Tímote ki Naamaká 3 - Fayam Midhab Yiesu Kiristoká He Hol Af Iđiny Kaanaká

Yaalmisano biiy el ˈdaˈdká

¹ Hééllá onnóo, bár biiy el ˈdaˈdká hé ˈdeđewká yiem hai ká ˈdeeme.

² Af kinaal gálaat íín tákámle he hollo hol ki fede, kamúr hai geelnedhe, hollo hol memeye, gál ˈdúwaká hollo hol ká dhaˈgama, chaarimo he af ká ˈgaa, hé gál hí ˈdaloká met ma gaa kekeminy, hé gielmit gálaat hol ˈdú nannuoká mán, Waago he egesheye,

³ hé gálaat ma geelneny, hé garano ma fediny, gálaato heengʼeedhe, hé hol tím mán, af ˈgérnti he ˈgaa, hé hé ˈdabaanká ma fediny,

⁴ gálaato met il gaa ˈgee, hé tawuny ki naamaká mán. Gáál hol meenyle gáál lug hai ˈdiisicha, gaal hé hí geymisuoká hai geelnedhe, gaal hé Waag ma geelneny,

⁵ gaal gál Waaˈgieto he hol hođia, kor íín fargogint Waaˈgiet hát he hujich nanniyyoká hé iiy ma yegen. Gál hatallóóllá hol gáá fagánash.

⁶ Gálallá ˈbaal he gál é ger mákártaká higilo-, ˈdeg đáa-, hawul mán-, ađaabanolle iigilish-, he fedit met hí hol ká burnayyeká hí baađisichoká af ˈdú nannasat-, he onisinyle ˈdég iiy ki hođuoká.

⁷ ˈDegééllá gálaat lullé af nee kokoyyo, hé hé ˈdúwa-, Waaˈgietká eiy ma nannasan.

⁸ Hát tikiˈde Yánnes ubaa Yámberes hí Móshe mé il gaa ˈgieká, in úba gál gáál he oonisúóllá hé ˈdúwa-, Waaˈgietká met il gaa ˈgee. Gaal he gál kas hí ˈdeenete-, iiy yeenlé Waag ka ˈguoká iiy yeen ˈdúwaká muuninyká.

⁹ Tá gáál he onisinyle hé biiy ma chochony. Hát Yánnes ubaa Yámbereska, gaal hát ˈdaalím mánká ál ˈjóbo gálaat hí gaa kiimita.

Hé ˈdúwa-, onnotééllá chíro, gálaat onísish

¹⁰ Aaléka, kó he onisinychú, iđinychú, hé yú ˈdú lađaanká, iiy yeenchú, geer gaa guchchú, gielmitchú, ubaa mé ki chirsanchú kó el gáá veeˈde.

¹¹ Héétí he il ká argisiny ubaa manyjany chia yú Ántiok, ubaa Ikónio, tá Lústura il hí ye gaa argiyye-, yú mé ki chirteká lulle kó óg. Tá yaalmisanóóllá lulle hé Máá kúnnaa Guđoká hí ye gaa rie.

¹² Aaléka, ameeny gál Máá kúnnaa Rubachiet Yíésu iiy yie-, iđiny Waag hí ˈdúúw gaa egeetoká fedoká manyjasiny il haí aargiˈda.

¹³ Héétí gál húgúmle ˈdeđewká ubaa gál hođomlé-, hol gál Waaˈgiet hođuoká biiy súm hai gaa ˈdeđendhe, gálaat hai baađisia, tá íín dhúrle úba ha gaalí baađisia.

¹⁴ Tá ˈdaakúka, hé onnote-, iiy chíéllá hát ˈdabaanká chíro, ˈdaa giri gál hééllá gaa onnoteká kuuní ógká.

¹⁵ Kuun Warˈgat Waaˈgietallá níínénti gáá onnote. Warˈgatééllá hé fargogínt ˈgayye, giri ko ˈdaalím shiiche-, rúbách ˈdaa iiy yeen kuuní Yiesu Kirísto iiy ki chieká ki argiyyeká.

¹⁶ He lullé Warˈgat Waaˈgiet gaa ijoká Waago yé gáá ˈdie. Hééllá lulle he onisiny, ubaa il gíl gaa helíti, tá atími, héétí gálaat iđiny Waag hí ki feˈdoká yé ˈdú ˈdeenyo ki midhab,

¹⁷ giri ameeny gál Waaˈgiet tagano ˈgie-, hé midhab he ekemeyoká lúl uroká.