kieye, Dhaayyíe, Élíny Waaˈgiet nyuogim ubaa ađaabano lésallá gaa egewká háluká!

³⁰ Máá ˈdeenyle yú hogodhe-, yú kieye, Máá yú met ká nadhe-, ka yiimet-, yú hátlé ma ka ˈdaláanká íín kíssóótí ali ije-, hé ye ˈdú ˈdúwa-, yú hí yegieká, hállá!

³¹ Yú dhúrchú érléká yáá mú moonnoy, tá yú ka yimie-, gálaat bie gim nannúóllá he giri gál Yisirayel mu hát mááyaká kiimisatká, yie.

³² Aaléka, Yuána hé argeká huogodhe, kieye, Yáá Hím Naasan Waaˈgiet hát hóleka úr gáá lelete-, mú ˈdú yíéđiyyeká arge.

³³ Yú yáá onnônyka mú ma kiimísan, tá Máá ye ali gáá kaay-, kieye, Gálaat bie gim náánnaʼ, ye yieká, ye geey, kieye, Máá Hím Naasan Waaˈgiet úr gáá leletoká hí ˈdú yíéđiyyo-, argiyyoká, máá kinaallá he máá gálaat Hím Naasan Waaˈgiet gim nannuoká, hí ye yie.

³⁴ Hé kinaallá yáá arge, tá yú hí mú ˈduuwle geeye, Máállá gon Iny Waaˈgiet, Yuána hí gáál yie.

Ánˈduru ubaa Bétiro Yíésu hol arge

³⁵ Bííy éíy taaka ka biˈdeká Yuána ubaa lalille naam sedhe, geđi ál kinaal ki ˈdie.

³⁶ Yuána Yíésu sienylé gaa igireká mú gaa dhaay, đo ˈdéé hodhe, kieye, Bá dhaayyíe, Élíny Waaˈgiet háluká! yie.

³⁷ Gál giri naama-, láliká ˈdeeny Yuána hí hodhéél maaleká đo Yíésu el gaa veere.

³⁸ Yíésu hol gáá madeká gál naama-, hí el gaa igireká arge, đo gáál yiete, kieye, Meete hí feˈde? yie. Gaal mú yiete, kieye, Rábi, kuun in el mé ko ále? yie. (Rábi hélle kieye, Máá gáál he oonisúóllo.)

³⁹ Yíésu gáál ˈdéé hol ˈdú nie, kieye, Ka yimedhíe, el meenychú argáa, yie. Hé kinaallá aadh ˈgas afur ˈjobínti. Aalé gaal mú hol eedhdhe, mu el meenylé ijoká arge, gaal mú hol af saanie.

⁴⁰ Gál giri naama-, Yuána ˈdéé hogodheká maale-, Yíésu el gaa veereká mú tikiˈd hí Ánˈduru giri Símon Bétiro nyárléká.

⁴¹ Ánˈduru đo kie, erkob nyárlé Símon af kí ˈdie, mú geey, kieye, Nyáá nyí Máá Messíya léká argiyye, yie. (Messíya he af Heberew. Af Hellenka he Kirísto.)

⁴² Mu đo Símon Yíésu ˈdú eey. Yíésu Símon ki fuˈjie, kieye, Kúún he Símon, iny Yuanaká. Kúún aaléka Kéfasso gaalí ko yegedhe, muí mú yie. (Meeny Kéfaslééllá hélle kieye, Nyátáábá, af Hellenka Bétiro.)

Yíésu Fílib ubaa Nadhániel ká vie

⁴³ Aaléka, bííy éíy taaka ka biˈdeká Yíésu sieny Galilááya seseenká hí ká hileká, Fílib ˈdú sedhe, mú geey, kieye, Ye el gáá véer, yie.

⁴⁴ Fílib úba he máá Beđesaida, ény giri Ánˈduru ubaa Bétiro égetléká.

⁴⁵ Aalé Fílib Nadhániel ˈdú sedhe, mú geey, kieye, Máá héle Móshe hí warˈgasam hemuumurit Waaˈgiet gaa veere-, gál Waag hí ˈdeem ka shigicheká úba hí ˈdeenyle warˈgasam gaa veereká nyáá nyí argiyye. Máá kinaallá he Yíésu Nasaret-, iny Yuosefká, yie.

⁴⁶ Nadhániel mú ˈdéé hol ˈdú nie, kieye, Hoo! Násaret kín hé midhabká hé hí yé gáá ˈdeˈdeen? yie. Aalé Fílib mú geey, kieye, Káde, ílkú hí ko geeycho, mú yie.

⁴⁷ Aalé Yíésu Nadhániel hí ˈdu gáá yiimie-, argeká, ˈdéé hodhe, kieye, Máá Yisirayel-, honyir-, af ka hódho mánká, háluká! yie.

⁴⁸ Nadhániel Yíésu yiete, Háte ye og? yie. Yíésu kieye, Fílib hátlé ko ma ka víiny-, kúún kinnach gaach gaa iđeká in yú ko arge, yie.

⁴⁹ Aalé Nadhániel mú geey, kieye, Máá gáál he oonisúóllo! Kúún gon Iny Waago! Kúún he Kánsích Yisirayel! muí yie.

⁵⁰ Yíésu mú geey, kieye, Af giri yú ko geey-, yú kieye, Kuun hátlé kinnach gaach gaa iđeká in yú ko arge, yú ko yieká, in iiy chie? Kuun aaléka, hé éíy taaka hééllá af ˈdú gíriká il ha ki aargiˈda, mú yie.

⁵¹ Yíésu geđi mú geey, kieye, Yú hí hé ˈdúwaká geeye, ur af hí furme-, gál ˈgasso-, urru-, Waaˈgietká úr mé nannuo-, tá Iny Máádhat ˈdu gáá leledhoká haí aargiˈda, Yíésu hí gáál yie.